Zua a Iwanger i Mimi

SHA iyange i Disemba 18, inyom i 1810 la, ijeverahumbe kar sha kpezegemnger vegher u sha ityough ki taregh ki imbusutariyan i tar u Scotland la. Hen shighe ne tugh hii u ilen shi shoja i ken mnger i ken tar u Britain lu shin girgimnger i í yer ér HMS Pallas la. Er tugh mbu lu ilen shi senou kpa lu nôôn yô, taver mbanahan girgi mbara kpishi u nengen a usu ú ua wase ve ve vea naha girgi la jighilii yô. Ken masejime yô, ve va nenge a usu maa ve naha girgi la ve yem vegher u usu shon lu la, nahan kwagh ne doo ve kpen kpen! Kpa kwagh ka a er i vihi yô, usu u ve nenge a mi la lu ú ua tese ve ape ve soo u zan la ga. Lu usu u mbatomov mbagenev mba eren tom hen kpezegemnger. Nahan girgi la yem zan zan maa za ta sha avande maa hembe shin mnger. Ior mba nahan i pue kar môm kpe shin mnger. Kwagh ne kpilighyol kpen kpen.

Girgimnger ne yange i tsume gbenda, ka nahan ve i er aikyôr ye. Ashighe agen yô, mbaihyomov yange ve tim usu sha u bumen mbanahan girgimnger. Takerada u i yer ér Wrecks, Wreckers and Rescuers la kaa ér ashighe agen yange i tsar iusu i bumen mbanahan girgi sha u ve naha ve za ta sha avande nahan ve er aikyôr.

‘Icighanruamabera Una Wase Ú u Zuan a Myom’

We kpaa er ú lu keren iwanger sha akaa a a ze ú iyol la yô, ú tagher a mbamzeyol vough er mbanahan girgi mbara nahan. Alaghga ú dondo akaawan a ior a vough ga, shin ior vea tsume a we sha apera je kpaa. Akaa ne cii aa yem a we ityough tingir. Tsô ú er nan ve u kura iyol you we? Ver ishima wer ape u lu keren iwanger la ka hen ijiir i mimi i u fatyô u suur sha i a ishima i môm yô. Magazin ne sue Bibilo i̱ i̱ lu Mkaanem ma Aôndo la anyom kar hegen hemba 125. Ka ken Bibilo tseegh se zua a iwanger i mimi i se dondo ye. Sha ci u ka i̱ i lu ‘icighanruamabera u una fatyô u tesen se u zan ken myom’ ye.—2 Timoteu 3:15–17.

 Aluer u soo wer u suur sha Bibilo a ishima i môm wer ka i i lu iwanger i mimi í ia hemen we yô, doo u ú tôv u fa mimi u i̱. (Pasalmi 119:105; Anzaakaa 14:15) Wea soo u zuan a mkaanem ma ma wase ior umiliôn imôngo ve ve lu a vangertiôr ér mimi je Bibilo ka mkaanem ma Aôndo yô, nger mbangeren magazin ne. Ú fatyô u ôron antakerada u i yer ér A Book for All People la. * Antakerada ne tese ér Bibilo ka takerada u mimi shi ka Aôndo kpa a ne i nger i̱ ye.

Mimi u i Gbe u Se Fa Keng Yô

Ka mimi u nyi a lu ken “icighanruamabera” u i doo u se fa kpeele? Time ase sha akaa a i er shin heen ne.

Aôndo Uhembanagee ngu môm shi Orgbanakaa kpaa ngu môm tsô. (Genese 1:1) Se mba uma “gadia [Aôndo] gba akaa cii” shi a na se uma kpaa. (Mpase 4:11) Sha nahan yô, gba u se civir un tswen. Ka Orgban tswen a lu iwanger i mimi ye. (Pasalmi 36:9; Yesaia 30:20, 21; 48:17, 18) Ngu a iti na kpôô kpôô i a soo ér se yilan i yô. (Ekesodu 3:15) Yange i nger iti ne sha asangaabaacaa a ken zwa Heberu, kpa i va gema i nger i er í yer í ainge nahan. I nger i ér YHWH, man iti ne due ken Bibilo kwa 7,000. Mba yer í ken zwa Tiv ér “Yehova” uderimbaanyomov imôngo hegen.—Ekesodu 6:3.

Yehova gba nomso man kasev ér ve lu uma gbem sha won ken Paradiso shin tar. Yange gba uumace a aeren a na. A na ve kwaghfan man mfe u una wase ve vea ember uma gbem sha won shin tar ne yô. (Genese 1:26–28) Yehova gba tar ér u lu ijiir i una karen nomso man kasev sha er una fa mba ve kom u una yem a ve ve za lu uma ken jijingi shaala, inja er ka shaala tseegh ior vea lu ve vea civir Aôndo doo doo nahan ga.

Aôndo yange gba or lu a ifer iyol ga. Ifer yange i hii shighe u orumace kua mbatyomov mbagenev nzughul a ian ve i eren kwagh sha asema a ve shi ve hemba Aôndo ato la. (Duteronomi 32:5) Mbamaren asev mba hiihii mbara yange ve tsua kwagh u dedoo man u bo a ishima ve. (Genese 2:17; 3:1–5) Kwagh ne na yô, uumace hingir u kpen. (Genese 3:19; Mbaromanu 5:12) Nahan u sôron mzeyol u mbahembanato mbara va a mi la yô, Yehova de ér ifer i za hemen sha anshighe kpuaa. Kpa ngu a̱ gema awashima na u lu a mi sha tar ne kua uumace la ga. (Yesaia 45:18) Nomso man kasev vea va lu uma ken tar u wang ú ua hingir paradiso la gbem sha won.—Mateu 6:10; Mpase 21:1–5.

Yesu Kristu ka Aôndo Uhembanagee ga, kpa ka Wan u Aôndo. Yesu Kristu yange tese mbadondon un ér ve eren msen nahan ér: “Ter wase u Sha, i̱ tsegha iti You.” (Mateu 6:9) Mayange je tôô ken ishima ér un ngu kwagh môm a Aôndo ga. Wen iyolna kaa ér: “Ter hembam.”—Yohane 14:28.

Yesu yange er akaa a dedoo sha u kuren awashima u Aôndo. Aôndo tindi un “er iwanger nahan, sha u hanma or u nan jighjigh yô, nana̱ de kera luun ken ime her ga  yô.” (Yohane 12:46) Apostoli Peteru kpaa ôr kwagh u Yesu ér, “myom ngu ken ma or ugen kpaa ga.” (Aerenakaa 4:12) Kwagh u Peteru a ôr ne ka mimi, sha ci u ka sha iwasen i awambe a Kristu la tseegh se zua a myom ye. (1 Peteru 1:18, 19) Yesu na nagh ku ipaa a uma na sha u yiman se ken isholibo i Adam man Ifa, mbamaren asev mba hiihii mbara va tsombor ve a mi la. (Mateu 20:28; 1 Timoteu 2:6) Shi Aôndo yange pase Yesu ishima Na man awashima Na kpaa.—Yohane 8:12, 32, 46, 47; 14:6; Aerenakaa 26:23.

Aôndo ver Tartor na shin gomoti na sha, mba ve kohol ve hingir gomoti ne yô, ka Yesu Kristu man mba i tsough ve ken uumace la. I ôr kwagh u Tartor u Aôndo ken Bibilo jimin cii. Aôndo na mba ve kohol ve hingir gomoti ne tom sha u ve ver ishima ér i er ishima na shin tar er i eren i sha nahan. (Mateu 6:10) Aôndo yange wa ishima ér uumace ve za lu sha ga. Yange soo ér tar u lu ya ve. Lu shighe u or gba ken kwaghbo la, Aôndo wa ishima u eren kwagh ugen u he ye. Á tsua ior ken “hanma nongo man hanma zwa man hanma nongoior” sha u ve za “tema tor sha tar” a Kristu imôngo ken gomoti u sha la. (Mpase 5:9, 10) Shighe kera shi ica ga tsô gomoti la una ‘hembe ityartor igen ne cii avur avur, una tim i,’ gadia í er ior ican nger gande.—Daniel 2:44.

Uma Kpen. Mimi u injaa u i pase ken Bibilo ne ta iwanger vindi vindi sha kwagh u or, man mlu u nan u ken hemen kpaa. Ior kpishi kwagh u mlu u mbakpenev nzughul ve shi mbagenev er mbaaie sha kwagh u mbakpenev kpaa, kpa Bibilo ta iwanger sha kwagh u mbakpenev.

I ôr ken takerada u hiihii u Bibilo ér: ‘TER Aôndo maa or sha vuulevu u inyaagh, fehe nan iôôn i uma ken ahenga, or la maa hingir or u uma.’ (Genese 2:7) U kav ivur ne kpa? Mayange je, uma ka ma jijingi u ken iyol i or ga. Or ngu a ngu uma ga. Or ka uma—inja na yô ka “vuulevu u inyaagh” kua iôôn i uma i Aôndo fehe ken or la í kohol cii i yer ér uma ye. Uma kpen. Shighe u or nan kpe yô, a fatyô u kaan ér uma kpe.—Genese 3:19; Orpasenkwagh 9:5, 10.

A va nder mba ve kpe la vea hide a lu uma. Shighe u Aôndo a hila de ér ifer i lu ne una karen yô, “mba ve lu shin iwar cii vea ungwa imo Na, vea due kpaa; mba ve lu eren akaa a dedoo, vea za ken mnder u uma, kpa mba ve lu eren ifer yô, vea za ken mnder u ijirôron.” (Yohane 5:28, 29; Aerenakaa 24:15) A va nder ior shin ku vea lu uma ken  paradiso shin tar, er Aôndo yange wa ishima sha hiihii ér i̱ lu nahan.

Hanma Iyange yô, Timen ken Ruamabera Vindi Vindi

Ú nenge er mfe u mimi ne una wase ú kpa? Ken ashighe a ican ne, mfe ne una kura ú sha “anyimanakaa a i eren aie sha mi er ka kwaghfan la.” Ka Satan Diabolo a lu suen kwaghfan u gbilinigh ne ye. Ka a gema iyol na a hingir er “ortyom u iwanger nahan,” ‘mbatomov nav di ka ve gema iyol ve ve hingir er mbaperapera’ nahan. (1 Timoteu 6:20; 2 Mbakorinte 11:13–15) “Mbafankwagh man mbakavenkwagh” mba “ve venda kwaghôron u TER” la senge ér kwaghfan u taregh ka iwanger, nahan aluer u ngu a mfe u vough u ken Bibilo ne yô, una wase ú ú palegh kwaghfan u taregh la.—Mateu 11:25; Yeremia 8:9.

Ior kpishi mba ve lu sha shighe u apostoli Yohane la tesen atesen a tsumen a ior kua kwaghfan u taregh, nahan apostoli Yohane ta Mbakristu mba sha derianyom u hiihii la icin ér: ‘De kera gbe nan nen hanma jijingi jighjigh tsô ga.’ A shi a kaa ér: ‘Kar nen ujijingi, sha u ne fa aluer ka her Aôndo ve dugh yô.’ (1 Yohane 4:1) Hen ase sha ikyav ne. Aluer ú ungwa loho u ú bende a we tsung nahan ú hen sha mi ga tsô u gba lumun ú tsôô? Ú er nahan ga. Cii man u lumun ú yô, u tôv u fa ape u dugh la shi u fa aluer ka u mimi yô.

Aôndo nger akaaôron a mimi, a aa wase ú u ‘karen akaa cii’ sha er u fa aluer iwanger i ú lu dondon la ka i mimi yô. (1 Mbatesalonika 5:21) Yange i wuese ior mba lun a inja i mimi, mba ken derianyom u hiihii la sha ieren ve i dedoo i “timen ken icighanruamabera ayange ayange” sha er vea fa aluer kwagh u ve lu henen la ka u mimi yô. (Aerenakaa 17:11) We kpaa u fatyô u eren nahan. Nahan lumun Bibilo i̱ lu ú “imenger i i wanger ken ijiir i wan ime,” sha er ia tese ú ape u za yô. (2 Peteru 1:19–21) Aluer u er nahan yô, u zua a “mfe u fan Aôndo,” gadia ka mfe ne a lu iwanger i mimi ye.—Anzaakaa 2:5.

[Footnote]

[Picture on page 4]

Mkaanem ma Aôndo ma er imenger nahan

[Picture on page 5]

Iti i Aôndo ér nyi?

[Picture on page 5]

Mlu u uumace u ken hemen ngu nena?

[Picture on page 6]

Yesu ka Aôndo Uhembanaa?

[Picture on page 6]

Mbakpenev mba hana?

[Picture on page 7]

Mimi u injaa ugen u Bibilo i tese yô ér a va nder mbakpenev