Dooshima Ne Ishimataver

“Ka jijingi u cian kwagh, Aôndo A ne se ga, kpa ka u ageegh man u dooshima man u kôron iyol tsaha.”—2 TIMOTEU 1:7.

1, 2. (a) Dooshima una mgbegha or nana er nyi? (b) Hii nan ve ishimataver i Yesu la i kaha kposo a i mbageneve?

 ORGEN u sember eren ivese yô za iyol gban vea kwase na shin ityeku ikyua a gar ugen ken imbusutarimese i tar u Australia. Er ve lu nôngon ér vea due shin mnger yô, zegeishu ugen u i yer ér shark la za va u kôron kwase na, tsô or la daa kwase na kera sha kpaver, ishu shon maa kôr un yem a mi. Zum u i lu nan kwaghôron u ku na yô, kwase na u hingir côghol la kaa ér: “A na uma na sha ci wam.”

² Sha kpôô yô, dooshima una fatyô u mgbeghan uumace u eren kwagh sha ishimataver. Yesu Kristu iyol na kpa kaa ér: “Or ngu a dooshima u a hembe ngun ga, je u or nana gbihi uma u nan sha ci u akar a nan.” (Yohane 15:13) Yesu ôr mkaanem man iyange lu a hurugh i zua ga tsô a na uma na sha ci u or môm tseegh ga, kpa sha ci u uumace jimin cii. (Mateu 20:28) Kpa Yesu yange nule gagher sha ishima i taver hen shighe môm tsô maa na uma na ga. Yange vande fan ér a naha un tar shi a tuhwa un shi a ôr un ijir sha mimi ga, ken masejime yô, a wua un sha kon u mtsaha. Yange wa mbahemen nav ago iyol sha kwagh u una va er un la, a kaa a ve ér: “Nenge, se mba kôndon zan sha Yerusalem; á za na Wan u or sha ikyev i upristi mba tamen man mbangeren, vea ôr Un ijir i kuugh, vea na Un sha ikyev i atôatyev; vea naha Un tar, vea gbidye Un akpa, vea haa Un azer iyol, vea wua Un kpaa.”—Marku 10:33, 34.

3. Kanyi yange i na ve Yesu taver ishima?

³ Kanyi yange i na ve Yesu taver ishima tsung nahana? Jighjigh man mcie u cian Aôndo yange wase un kpishi. (Mbaheberu 5:7; 12:2) Kwagh u hemban cii yô, Yesu yange taver ishima sha ci u Aôndo man uumace doo un ishima. (1 Yohane 3:16) Aluer se mba a imba dooshima la shi se mba a jighjigh u nan shi se mba cian Aôndo yô, se kpa se taver ishima er Kristu nahan. (Mbaefese 5:2) Se er nan ve se lu a imba dooshima laa? Doo u se fa pe dooshima a dugh yô.

‘Ka Her Aôndo Dooshima a Dugh Ye’

4. Hii nan ve se fatyô u kaan ser ka hen Yehova dooshima a dughu?

⁴ Yehova ka dooshima shi ka hen a na dooshima a dugh kpaa ye. Apostoli Yohane nger ér: “Ne mbadoon mo ishima, se doo nen ayol a ase, gadia dooshima yô, ka her Aôndo a dugh ye; hanma or u nan lu a dooshima kpaa, ka Aôndo A mar nan ye, shi nan fa Aôndo kpaa. Kpa u nan lu a dooshima ga yô, nan fa Aôndo ga, gadia Aôndo ka dooshima je.” (1 Yohane 4:7, 8) Nahan kpa sar or a kporom hen Yehova sha u zuan a mfe u vough shi eren sha kwagh u nan lu henen la a ishima i môm ve nana lu a dooshima u Aôndo la ye.—Mbafilipi 1:9; Yakobu 4:8; 1 Yohane 5:3.

5, 6. Kanyi yange i wase mbadondon Yesu mba sha ayange a tsuaa la ve, ve lu a imba dooshima u Kristu kpa lu a mi laa?

⁵ Yesu yange tese ken msen na u masetyô u er vea mbaapostoli nav mba 11 mba jighjigh  mbara ér u fan Aôndo gba zua vea dooshima. A kaa ér: “M pase ve iti You; Me shi Me pase ve i kpaa; sha u dooshima u M doo U la, a̱ lu ken a ve, Mo kpaa M̱ lu ken a ve yô.” (Yohane 17:26) Yesu yange wase mbahenen nav ve lu a imba dooshima u un man Ter na lu a mi la, nahan, kwaghôron na man ieren na cii pase kwagh u iti i Aôndo i til sha mi yô—ka aeren a Aôndo a dedoo je la. Ka nahan ve Yesu ôr mkaanem man ye, ér: “U nan nenge a Mo yô, nan nenge a Ter je ve.”—Yohane 14:9, 10; 17:8.

⁶ Dooshima u Kristu la shi ka ityamegh ki jijingi u Aôndo. (Mbagalatia 5:22) Shighe u Mbakristu mba tsuaa mbara ngohol icighan jijingi sha iyange i Pentekosti u inyom i 33 la, ve umbur akaa a Yesu tese ve la tseegh ga, kpa ve seer fan Ruamabera kighir sha mi. A shi nan kpa mfe u ve seer zuan a mi la na Aôndo seer doon ve ishima. (Yohane 14:26; 15:26) Nahan lu nyi i gema i due kere? Er i lu cirin ve a ku je kpa, ve za hemen u pasen loho u dedoo sha ishima i tseen.—Aerenakaa 5:28, 29.

Ve Tese Ishimataver man Dooshima

7. Paulu vea Barnaba yange ve wa ishima a nyi zum u ve lu eren tom mishen imôngo laa?

⁷ Apostoli Paulu nger ér: “Ka jijingi u cian kwagh, Aôndo A ne se ga, kpa ka u ageegh man u dooshima man u kôron iyol tsaha.” (2 Timoteu 1:7) Paulu yange lu ôron kwagh u er un iyol na yô. Paulu vea Barnaba yange ve ya ican kpishi zum u ve lu eren tom mishen imôngo la. Yange ve pase kwagh ken agar kpishi, kua ken Antioki man Ikonium man Lisetera. Ken hanma gar yô, ior mbagenev na jighjigh kpa mbagenev hendan a ve tsung. (Aerenakaa 13:2, 14, 45, 50; 14:1, 5) Ken Lisetera di, ikpelaior i toron asema yange i ta Paulu awen i kôr un i za gbihi ken won gar, ve hen ér a kpe! “Kpa er mbahenen va kase un yô, a mough, a shi a nyôr ken gar. Kper nan gen A due vea Barnaba, ve yem ken Derebe.”—Aerenakaa 14:6, 19, 20.

8. Ishimataver i Paulu man Barnaba la tese ér mbagenev doo ve ishima nena?

⁸ Er i nôngo u wuan Paulu nahan, un man Barnaba ve cia ve de tom u pasen kwagha? Mayange ga! Er iorov mba uhar mban pase loho u dedoo ken Derebe “ve zua a mbahenen kpishi yô, ve hide hen Lisetera man Ikonium kua Antioki.” Ve hide ér vea za er nyi? Sha u vea taver jighjigh u mbahev mba ve nyôr ken tiônnongo la. Paulu kaa a Barnaba ér, “Ka sha atsan kpishi keng je man sé nyôr ken tartor u Aôndo ye.” Sha kpôô yô, lu mdoo u “iyôngo” i Kristu doo ve ishima la na ve ve taver ishima nahan ye. (Aerenakaa 14:21–23; Yohane 21:15–17) Anmgbianev mba uhar mban mba tsough mbatamen ken atôônanongo a ve sember veren la yô, ve er msen maa “ve wa ve sha ikyev i Ter u ve na Un jighjigh la.”

9. Paulu yange tese mbatamen mba ken Efese dooshima kpishi, nahan kwagh la mgbegha ve ve er nyi?

⁹ Paulu yange lu or u tseen ishima shi waan ior ikyo kpaa, nahan doo mbatamen mba ken tiônnongo u Kristu u sha derianyom u hiihii la ishima kpen kpen. Umbur kwagh u za hemen hen mkombo u Paulu zua vea mbatamen mba ken Efese la, yange pase kwagh ken gar la anyom atar shi tagher a ahendan kpishi. (Aerenakaa 20:17–31) Paulu wa ve kwagh ér ve kura ikyumile i Aôndo i i lu sha ikyev ve la, been yô a gure inya a er msen a ve cii. Maa “ve cii ve vaa tsung, ve kuve Paulu, ve gba susen un zwa. Kwagh u hemban vihin ve yum je yô, lu kwagh u a kaa er, mayange vea kera zua ishigh a na ga la.” Sha kpôô yô, Paulu doo anmgbianev mban ishima tsung! Nahan ka kom shighe u Paulu man ikyar na vea “undu” mbatamen mban yô, vihi ve kpishi, ve soo ér ve yem ga.—Aerenakaa 20:36–21:1.

10. Mbatomov mba Yehova mba sha ayange ne tese ér ve doo ayol a ve sha gbashima nena?

¹⁰ Nyian kpa ior soo kwagh u mbatamen mba zenden sha man mbatamen mba ken tiônnongo man mbagenev kpaa sha ishimataver i ka ve tese sha u kuran iyôngo i Yehova la. U tesen ikyav yô, mbatamen mba zenden sha mba ken ityar i i lu nôngon ityav shin i i cir tom u pasen loho u dedoo ker la vea kasev vev ka ve ver uuma vev sha zongo shi ve tôô ian i ma ve lu eren akaa a ve la ve zenden ve sôron atôônanongo. Shi Mbashiada kpishi ya ican sha ikyev i mbahemenev mba vihin tu man mbatomov vev sha ci u ve venda u tesen ape anmgbianev vev ve lu, shi ve  lumun u tesen ijiir i ve zough a kwaghyan u ken jijingi ga. I tôv mbagenev udubu imôngo a ican tsung, je yô i wua mbagenev sha ci u ve venda ér vea de u pasen loho u dedoo ga shi vea de u kohol imôngo vea anmgbianev vev ken mbamkombo mba Mbakristu ga. (Aerenakaa 5:28, 29; Mbaheberu 10:24, 25) Se dondo nen jighjigh man dooshima u anmgbianev mba nomso man mba kasev mba taver asema mban.—1 Mbatesalonika 1:6.

Dooshima Wou a De Ndôhôr Ga

11. Satan te num sha mbacivir Yehova nena, nahan gba u ve di vea er nyi?

¹¹ Yange mba gbihin Satan shin tar ne yô, a wa ishima u van a iyugh na sha mbacivir Yehova mba ve ‘kor atindi a Aôndo shi ve lu eren shiada sha kwagh u Yesu kpaa’ la. (Mpase 12:9, 17) Gbenda môm u Satan a eren kwagh ne yô, ka sha u tôvon ve a ican. Ashighe kpishi gbenda ne ka u wase un ga, sha ci u ka u na ior mba Aôndo ve hemba doon ayol a ve shi gbashima u mbagenev a seer taver a taver. Gbenda ugen u Satan a eren kwagh ne yô, ka sha u kôron ave sha isharen i uumace i eren kwaghbo la. Ka sha ishimataver tsung or a fatyô u hendan a Satan sha gbenda ne ye, sha ci u a gba u se hendan a mbamhen mba bov mba ken atô u ishima yase i i ‘we atseregh’ yum ne.—Yeremia 17:9; Yakobu 1:14, 15.

12. Satan eren tom a jijingi u taregh sha u una nôngo yô Aôndo a de kera doon se ishima ga nena?

¹² Ikyagh ki tswamegh ki vesen ki gen ki Satan a lu a mi yô, ka “jijingi u taregh” u a samber wuee, a lu hemen mhen u ior la; jijingi ne hendan a icighan jijingi u Aôndo. (1 Mbakorinte 2:12) Jijingi u taregh ne suen ieren i zendan uyôughyôughmbaakaav ityô la—ka “isharen i ashee” je la. (1 Yohane 2:16; 1 Timoteu 6:9, 10) U ngeen a akaa shin lun a inyaregh ka kwagh u bo ga, kpa aluer se hemba soon akaa ne a Aôndo yô, Satan una hemba se. Jijingi u taregh ne ngu a tahav mbu meen ior tsung. Tahav mbun mbu ken isharen i iyolough man ayom aa tar ne man gbenda u u samber a akaa sha u tsughun ior la. Mayange de deen wer jijingi u taregh a nyôr ken a we ga!—Mbaefese 2:2, 3; Anzaakaa 4:23.

13. A fatyô u karen ishima i se kange ser se lu a aeren a wang la nena?

¹³ Saa or nana kange ishima ér nana lu a aeren a wang ve nana kôr cio u hendan a jijingi u taregh shi dughun un ken a nan kera ye. U tesen ikyav yô, aluer or nenge a ufoto mba ijimbagh sha televishen shin sha kômputa yô, ka sha ishima i taver tsung nana mough a pir televishen shin kômputa shon ye. Shi ka sha ishima i taver tsung or nana fatyô u hendan a mbamhen mba sha mi ga man mkighir u mbakov shi palegh azende a bo ye. Shi zum u mba nan ze makeranta imôngo a ve shin mba nan eren tom imôngo a ve shin mbawanndor a nan shin mba hen tsombor u nan ve lu nahan nan tar yô, saa nana taver ishima tsung ve nana fatyô u kuran atindi  a Aôndo ye.—1 Mbakorinte 15:33; 1 Yohane 5:19.

14. Aluer jijingi u taregh nyôr ken a vese yô, se er nena?

¹⁴ Nahan ka hange hange u Aôndo man anmgbianev asev mba nomso man mba kasev vea seer doon se ishima. Nahan, tôô shighe time sha mbaawashima ou shi gbidye kwar sha ieren you nenge aluer ikyav tese ér jijingi u taregh hii u nyôron ken a we yô. Aluer u nenge wer a hii u nyôron ken a we cuku kpa er msen hen Yehova a na u ishimataver sha er u dugh un ken a we kera yô. Yehova una er kwagh sha msen u ú er a ishima i môm la kpee je. (Pasalmi 51:17) Heela tseegh ga, jijingi u Aôndo hemba jijingi u taregh tahav ica je.—1 Yohane 4:4.

Se Wa Ishima a Mbamzeyol a Ishimataver Nena?

15, 16. Dooshima u Kristu la una wase se u wan ishima a ameen nena? Tese ikyav.

¹⁵ Mbamtaver mbagen mba mbatomov mba Yehova ve we ishima a mi yô, ka mbamzeyol mba myen wase man iyolbeen i ve se a mi la. Ashighe kpishi mbamzeyol mban ka ve na or gba angev shin nan gba iwan, shi ve na or ure kpishi shi ve va nan a akaa a zan iyol agen kpaa. (Mbaromanu 8:22) Dooshima u Kristu la una wase se u wan ishima a ameen ne. Nenge ase ikyav sha kwase ugen u i yer un ér Namangolwa la, i yese un ken tar u Zambia hen tsombor u Mbakristu. Namangolwa gba iwan zum u lu anyom ahar la je. A kaa ér: “Yange m shi henen mer mlu wam una cier ior iyol, nahan m ngôôr heen ga. Kpa anmgbianev av mba se civir Aôndo imôngo wasem, nahan m kôôm mhen wam. Kunya ngu kera kerem a mlu wam ga, shighe karen yô, m er batisema.”

¹⁶ Namangolwa ngu a ikyekye i mbaawanev i a zenden sha mi yô, kpa ka una za nyôr hen ijiir i waa u lu kpishi yô a hungwa a zende agurenu. Nahan kpa, ka a hemba kera kera kpa a er tom u ishuen pania kwa har ken inyom. Namangolwa yange pase kwase ugen kwagh been yô, kwase shon haa mliam ashe. Ér nyi? Lu sha ci u jighjigh u anmgbian wase u kwase ne kua ishimataver na la bende a na kpishi je. Yehova ver iniôngon i Namangolwa doo doo, nahan iorov utaan mba a hen Bibilo a ve yô er batisema, u môm ngu ortamen ken tiônnongo u Kristu hegen. Namangolwa shi kaa ér, “angahar ka a nyoon mo kpoghuloo je kpa m den mer a yangem u eren tom wan ga.” Anmgbian u kwase ne ngu di môm ken Mbashiada imôngo, mba ve lu tar sha won cii, mba ve yen sha iyol kpa ve gem ve taver ishima sha ci u  mdoo u Aôndo man mbawanndor a ve ve doo ve ishima la. Ior mban cii mba akaainjaa sha ishigh ki Yehova kpen kpen!—Hagai 2:7.

17, 18. Kanyi ka i wase mbagen u wan ishima a angev man ameen agene? Tese akav sha ior mba hen haregh wou.

¹⁷ Icôronuange kpa ka i na or ishimanyian shi nan ule kpaa. Ortamen u ken tiônnongo ugen kaa ér: “Anmgbianev mba kasev utaan hen ijiir i m nyer mkombo u henen takerada la mba a uicôronmbauangev atô kposo kposo. Ashighe agen ka ve ure kpishi. Kpa mayange mba bundu mkombo ga, saa shighe u i vihi ve iyol kpoghuloo shin i ker ve gambe ken iyouci tseegh. Ve cii mba dugh kwaghpasen hanma shighe. Ve umbur mo mkaanem ma Paulu man, ér: ‘Ka shighe u m lu isheer la je m gem m taver ye.’ Dooshima ve man ishimataver ve la doom kpen kpen. Alaghga mvihiyol ve la na yô, ve seer veren ishima sha akaa a ve eren man sha akaa a a hembe lun hange hange ken uma yô.”—2 Mbakorinte 12:10.

¹⁸ Aluer iyolbeen shin angev shin mbamzeyol mbagenev ta sha a we yô, ‘eren msen gbem,’ sônon iwasen sha er u yina ishima ga yô. (1 Mbatesalonika 5:14, 17) Nahan kpa, ashighe agen ishima ia za u iyol, kpa nôngo hemba veren ishima sha ikyaryan you vea Aôndo, hemban cii je yô, ishimaveren i injaa i se lu a mi sha kwagh u Tartor la. Anmgbian u kwase ugen kaa ér: “Tom u pasen kwagh ngum er icigh nahan.” Tom u pasen loho u dedoo la wase un u lun a ishimaverenkeghen.

Dooshima ka a Wase mba Ve Er Isholibo la Ve Hide hen Yehova

19, 20. (a) Kanyi ia wase mba ve er isholibo vea taver ishima vea hide hen Yehova? (b) Se time sha nyi ken kwaghngeren u a dondo nee?

¹⁹ Ka i taver ior kpishi mba ve de u civir Aôndo shin ve er isholibo yô u hiden hen Yehova. Kpa aluer amba a ior la gema ishima sha mimi shi Aôndo hide doo ve ishima yô, ishima ia taver ve nahan vea hide hen na. Nenge ase ikyav sha kwagh u yange er Mario la, * un ngu ken tar u Amerika. Mario yange undu tiônnongo u Kristu hingir u man msôrom kpoghuloo kua mcimbim ma bov. Anyom nga karen 20 yô, i kôr un i za wuhe ken purusu. Mario kaa ér: “M hii u henen sha mlu wam u ken hemen shi ôron Bibilo kpaa. Shighe kar yô, aeren a Aôndo gba doom mo ishima, hemban cii je yô mhôônom nam, gadia ka m shi eren msen sônon un mer a zungwem mhôônom. Yange mba dughun mo ken purusu yô, m kera za ikyua a azende am a bo la ga, m hide m hii u zan mbamkombo mba Mbakristu zan zan i kar hiden a mo ken tiônnongo. M ngu sundan kwagh u yange m lôô la ken iyol yam hegen, kpa m gema m ngu a ishimaverenkeghen. M wuese Yehova kpishi er a zungum mhôônom shi a dem kwaghbo wam kpaa nahan.”—Pasalmi 103:9–13; 130:3, 4; Mbagalatia 6:7, 8.

²⁰ Nahan kpa gba u mba mlu ve a lu kwagh môm a u Mario la vea nôngo kwagh kpoghuloo ve vea fatyô u hiden hen Yehova ye. Gba u vea za hemen u henen Bibilo shi eren msen shi gbidyen kwar sha kwagh u ve hen la; aluer ve er kwagh ne yô, Yehova una hide a doo ve ishima nahan ishima ia hemba taver ve u hiden hen a na. Ishimaverenkeghen i Mario lu a mi sha kwagh u Tartor la kpa yange i seer taver un ishima. Sha kpôô yô, dooshima man jighjigh u nan man mcie u cian Aôndo kua ishimaverenkeghen ka akaa a injaa a aa wase se ken uma yô. Se time sha akaa a injaa a Aôndo a ne se ne ken kwaghngeren u a dondo ne.

[Footnotes]

U Fatyô u Nan Mlumun Kpa?

• Dooshima yange wase Yesu u taver ishima nena?

• Mdoo u anmgbianev doo Paulu man Barnaba ishima la taver ve ishima nena?

• Ka sha nyi gbenda nahan Satan ka a nôngon ér dooshima wase a ndôhôrô?

• Aluer Yehova doo se ishima yô, se zua a tahav mbu wan ishima a ameen a nyi?

[Study Questions]

[Picture on page 23]

Mdoo u ior doo Paulu ishima la wase un u wan ishima a ameen

[Picture on page 24]

Ka sha ishima taver tsung or a fatyô u kuran atindi a Aôndo ye

[Picture on page 24]

Namangolwa Sututu