Mcivir U A Doo Sha Ci Wou Yô

NGISE orpasalmi Asav kaa wener: “Mo yô, doom u mgbôghom a Aôndo.” Sha anshighe ugen la, sar un u dondon ior mba kwagh u Aôndo gba ve ishima ga, sha er una er uma yô. Kpa Asav hide hen sha kwagh ne, tsô a nenge ér mtsera ngu sha u mgbôghom a Aôndo shi ka kwagh u a doo sha ci na kpaa je la. (Pasalmi 73:2, 3, 12, 28) Mcivir u mimi doo sha ci wou nyian je kpa? Una wase u nena?

Aluer u ngu civir Aôndo u mimi yô, kwagh ne una wase u, nahan u kera ver ishima sha u eren akaa a wan iyol you ikyo tseegh ga. Mba ve keren mtsera ve tseegh vea zua a msaanyol mayange ga, sha ci u “Aôndo u dooshima” gba se ér se waan mbagenev kpa ikyo. (2 Mbakorinte 13:11) Yesu yange ôr mkaanem ma mimi, ma ma tese mlu u orumace yô, wener: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Ka nahan ve i saan se iyol u eren akaa sha ci u azende a ase man tsombor wase kpaa ye. Kpa a hemba saan se iyol aluer se mba eren akaa sha ci u Aôndo yô. Gba u se hemba soon un a hanma orgen cii. Ior umiliôn imôngo sha ajiir kposo kposo nenge ér u civir Aôndo sha u eren akaa a a soo la ka kwagh u nan mkom.—1 Yohane 5:3.

Uma Wou Una Lu a Inja

Shi ityôkyaa igen i mcivir u mimi a doo sha ci wou yô ka i je ne: una na uma wou una lu a inja. Ú nenge er ashighe kpishi ka i saan or iyol sha ci u nan ngu eren kwagh u injaa yum gaa? Ior kpishi mba a kwagh u ve we ishima u eren yô. Alaghga ka kwagh u a bende a tsombor ve shin azende a ve, gayô kasua ve shin ka ma kwagh u nan ve iember. Kpa er or fe kwagh u kper ga yô, ashighe kpishi akaa ne je kpa nga a na ve msaanyol ga. (Orpasenkwagh 9:11) Kpa, mcivir u mimi una wase u ú lu a ishimaveren i injaa, i ia za hemen u nan we msaanyol, sha shighe u u tagher a mbamzeyol je kpaa.

Or u nan lu ken kwaghaôndo u mimi yô gba u nana fa Yehova shi nana civir un sha mimi. Mba ve eren kwaghaôndo u mimi cii kporom ikyua a Aôndo. (Orpasenkwagh 12:13; Yohane 4:23; Yakobu 4:8) Alaghga a taver we u kaven er we nahan ú fa Aôndo dedoo je una hingir ijende you yô. Kpa aluer u hen akaa a ken Bibilo a a tese gbenda u Aôndo a eren kwagh a ior shi u hen sha akaa a a gbe la kpaa yô, ú kav aeren a na agenegh. (Mbaromanu 1:20) Heela tseegh ga, a lu u ôr Mkaanem ma Aôndo yô, u fa er i hii ve se lu shin tar ne, man er i hii ve Aôndo a de ér se ya ican shi u fa gbenda u una bee a ican i yan kpaa yô. Shi kwagh u hemban doon je yô, u fa er we kpa ú wase u kuren awashima u Aôndo yô. (Yesaia 43:10; 1 Mbakorinte 3:9) Aluer u fa akaa ne cii yô uma una hemba doon we cii!

Er U Hingir Or u Dedoo Yô

Mcivir u mimi doo sha ci wou, gadia una wase u ú hingir or u dedoo. A lu ú ngu eren kwaghaôndo u mimi yô, ú lu a aeren a a wase u ú eren kwagh a mbagenev saan saan yô. Shi ú hen aeren a Aôndo man Wan na, nahan ú fa u eren kwagh sha mimi shi ú fa u lamen a ior man u eren kwagh sha gbenda u mbagenev vea na u jighjigh yô. (Mbaefese 4:20–5:5) Aluer ú fa Aôndo tsembelee je kwagh na doo u ishima tsung yô, u soo u kaven un keng keng. Bibilo kaa ér: “Lu nen mbakaven Aôndo er ônov mba doon ishima nahan.”—Mbaefese 5:1, 2.

Aluer ior mba u lu a ve cii ka mba eren kwagh a ior sha dooshima er Aôndo nahan, á doo u ga he? Doo kpishi er mcivir u Aôndo u  mimi a lu kwagh u or môm tswen ga nahan. Mcivir u mimi una wase u ú lu imôngo a ior mba kwagh u dedoo a doo ve ishima yô. Kpa, alaghga ú soo u nyôron ma kwaghaôndo ga. Er se nenge ken kwaghngeren u ken ijime la nahan, ukwaghaôndo kpishi mba a mbamzeyol sha ci u mba nongo u kwaghaôndo yum ga, kpa ka sha ci u mba eren akaa sha inja ga shi í tim ve sha ityôkyaa i dedoo kpaa ga. Mbaadua kpishi mba eren aeren a Mbakristu ga. Kpa nongo u ior mba Aôndo yô, ka Yehova iyol na a tim u ye, shi a tim u sha ityôkyaa i dedoo kpaa. Bibilo kaa ér: “Aôndo ka u nzughul nzughul ga, kpa ka u bem.” (1 Mbakorinte 14:33) Aluer u ngu kohol imôngo a nongo u Mbakristu mba ve eren akaa sha inja sha inja la yô uma una hemba doon we er ior mbagenev umiliôn umiliôn kpa a doo ve nahan.

Se Mba a Ishimaverenkeghen

Icighan Ruamabera tese ér Aôndo ngu kohol mbacivir un sha mimi cii sha er vea va war mkur u tar ne, vea ya dyako u tar u he u “perapera una tema ker” la yô. (2 Peteru 3:13; Mpase 7:9–17) Nahan yô, mcivir u a doo sha ci wou la una na u ishimaverenkeghen i i lu kwagh u injaa u una na u msaanyol yô. Mbagenev yô hen ér a kpe ve iyol ken hemen aluer tar ve ngu a gomoti u dedoo shi kpenga ve kpa doo shi mba gbong gbong kpaa yô; shi ve hen ér aluer i nenge sha ve zum u ve mem tom u uke yô a saan ve iyol. Kpa akaa angan nahan na se ityôkyaa injaa i veren ishima ser a kpe se iyol ken hemen ga. Apostoli Paulu nger wener: “Se ver asema ase se [mba] keghen Aôndo u uma.”—1 Timoteu 4:10.

Aluer u ker mbacivir Aôndo sha mimi yô, u zua a ve. Er mpav a ngee ken tar nahan kpa, Mbashiada mba Yehova mba inja kposo, mba a dooshima shi mba ken mzough kpaa. Ve due ken hanma tar man hanma ikyurior; kpa, mba ken mzough sha ci u ve doo ayol a ve shi Yehova doo ve ishima. (Yohane 13:35) Nahan mba lôhôn we ér u̱ va nenge kwagh u a lu zan hemen hen atô ve ne iyol you. Asav yange kaa ér: “Doom u mgbôghom a Aôndo.”—Pasalmi 73:28.

[Picture on page 7]

Ú fatyô u lun ijende i Aôndo