Mbahemenev Mba Shin Tine Mba Hev

SHA iyange i Tomatar pepe, Agusutu 24, 2005 la, i ôr Mbashiada hen afishi a ken tar u Amerika man Canada loho u doon tsung. Loho shon kaa ér i seer mbahemenev mba Mbashiada mba Yehova uhar, ve yô ka Geoffrey W. Jackson man Anthony Morris III. Vea hii tom ken uwer u Setemba 1, 2005.

Anmgbian Jackson hii tom pania ken uwer u Febewari 1971 ken icile i Tasmania, ken tar u Australia. Mba ker ken uwer u Jun 1974 yô, a vôso Jeanette (Jenny). Shighe karen deghôô yô, i tsua ve ér ve er tom u ikpur pania. Ken inyom i 1979 zan zan 2003 la, ve er tom u mishen ken icile i Tuvalu man Samoa man Fiji, ken ityeku i i yer ér South Pacific la. Shighe u anmgbian Jackson vea kwase na ve lu eren tom ken ucile mban ne ve wase kpishi sha u geman ityakerada i i har sha Bibilo yô. Ken inyom i 1992 yô, i tsua anmgbian Jackson ér a lu môm ken Kômatii u Nengen sha Branci ken icile i Samoa, ken inyom i 1996 di a hingir u eren tom vea Kômatii u Nengen sha Branci ken icile i Fiji. Ken uwer u Aipor 2003 la i lôhô un vea kwase na Jenny ve za kohol tsombor u Betel u ken Amerika, ve hii u eren tom vea ijiirtom i í yer ér Translation Services Department (Gbaatom u Nengen sha Tom u Kwagh Geman) la. Ica i gba ga maa i tsua anmgbian Jackson ér a wasen Kômatii u Tesen u Mbahemenev mba Shin Tine.

Anmgbian Morris hii tom pania ken inyom i 1971 ken tar u Amerika. A vôso kwase na Susan ken uwer u Disemba 1971. Ve er tom pania anyom anyiin maa ve mar wan ve u hiihii, ve ii un iti ér Jesse. Shighe karen yô, shi ve va mar wan ugen, un di mba yer un ér Paul. Mba ker ken inyom i 1979 yô, anmgbian Morris hide shi hii u eren tom pania u keke. Mba we mbayev vev mba uhar mbara ken makeranta yô, kwase na Susan kpa kohol un ken tom u pania u keke la. Ve yem ken zege icile i Rhode i ken Imbusutarimese i Carolina, ken tar u Amerika, ape kwagh hemba gban sha mbapasenkwagh la. Ken Imbusutarimese i Carolina la, anmgbian Morris hingir u wasen ortamen u sôron atôônanongo, ônov vev mba uhar mbara di tôô tom u pania u keke. Jesse nyer anyom 19 yô, i lôhô un ér a za er tom ken Betel u ken tar u Amerika, Paul kpa nyer anyom 19 yô, i yila un. Hen shighe la anmgbian Morris hingir ortamen u zenden sôron atôônanongo. Mba ker ken inyom i 2002, sha uwer u Agusutu 1 yô, i lôhô un vea kwase na ér ve za er tom shin Betel. Anmgbian Morris er tom vea Gbaatom u Nengen sha Tomshiren ken Patterson, shighe karen yô, a hingir u wasen Kômatii u Nengen sha Tomshiren u Mbahemenev mba Shin Tine la.

Anmgbianev mba genev mba ve vande lun Mbahemenev mba Shin Tine yô, ka C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; and D. Sydlik. Mbahemenev mba Shin Tine mban cii ka Mbakristu mba i shigh ve mkurem yô.