Mbampin mba Mbaôron Takerada Ne Ve Pin La

“Ityav mbi iyange i vesen i Aôndo, Uhembanagee,” mbi i yer ér Armagedon la kanyi, man mbia er nyi?—Mpase 16:14, 16.

Ityav mbi Armagedon ka ityav mbi Yesu Kristu, un u Yehova a ne un tôgh ku torough la una nôngo tar sha won cii, una tim mbaihyomov mba Aôndo cii kera yô. I pase ken Bibilo ér “ujijingi mba diabolo mba ve eren uivande” la kohol “utor mba sha tar sha won cii,” mba ve lu mbaihyomov mba Aôndo la “hen ijiir i i yer ken zwa u Heberu er Armagedon la.”—Mpase 16:14, 16.

Ijiir i mbautyaav mban vea kohol her la ka ijiir i kpôô kpôô ga. Inja i iti i Armagedon ér “Uwo u Megido.” (Mpase 16:16) Nahan kpa, ma uwo môm tsô ngu mba yer ér Uwo u Megido ga. Shi “utor mba shin tar man akumautya a ve” cii vea fatyô u kohol hen ijiir i môm ga. (Mpase 19:19) Nahan, “ijiir” la ka mhendan u utor mba mbapatii man mba ve suen ve la cii vea hendan kwagh a Yehova man “akumautya a Sha,” a Yesu Kristu u a lu “Tor u utor man Ter u uter,” una hemen a la.—Mpase 19:14, 16.

Ishember i Armagedon la i zua sha gar ugen ken Iserael u tsuaa la, i yilan gar la ér Megido. Gar ne lu sha ityoughkitaregh ki Uwo u Karmel, mbakpengav man mbautyaav kpishi karen gbenda her. Shi lu gar u í hemban ityav her yô. U tesen ikyav yô, orjir Baraki yange hemba akumautya a ageegh a Mbakanaan, a Kurutya Shisera hemen a la hen kpe u “mngerem ma Megido.” (Mbaajiriv 4:12–24; 5:19, 20) Lu hen ijiir shon i môm, orjir Gidion kpa hemba Mbamidian ityav ye. (Mbaajiriv 7:1–22) Bibilo kar ityav mbi Armagedon, mbi mbi lu van la sha gar u Megido sha u taver se ishima ér Aôndo una tindi Wan na una va tim mba ve hendan kwagh a na la cica cii.

Ityav mbi Armagedon mbin mbia er nyi? Mbia bee a nyityô hôngor man ifer cii. Shi mbia bugh uumace gbenda u zuan a averen a i gbe je ve lu a zua a mi ga yô. (Mpase 21:1–4) Tartor u Aôndo u ua hemen sha dooshima la ua gema tar cii ua hingir paradiso, mbaperapera vea lu ken u gbem.—Pasalmi 37:29.