Aôndo We Mbabeenyol Ikyo

ICAN i ior ve lu eren mbabeenyol nyian kpishi ne ka kwagh u kpiligh se iyol ga. I tsengaôron ken Bibilo ér ken “ayange a masejime” ne mbagenev vea hingir “mbawan ayol a ve ikyo tseegh . . . man mbalun a dooshima ga.” (2 Timoteu 3:1-3) Ishember i ken zwa Grika i̱ í gem ér “dooshima” ne wa dooshima u hen tsombor kpa ker. Dooshima ne ban nyian vough er kwaghôron u profeti u ken Bibilo la a tsengeôron nahan.

Er mbagenev ve eren mbabeenyol ican nahan kpa Yehova Aôndo yô, mbabeenyol doo un ishima shi we ve ikyo kpaa. Nenge er i er kwagh ne ken Bibilo yô.

“Orjir u Kasev mba Côgholov”

I ôr ken Ruamabera u ken Zwa Heberu la er Yehova Aôndo a we mbabeenyol ikyo yô. U tesen ikyav yô, Davidi ôr ken Pasalmi 68:5 ér Aôndo ka “orjir u kasev mba côgholov” mba beenyol. * Ken avur a Bibilo agen yô, i gema ishember i “orjir” ne ér “orwasen” shin “orkuran” shin “or u nôngon kwagh sha ci u or.” Sha kpôô yô, Yehova we kasev mba chôgholov ikyo. U tesen ikyav yô, Bibilo kaa ér ka a nzughul a ve yô, ishimavihin i Yehova i̱ yegh. (Ekesodu 22:22-24) Kasev mba côgholov man mbabeenyol mba ve lu civir Aôndo sha mimi cii, kwagh ve gba Aôndo man mbatomov nav ishima tsung. Anzaakaa 16:31 pase mnenge u Yehova Aôndo man u mbatomov nav ér: “Ivu ka tsar u sha ityou  u icivirigh, mba zuan a i sha gbenda u perapera.”

Kape i lu ve u nan mbabeenyol icivir la kpa lu kwagh u vesen ken Tindi u Yehova na Mbaiserael je la. Tindi shon kaa ér: “Mough tile sha, sha ishigh ki or u menden ivu, civir ishigh ki tamenor, cian Aôndo wou; ka Mo TER.” (Levitiku 19:32) Nahan, shighe u Mbaiseral la, lu hange hange u hanmaor u nan soo ér Yehova Aôndo a lumun nan cii nana civir mbabeenyol. Nahan lu kwagh u or a civir orbeenyol ga yô, nana fatyô u kaan ér Aôndo doo nan ishima ga.

Mbakristu kera mba sha ikyev i Tindi u Mose la ga. Kpa, mba sha ikyev i “tindi u Kristu.” Tindi ne wasen ve u lun a inja i dedoo shi doon ayol a ve shi ungwan mbamaren vev shi wan mbabeenyol ikyo kpaa. (Mbagalatia 6:2; Mbaefese 6:1-3; 1 Timoteu 5:1-3) Mbakristu mba doon ayol a ve sha ci u i wa ve tindi ér ve doo ayol a ve yum ga, kpa dooshima ve ka u ken ishima. Apostoli Peteru wa Mbakristu kwagh ér: “Doo nen ayol a en ken ishima tsung je.”—1 Peteru 1:22.

Orhenen Yakobu kpa pase ityôkyaa igen i i gbe u se waan mbabeenyol ikyo yô. A kaa ér: “Mcieaôndo u wang u a lu a acôghor iyol sha ishigh ki Aôndo ga yô, ka un ne: ka u za sôron ancôgholov kua kasev mba côgholov ken ican ve, man shi u kuran iyol you wang sha kwagh u taregh.” (Yakobu 1:27) Yakobu ôr kwagh ugen u i doo u se hen sha mi yô. A wase se u fan er kwagh u ancôgholov man kasev mba côgholov a gbe Yehova ishima tsung yô.

Nahan doo u se nzughul a mbabeenyol ga. Kpa se saa heela tseegh ga, se wasen ve shi se eren a ve doo doo kpaa. (Nenge akwati u a lu a itinekwagh ér “Aeren a Dooshima,” u a lu sha peeji 6-7 la.) Yakobu nger ér: ‘Jighjigh u nan u lun a aeren ga, ngu kpenegh.’—Yakobu 2:26.

Surun Ve Asema “ken Ican Ve”

Kwagh ugen kpa ngu u se hen sha mkaanem ma Yakobu la yô. Umbur wer Yakobu kaa a Mbakristu ér ve ver ishima sha kasev mba côgholov ‘ken ican ve.’ Inja i ishember i ken zwa Grika i̱ í gem ér “ican” ne jighilii yô, ka mtaver u or ka nan tagher a mi shighe u mbamzeyol ve te sha nan la. Mbabeenyol kpishi mba ye imba ican ne. Mbagenev mba a or ijime ga. Mbagenev di mba yan ican i mbamzeyol mba iyolbeen i ve a mi la. Mbabeenyol mbagenev mba ve lu civir Aôndo her kpoghuloo kpa ashighe agen ka ve tagher a mbamzeyol mba vea na ve ishimayinan yô. Nenge ase kwagh u orgen, iti na ér John. * A er tom u yôôn angwe u Tartor anyom akunduahar. Ken atô u anyom ne a er tom u ikpur pania anyom atar. John hemba anyom 80 hegen, ashighe agen ka a tagher a mbamzeyol mba nan un ishimayinan. A kaa ér: “Ka mea hide mea hen sha akaa a yange m er la yô, m nenge mer yange m er akaa agen kpishi sha mi ga. Nahan m hen a ishima yam mer yange ma m er kwagh nahan ga.”

Aluer ambaaior ne fa ér Yehova ngu perapera kpa sendegh ér se lu perapera ga yô, kwagh ne una taver ve ishima. Aôndo fa mbamyen asev, nahan kpa, Bibilo kaa ér: “TERE, aluer Wea we aferakaa ikyo yô, ka an ma nan til sha, Tere?” (Pasalmi 130:3) Yehova veren ishima sha mbamyen asev ga, kpa  kwagh hembe gban un sha er ishima yase i lu ker la. Er nan se fe ser kape kwagh a lu nee?

Tor Davidi lu perapera ga, shi er asorabo kpaa. Kpa Aôndo mgbeghan un ér a nger mkaanem ma ma lu ken Pasalmi 139:1-3 ne, ma kaa ér: “TERE, U tôvom, U fam. Mtem wam man mmough wam kpaa We U fa, U fa mhen wam ken ica je. U tôv zende wam man myav wam, U fa igbenda yam cii.” Inja i ishember i “tôv” ne kpôô kpôô yô, ka u “peer kwagh,” er orsule ka nan peer imough nan haa kera nan undu samuyia her nahan. Icighan jijingi u Yehova mgbegha Davidi sha u a pase se se fa ser Yehova ka a hungur aeren a ase a bo la, kpa aeren a ase a dedoo la yô a lu a mi ken ishima her.

Aluer se mba civir Ter wase u sha, u mhôôn la sha mimi yô, mayange je, una hungur aeren ase a dedoo ga. Bibilo kaa ér aluer Yehova hungur aeren ase a dedoo man dooshima u se tese sha ci u iti na la yô, una tôô ér un ban a perapera.—Mbaheberu 6:10.

“Akaa a Tse la Kar Kera”

Bibilo pase se ér Aôndo yange wa ishima ér or nana bee iyol ga. Lu shighe u mbamaren  asev mba hiihii mbara—nomsoor man kwase u hiihii la—ve hemba Orgban ve ato la hingir u uumace vea been iyol ye. (Genese 3:17-19; Mbaromanu 5:12) Kpa iyolbeen ia tsôr ga.

Er se vande henen nahan, mbamzeyol mba se lu zuan a mi nyian, kua u nzughul a mbabeenyol kpaa cii ka akav a tesen ér se mba “ken ayange a masejime” a mkur u tar ne. (2 Timoteu 3:1) Aôndo wa ishima ér una va bee a mbamzeyol mba isholibo man iyolbeen kua ku u ve a mi la. Bibilo kaa ér: “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.

Ken tar u he u Aôndo una va a mi la, mbamzeyol mba iyolbeen i ve a mi la vea kera lu ga. Shi a kera nzughul a mbabeenyol kpaa ga. (Mika 4:4) Mbakpenev mba Aôndo a lu umbur ve her la cii, una va nder ve sha er ve kpa vea ember uma ken Paradiso shin tar yô. (Yohane 5:28, 29) Hen shighe la ior vea seer fan ér Yehova Aôndo we mbabeenyol kua hanmaor u nan ongo un cii ikyo.

[Footnotes]

[Box/Pictures on pages 6, 7]

Aeren a Dooshima

Mbatamen mba ken atôônanongo a Mbashiada mba Yehova mba hemen gbenda sha u wan mbabeenyol ikyo. Ve nenge ér kwaghwan u apostoli Peteru ne ngu a inja. A kaa ér: “Kura nen ikyumuile i Aôndo i i lu hen ven la.” (1 Peteru 5:2) Gbenda ugen u kuran ikyumuile i Aôndo yô ka u nengen sha mbabeenyol doo doo. Se nenge sha ve nena?

Doo u se za teman imôngo a mbabeenyol mban shi se lamen a ve sar sar, aluer se mba eren nahan yô, kwagh ne una wase se u fan mbamgbe vev. Ashighe agen yô, se wase ve u yamen akaa ken kasua shi sôron ve akaa hen ya kpaa. Shi se fatyô u wasen ve a injar mato i zan mbamkombo mba tiônnongo shi ôron ve Bibilo kua ityakerada yase i Mbakristu ve ungwa. Akaa agen kpa nga kpishi a se fatyô u wasen ve yô. Nahan se fatyô u sôron igbenda i injaa veren sha er se nengen sha ve doo doo yô, shi se dondon i kpaa. *

Aluer kwagh tsule ma anmgbian u nomso shin u kwase u nan beeyol, er m-ban u inyar nahan yô, a wase nan nena? Doo u a vande tôvon fan aluer nan ngu a mbayev shin nan ngu a ior hen tsombor mba vea wase nan yô. Ka kwagh u Bibilo kpa i soo vough je la. 1 Timoteu 5:4 kaa ér: “Aluer ma kwasecôghol nana lu a ônov shin ônov mba ônov mba nan yô, ve̱ vande henen u eren a ya ve sha mcivir u i civir Aôndo la, ve̱ gema ve̱ wasen mba ve mar ve la, gadia kwagh ne ka kwagh u doon sha ishigh ki Aôndo je.”

Alaghga ma anmgbian u beenyol nana soo u fan aluer nan kuma u gomoti una wase nan yô. Aluer kwagh ngu nahan yô, doo u anmgbianev mba ken tiônnongo vea pase nan kwagh u i doo u nana er yô. Kpa aluer imba iwasen la ngi ga yô, mbatamen ve nenge aluer nan kuma u tiônnongo una wasen nan yô. Atôônanongo a ken derianyom u hiihii la kpa yange a na imba iwasen ne ashighe agen. Apostoli Paulu nger Timoteu, u eren tom a na imôngo la ér: “I̱ de ngeren ma kwasecôghol u nan yen anyom akunduatar ga; man i̱ lu kwase u nan er nom môm yô, u i er nan shiada sha aeren a dedoo, er nan lu yesen ônov mba nan man nan lu eren a mbavannya dedoo man nan lu ôôn uicighanmbaiorov angahar, man nan lu wasen mbaatsanev man nan lu pendan ishima sha hanma ieren i dedoo cii” yô.—1 Timoteu 5:9, 10.

[Footnote]

[Picture on page 5]

Dorka waan kasev mba côgholov ikyo.—Aerenakaa 9:36-39.