Mbampin mba Mbaôron Takerada Ne Ve Pin La
Mbampin mba Mbaôron Takerada Ne Ve Pin La
Er nan ve se fe ser kwaghfan u i er kwagh na ken Anzaakaa 8:22–31 la ka Yesu Kristu zum u a lu sha laa?
I ôr kwagh u kwaghfan ken takerada u Anzaakaa ér: “TER lu a mo sha mhii u gbenda Na je, je er ityom Na lu a lu ga, tsuaa la je. . . . Er i lu a tim iwo ga, man er agungu kpaa lu a lu ga je, tsô i marem. . . . Zum u A er Usha la m lu her je, . . . m lu vea Na, er or u fan tom nahan, hanma iyange m lu saan saan gbem, m lu ember sha ishigh Nagh gbem, m lu ember ken tar Na u sha won cii, doom a ônov mba iorov tsung.”
Kwagh u i er ken avur ne la gban kan di kwaghfan u Aôndo shin kwaghfan u ken ityou tsô ga. Sha ci u nyi? Ka sha ci u kwaghfan u i er kwagh na heen ne yange i ‘mar’ un shin i gba un lu mhii u gbenda u Yehova je. Yehova Aôndo ngu a mhii ga, shi vande ngun a kwaghfan kpaa. (Pasalmi 90:1, 2) Kwaghfan na ngu a mhii ga; shi i gba un kpaa ga. Yange i ‘mar’ kwaghfan la ga. Heela tseegh ga, i kaa ér kwaghfan ne lamen shi eren kwagh, nahan tese ikyav ér ka or.—Anzaakaa 8:1.
Takerada u Anzaakaa kaa ér hii sha uicôronmbaashighev mba ngise la je, kwaghfan lu vea Yehova Orgban “er or u fan tom nahan.” Sha kpôô yô, ka Yesu jighilii i lu ôron kwagh na heen ye. Cii man Yesu va shin tar yô, a er tom vea Yehova ikyooso ikyooso, nahan Mkaanem ma Aôndo kaa ér: “Un vande a akaa cii man ka ken Na a lu zan hemen her ye.”—Mbakolose 1:17; Mpase 3:14.
I yila Yesu ér kwaghfan nahan ka vough, sha ci u ka un a pase mbaawashima mba Yehova man uiniezwa nav ye. Shighe u Yesu lu a va shin tar ga la, lu Imo i Aôndo, shin Orshua na. (Yohane 1:1) Shi i yila un ér “agee a Aôndo man kwaghfan u Aôndo.” (1 Mbakorinte 1:24, 30) Nenge imba er i er kwagh u Wan u Aôndo, u uumace ve doo un ishima tsung je a ne uma na sha u paan ve la sha gbenda u doon tsung sha wono!—Yohane 3:16.
[Picture on page 27]
‘Er i lu a tim iwo ga je, tsô i marem’