U Fatyô u Hemban Ashighe a Ican

IOR kpishi mba tagher a mbamzeyol mba vihin tsung ken ashighe a ican ne. Kpa er Aôndo a doo Mbakristu ishima shi ve dondon atindiakaa a na sha mimi yô, kwagh ne wase ve u wan ishima a mbamzeyol mban. A wase ve nena? Se zua a mlumun sha mpin ne ken injakwagh igen i Yesu Kristu yange ôr yô. A tôô mbahenen nav mba ve ongo imo na la a kar sha “orfankwagh u nan maa iyou i nan sha vande” yô. A kaa ér: “Ura nôô, uikyuwan sen, ahumbeaura ta sha iyou la, kpa i gba ga, sha ci u i we i imagh sha vande yô.”—Mateu 7:24, 25.

Fa wer or u i er kwagh na ken injakwagh ne ka orfankwagh, nahan kpa a tagher a mbamzeyol—mba ura man uikyuwan kua ahumbeaura ve til sha ityough nagh la. Nahan Yesu yange lu kaan ér mbahenen nav vea ember uma, vea lu bem bem a mzeyol shio ga. (Pasalmi 34:19; Yakobu 4:13-15) Kpa yange kaa ér mbatomov mba Aôndo mba jighjigh vea fatyô u wan agoyol sha er vea wa ishima a mbamzeyol mba vihin tsung yô.

Yesu hii injakwagh la ér: ‘Hanma or u nan ongo akaaôron Am ne man nan eren sha a yô, á kar nan sha orfankwagh u nan maa iyou i nan sha vande.’ Yesu lu ôron kwagh u maan iyou kpôô kpôô ga, kpa lu ôron kwagh u lun a aeren a Mbakristu man isharen i eren kwagh u dedoo. Mba ve dondon mkaanem ma Yesu yô, mba eren kwagh sha kwaghfan man sha mkav kpaa. Ve maa asaren a ve man aeren a ve cii sha atesen a Yesu a a taver er ka vande la, gadia mba eren akaa a i tese ve la. Vande u sha ikyav ne ngu sha taregh nyagh ga, gba u or u i er kwagh na ken injakwagh ne una ‘time a za shimi’ ve nana zua a u ye. (Luka 6:48) Kape mbahenen mba Yesu kpa ve nôngon kpoghuloo u lun a aeren a injaa a a kporom a ve hen Aôndo je la.—Mateu 5:5-7; 6:33.

Mbamtaver mba lun er ahumbeaura ka vea ta sha imaagh ki mbahenen mba Yesu ve we ken Kristu gbang la nahan, nyi i ere? Er ve dondon atesen a Kristu sha asema a ve shi ve lu a aeren a Mbakristu kpaa yô, mba zough a agee a wan ishima a mbamtaver mba shonov, man kwagh ne una na ve agee sha shighe u zegecan u Armagedon u a mgbôghom ne kpaa. (Mateu 5:10-12; Mpase 16:15, 16) Sha kpôô yô, ior kpishi dondo atesen a Kristu nahan mba hemban mbamtaver mba ve lu er ahumbeaura ne. We kpa u fatyô u eren nahan.—1 Peteru 2:21-23.