Mba Kohol Akaa A Sha Man A Shin Tar cii
Mba Kohol Akaa A Sha Man A Shin Tar cii
“A pase se kwaghmyer u awashima Na . . . , Una kohol akaa a a lu Sha man a a lu shin tar kpaa ci ca cii sha ikev i Kristu.”—MBAEFESE 1:9, 10.
1. Yehova “wa ishima” ér una er nyi a akaa a sha man a shin tara?
AWASHIMA u vesen u Yehova, “Aôndo u bem” yô, ka u bem a lu sha tar cii. (Mbaheberu 13:20) Jijingi u Aôndo yange mgbegha apostoli Paulu nger ér Aôndo “wa ishima . . . u sôron akaa cii sha ci u shighe una va kuma vough la yô, Una kohol akaa a a lu Sha man a a lu shin tar kpaa ci ca cii.” (Mbaefese 1:9, 10) Inja i ishemberkwaghôron i “Una kohol akaa” ne ér nyi? Orgen u timen ken Bibilo u i yer un ér J. B. Lightfoot la kaa ér: “Ishemberkwaghôron ne tese ér sha won jimin cii una lu vough a kwagh u nzughul shio, una kera lu a akaa a vihin ga, kpa a magh akaa cii imôngo ken Kristu. Isholibo man ku man ijungwen kua akaa a van or ahenge man ican cii ia kera lu ga.”
“Akaa A A lu Sha” La
2. Ka unô ve lu “akaa a a lu Sha,” a i gbe u a kohol a laa?
2 Apostoli Peteru nger kwagh u ishimaverenkeghen i vesen i Mbakristu mba mimi la ér: “Se mba keghen Usha mba hev je man tar u he u perapera una tema ker yô, sha ityendezwa Na la.” (2 Peteru 3:13) “Usha mba hev” mba i tende zwa heen ne ka gomoti shin Tartor u Mesiya u u lu hemen ne. A kohol “akaa a a lu Sha” á Paulu a er ken washika u nger Mbaefese la cii “sha ikyev i Kristu.” Akaa shon yô ka iorov kpuaa mba i tsough ve ér ve za hemen sha vea Kristu la. (1 Peteru 1:3, 4) “I paa” Mbakristu mba i shigh ve mkurem, ve lu iyenge 144,000 mban “shin tar” ér ve za tema tor vea Kristu sha Tartor u sha.—Mpase 5:9, 10; 14:3, 4; 2 Mbakorinte 1:21; Mbaefese 1:11; 3:6.
3. Shighe u mba i shigh ve mkurem mbara ve lu shin tar her la je kpa, a fatyô u kaan ér ve ‘tema sha ajiir a Sha’ nena?
3 I tsua Mbakristu mba i shigh ve mkurem la, shin i mar ve sha icighan jijingi, ve hingir ônov mba Yehova mba ken jijingi. (Yohane 1:12, 13; 3:5-7) Yehova tsua Mbakristu mban ér ve lu “ônov” nav, nahan ve hingir anmgbianev mba Yesu. (Mbaromanu 8:15; Mbaefese 1:5) Nahan yô, shighe u ve lu shin tar her la je kpa a fatyô u kaan ér i ‘nder ve a Na imôngo, ve tema a Na imôngo sha ajiir a Sha ken Kristu Yesu.’ (Mbaefese 1:3; 2:6) Ve kuma sha iaven i vesen i ken jijingi ne sha ci u ‘i ver ve ikyav sha Icighan Jijingi u ityendezwa, u a lu ibumun u dyako’ u i ver sha ci ve sha la. (Mbaefese 1:13, 14; Mbakolose 1:5) Ka Mbakristu mban ve lu “akaa a a lu Sha” la ye. Gba u a kohol ve vea ar sha iyenge i Yehova a soo la.
Í Hii u Kohol Akaa a Sha La
4. Lu hanma shighe i hii u kohol “akaa a a lu Sha” laa, man i hii u kohol a nena?
4 Yehova eren kwagh ér a zua sha awashima na u “sôron akaa” shin nengen sha akaa la, ka nahan ve yange wa ishima ér ‘shighe una va kuman vough yô,’ a hii u “kohol akaa a a lu Sha” la ye. (Mbaefese 1:10) Shighe shon hii sha iyange i Pentekosti u inyom i 33 la. Sha iyange la, icighan jijingi gba sha mbaapostoli man nongo u mbahenen, nomso man kasev cii. (Aerenakaa 1:13-15; 2:1-4) Kwagh u er ne tese ér ikyuryan i he hii, shi tese kpaa ér i ver tiônnongo u Kristu shi i mar ikyurior i Iserael u ken jijingi la, ka “Iserael u Aôndo” je la.—Mbagalatia 6:16; Mbaheberu 9:15; 12:23, 24.
5. Er nan ve Yehova hide tsua “ikurior” i he sha ityough ki Iserael u sha iyol laa?
5 Ikyuryan i Tindi i̱ í ya a Iserael u sha marami la fatyô u veren “tartor u upristi kua icighanikurior” i̱ ia za lu sha gbem sha won la ga. (Ekesodu 19:5, 6) Yesu kaa a mbahemenev mba kwaghaôndo u Mbayuda mbara ér: “Á ngohol tartor u Aôndo hen a ven kera á na ikyurior i ia ume atam yô.” (Mateu 21:43) Ka Mbakristu mba i shigh ve mkurem, mba i ye ikyur i he a ve la ve lu ikyurior i Iserael u ken jijingi la ye. Apostoli Paulu ôr kwagh ve ér: “Ne mba icuwannongo, nongo u upristi mba sha inja i tor, icighanikyurior, nongoior u Aôndo jim, ka sha u né yôô aeren a Na a ageegh, Un u A yila ne ken ime, A va a ven ken iwanger Na i kpiligh iyol la. Ngise ne lu nongoior ga, kpa hegen ne gema ne hingir nongoior u Aôndo.” (1 Peteru 2:9, 10) Yehova venda Mbaiserael mba sha marami mba ya ikyur a ve la. (Mbaheberu 8:7–13) Yesu tsengaôron ér i ngohol ian ve i lun ken Tartor u Mesiya la hen a ve kera, i na Iserael u ken jijingi, mba ve lu iyenge 144,000 la.—Mpase 7:4–8.
I Ya Ikyur i Tartor a Ve
6, 7. Ka ikyuryan i vesen i nyi Yesu a ye a anmgbianev nav mba i shigh ve mkurem laa, man ikyuryan la na ve ishimaveren i nyi?
6 Hen tugh mbu Yesu er mkombo u ku na a mbaapostoli nav mba jighjigh la, á kaa a ve ér: “Ka ne je ne taver ishima ne lu a Mo ken ameen a i lu meen Mo la cii ye. Nahan M ver ne tartor er Terem kpaa A verem nahan, sha u né ya kwagh, né ma kwagh sha tebur Wam man né tema sha mkônom ma torom, né ôr ijir sha ikwe i Mbaiserael i pue kar ihiar la ye.” (Luka 22:28–30) Ikyuryan i Yesu á er kwagh u i̱ heen ne ka i̱ vesen i̱ a ye a anmgbianev nav mba i shigh ve mkurem ve lu iyenge 144,000, mba vea ‘lu jighjigh zan zan a ar ken ku,’ shi vea ‘hemba’ kpaa la.—Mpase 20:4, 6.
7 Nongo u u vese iyenge ga ne kera ngu a ishimaveren ér vea lu shin tar ne ken iyol i inyam man awambe ga. Mba za teman tor a Yesu imôngo sha, vea ôr uumace ijir. (Mpase 20:4, 6) Hegen se time sha avur agen a a er kwagh u mba i shigh ve mkurem la tseegh, shi a pase er i hii ve “iyôngo igen” la i ye bredi shi i me wain u a lu ikyav la ga yô.—Yohane 10:16.
8. Mbakristu mba i shigh ve mkurem mbara ka vea ya bredi la nahan ve tese ér nyi? (Nenge akwati u a lu sha peeji 11)
8 Mba i shigh ve mkurem mbara lumun u yan ican shi kpen er Kristu nahan. Paulu u a lu môm ken ve la kaa ér un wa iyol u den akaa cii ér a saa sha er ‘Kristu Una lu mtsera na, sha u una fa Un man agee a mnder Na u shin ku, man mzough u zuan a Na sha atsan a Na’ la yô. Sha mimi yô, Paulu yange lumun ‘u hingir kwagh môm a Kristu ken ku.’ (Mbafilipi 3:8, 10) Mbakristu mba i shigh ve mkurem kpishi taver ishima ‘tôô ku u kpen a Yesu ken iyol’ ve i inyam man awambe la.—2 Mbakorinte 4:10.
9. Ka iyol i an bredi u i umbur ku u Yesu a mi la a til sha mini?
9 Zum u Yesu lu eren mkombo u Kwaghyan u Ter u Aikighe la, á kaa ér: “Ngun ka iyol Yam je ne.” (Marku 14:22) Iyol i Yesu lu ôron kwagh u i ne lu iyol na kpôô kpôô, i kera shi ca ga tsô a er i ican shi a haa awambe a i inya la. Bredi u a lu a kwa ga la lu ikyav i kuman vough i iyol na. Inja nena? Ka nahan sha ci u ken Bibilo yô, kwa tile sha ityough ki isholibo man ifer. (Mateu 16:4, 11, 12; 1 Mbakorinte 5:6–8) Yesu lu or u vough, shi iyol na i inyam man awambe la lu a isholibo ga. Nahan, lu u una na iwom a iyol na i vough la. (Mbaheberu 7:26; 1 Yohane 2:2) Kwagh u gba u una er ne lu kwagh u wasen hanma Orkristu u nan lu jighjigh cii, aluer nana lu a ishimaveren i yemen sha shin lun ken paradiso shin tar ne kpaa.—Yohane 6:51.
10. Mba ve me wain u umbur ku u Yesu la mba ken ‘mzough a awambe a Kristu’ nena?
10 Paulu nger kwagh u wain u Mbakristu mba i shigh ve mkurem ve me sha iyange i umbur ku u Yesu la ér: “Iyongo i ishughun i se nan ishughun sha ci u i la yô, kera ka mzough wase a awambe a Kristu gaa?” (1 Mbakorinte 10:16) Ka sha nyi gbenda nahan mba ve me wain la ve lu ken ‘mzough a awambe a Kristu?’ U ngu wer ka sha ci u ve na nagh ku ipaa kura ga, gadia ve kpaa i yima ve a yima. Kpa ve na awambe a Kristu a a lu a tahav mbu yiman ve la jighjigh, nahan i de ve asorabo shi i na ve ishô ér ve kuma u zuan a uma u tsôron sha. (Mbaromanu 5:8, 9; Titu 3:4–7) Ka sha awambe a Kristu a hee inya la i “tsegh” mba 144,000, mba vea za tema tor a Kristu la, i ver ve kposo shi i wanger ve sha asorabo a ve, ve hingir “uicighanmbaiorov” ye. (Mbaheberu 10:29; Daniel 7:18, 27; Mbaefese 2:19) Sha mimi yô, ka sha awambe a Kristu a hee inya la a ‘yam Aôndo ior ken hanma nongo man hanma zwa man hanma nongoior man hanma ikyurior, a er ve, ve hingir tartor man upristi sha ci u Aôndo wase, sha er vea tema tor sha tar’ ye.—Mpase 5:9, 10.
11. Mme u mba i shigh ve mkurem ve me wain la tese nyi?
11 Zum u Yesu lu veren mkombo u ku na la, á na mbaapostoli nav mbajighjigh iyongo i wain, nahan a kaa a ve ér: “Ne cii ma nen shimi; gadia ka awambe Am a ikyuryan je ne, a i hee a sha ci u ior kpishi sha u den asorabo” yô. (Mateu 26:27, 28) Er awambe a anomabua man ivo yange nyôôso ikyuryan i Tindi, i Aôndo ya a ikyurior i Iserael la nahan, awambe a Yesu la kpaa kape a nyôôso ikyuryan i he i Yehova ya a Iserael u ken jijingi, hii sha iyange i Pentekosti u inyom i 33 je la. (Ekesodu 24:5–8; Luka 22:20; Mbaheberu 9:14, 15) Mme u mba i shigh ve mkurem ve me wain u a lu ikyav i “awambe a ikyuryan” la tese ér i ya ikyur i he a ve, shi mba zuan a mtsera sha i̱ kpaa.
12. I er mba i shigh ve mkurem la batisema ken ku u Kristu nena?
12 I umbur mba i shigh ve mkurem mbara kwagh ugen kpaa. Yesu kaa a mbahenen nav mbajighjigh mbara ér: “Iyongo i M me ne, né ma, batisema u i eren Mo ne, ne kpaa á er ne un.” (Marku 10:38, 39) Apostoli Paulu shi va ôr kwagh u ‘mba i er ve batisema ken ku u Kristu’ la. (Mbaromanu 6:3) Mba i shigh ve mkurem la na nagh a uma ve. A fatyô u kaan ér ku u ve kpe la ka nagh je ve ne a uma ve ye sha ci u kera mba a ishimaverenkeghen i zuan a uma u tsôron shin tar ne ga. Batisema u Mbakristu mban ve er ken ku u Kristu la ka a kure zum u ve kpe la, nahan í gema í nder ve ve hingir ior mba ken jijingi sha u vea “ya tor” a Kristu “imôngo” sha yô.—2 Timoteu 2:10–12; Mbaromanu 6:5; 1 Mbakorinte 15:42–44, 50.
Mba Ve Ye Bredi shi Ve Me Wain La
13. Er nan ve mba ve lu a ishimaverenkeghen i lun shin tar ne ve ye bredi shi ve me wain la ga, kpa mba ze mkombo u umbur ku la sha ci u nyi?
13 Ka mba ve ye bredi shi ve me wain la tseegh akaa a i ter sha heen ne a lu sha ci ve ye, nahan aluer mba ve lu a ishimaverenkeghen i lun shin tar ne kar a ishima ya bredi shi ma wain la yô, a lu sha mi ga cii. Mba ve lu a ishimaverenkeghen i lun shin tar ne fa dedoo ér í shighe ve mkurem ér ve lu ken iyol i Kristu ga, shi ve fa ér mba ken ikyuryan i he i Yehova a ye a mba vea za hemen sha a Yesu Kristu la ga. Er “iyongo” la i til sha ityough ki ikyuryan i he yô, ka mba ve lu ken ikyuryan i he la tseegh vea ya bredi shi vea ma wain la ye. Í er mba ve lu a ishimaverenkeghen i zuan a uma u tsôron shin tar, hingir uumace mba vough sha ikyev i Tartor la batisema ken ku u Yesu ga, shi vea ya tor a na sha kpaa ga. Nahan aluer mba yan bredi shi man wain la yô, vea tese ér mba kwagh môm a mba ve lu yemen sha la kpa a lu mimi ga. Sha ityôkyaa ne yô, mba ye bredi shi mba me wain la ga, kpa ka ve za mkombo u umbur ku la ve za tema ving ve nenge er ka i er mkombo shon yô. Ve wuese Yehova kpishi sha hanma kwagh u a er a ve sha ikyev i Wan na, kua asorabo a a de ve sha awambe a Kristu la kpaa.
14. Mba i shigh ve mkurem la ka vea ya bredi shi vea ma wain nahan ve taver ken jijingi nena?
14 Shighe zulum u a mase veren Mbakristu mba i tsough ve u za yan tor a Kristu sha la ikyav sha atsul. Shighe u Mbakristu mba i shigh ve mkurem la ve lu uma ve lu a na nagh a uma ve ga yô, vea za hemen u yan bredi shi man wain u a lu ikyav la, gadia ne ve agee a ken jijingi. Nahan kwagh ne ka a taver mzough u nomso man kasev mba i shigh ve mkurem mban cii, gadia mba iyol i môm a Kristu. Bredi man wain u a lu ikyav, u ve ye la umbur ve ér gba u vea lu jighjigh zan zan ku ve.—2 Peteru 1:10, 11.
Mba ‘Kohol Akaa A A lu Shin Tar’ La
15. Ka unô i kohol ve imôngo a Mbakristu mba i shigh ve mkurem laa?
15 Hii ken atô u kwavanyom u 1930 la je, “iyôngo igen” i i lu seer ngeen a ngee, i i lu a ishimaverenkeghen i yan dyako u tar la ngi suen “anikyumuile u kpeghee” ne. (Yohane 10:16; Luka 12:32; Sekaria 8:23) Ve hingir akar a mimi a anmgbianev mba Kristu, mba wasen ve u eren tom u pasen “Loho u Dedoo u tartor ne” sha er u lu mpase hen akuraior cii yô. (Mateu 24:14; 25:40) Er ve lu eren tom ne a ve imôngo yô, zum u Kristu una va u va ôron akuraior ijir la, una ôr ve ijir sha mimi, una ver ve ken “uwegh Nagh ku yanegh” sha ci u mba “iyôngo” na. (Mateu 25:33–36, 46) Er ve ne awambe a Kristu jighjigh yô, vea lu ken “zegeikpelaior” i̱ ia war “zegecan” u a lu van la.—Mpase 7:9–14.
16. Ka unô vea lu akaa ‘a a lu shin tar’ laa, man vea hingir “ônov mba Aôndo” nena?
16 Zum u a ver mba 144,000 mbara ikyav sha atsul a bee yô, a pase “ahumbe” a mtim aa va ta sha tar u bo u Satan ne. (Mpase 7:1–4) Shighe u Kristu una tema tor Anyom Dubu a mba vea ya tor a na shi vea lu upristi la, a nder zegeikpelaior igen shin ku vea kohol mba vea war mtim u tar u Satan la. (Mpase 20:12, 13) Zegeikpelaior ne ia lu sha ikyev i Tartor u Mesiya u Kristu Yesu una hemen la gbem sha won. Mtemtor u Anyom Dubu una bee yô, a mase tan akaa ‘a a lu shin tar’ la ikyaren. Mba vea lu jighjigh la vea hingir “ônov mba Aôndo.”—Mbaefese 1:10; Mbaromanu 8:21; Mpase 20:7, 8.
17. Yehova una kure awashima na nena?
17 Nahan, Yehova una kure awashima na u “sôron akaa” la sha gbenda u vesen, una “kohol akaa a a lu Sha man a a lu shin tar kpaa ci ca cii sha ikyev i Kristu.” Hen shighe la, akaa a a lu sha man a a lu shin tar cii aa lu ken bem, a doo hanma or u wan iyol i nan sha ikyev i hemen u perapera u Yehova, un u a lu a awashima u vesen la.
18. Mba i shigh ve mkurem man akar a ve cii vea zua a iwasen sha u zan mkombo u umbur ku u Yesu la nena?
18 Asande a mba i shigh ve mkurem man iyôngo igen umiliôn imôngo mba ve lu akar a ve la vea kohol imôngo sha iyange i Aipor 12, 2006 la, nahan kwagh la una taver jighjigh ve kpen kpen! Vea kumba vea umbur ku u Kristu vough er Yesu kaa a ve ér: “Eren nen kwagh ne sha u umbur Mo” nahan. (Luka 22:19) Hanma or u nana za mkombo la cii nana umbur kwagh u Yehova a er a nan sha ikyev i Wan na u ishima ishima, Yesu Kristu la.
U Hiden Saven a Sav
• Yehova wa shima u eren nyi a akaa a a lu sha man a a lu shin tar laa?
• Ka unô ve lu “akaa a a lu Sha” laa, man mba kohol a nena?
• Ka unô ve lu ‘akaa a a lu shin tar’ laa, man ka ishimaveren i nyi ve lu a mini?
[Study Questions]
[Box on page 11]
“Iyol i Kristu”
Er Paulu lu ôron kwagh u mluainja u bredi u a lu sha ci u anmgbianev mba Kristu mba i shigh ve mkurem la ken 1 Mbakorinte 10:16, 17 yô, a ôr kwagh u “iyol” kpaa sha gbenda u vesen. Á kaa ér: “Bredi u se coon la, kera ka mzough a iyol i Kristu gaa? Er bredi la a lu môm yô, nahan se mba se lu kpishi kpaa, se mba iyol i môm je, gadia se cii se ya bredi môm la.” Mbakristu mba i shigh ve mkurem mbara ka vea yaan bredi u a lu ikyav la yô, ve tese ér ve cii mba ken mzough, nahan i lu inja er mzough ve la ka iyol, Kristu gema ka ityough nahan.—Mateu 23:10; 1 Mbakorinte 12:12, 13, 18.
[Pictures on page 11]
Er nan i lu mba i shigh ve mkurem la tseegh ve ye bredi shi ve me wainaa?
[Picture on page 13]
Yehova una sôr akaa, una kohol akaa a sha man a shin tar cii aa lu ken mzough