Mkaanem ma Yehova Ma Uma Je

U Ôron Ruamabera u sha Utaan u Pasalmi Asav Asav

ALAGHGA mbanyarev vea kaa ér: “Ônov asev mba nomso, ve̱ hingir er agumaikyon a a vese doo doo ken iyev vev je; ônov asev mba kasev kpaa, ve̱ lu er awen a sha zongo, a i koo a doo doo er ka sha ci u iyou i tor nahan; iuna yase i̱ iv. . . ilev yasev kpaa mbi̱ mar udubu man udubu pue.” Shi adooga mba lun a kwagh ave vea kaa ér: “Saan ior mba ve lu a imbamlu ne iyol.” Nahan kpa, orpasalmi gema kaa ér: “Saan ior mba TER A lu Aôndo ve la, iyol.” (Pasalmi 144:12–15) A er nan man a saan ve iyol ga sha wono? Gadia Yehova ka Aôndo u sar sar, nahan saan mba ve civir un la cii iyol. (1 Timoteu 1:11; NW) Ruamabera u masetyô u a hii sha Pasalmi 107 zan zan 150, u Aôndo yange mgbegha ior ve nger la pase se wang er i saan mbacivir Aôndo iyol yô.

Ruamabera u sha Utaan u Pasalmi ne shi pase aeren a Yehova a doon tsung, er erdoo na man mimi kua mdoom nam nahan. Aluer se seer fan imba or i Aôndo a lu yô, una seer doon se ishima shi a hemba doon se u cian un kpaa. Mfe ne una na a saan se iyol. Sha kpôô yô, loho u ken Ruamabera u sha Utaan u Pasalmi la doo je zua ga!—Mbaheberu 4:12.

SAAN VE IYOL SHA CI U ERDOO U YEHOVA

(Pasalmi 107:1–119:176)

Shighe u i pase Mbayuda mba ve yem uikyangen ken Babilon ve lu hiden ken tar ve la, ve wa icam ve kaa ér: “Wuese TER sha erdoo Na, man aeren a Na a kpilighyol, a A eren a ônov mba iorov” la. (Pasalmi 107:8, 15, 21, 31) Davidi kpa yange wa icam i wuese Aôndo wener: “Mimi Wou kpaa ar sha ikwavaôndo je.” (Pasalmi 108:4) Shi a er msen ken icam na igen ér: “Wasem, TERE, Aôndo wam, yimam sha erdoo Wou.” (Pasalmi 109:18, 19, 26) Pasalmi 110 ka kwaghôron u profeti u a pase kwagh u mtemtor u Mesiya yô. Pasalmi 111:10 kaa ér: “Mcie u cian Aôndo ka mhii u kwaghfan je ra.” Pasalmi u a dondo la di kaa ér, “Saan or u nan cie TER la iyol.”—Pasalmi 112:1.

I yila Pasalmi 113 zan zan 118 ér ka Upasalmi mba Iwuese, sha ci u ve ter ishember i “Haleluya” shin “Wuese nen Ter” la acin imôngo. Takerada u i yer ér Mishnah, u yange i nger u ken derianyom u sha utar sha u pasen atindi a Mbayuda wa ngise ngise la kaa ér yange i waan atsam a iwuese ne hen iniongo i Paseka man uiniongo mbagenev mba utar mba Mbayuda eren ken inyom yô. Pasalmi 119 u a hembe lihen shi a lu ityough ki hemban lihen ken Bibilo kpaa la wuese mkaanem ma Yehova a pase ior nav la.

Mbamlumun sha Mbampin mba sha Akaa a ken Ruamabera:

109:23—Davidi yange lu kaan ér nyi jim, zum u a kaa ér: “M kar kera er mure u a gbe a ze ca” nahan laa? Davidi yange lu wan di a wa icam pasen er ayange na a kuugh a mgbôghom tsô.—Pasalmi 102:11.

110:1, 2—‘Ter’ u Davidi, Yesu Kristu lu eren nyi shighe u tema ken uwegh ku yanegh ku Aôndo laa? Yange mba nderen Yesu shin ku yô a kôndo a yem sha a za tema ken uwegh ku yanegh ku Aôndo, a kegh zan zan ka ker ken inyom i 1914 yô a tema Tor. Sha shighe u Yesu lu keghen la, lu orvesen u mbadondon un mba i shigh ve mkurem la, lu hemen ve ken tom u pasen ior kwagh shi geman ve ve hingir mbahenen  la shi lu wan ve agoyol sha er vea tema tor a na ken Tartor na yô.—Mateu 24:14; 28:18–20; Luka 22:28–30.

110:4—Ka an Yehova a ‘bum a nan je i lu kwagh u una vaa afanyô ga’? Ibumun ne ka ikyur i Yehova ya a Yesu Kristu ér a lu Tor kua Zegepristi la.—Luka 22:29.

113:3—Á wuese iti i Yehova “hii sha iyangeduen je, zan zan iyangemiren” nena? Mkaanem man tese ér ior kpishi mba civir Aôndo hanma iyange, ka ior kpuaa tseegh ga. Iyange ka í due sha ityoughkitaregh í kar í za mire shin ityôtar, nahan í ta iwanger sha tar cii. Yehova kpa gba u a civir un sha tar cii. Kpa saa mbacivir un vea kohol imôngo, vea eren akaa sha inja sha inja ve vea fatyô u eren kwagh ne ye. Er se lu Mbashiada mba Yehova yô se mba a ian i civirigh i wuese Aôndo shi eren tom u pasen kwagh u Tartor sha gbashima.

116:15—‘Ku u uicighan mba Yehova ka kwagh u injaa kpishi sha ishigh nagh’ nena? Mbacivir Yehova mba kwagh u injaa sha ishigh nagh kpishi je ka kwagh u una de ér ve kpe môm môm ve bee ga. Aluer á de ér kwagh a er nahan yô, a lu inja er mbaihyomov nav hemba un tahav nahan. Bee kera yô, ior vea kera shi shin tar mba vea va hii u sôron tar u he la ga.

119:71—Ican ia fatyô u lun kwagh u dedoo nena? Ican ia fatyô u tesen se u hemban suur sha Yehova shi ia wase se se eren msen kpoghuloo shi se hemba veren ishima u ôron Bibilo shi eren kwagh u se lu ôron la kpaa. Bee kera yô, nyityôkwagh i se er shighe u ican i tser se la cii ia pon ajiir a se yen la sha er se sôr yô. Aluer se de ser ican i yan i kôôm se yô, ishima ia vihi se a vihi zum u se lu yan ican ga.

119:96—Inja i ishember i “ikighir i hanma kwagh u vough cii” la ér nyi? Orpasalmi ngu pasen gbenda u uumace ve nengen kwagh u vough la. A shi nan kpa, ngu kaan ér mfe u uumace sha gbaa u kwagh u a lu u vough la ngu a ikighir. Kpa tindi u Aôndo yô gbangese je ikighir ngi ga. Kwaghwan u ken tindi na ne una wase se sha akaa a se eren ken uma wase cii. “M nenge ikighir i hanma kwagh u vough cii, kpa tindi Wou yô, gbangese kpishi.”

119:164—U wuese Aôndo “kwa taankaruhar sha iyange i môm” ka kwagh u injaa nena? Ashighe kpishi utaankaruhar ka a tile sha ityough ki kwagh u a lu jimin yô. Nahan yô, orpasalmi ngu kaan heen ér Yehova kuma u se wuese un a mshi shio.

Ityesen hen Avese:

107:27-31. Zum u Armagedon una va la kwaghfan u tar ne una “bee ca ca.” (Mpase 16:14, 16) Inja na yô una yima or môm sha ikyev i mtim ga. Ka mba ve veren ashe hen Yehova ér a̱ yima ve la tseegh vea lu uma vea “wuese [un] sha erdoo Na” ye.

109:30, 31; 110:5. Ngise la a̱ nôngon ityav yô orshoja nan kôr sanker ken uwegh ku yanegh, perutya di u lu ken uwegh ku imesegh, nahan uwegh ku yanegh kura ku lu a kwagh u yisan ku ga. U ôron sha injakwagh yô, Yehova ngu “ken uwegh ku yanegh” ku mbacivir un, ngu nôngon kwagh sha ci ve. Nahan yô, ngu kuran ve shi ngu wasen ve kpaa—kwagh ne ka ityôkyaa i dedoo i se “wuese [un] kpishi” je!

113:4-9. Yehova ngu sha, ica hiinii je yô ka a shir a shir ashe shin ve a ‘nenge a usha’ ye. Kpa, zungu icanor man ikyômkwase mhôônom. Yehova, Ter Uhembanagee hir a iyol ijime, man a soo ér mbacivir un kpa ve hiden a iyol ijime.—Yakobu 4:6.

114:3-7. Aluer se hen sha gbenda u Yehova yange er akaa a kpilighyol sha ci u ior nav hen Zegemnger u Nyian man Ifi u Yordan kua hen Uwo u Senai la yô, akaa ne aa kpiligh se iyol kpishi. “Ikyarikyase i̱ gbidye” uumace, mba “tar” u til sha ityough vev la “iyol” sha ishigh ki TER.

119:97-101. Aluer se zua a mfe man mkav ken Mkaanem ma Aôndo yô kwagh ne una kura se sha akaa a a vihi ikyar i se ye vea Aôndo la.

119:105. Mkaanem ma Aôndo ma er ka imenger i angahar a ase nahan, gadia ma a wase se u nôngon a mbamzeyol mba se lu tagher a mi hegen la. Shi ma wanger gbenda wase kpaa, sha ci u ma tsengaôron kwagh u Aôndo a we ishima u eren yô.

 ATSAN ER VE, KPA SAAN VE IYOL

(Pasalmi 120:1–145:21)

Se fatyô u tagher a ameen shi waren atsan kposo kposo nena? Pasalmi 120 zan zan 134 na se mlumun sha mpin ne wang. Ka sea veren ashe hen Yehova ser a wase se yô, se kôr cio u waren ican shi se zua a msaanyol kpaa. I yila upasalmi mban ér Atsam a zan Iniongo, man a̱ shi nan kpa Mbaiserael waan a shighe u vea zaan uiniongo vev mba sha inyom ken Yerusalem la.

Pasalmi 135 man 136 tese ér Yehova ka Or u eren kwagh u sha ishima na. Ngu er ka ieev mbi mbi fetyô u eren kwagh môm ga la ga. Pasalmi 136 ngu a atsam a yange í ndera shi í lumun yô; hanma ivur i ken Pasalmi ne yô í hii nderan icam ker cii ve í lumun ye. Pasalmi 137 di ôr kwagh u mzungu u Mbayuda lu zungwen ken Babilon la, gadia lu ve pe civir Yehova ken Shion. Pasalmi 138 zan zan 145 ka Upasalmi mba Davidi nger yô. Sar un u ‘wuese Yehova a ishima na cii.’ Sha ci u nyi? A pase ityôkyaa ér: “U erem m [ngu] kwagh u cieryol man u kpilighyol kpaa.” (Pasalmi 138:1; 139:14) Davidi er msen ken Pasalmi 139 zan zan 144 wener Aôndo a kura un sha ikyev i aferaior, a kôôm un sha perapera na shi a yima un sha ikyev i mbatôvon un a ican shi a tese un inja i dedoo. Davidi shi ôr kwagh u msaanyol u ior mba Yehova. (Pasalmi 144:15) Davidi pase mhembe u Aôndo man mdoom nam been yô, a kaa wener: “Zwa wam ua ôron kwagh u iwuese i TER; uuma cii ve̱ wuese icighanti Na gbem sha won.”—Pasalmi 145:21.

Mbamlumun sha Mbampin mba sha Akaa a ken Ruamabera:

122:3—Yerusalem yange lu “gar u i zough un kpogholoo” nena? Yange i maa ayou ken gar u Yerusalem i zua er agar agen a ngise kpa lu nahan. Er i maa gar u Yerusalem lu a ahia kpishi ga yô lu ican u kuran gar ne sha ikyev i mbaihyomov ga. Heela tseegh ga, kwagh ne na yô ior mba ken gar ne lu ikyua a mbawanndor a ve, nahan ve wasen ayol a ve shi ve kuran ayol a ve kpaa. Kwagh ne tese mzough u ken jijingi u yange a lu hen atô u ikwe 12 i Mbaiserael shighe u vea kohol imôngo u civir Aôndo la.

123:2—Ikyav i injakwagh i sha kwagh u ashe a mbashiren ne ér nyi? Ikpan i nomso man i ukase ka i ver ashe sha uwegh ku uter vev shin ungô vev sha ci u atôakaa a ahar ne: sha er vea fa kwagh u mbavesen vev mban ve soo ér ve er la shi vea zua a mkor hen ve kua akaa a a gbe ve la kpaa yô. Nahan se kpa, ashe ase nga sha Yehova sha er se fa ishima na shi se er kwagh u una lumun se yô.

131:1-3—Davidi yange ‘sur ishima na, hingir dem dem, er wan u den atumba ka a lu hen ngô na nahan’ nena? Er wan u den atumba ka nan zua a msurshima man mkom sha u lun shin ikyum i ngô u nan nahan, Davidi kpa yange sur ishima na, hingir dem dem, nahan lu ‘er wan u den atumba u nan lu vea ngô u nan nahan.’ A er kwagh ne nena? Ishima na lu a imanger ga, ashe na kpaa ta ihyagh ga shi a hagher sha uzegembaakaav kpaa ga. Davidi nôngo ér una za iti ga, kpa a gema a kav mbamyina nav shi a hide a iyol jime kpaa. Doo u se er kwagh er Davidi nahan, hemban je yô shighe u i sar se u lun a tom ken tiônnongo yô.

Ityesen hen Avese:

120:1, 2, 6, 7. Sendetyo man iliam i dang ka i na or ishimavihin kpishi. Gbenda môm u  se tese ser ‘bem doo se’ yô ka u kôron zwa wase tsaha.

120:3, 4. Se fatyô u zuan a msurshima hen Yehova zum u i gbe u se wa ishima a or u “nombor [u nan] u tsughun a tsugh” yô, gadia se fa ser Yehova una sôr hanma kwagh sha shighe u a nenge i doo un cii. Mba senden ior ityough vea ya ican sha ikyev i “or u ageegh.” Iyugh i Yehova i i lu er “akausu a gbaaye” la ia va sha a ve kpee je.

127:1, 2. Doo u se ver ashe sha Yehova ser a kura se ken nyityôkwagh i se lu eren cii.

133:1-3. Mzough u ior mba Yehova doo tsung, ka kwagh u injaa u nan myôhôryol kpaa. Mayange se vihi nen mzough wase ne sha u puun a puu mbagenev shi eren ayôôso shin gban ahon ga.

137:1, 5, 6. Kwagh u Shion yange doo mbacivir Yehova mba i yem a ve ukyangen la ishima kpen kpen. Sha shighe ve la, Shion tile sha ityough ki nongo u Aôndo. Se di ye? Se var a nongo u Yehova a lu yaren tom a u nyian ne sha mimi kpa?

138:2. Yehova “kende a kwaghôron Na sha hemba iti na cii, [NW ]” sha ci u hanma kwagh u a tende zwa ken iti na cii una kure un je a hemba kwagh u se ver ishima ser una er la. Sha mimi yô, akaa a dedoo nga keghen se ken hemen.

139:1-6, 15, 16. Yehova fa ityom yase man mbamhen asev man kwaghôron wase, er a lu a due ken zwa wase ga la je. A fa se zum u ijenawambe yase i jire la, zum u alegh a yolough ase lu a lu ga la je. Gbenda u Yehova a fe se ne “kpiligh . . . iyol je” gande u kaven. Doo se kpishi er Yehova a nengen hanma kwagh u a lu zan se iyol shi a fe er mbamzeyol mba shon ve bende a vese kpaa nahan!

139:7-12. Ma ijiir i môm ngi i se za ve a gande Aôndo u wasen se ga.

139:17, 18. Mfe u Yehova doo se ishima kpa? (Anzaakaa 2:10) Aluer a doo se yô, se mba a kwagh u nan se msaanyol u been mayange ga. Mbamhen mba Yehova ngee ‘hemba waarawa.’ Hanma shighe yô akaa ka a lu kpishi a se fatyô u henen sha kwagh na yô.

139:23, 24. Gba u se soo ser Yehova a tôv mbamhen asev mba ken atô, a nenge aluer ma “gbenda u ifer”—inja na yô ka mbamhen mba bov kua asaren a bo nga ken a vese yô shi a wase se u been a mi kera.

143:4-7. Se fatyô u wan ishima a atsan a vihin tsung nena? Orpasalmi tese se er se er kwagh ne yô: Gba u se hen sha aeren a Yehova shi se ver ishima sha ityom na shi se eren msen hen a na ser a wase se.

“Haleluya”

Ruamabera u hiihii zan zan u sha unyiin u pasalmi la kure sha ishember i wuese Yehova. (Pasalmi 41:13; 72:19, 20; 89:52; 106:48) Ruamabera u sha utaan ne kpa kure nahan. Pasalmi 150:6 kaa ér: “Hanma kwagh u a lu a iôôn tsô yô, a̱ wuese TER. Haleluya.” Mkaanem man ma a kure vough ken tar u he u Aôndo una va a mi la.

Er se lu keghen shighe u doon tsung la nahan, se mba a atôakaa kpishi a civir Aôndo u mimi shi wuese iti na kpaa. Ka sea tema sea hen sha msaanyol u se lu a mi sha ci u se fa Yehova shi se ya ikyar a na kpaa nahan, ishima i mgbegha se u wuese un a ishughun ga he?

[Picture on page 30]

Ityom i Yehova i kpilighyol la cier iyol je gande

[Picture on page 31]

Mbamhen mba Yehova ngee ‘hemba waarawa’