Gbenda u Kwagh U Dedoo Una Hemba Ifer Yô

Tor Davidi yange lu or u dedoo. Aôndo doo un ishima tsung, ijirôron i mimi kpa doo un ishima shi mhôônom kôron un a mbaatsanev kpaa. Kpa tor shon u dedoo ne er idya a kwase u ortom na. Davidi va fe ér Batesheba, kwase u wanakiriki na la wa iyav sha idya la yô, a wua nom na. Maa a vôso Batesheba sha er una cir afer a a er la yô.—2 Samuel 11:1–27.

 IKYAV tese wang ér uumace mba a tahav mbu eren akaa a dedoo. Tsô er nan ve ve er aferakaa kpishi yum nahana? Bibilo ôr akaa kpishi a a ne ve kwagh a lu nahan yô. Shi i̱ pase er Aôndo una va bee a ifer vindi vindi sha ikyev i Yesu Kristu yô.

Mhen u Or Ka u Bo

Tor Davidi iyol na yange ôr ityôkyaa igen i i ne ve uumace ve eren afer yô. Yange mba pasen un aferakaa a a er la yô, a lumun ibo. Nahan a zungwe kpishi, tsô a nger ér: “Shi nenge, i marem ken ifer, ka ken isholibo je, ngôm wa iyav av ye.” (Pasalmi 51:5) Mayange Aôndo wa ishima ér ungô ve maren ônov mba lun a isholibo iyol ga. Kpa er yange Ifa hemba Aôndo ato, shi Adam kpa ta ikyaa a na yô, ve hingir u maren ônov mba lun a isholibo iyol. (Mbaromanu 5:12) Nahan er uumace mba lun vough ga mban lu ngeen seer a seer yô, aeren a ve tese wang ér, “mhen u ishima i or ka u bo, hii sha iyev mbu nan je.”—Genese 8:21.

Aluer se kôr iyol yase tsaha ga yô, mhen u eren kwaghbo ne una tuur se se nyôr ken “ijimba i eren, . . . man ihom i kôron man iyongo i keren man iwuhe man ishima i nyoon man u wan iyol you iko tseegh, man u hendan  akaa, man mbampav, man mtôm” man aeren a vihin agen a Bibilo i yer ér “aeren a iyolough” la. (Mbagalatia 5:19–21) Tor Davidi yange de iyol i inyam man awambe i i yen ne ya tor sha a na, nahan a hingir u eren idya, kwagh ne va un a mbamzeyol mba vihin tsung. (2 Samuel 12:1–12) Davidi yange ma fatyô u hendan a mhen u ijimbagh la. Kpa er nahala ga, er a za hemen u henen kwagh u Batesheba ken ishima zan zan yô, a er kwagh u orhenen Yakobu a pase ne, ér: “Hanma or ka i mee nan zum u asaren a nan iyol i nan ka a urugh nan a hôn nan la. Zum u isharen ka i jile iyol kera yô, i gema i mar isholibo. Isholibo di ia va vese yô i gema i dugh ku.”—Yakobu 1:14, 15.

Iwoo-or man myav u yaven a kasev sha igyosough kua ishar i yan i i ter ken ngeren u ken ijime la tese kwagh u ior ka vea de ér mhen u bo a kôôm ve ve a er yô.

Ashighe Agen Ior Ka Ve Er Afer sha Lan

Uma u apostoli Paulu wase se u fan ityôkyaa igen i ior ve eren afer yô. Cii ve Paulu kpe yô, i fa un ér lu ishima legh legh shi mhôônom kôron un a ior. Yange na iyol na u wasen anmgbianev nav mba nomso man mbakasev mba ken Kristu. (1 Mbatesalonika 2:7–9) Kpa sha shighe u i yilan un ér Saulu la, ‘suwen u tan kume shi wuan’ nongo shon môm môm u va na iyol na sha ci u u la. (Aerenakaa 9:1, 2) Hii nan ve Paulu lumun a afer a i eren Mbakristu la shi un kpa eren ve aferakaa kpishi? A kaa wener, “m lu eren sha lan.” (1 Timoteu 1:13) Sha hiihii la Paulu lu a ‘ishima i tseen sha kwagh u Aôndo kpa lu sha gbenda u kwaghfan ga.’—Mbaromanu 10:2.

Kape ior mba asema a mimi ve er aferakaa kpishi sha lan sha ci u ve ban a mfe u vough u Aôndo er Paulu nahan je la. U tesen ikyav yô, Yesu kaa a mbadondon nav ér: “Shighe ngu van je u hanma or u nana wua ne yô, nana hen er nan ngu eren tom u civir Aôndo.” (Yohane 16:2) Mbashiada mba Yehova mba nengen er mkaanem ma Yesu man ma lu kuren sha ve nyian yô. Ken ityar kpishi ior mba ve sengen ér mba civir Aôndo ka ve shi tôvon ve a ican shi wuan ve je kpaa. Sha mimi yô, imba ishima i tseen ngila nahan i doo Aôndo ishima ga.—1 Mbatesalonika 1:6.

Or u Nan Hii Ifer La

Yesu pase ityôkyaa i vesen i i ne ve ifer i lu yô. A kaa a mbahemenev mba kwaghaôndo mba ve wa ishima u wuan un la ér: “Ka ken ter wen diabolo je ne dugh ye, man ka ne ka eren asaren a ter wen; un yô lu orwuanor sha hiihii je.” (Yohane 8:44) Ka Satan yange lu keren mtsera na ve mee Adam man Ifa ve hemba Aôndo ato ye. Ihyembeato ve la i va a isholibo sha uumace, isholibo di gema va a ku.

Kwagh u Satan er a Yobu la kpa seer tesen er ishima na i lu i wuan or tseegh yô. Yehova yange na Satan ian ér a kar mtil sha mimi u Yobu, nahan Satan vihi akaa a Yobu lu a mi cica cii. Kpa kuma un ga, shi a wua ônov mba Yobu pue. (Yobu 1:9–19) Ken upuembaanyomov mba ve kar ne, ifer i eren seer  ngeen a ngee, sha ci u uumace yina shi mba eren akaa kpishi sha lan, man sha ci u Satan kpa a lu seer wan ave sha akaa a uumace yô. Bibilo kaa ér ‘i gbihi Diabolo shin tar shi i gbihi mbatyomov nav a na imôngo kpaa.’ Kwaghôron u profeti shon môm môm shi kaa ér, ‘kwagh a tser tar’ sha gbenda u i gbe je a lu a tser u ga yô. Satan una fatyô u kighir ior ér ve er afer ga, kpa ka un a lu ityough sha u “tsughun tar cii” ye.—Mpase 12:9, 12.

Mhen u Bo Una Kera Lu Ga

Cii man i dugh ifer ken uumace kera yô, saa a vande been a mhen u i ifer u i mar orumace a mi la, shi ior vea kera ban a mfe u vough ga, shi a kar a Satan kpa kera. Kpa hiihii yô, a er nan ve a dugh mhen u eren ifer ken ishima i orumace kera?

Ma ortwer u paven ior shin ma icigh ki orumace nan er i môm tsô kpa kia fatyô u been a mhen u bo ken ishima i orumace ga. Kpa Yehova yô gema bugh gbenda u been a isholibo man myen sha ci u hanma or u nan lumun u cii. Apostoli Yohane nger ér: “Awambe a Yesu . . . wanger se sha asorabo cii.” (1 Yohane 1:7) Yesu, or u vough yange kar a ishima na nagh a uma na, nahan “a tôô asorabo ase ken iyol Na je sha [kon] sha er ma se kpe kera sha kwagh u isholibo, kpa se̱ gema se̱ lu uma sha ci u perapera” yô. (1 Peteru 2:24) Ku u Yesu kpe sha u nan nagh la bee a akaa a vihin a ifer i Adam i ve a mi sha a vese la. Paulu kaa ér Yesu Kristu hingir “ipaa sha ci u ior cii.” (1 Timoteu 2:6) Sha mimi yô, ku u Kristu la bugh gbenda sha er uumace vea hide sha mlu u vough u Adam ta kera la yô.

Kpa alaghga u pine wer, ‘aluer ku u Yesu kpe anyom a kar hegen i kom er 2,000 la lu sha u uumace ve hide sha mlu u vough yô, hii nan ve ifer i lu zan hemen her shi ior ve lu kpenee?’ Mlumun u sha mpin ne una wase u tan iwanger sha ityôkyaa i sha uhar i i ne ve ifer i lu yô—ior fa mbaawashima mba Aôndo ga.

Mfe u Vough Ve a Ieren Dedoo

Aluer or u lun a ishima i mimi nan fa kwagh u Yehova man Yesu ve lu eren hegen sha u been a ifer yô, alaghga kwagh la una yange nan u gban lumun a iferkwagh sha lan tsô la, ga yô, a lu Aôndo jighilii nana lu nôngon num a na ye. (Aerenakaa 5:38, 39) Yehova wa iyol u den ior akaabo a ve er sha lan la. Apostoli Paulu ôr kwagh u ior mba ken Atene ér: “Aôndo wa ayange a mlan ve la iko ga; kpa hegen yô, ngu pasen ior sha hanma ijiir cii er ve̱ gema ishima, gadia A ver iyange i Una ôr tar cii ijir sha mimi, sha Or u A ver nan yô; sha kwagh ne yô, A na ior cii ikav i mimi sha mnder u A nder Un shin mbakpenev la.”—Aerenakaa 17:30, 31.

Paulu yange fa ér i nder Yesu shin ku, gadia Yesu u i nder un la iyol na lam a Paulu kaa a na ér a de u tôvon Mbakristu mba tsuaa mbara a ican. (Aerenakaa 9:3–7) Paulu yange zough a mfe u vough u mbaawashima mba Aôndo yô, maa a gema a hingir or u dedoo er Kristu nahan. (1 Mbakorinte 11:1; Mbakolose 3:9, 10) Shi Paulu pase “Loho u Dedoo u tartor ne” sha gbashima. (Mateu 24:14) Hii shighe u Yesu kpe i nder un shin ku, anyom a kar hegen i war kuman 2,000 la je, a tsua ior mba vea za tema tor a na ken Tartor na, er Paulu kpa una tema nahan.—Mpase 5:9, 10.

Hii ken derianyom u a kar la zan zan nyian, Mbashiada mba Yehova mba kuran tindi u Yesu a we ér: “Za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii” la. (Mateu 28:19, 20) Mba ve ngohol loho ne yô, mba a ishimaveren i va lun uma gbem sha won shin tar sha ikyev i gomoti u Kristu u sha la. Yesu kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Kwagh u hemban doon u se er a or yô, ka u wasen nan nana zua a mfe u una za a nan ken uma u tsôron la.

Mba ve ngohol loho u dedoo u Tartor ne  yô, mba a aeren a dedoo er “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha” shin er aferakaa kposo kposo a kase ve nahan kpaa. (Mbagalatia 5:22, 23) Ve dondo ikyav i Yesu la nahan mba “oron iyev i ifer sha ifer ga.” (Mbaromanu 12:17) Ve asange asange mba zan hemen u ‘hemban kwaghbo sha kwagh u dedoo.’—Mbaromanu 12:21; Mateu 5:44.

A Mase Hemban Ifer Vindi Vindi

Uumace vea nôngo nan nan kpa vea fatyô u hemba Satan Diabolo u a lu suen iferkwagh ken ijime la ga. Kpa ica a gba ga tsô Yehova una na Yesu zwa ér a cagh Satan ityough. (Genese 3:15; Mbaromanu 16:20) Shi Yehova una na Yesu zwa ér a “hembe” shi a “tim” iniongo i patii, iniongo ne kpishi er aferakaa a vihin tsung. (Daniel 2:44; Orpasenkwagh 8:9) Sha iyange i ijirigh i i lu van la, mba ‘ve we Loho u Dedoo u Ter wase Yesu iko ga la cii vea ya mtsaha u mtim u tsôron.’ (2 Mbatesalonika 1:8, 9; Sefania 1:14–18)

A karen a Satan man mba ve te ikyaa a na la cii kera yô Yesu una tema tor sha, nahan una wase mba vea war la cii vea sôr tar ua hide a lu er yange i gba u sha hiihii ve u lu la. Shi Kristu una nder mba ve kom u a na ve ian i lun uma sha tar u a hide a sôr la cii. (Luka 23:32, 39–43; Yohane 5:26–29) Sha nahan yô, una kar a akaa agen a ifer i ve uumace a mi la cii kera.

Yehova una kighir or ér nana wa loho u dedoo u sha kwagh u Yesu la ikyo ga. Nahan kpa, ngu nan ior ian i zuan a mfe u una va ve a uma la. Doo u ú yar tom a shighe u a ne la hegen! (Sefania 2:2, 3) Aluer u er nahan yô, u fatyô u wan ishima a nyityô kwaghbo u a tser ú cii. Shi u nenge er Kristu una va hemba ifer vindi vindi yô.—Mpase 19:11–16; 20:1–3, 10; 21:3, 4.

[Picture on page 5]

Saulu yange er aferakaa kpishi sha ci u lu a mfe u vough ga

[Picture on page 7]

Kwagh u hemban doon u se er a or yô, ka u wasen nan nana zua a mfe u Aôndo