Yange I Mar Ve Ken Ikyurior I Aôndo Tsua yô
Yange I Mar Ve Ken Ikyurior I Aôndo Tsua yô
‘TER, Aôndo wou, tsuwa u er u̱ lu nongo Na jim.’ —DUTERONOMI 7:6.
1, 2. Ka akaa a kpiligyol a nyi Yehova er sha ci u ior nava, man ka ikyuryan i nyi Mbaiserael ya vea Aôndo?
KEN inyom i 1513 C.S.Y. (Cii man Shighe u Yesu) la, Yehova ya ikyar a mbatomov nav mba shin tar. Ken inyom la, a hee tartor u ageegh ugen, a gema a yima Mbaiserael a due a ve ken kpan. Nahan á hingir Oryiman ve shi ve lu sha ikyev na. Kpa, cii man Aôndo a er kwagh ne yô, á kaa a Mose ér: “Kaa Mbaiserael wer: Ka Mo TER, Me due a ven ken tom u ican u Mbaigipiti ne kera, man shi Me yima ne sha ican i ikpan i sha ikyev ve la kpaa ye; Me paa ne sha uwegh ku naregh, man sha ajiraôron a vesen. Me ngohol ne, né hingir Mo ikyurior, Me lu Aôndo wen.”—Ekesodu 6:6, 7.
2 Mbaiserael yange ve due ken Igipiti ica gba ga maa ve ya ikyur a Yehova, Aôndo ve. Hii hen shighe la je, Yehova hingir u lun a ikyurior shin tar i i̱ lu ken mzough yô. Nahan lu kwagh u una kera eren kwagh a asande a ior shin ma tsombor shin ipyaven tseegh ga. (Ekesodu 19:5, 6; 24:7) Yange na ior nav atindi a aa kuran ve hanma iyange yô, man atindi ne hemba wasen ve sha er vea civir Aôndo yô. Nahan Mose kaa ér: “Gadia ka hanma zegeikyurior je, i lu a Aôndo ikyua ikyua a i, er TER, Aôndo wase, zum u ka sea yila Un nahana? Man ka hanma zegeikyurior je i lu a akaawan man atindi a perapera er atindi ne nahan cii, a m lu veren ne sha ishigh nyian nee?”—Duteronomi 4:7, 8.
I Mar Ve ken Ikyurior i Eren Shiada
3, 4. Ka ityôkyaa i vesen i nyi i tsua Iserael hingir ikyurioro?
3 Uderimbaayomov yange mba karen yô, Yehova kaa a profeti Yesaia ér a umbur Mbaiserael ityôkyaa i vesen i i ne ve un tsough ve ér ve lu ikyurior na yô. Yesaia kaa ér: “TER u A gbe u, we Yakob, Un u A maa u, we Iserael, ngu kaan nahan er: De cie ga, gadia M paa u, M yila u sha iti, uwe u ngu u Wam je. Gadia Mo, M ngu TER, Aôndo wou, Icighan u Iserael, Oryiman wou; . . . va a ônov Av mba nomso mba ken ica la kua ônov Av mba kasev mba ken ikighirtar la kpaa; hanmô u i yer nan sha iti Yam, u M gbe nan sha ci u icivir Yam, u M maa nan, u M er nan la. Ka ne ne lu mbashiada Av ye, kape TER A kaa ne, wanakiriki Wam u M tsough . . . Ior mba M maa sha ci Wam iyol Yam je, vea pase iwuese Yam.”—Yesaia 43:1, 3, 6, 7, 10, 21.
4 Mbaiserael lu ior mba i yilan ve sha iti i Yehova yô, nahan gba u vea er shiada sha kwagh u mtemtor u Yehova akuraior aa ungwa. Ve lu ior mba i ‘gba ve sha ci u icivir’ i Yehova yô. Gba u “vea pase iwuese” i Yehova, vea ôr ior gbenda u kpilighyol u i yima ve la, sha nahan yô, vea wuese icighan iti u Yehova. U ngeen kwagh ga yô, ve lu ikyurior i eren shiada sha ci u Yehova.
5. Ka sha nyi gbenda nahan Iserael lu ikyurior i í tsegha ii?
5 Ken derianyom u sha pue kar môm C.S.Y. la, Tor Solomon pase ér Yehova tsua ikyurior i Iserael ver kposo a akuraior agen. A er msen hen Yehova ér: “Ken akuraior a sha won cii ka ve U tsegh ve ye, sha u ve̱ lu dyako Wou.” (1 Utor 8:53) Hanma or Iserael yô yange nan ya ikyar sôngo sôngo a Yehova. Mose vande kaan a ve ér: “Ne mba ônov mba TER, Aôndo wen . . . Gadia u ngu TER, Aôndo Wou, icighanikyurior je.” (Duteronomi 14:1, 2) Nahan ityôkyaa lu i agumaior a Iserael aa tsegha ayol a ve sha ci u Yehova ga. Gadia i mar ve ken ior mba i vande tseghan ve sha ci u Yehova yô. (Pasalmi 79:13; 95:7) Nahan hanma kov u he yô, í tese ú atindi a Yehova shi gba u ua kuran á sha ci u ikyuryan i i̱ zua Iserael a Yehova la.—Duteronomi 11:18, 19.
Hanmaor Iserael lu a Ian i Tsuan kwagh u Nan Soo Yô
6. Kanyi kwagh nahan hanmaor ken Iserael lu a ian i tsuan ér nana eree?
6 Er yange i mar hanma Oriserael ken ikyurior i í tsegha i̱ nahan kpa, hanma ve nan lu a ian i tsuan u civir Aôndo shin vendan un. Cii man ve nyôr ken Tar u Ityendezwa la yô, Mose kaa a ve ér: “M yila Sha man tar, ve̱ lu shiada sha a ven nyian, er m ver uma man ku sha ishigh yough, man shi iveren man ifan; yô, tsuwa uma sha er ú lu uma, we a tsombor wou; er TER, Aôndo wou, A̱ doo u ishima, u̱ ungwan imo Na, u̱ var a Na, gadia ka uma wou man ayange ou a ngeen je la, sha er u̱ tema ken tar u TER bum a uter ou, Aberaham man Isaka man Yakob, er Una na ve u la.” (Duteronomi 30:19, 20) Hanmaor ken Iserael lu a ian i lumun ér Yehova doo nan ishima shi ungwan un shi varen a na kpaa. Er Mbaiserael lu a ian i tsuan kwagh u ve soo yô, nyityôkwagh i i dugh ken kwagh u ve tsough la cii ia lu sha ityough vev.—Duteronomi 30:16–18.
7. Kanyi kov u u lu shighe u Yosua kpe kera la eree?
7 Akaa a yange er sha shighe u Mbaajiriv hemen ken Iserael la tese injar i dedoo i or a lu jighjigh ve nana zua a mi man injar i or nana lu jighjigh ga ve nana zua a mi la kpaa. Cii man shighe la yô, Mbaiserael dondo inja i dedoo i Yosua, nahan kpe ve iyol. “Ior civir TER sha ayange a Yosua lu uma la cii, mba ve nenge aeren a TER a vesen cii, a A er sha ci u Iserael yô.” Kpa er Yosua va kpe shighe kar kpuaa yô, “kov ugen mough ken ijime ve, u u fe TER kua tom u A er sha ci u Iserael ga yô. Mbaiserael er kwaghbo sha ishigh ki TER.” (Mbaajiriv 2:7, 10, 11) A̱ shi nan kpa kov u he ne venda ian ve i civirigh i lun ken ikyurior i í tsegha i̱ sha ci u Yehova la, gadia ve kera umbur er lu sha ci ve Yehova, Aôndo ve er akaa a kpilighyol ken ayange a karen ken ijime la nahan ga.—Pasalmi 78:3–7, 10, 11.
Ve Er sha Iyoltseghan Ve La
8, 9. (a) Yange í kaa a Mbaiserael ér ve eren nyi sha u tesen ér ve tsegha ayol a ve sha ci u Yehovaa? (b) Injar i mba ve naan iniav sha asema a ve la lu nyi?
8 Yehova yange na ior nav ian ér ve er sha iyoltseghan i ve tsegha ér vea lu ikyurior na la. U tesen ikyav yô, á kaa a ve ér ve naan iniav man iniav mbin mbigenev lu hange hange, kpa mbigenev yô, hanma or naan sha ishima i nan. (Mbaheberu 8:3) Iniav mbi ior naan sha asema a ve yô, lu iniav mbi nanden man iniav mbi samuyia kua iniav mbi bem. Ve naan iniav mbin sha u wuese Yehova shi ve naan mbi ér a lumun ve.—Levitiku 7:11–13.
9 Iniav mbi ior naan sha asema a ve la doo Yehova ishima. Iniav mbi nanden man mbi sha samuyia cii lu iniav mbi ‘human doon mbi i naan TER’ yô. (Levitiku 1:9; 2:2) Yange a̱ naan nagh ku bem yô, i dugh ahôm man awambe a inyam la i nande Yehova nagh a mi, upristi man or u nan ve a nagh la di ve gema ve ya inyam la. Kwaghyan ne lu u sha ikyav, lu u tesen ér mba ken bem a Yehova. Tindi shon kaa ér: “Zum u nea naan TER nagh ku sôngon ku bem yô, naan nen ku er á rumun ne yô.” (Levitiku 19:5) Hanma Oriserael cii i mar nan ken ikyurior i̱ í tsegha i̱ sha ci u Yehova yô, nahan kpa lu mba ve naan iniav sha asema a ve sha u tesen ér mimi je ve soo ér Yehova a lu Aôndo ve la tseegh ‘á rumun ve’ shi á ver ve doo doo ye.—Levitiku 19:5.
10. Yehova yange venda iniav mbi Mbaiserael sha ayange a profeti Yesaia man Malaki la nena?
10 Mbaiserael lu ikyurior i í tsegha i̱ yô, kpa ve hemba Yehova ato acin imôngo. Yehova ôr a profeti Yesaia ér a kaa ve ér: “U vam a iyôngo i nagh ough ku nanden ga, u civir Mo sha nagh ough ku sôngon kpaa ga. Mo M kighir we Mer, va nam nagh ku sha samuyia ga.” (Yesaia 43:23) Heela tseegh ga, iniav mbi ior naan sha asema ve ga, shi ve naan sha dooshima ga la cii kwagh gba Yehova sha mi ga. U tesen ikyav yô, sha ayange a profeti Malaki la Mbaiserael naan nagh sha ilev mbi lun a ihyogholough iyol, shighe ne Yesaia kera lu uma ga anyom kar er deri utar nahan. Malaki kaa a ve ér: “Doom a ven ga, kape TER u akum a Sha A kaa ne, Me ngohol nagh ku sha ave a en la ga. . . . Ne va a kwagh u iin a ii man iwankwagh, man kwagh u a lu uange; ka nagh ku ne ne je ra; nahan doo u Me ngohol ku sha ave a en kpa? Kape TER A kaa ne.”—Malaki 1:10, 13; Amoshi 5:22.
I Venda Ikyurior i Í Tsegha I̱ La
11. Ka ian i nyi i na Mbaiserael?
11 Shighe u Mbaiserael hingir ikyurior i í tsegha i̱ sha ci u Yehova la, á tôndo zwa a ve ér: “Aluer né veren ato sha kwaghôron Wam mimi je, shi né waan ikyuryan Yam ikyo kpaa yô, nahan akuraior a sha won cii, ka ne né hingir kwagh Wam iyol Yam je ye; gadia tar cii, ka u Wam je. Ka ne né lum tartor u upristi kua icighanikyurior ye.” (Ekesodu 19:5, 6) Lu u Mesiya u i tôndo zwa ér ngu van la una va ken Iserael una hii nan ve ian i lun ken gomoti u Aôndo. (Genese 22:17, 18; 49:10; 2 Samuel 7:12, 16; Luka 1:31–33; Mbaromanu 9:4, 5) Nahan kpa, Mbaiserael kpishi er sha iyoltseghan ve la ga. (Mateu 22:14) Ve venda Mesiya, ken masejime yô ve wua un.—Aerenakaa 7:51–53.
12. Ka nyi Yesu ôr u tesen ér Yehova venda ikyurior na i á tsegh i̱ laa?
12 Er zurum u Yesu una kpe yô, á kaa a mbahemenev mba Mbayuda ér: “Shin icighanruamabera ne, ne ôr un gaa? Er: Iwen i mbamaan ve venda i la, ka i je, i hingir i sha zongo ye, ka Ter je A er kwagh ne ye, gema ka kwagh u kpilighyol sha ashe ase. Ka nahan man M kaan ne ye, á ngohol tartor u Aôndo hen a ven kera á na ikyurior i ia ume atam yô.” (Mateu 21:42, 43) Yesu shi ôr kwagh ugen u tesen ér Yehova venda ikyurior i í tsegh i̱ sha ci na la. Á kaa ér: “Yerusalem, Yerusalem, we u u woo uprofeti man u te mba i tindi ve her a we, awen ne; ka acin a me je man i lum pe kohol ônov ou er ngôikyegh ka a kohol ônov nav shin akper a na nahan, kpa ne rumun ga! Nenge ase, i undu ya wou, hingir ice.”—Mateu 23:37, 38.
Ikyurior i He I̱ Í Tsegha I̱ Yô
13. Ka kwaghôron u profeti u nyi Yehova ôr sha ayange a Yeremia laa?
13 Yehova yange ôr kwagh ugen sha ior nav sha ayange a profeti Yeremia la ér: “Nenge, ayange nga van, kape TER A kaa ne, a Me ya ikyuryan i he a ya u Iserael kua ya u Yuda; kpa ia kera lu sha inja i ikyuryan i M ya a uter vev sha ayange a M kôr ve uwegh sha u duen a ve ken tar u Igipiti la ga—ikyuryan Yam i ve vihi la, shin er M lu ter ve je nahan kpaa, kape TER A kaa ne. Kpa ikyuryan i Me ya a ya u Iserael er ayange ne á kar kera yô, ka i ne, kape TER A kaa ne: Me ver atindi Am ken atô ve je man shi Me nger a ken asema a ve kpaa; nahan Me lu Aôndo ve, ve di kpaa vea lu ior Av.”—Yeremia 31:31–33.
14. Ka hanma shighe nahan ikyurior i he i í tsegha i̱ ne hingir u lunu, man i hingir u lun nena? Pase ase ior mba ve lu ikyurior shon la.
14 Yange i wa imaagh ki ikyuryan i he ne zum u Yesu kpe, kpa ken masejime yô za na Ter na injar i awambe a na a á haa inya la ken inyom i 33 la. (Luka 22:20; Mbaheberu 9:15, 24–26) Nahan kpa, ikyuryan i he ne yange i̱ hii tom sha shighe u i haa mbahenen icighan jijingi sha iyange i Pentekosti u inyom i 33 la, shi lu hen shighe ne i mar “Iserael u Aôndo,” u a lu ikyurior i he ne ye. (Mbagalatia 6:16; Mbaromanu 2:28, 29; 9:6; 11:25, 26) Apostoli Peteru yange nger Mbakristu mba i shigh ve mkurem la kwagh ér: “Kpa ne yô, ne mba icuwannongo, nongo u upristi mba sha inja i tor, icighanikyurior, nongoior u Aôndo jim, ka sha u né yôô aeren a Na a ageegh, Un u A yila ne ken ime, A va a ven ken iwanger Na i kpiligh iyol la. Ngise ne lu nongoior ga, kpa hegen ne gema ne hingir nongoior u Aôndo.” (1 Peteru 2:9, 10) Ikyar i dedoo i Mbaiserael mba sha marami ya vea Yehova la maa kure. Nahan ken inyom i 33 la, Yehova tôô iveren na sha Iserael u shin tar la kera gema na Iserael u ken jijingi, ka tiônnongo u Mbakristu, ‘ikyurior i i um atam’ a Tartor u Mesiya je la.—Mateu 21:43.
Hanmaor Nana Tsegha Iyol i Nan
15. Sha iyange i Pentekosti u inyom i 33 la, ka batisema u nyi Peteru taver mba ve lu ungwan a na la ishima ér ve ere?
15 Pentekosti u ken inyom i 33 la yange been yô, hanma Oryuda kua Ortyôtyev cii lu a ian i tseghan iyol i nan sha ci u Aôndo shi eren “batisema ken iti i Ter man Wan man Icighan Jijingi.” * (Mateu 28:19) Apostoli Peteru kaa a Mbayuda mba ve kegh ato a kwaghôron na sha iyange i Pentekosti la kua mba ve hingir Mbayuda mbara cii ér: “Gema nen asema, i̱ er hanmô wen batisema ken iti i Yesu Kristu sha mde u asorabo a en, tsô né ngohol Icighan Jijingi iwua je.” (Aerenakaa 2:38) Yange gba u Mbayuda man mba ve nyôr ve la cii vea er batisema sha u tesen ér ve tsegha ayol a ve sha ci u Yehova tseegh ga, kpa shi gba u vea tese kpaa ér ve lumun ér ka ken iti i Yesu, Yehova una de ve asorabo ye. Yange gba u vea fa ér Yesu ka Pristi u Tamen u Yehova, shi ka un a lu Orhemen, a lu ityough sha tiônnongo u Kristu kpaa ye.—Mbakolose 1:13, 14, 18.
16. Sha ayange a Paulu la, Mbayuda kua mba ve nyôr Mbayuda, mba ve soo u fan kwagh u Aôndo la hingir u lun ken Iserael u ken jijingi nena?
16 Anyom nga kar yô, apostoli Paulu kaa wener: “Kpa m ôr kwagh m hii hen mba ve lu ken Damaseku man ken Yerusalem man shi ken tar u Yudia cii zan zan kua atôatyev kpaa, m kaa mer, ve̱ zamber, ve̱ gema her Aôndo, man shi ve̱ er aeren a a kom mgemshima la.” (Aerenakaa 26:20) Paulu yange wasen Mbayuda kua mba ve nyôr Mbayuda mbara mba fe dedoo ér Yesu ka Kristu, Mesiya yô, a shi a wase ve ve tsegha ayol a ve shi ve er batisema kpaa. (Aerenakaa 16:14, 15, 31–33; 17:3, 4; 18:8) Nahan er mbahenen mba hev mban lumun Aôndo yô, ve hingir Iserael u ken jijingi.
17. Ka tom u veren ikyav u nyi u lu zan u za kuusu, shi ka tom ugen u nyi i lu erenee?
17 Nyian ne, tom u veren asande a Iserael u ken jijingi ikyav la ngu zan u za kuusu. A veren ve ikyav a been yô, a na “mbatyomov mba Shaav unyiin” mba ve ker ahumbe a mtim a “zegecan” la ian ér ve pase á. Kpa hegen ne yô, ka kohol “zegeikpelaior” i i̱ lu a ishimaverenkeghen i va lun uma shin tar ne fele fele. “Iyôngo igen” ne na “awambe a Waniyôngo” jighjigh sha asema a ve, shi ve er batisema sha u tesen ér ve tsegha ayol a ve sha ci u Yehova. (Mpase 7:1–4, 9–15; 22:17; Yohane 10:16; Mateu 28:19, 20) Agumaior kpishi a mbamaren vev mba ve lu Mbakristu ve tese ve kwagh u Aôndo mba ken iyôngo ne. Aluer u ngu gumor yô, a doo u kpishi u ôron kwaghngeren u a dondo ne.
[Footnote]
^ Nenge Iyoukura [zwa Buter] i Mei 15, 2003 peeji 30–31 la.
U Hiden Saven a Sav
• Er nan ve gba u agumaior a ken Iserael aa tsegha ayol a ve sha ci u Yehova ga?
• Yange gba u Mbaiserael vea er nyi sha u tesen ér mba eren sha iyoltseghan ve?
• Yehova venda ikyurior i Iserael i í tsegha i̱ la sha ci u nyi, man gema zua a ikyurior igen nena?
• Hii sha iyange i Pentekosti u ken inyom i 33 la zan zan nyian, gba u Mbayuda man mba ve nyôr Mbayuda vea er nyi ve vea hingir Iserael u ken jijingii?
[Study Questions]
[Picture on page 21]
Yange i mar agumaior a Iserael ken ikyurior i Aôndo tsua yô
[Picture on page 23]
Hanma Oriserael yô, gba u nana tsua u civir Aôndo shin nana venda un
[Picture on page 23]
Nagh ku Mbaiserael naan sha asema a ve la lu u tesen ér Yehova doo ve ishima
[Picture on page 25]
Pentekosti u inyom i 33 la yange been yô, gba u mbadondon Yesu vea er batisema sha u tesen ér ve tsegha ayol a ve sha ci u Aôndo