Yehova Una “Kure Ijir”

“Aôndo Una kera kure ijir sha ci u uicuwan Nav mba ve ve a mliam hen Na tugh man tetan [la gaa]?”—LUKA 18:7.

1. Ka jighjigh u unô a ne ú ishimatavera, man ka sha ci u nyi?

 MBASHIADA mba Yehova mba a nomso man kasev mba ken Kristu sha tar jimin cii, mba ve civir Yehova sha jighjigh anyom imôngo yô. U fa mbagenev ken anmgbianev mban kpa? Alaghga u umbur ma anmgbian u kwase u beenyol u nan er batisema ica i gbe, shi nan gbe uwer u van mbamkombo ken Iyou i Tartor ga yô. Shin u umbur ma anmgbian u nomso u beenyol u nan dugh kwaghpasen a tiônnongo hanma sati anyom imôngo hegen yô. Alaghga mbajighjigh mban mbagenev kpishi yange ve hen ér hegen nahan Armagedon una va. Er ve lu ken bo tar ne nahan kpa, ve na uityendezwa mba Yehova jighjigh her dông shi ve kange ishima gbang ér vea “taver ishima zan zan mkur.” (Mateu 24:13) Sha mimi yô, imba jighjigh u mbacivir Yehova sha mimi mban ve lu a mi ne ka kwagh u taver tiônnongo cii ishima.—Pasalmi 147:11.

2. Kanyi i vihin se tsung i lu eren nee?

² Nahan kpa, alaghga ashighe agen se nenge mbacivir Aôndo mbagen vea er inja kposo. Mbashiada mbagen pase kwagh anyom imôngo kpa ve de jighjigh u ve ne Yehova la vôr, nahan ve undu tiônnongo u Kristu. Vihi se kpishi er mbagenev mba yange ve civir Aôndo a vese imôngo ve undu Yehova yô, nahan sar se tsung u wasen “iyôngo i i saa” la sha er ia hide ken ityôr yô. (Pasalmi 119:176; Mbaromanu 15:1) Nahan kpa, er mbagenev ve lu a jighjigh ve her dông, mbagenev di ve undu jighjigh ve yô, kwagh ne due a mbampin. Ka mbampin mba shon je ne: Kanyi i̱ wase Mbashiada mba Yehova kpishi ve ze hemen u nan uityendezwa mba Yehova jighjigh, kpa mbagenev yô ve undu jighjigh ve u nana? Kanyi se er ve se za hemen u taver jighjigh u se lu a mi ser, “iyange i vesen i TER” mgbôghom laa? (Sefania 1:14) De se time nen sha injakwagh igen ken Ivangeli i Luka.

Icintan sha ci u Mba Ve Lu sha “Shighe u Wan u Or Una Va” La

3. Injakwagh i i er kwagh u kwasecôghol man orjir la ia hemba wasen unô, man ka sha ci u nyi?

³ Yesu ôr injakwagh sha kwagh u kwasecôghol man orjir ugen ken Luka ityough 18. Injakwagh la ngi kwagh môm a i Yesu a er kwagh u orya u cihi kunya, u se er kwagh na ken kwaghngeren u ken ijime la. (Luka 11:5–13) Nahan kpa, avur a Bibilo a a er injakwagh i i er kwagh u kwasecôghol man orjir la tese ér anzaakaa ne hemba ôron kwagh u mba ve lu sha “shighe u Wan u or Una va,” zum u una tema tor u Tartor la, shighe shon hii ken inyom i 1914 la.—Luka 18:8. *

4. Yesu yange ôr nyi cii ve mase ôron injakwagh i ken Luka 18 laa?

⁴ Cii man Yesu ôr injakwagh i i er kwagh u kwasecôghol man orjir la yô, á kaa ér hanma or naná nenge a ikyav i̱ ia tese ér un tema tor  ken Tartor u sha la, “er inyiar” ka i nyiar “vegher ugen u Sha zan zan i mande vegher ugen u Sha” ve i wanger hanma ijiir ior ve nenge nahan. (Luka 17:24; 21:10, 29–33) Kpa, kwagh a gba ior kpishi mba vea lu ken “shighe u mkur” la sha ikyav i vea nenge a mi tseer tseer la ga. (Daniel 12:4) Sha ci u nyi? Sha ci u ityôkyaa shon i môm i yange i na ve kwagh gba ior mba sha ashighe a Noa man Loti sha icintan i Yehova ga la. Sha ayange la ior lu “yan akaa, man akaa, yamen ukasua, lôôn akaa” zan zan i va kar timin ve. (Luka 17:26–29) Yange ve tim sha ci u kwagh hemba gban ve u eren akaa a ve, a u eren ishima i Aôndo. (Mateu 24:39) Nyian kpa kwagh hemba gban ior u eren akaa a ve, kwagh tsô gba ve u veren ishima sha ikyav i i tese ér mkur u ior mba ve vende u civir Aôndo mgbôghom la ga.—Luka 17:30.

5. (a) Ka unô jighilii Yesu ta ve icini, man lu sha ci u nyi? (b) Lu nyi i na ve mbagenev undu jighjigh ve?

⁵ Ishima yange i̱ za Yesu iyol ér mbadondon un kpa tar u Satan ne ua mee ve vea ‘hide’ vea yem u eren akaa a ve undu la. (Luka 17:22, 31) Man ka kwagh u Mbakristu mbagen er vough je ne. Mbakristu mban kegh shighe u Yehova una tim botar ne anyom imôngo. Kpa, er Armagedon va sha shighe u ve hen ér una va la ga yô, iyol kpe ve. Nahan jighjigh u ve na ér iyange i jirigh i Yehova mgbôghom la maa vôr. Nahan iyol kpe ve u pasen kwagh, tsô ve hide ijime kure kure ve hingir u zendan akaa a taregh ityô, sha nahan yô, ve kera lu a shighe u civir Aôndo ga. (Luka 8:11, 13, 14) Shighe kar yô, ve ‘hide’ ve yem u eren akaa a ve undu la. Ve er kwagh vihi kpen kpen!

Doo u Se “Eren Msen Zumbee”

6–8. (a) Pase injakwagh i i er kwagh u kwasecôghol man orjir la. (b) Yesu pase ikyav i injakwagh ne nena?

⁶ Kanyi se er ve jighjigh u se ne ser uityendezwa mba Yehova vea kure la una vôr ga? (Mbaheberu 3:14) Yesu yange ta mbahenen nav icin ér ve de dondon botar u Satan ne ga, been yô, a ôr kwagh u a ne mlumun sha mpin ne yô.

⁷ Luka kaa ér Yesu “ôr ve injakwagh sha u tesen er [i] doo u taver ishima u eren msen zumbee, gban uwer ga” yô. Yesu kaa ér: “Ken gar ugen orjir lu, cian Aôndo ga, or kpaa waan nan ikyo ga. Gar shon la kwasecôghol kpaa lu ker, zer van hen na, kaan er: ‘Kurem ijir sha orihyom wam.’ A zer vendan, kpa ken masetyô yô, a kaa ken ishima na er: Shin er m cie Aôndo ga, or kpaa m we ikyo ga, nahan kpaa sha ci u kwasecôghol ne a zem iyol yum yô, me kure un ijir sha orihyom na, sha u a̱ de kera zem iyol zan zan i̱ bundem iyol sha mve na u keke ne ga.”

⁸ Yesu er kwagh ne been yô, a hide a pase ve inja i kwaghôron shon. A kaa ér: “Ungwa nen kwagh u orjir u a lu perapera ga ne a kaa la. Man hire Aôndo Una kera kure ijir sha ci u uicuwan Nav mba ve ve a mliam hen Na tugh man tetan ga yee, shin er A timbir sha  kwagh ve yum nahan kpaa. Me kaa ne, Una kure ijir fese je. Kpa shighe u Wan u or Una va la yô, Una zua a jighjigh u nan sha wonoo?”—Luka 18:1-8.

“Kurem Ijir”

9. Ka semakwagh u nyi i er ken injakwagh i i er kwagh u kwasecôghol man orjir laa?

⁹ Semakwagh u i er ken injakwagh ne la wanger wang. Yesu man mba i er kwagh ve ken injakwagh la pase semakwagh shon. Kwasecôghol la yange zamber wener: “Kurem ijir.” Orjir la di kaa ér: “Me kure un ijir.” Yesu gema pine ér: “Aôndo Una kera kure ijir” gaa? Yesu hide ôr kwagh u Yehova ér: “Una kure ijir fese je.” (Luka 18:3, 5, 7, 8) Kpa ka hanma shighe jighilii nahan ‘Aôndo Una kure ijiri’?

10. (a) Yange i or iyev ken derianyom u hiihii la hanma shighe? (b) A or iyev sha ci u ior mba Aôndo nyian hanma shighe, man a or i̱ nena?

¹⁰ Sha derianyom u hiihii la, inyom i 70 la lu inyom i ‘ayange a oron iyev,’ gadia lu ken inyom la i tim Yerusalem man tempel na ye. (Luka 21:22) Sha ayange ne di a or iyev sha ci u ior mba Aôndo sha “iyange i vesen i TER.” (Sefania 1:14; Mateu 24:21) Zum la, Yehova una ‘or mba ve lu tôvon’ ior nav a ican la “iyev,” gadia Yesu Kristu “una tsaha mba ve fe Aôndo ga man shi mba ve we Loho u Dedoo u Ter wase Yesu ikyo ga la.”—2 Mbatesalonika 1:6–8; Mbaromanu 12:19.

11. Ka sha nyi gbenda nahan a kure ijir “fese je”?

¹¹ Se kav ibumun i Yesu a bum ér Yehova una kure ijir “fese je” la nena? I ôr ken Mkaanem ma Aôndo ér “er [Yehova a lu] timbir” nahan kpa, aluer shighe la kuma yô, una ôr mbaaferev ijir, una tsaha ve fese je. (Luka 18:7, 8; 2 Peteru 3:9, 10) Sha ayange a Noa la, Mngerem ma Deemee tim mbaaferev ngôôr ga. Sha shighe u Loti la kpa usu sen sha tim mbaaferev. Yesu kaa ér: “Anzaakaa ne aa er sha iyange i á pase Wan u or la.” (Luka 17:27–30) Sha ayange ne kpa, kape “mtim una ande sha” mbaaferev “ibuv” je la. (1 Mbatesalonika 5:2, 3) Nahan er i gbe u Yehova una va ôr ijir yô, se lu nen a vangertiôr ser una de tar u Satan ne ér u tsa i kar ikyaa inya ga.

“Una Kure Ijir”

12, 13. (a) Injakwagh i Yesu ôr sha kwagh u kwasecôghol man orjir la tese se nyi? (b) Er nan ve se lu a vangertiôr ser Yehova una ungwa mbamsen asev shi una kure se ijiri?

¹² Injakwagh i Yesu ôr sha kwagh u kwasecôghol man orjir la tese se akaa agen a mimi a a lu se a inja yô. Yesu pase injakwagh shon ér: “Ungwa nen kwagh u orjir u a lu perapera ga ne a kaa la. Man hire Aôndo Una kera kure ijir sha ci u uicuwan Nav” ga yee? Kpa, u ngu wer Yesu lu karen Yehova sha orjir la, inja er Aôndo una er kwagh a mbananjighjigh er orjir la er nahan ga. Kpa, Yesu lu tesen mbadondon un kwagh u injaa u vea hen sha mkposo u a lu hen atô u Aôndo man orjir la yô. Ka mkposo u nyi a lu hen atô ve?

¹³ Orjir u ken injakwagh i Yesu ôr la lu “perapera ga,” kpa “Aôndo [yô] ka orjir u mimi.” (Pasalmi 7:11; 33:5) Kwagh yange gba orjir la u wasen kwasecôghol la ga, kpa Yehova yô, kwagh u hanma or cii gba un ishima. (2 Kroniku 6:29, 30) Er kwagh gba orjir la u wasen kwasecôghol la ga nahan kpa, Yehova yô, gba un ishima shi a wa iyol a kegh a kegh u wasen hanma or u nan civir Un cii. (Yesaia 30:18, 19) Kwagh ne tese se  nyi? Aluer orjir u a lu perapera ga la ungwa zamber u kwasecôghol la, kure un ijir yô, hile Yehova ve una ungwa mbamsen mba ior nav shi una kure ve ijir ga yee?—Anzaakaa 15:29.

14. Er nan ve i doo u se undu jighjigh u se ne ser iyange i jirigh i Aôndo ngi van la ga?

¹⁴ Nahan, mba ve kera ne jighjigh ér iyange i jirigh i Yehova ngi van ga cii yô tsume kpishi. Sha ci u nyi? Er ve undu jighjigh u ve ne taveraa ér “iyange i vesen i TER” i mgbôghom la yô, ve tese ér ve na Aôndo jighjigh ga, shi una fatyô u kuren uityendezwa nav kpaa ga. Kpa or môm nana fatyô u gban akperan sha kwagh u ieren i mimi i Aôndo ga. (Yobu 9:12) Nahan mpin u injaa u i doo u se pine ayol a ase yô ka un ne, Me za hemen u nan jighjigh her taveraa kpa? Man ka kwagh u Yesu yange ôr kwagh sha mi ken mkur u injakwagh na i kwasecôghol man orjir la je ne.

“Una Zua a Jighjigh u Nan Ne sha Won Kpa?”

15. (a) Ka mpin u nyi Yesu pine, man lu sha ci u nyi? (b) Ka mpin u nyi i doo u se pine iyol yase?

¹⁵ Yesu pine mpin u injaa ne ér: “Kpa shighe u Wan u or Una va la yô, Una zua a jighjigh u nan ne sha won kpa?” (Luka 18:8; NW ) Ishember i “jighjigh u nan ne” la tese ér Yesu lu ôron kwagh u nyityô jighjigh u nan tsô ga, kpa lu imba jighjigh u nan u kwasecôghol la lu a mi la. Yesu yange na mlumun sha mpin ne ga. Yange pine mpin ne ér una wase mbahenen nav ve nenge aluer ka imba jighjigh u ve lu a mi la yô. Yange jighjigh ve lu vôron nahan ve lu nôngon ér vea hide vea yem vea za er akaa a ve gema ijime a mi laa? Shin ve lu a imba jighjigh u kwasecôghol laa? Se kpa doo u se pine ayol a ase nyian ser, ‘Ka jighjigh u nan u nyi “Wan u or” a nengem a mini?’

16. Ka jighjigh u nyi kwasecôghol la lu a mini?

¹⁶ Aluer se soo ser Yehova a kure se ijir yô, doo u se lu a imba ieren i kwasecôghol la. Ka jighjigh u nyi lu a mini? Yange tese jighjigh u nan taveraa, gadia a ‘zer van hen orjir la, kaan ér: Kurem ijir.’ Kwasecôghol la yange zer van hen orjir u perapera ga la ér a̱ kure un ijir. Nahan doo u mbacivir Aôndo nyian kpa vea lu a vangertiôr ér Yehova una kure ve ijir, aluer ka ve inja er a ngôôr je kpaa. Heela tseegh ga, mbacivir Aôndo ka ve tese ér ve na uityendezwa mba Aôndo jighjigh sha u eren msen kpoghuloo, van a ‘mliam vem hen Na tugh man tetan’ kpaa. (Luka 18:7) Aluer Orkristu gba uwer u eren msen ér Aôndo a kure ijir sha ci u ior nav yô, nan kera na jighjigh ér Yehova una wase mbacivir un ga.

17. Ka atôakyaa a nyi se lu a mi a eren msen zumbee sha er se za hemen u nan jighjigh ser iyange i ijirigh i Yehova ia va kpeele?

¹⁷ Mlu u kwasecôghol la seer tesen se atôakyaa a i doo u se eren msen kpoghuloo yô. Nenge ase er mlu na a kaha a u wase yô. Or môm yange nan taver un ishima ér a de gbe uwer ga, a zaan hen orjir la her ga, kpa se yô, Mkaanem ma Aôndo taver se ishima ér se ‘taver ishima sha msen u eren.’ (Mbaromanu 12:12) Or môm yange nan tôndo zwa a kwasecôghol la ér á ungwa zamber na la ga, kpa Yehova yô, tôndo zwa ér una kure se ijir. Yehova ôr kwagh a vese sha ikyev i profeti na ér: “Er una ngôôr kpaa, kegh un, gadia una va kpee, una bunde ga.” (Habaku 2:3;  Pasalmi 97:10) Kwasecôghol la lu a or u nana wase un u zamber orjir la ga. Kpa se yô, se mba a Yesu orwasen se u ageegh, “ngu ken uwegh ku yanegh ku Aôndo, ngu sônon sha ci wase.” (Mbaromanu 8:34; Mbaheberu 7:25) Nahan aluer kwasecôghol ne lu a or môm u zamber sha ci na shi taver un ishima ga kpa a za hemen u zamber a orjir la a ishimaveren ér una kure un ijir yô, se je yô hemba doon u se za hemen u lun a jighjigh u nan ser iyange i jirigh i Yehova la ia va kpee a bunde ga!

18. Msen una taver jighjigh wase shin una wase se sha er Aôndo una kure se ijir nena?

¹⁸ Injakwagh i kwasecôghol la tese se ér msen zua kôôsôô a jighjigh u nan shi aluer se za hemen u eren msen yô, kwagh ne una wase se u hendan a akaa a a na jighjigh wase una vôr la. Kpa, aluer se mba eren msen sha ikpamberashe yô, imba msen la una yange jighjigh wase u vôron ga. (Mateu 6:7, 8) Aluer se fa dedoo ser se suur sha Aôndo shi se fa ser msen una wase se u kporom hen a na shi una taver jighjigh wase yô, ishima ia hemba mgbeghan se u eren msen. Shi jighjigh ka kwagh u hange hange u una wase se u zuan a myom yô, ka nahan ve Yesu nenge ér gba u una taver mbahenen nav ishima u “eren msen zumbee” ye. (Luka 18:1; 2 Mbatesalonika 3:13) Kpa sha mimi yô, sea eren msen ser “iyange i vesen i Ter” la i va shin sea eren ga kpa ia va. Kpa ka msen shin jighjigh wase u nan la keng keng una na ve Aôndo una kure se ijir shi se war ityav mbi Aôndo la shin se war ga ze.

19. Se tese ser se na jighjigh ser Aôndo una “kure ijir” sha ci wase nena?

¹⁹ Aluer se umbur yô, Yesu yange pine ér: “Shighe u Wan u or Una va la yô, Una zua a jighjigh u nan ne sha won kpa?” Kanyi i lu mlumun sha mpin u injaa nee? Saan se iyol kpishi u fan ser mbamsen mba mbacivir Yehova umiliôn imôngo sha tar jimin cii ve eren la kua ishimawan ve man ishimataver ve la tese ér mba a imba jighjigh la! Nahan se fatyô u nan mlumun sha mpin u Yesu la ser een. Er tar u Satan ne u lu eren se ican kpoghuloo nahan kpa, se fa dedoo ser Aôndo ‘Una kure ijir sha ci u uicuwan Nav.’

[Footnote]

Baver We Kpa?

• Kanyi i ne ve mbagenev ve undu jighjigh ve u nana?

• Er nan ve se lu a jighjigh u nan taveraa ser iyange i ijirigh i Yehova la ia va?

• Ka atôakyaa a nyi se lu a mi a se za hemen u eren msene?

• Aluer se mba eren msen kpoghuloo yô, una wase se se gbihi jighjigh wase ga nena?

[Study Questions]

[Picture on page 18]

Kanyi se hen ken injakwagh i i er kwagh u kwasecôghol man orjir laa?

[Pictures on page 21]

Ior umiliôn nyian na jighjigh ér Aôndo una ‘kure ve ijir’