Nagh ku Ipaan Kende a Perapera u Aôndo Sha

ADAM man Ifa yange mba eren isholibo yô, Yehova pase awashima na ér una ver Vor u á cagh u ikishinguhar yô. (Genese 3:15) Awashima ne kure sha mi shighe u mbaihyomov mba Aôndo wua Yesu Kristu sha u manden un sha kon u mtsaha la. (Mbagalatia 3:13, 16) Yesu lu a isholibo iyol ga, i jile un ken iyav mbu iniunkwase igen sha tahav mbu icighan jijingi. Nahan awambe na a yange haa inya la hingir u paan uumace mba ve ye dyako u isholibo man ku i̱ Adam la.—Mbaromanu 5:12, 19.

Kwagh môm tsô ngu u una yange Yehova, Aôndo uhembanagee u kuren mbaawashima nav ga. Nahan, hii shighe u orumace gba ken isholibo la je, sha mnenge u Yehova yô i na nagh ku ipaan la kera, nahan una fatyô u eren kwagh a mba ve ne uityendezwa nav jighjigh la cii. Kwagh ne wase ônov mba Adam er Enoki man Noa man Aberaham nahan u zenden vea Aôndo shin er ve lu a isholibo iyol kpaa, shi Aôndo lu huror ve, kpa mayange je kwagh ne vihi icighanmlu na la ga.—Genese 5:24; 6:9; Yakobu 2:23.

Mbagenev mba yange ve na Yehova jighjigh yô er asorabo a vesen. Môm ken ve yô lu Tor Davidi. Alaghga ú pine wer, ‘Er nan ve Tor Davidi yange er idya a Batesheba shi wua nom na Uria, kpa Yehova lu veren un doo doo her tsô?’ Ityôkyaa i vesen yô Davidi yange gema ishima sha mimi shi lu a jighjigh u mimi kpaa. (2 Samuel 11:1–17; 12:1–14) Er lu u Yesu Kristu una na nagh ken hemen yô, Aôndo fatyô u den Davidi asorabo a na, gadia Davidi gema ishima. Nahan Aôndo nzughul a ijirôron na i sha mimi kua perapera na ga. (Pasalmi 32:1, 2) Bibilo ta iwanger sha kwagh ne, gadia i̱ pase se kwagh u vesen u nagh ku Yesu kura ku er yô, inja na yô i na nagh kura “sha u Aôndo Una tese perapera Na gadia asorabo a i vande eren tsuaa . . . la yô, A kera wa a iko ga,” kua aa i eren “hen shighe u ainge ne” kpaa.—Mbaromanu 3:25, 26.

Sha kpôô yô, awambe a Yesu a a lu a inja tsung la wase uumace u zuan a mbamtsera mba vesen. Mbaasorabo mba ve gem asema vea fatyô u lun ikyua ikyua a Aôndo sha ci u nagh ku ipaan la. Heela  tseegh ga, nagh ku Kristu la bugh gbenda u a va nder mbakpenev vea nyôr ken tar u he u Aôndo la yô. A nder mbajighjigh mba yange ve kpe cii man Yesu va na nagh ku shon la kua mbagenev kpishi mba yange ve kpe ken mlan, nahan ve civir Aôndo ga la kpaa. Bibilo ôr kwagh u “mnder u mbaperapera kua mba ve lu perapera ga vea nder shin ku la.” (Aerenakaa 24:15) Sha shighe la, Yehova una na uumace mba ungwan imo na cii uma u tsôron sha ci u nagh ku ipaan la. (Yohane 3:36) Yesu iyol na pase wener: ‘Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.’ (Yohane 3:16) Uumace vea zua a mbamtsera mban sha ci u nagh ku ipaan ku Aôndo a ne sha wan na la.

Nahan kpa, nagh kun er kwagh u vesen u a hembe mbamtsera mba ku ve se a mi la. Ku er kwagh u hemban lun a inja sha ci u iti i Yehova. Ku tese ér Yehova ka Aôndo u ôron ijir sha mimi, u a eren kwagh a uumace mba asorabo, kpa a lun wang her, a hôngor icighanmlu na ga yô. Luun er Aôndo yange una we ishima u nan nagh kun ga yô, wan u Adam môm tsô ma nan fetyô u zenden vea Yehova shin lun huror na ga, kua Enoki man Noa man Aberaham je kpaa. Orpasalmi yange fa kwagh ne nahan, nahan á nger ér: “TERE, aluer Wea we aferakaa iko yô, ka an ma nan til sha, Tere?” (Pasalmi 130:3) Yô, se sugh nen Yehova sha er yange tindi Wan na u ishima ishima la shin tar ne yô, shi se sugh nen Yesu kpaa sha er yange lumun u va nan uma na sha u paan se yô!—Marku 10:45.