Ember Uma Sha U Cian Yehova

“Cia nen TER, ne uicighan Nav, gadia kwagh banen mba ve cie Un la ga!”—PASALMI 34:9.

1, 2. (a) Mbaaduav tese kwagh u mcie u cian Aôndo sha igbenda kposo kposo nena? (b) Ka mbampin mba nyi se tôv sha mi hegene?

 MBAHEMENEV mbaaduav ka ve shi anger ior ér ve cia Aôndo gayô una va nande ve ken igyamusu gbem sha won. Kpa Ruamabera gema lumun a ityesen ne ga. Ityesen ne zua sha kwagh u Bibilo i tese ér Yehova ka Aôndo u dooshima man u ôron ijir sha mimi la ga. (Genese 3:19; Duteronomi 32:4; Mbaromanu 6:23; 1 Yohane 4:8) Mbahemenev mbaaduav mbagenev yô mba tesen ior ér ve cia u eren kwagh u vihin Aôndo ishima ga. Ka ve de ve tesen ér Aôndo we kwagh u ior ve eren la ikyo ga, aluer ka nyi je or lu eren kpa una lumun nan. Ityesen ne kpa Bibilo lumun i ga.—Mbagalatia 5:19-21.

² Sha kpôô yô, Bibilo wa se kwagh ér se cia Aôndo. (Mpase 14:7) Kwagh u Bibilo i kaa ér se er ne gema va a mbampin ken asema a ase. Er nan ve Aôndo u dooshima a soo ér se cia unu? Aôndo soo ér se cia un nena? Mcie u cian Aôndo una wase se nena? Se nenge sha mbampin mban shi se seer timen sha Pasalmi 34 kpaa.

Se Cia Aôndo sha ci u Nyi?

3. (a) U nenge tindi u i we se ér se cia Aôndo la nena? (b) Er nan ve i saan mbacian Yehova iyolo?

³ Er Yehova a gbe akaa cii shi a lu Tor u Hembancii u sha man tar yô, a kuma u se cia un. (1 Peteru 2:17) Nahan kpa, mciem man ka ma cian ma aôndo u vihin tu, gbidyen ikyarkyase iyol gbir gbir ga. Kpa ka u cian Yehova, nan un icivir sha ci u ian i a lu sha mi la. Shi ka u cian u eren kwagh u vihin un ishima kpaa. Mcie u cian Aôndo ka ijungwen shin iyol i kunden  gbir gbir sha mcie ga, kpa ka kwagh u dedoo, u nan or mkpeyol. Yehova ka “Aôndo u sar sar,” nahan a soo ér uumace ve ember uma. (1 Timoteu 1:11, NW ) Nahan kpa, saa se eren kwagh u Aôndo a soo la ve se ember uma ye. Ior kpishi gema aeren a ve sha er vea er ishima i Aôndo yô. Mkaanem ma ngise orpasalmi Davidi ôr, ma lu heen ne ma kuren sha mba ve gem aeren a ve la cii, a kaa wener: ‘Bende, nenge nen, TER ka u doon je; saan or u nan suur sha a Na la, iyol. Cia nen TER, ne uicighan Nav, gadia kwagh banen mba ve cie Un la ga!’ (Pasalmi 34:8, 9) Kwagh u doon tsung u lun gbem sha won môm tsô ban mbacian Yehova ga, sha ci u ve ya ikyar a Aôndo.

4. Davidi man Yesu yange ve kaa ér Yehova una za hemen u koson mbacivir un nena?

⁴ Davidi yange na ior nav icivir sha u yilan ve ér “uicighan” mba Aôndo, gadia sha shighe na la ve lu icighan ikyurior i Aôndo. Shi yange ve wa uma ve ikyo ga, ve dondo Davidi. Er ve lu yevese Tor Saulu nahan kpa, Davidi na jighjigh ér Yehova una za hemen u koson ve. Nahan a nger ér: ‘Agumabegha je kpaa kwagh ka a ban a, ijen i kôr a; kpa mba ve keren TER yô, ma kwagh u dedoo una ban ve ga.’ (Pasalmi 34:10) Yesu kpa yange ôr kwagh nahan a mbadondon un.—Mateu 6:33.

5. (a) Mbadondon Yesu kpishi lu unô ioro? (b) Kanyi kwagh Yesu yange wa se sha u tesen or u i gbe u se cia nanaa?

⁵ Ior kpishi mba yange ve ungwan Yesu la lu Mbayuda mba ve lu atsanaior, ve lu sha kwar ikyaa ga yô. “Mhôônom kôr [Yesu] a ve tsung, sha ci u i tumbul a ve, ve sambe wuee er iyôngo i i lu a orkuran i ga nahan.” (Mateu 9:36) Atsanaior ne fatyô u taver ishima dondon Yesu kpa? Yange gba u vea lu a mcie u cian Yehova, a lu ior ga, sha er vea kôr cio u dondon Yesu yô. Yesu kaa ér: “De cie nen mba ve woo iyol kpa ken masejime yô, ve kera lu a ma kwagh ugen u vea er ga la ze. Kpa Mo Me kaa ne u alu u ne cia Un yô; cia nen Un u Una wua man shi Una fatyô u gbihin ken gehena kpaa la; M ngu kaan ne, ka Wen cia nen ye. Mba teen mbaatsator utaan sha toro uhar gaa? Mô ve môm kpaa i hungul Aôndo ga. Man shi ice yen i sha ityou je kpaa i ôr i cii. De cie nen ga; mbaatsator kpishi je kpaa ne hemba ve inja.”—Luka 12:4-7.

6. (a) Ka mkaanem ma Yesu ma nyi ma taver Mbakristu asema? (b) Er nan ve Yesu a hembe veren se ikyav i dedoo sha kwagh u mcieaôndo?

⁶ Zum u mbaihyomov ka vea hendan a mbacian Yehova ér ve de u civir Aôndo yô, ve umbur kwaghwan u Yesu ne, a kaa ér: “Hanma or u nana pasem sha ishigh ki iorough, Wan u or kpaa Una pase nan sha ishigh ki mbatyomov mba Aôndo. Kpa u nana nyiman Mo sha ishigh ki iorough yô, á nyiman nan sha ishigh ki mbatyomov mba Aôndo kpaa.” (Luka 12:8, 9) Mkaanem man taver Mbakristu asema kpen kpen, hemban cii je yô mba ve lu sha ajiir a i cir tom u mcivir u mimi la. Nahan ka ve za hemen u wuese Yehova ken mbamkombo vev mba Mbakristu man ken tom ve u pasen kwagh la sha kwaghfan. (Aerenakaa 5:29) Yesu ver se ikyav i hemban doon cii sha kwagh u “mcieaôndo.”  (Mbaheberu 5:7) I ôr kwaghôron u profeti sha a na ér: “Jijingi u TER Una lu sha a Na, ka Jijingi . . . u cian TER. Á doo Un iyol a mcie u cian TER la.” (Yesaia 11:2, 3) Nahan yô, Yesu kuma u una tese se mbamtsera mba mcie u cian Aôndo a ve or a mi la gbing gbing je.

7. (a) Mbakristu mba vengese mlehe u a ze kwagh môm a u Davidi yange lôhô ior nav la nena? (b) Mbamaren vea dondo ikyav i dedoo i Davidi la nena?

⁷ Hanma or u nan dondo ikyav i Yesu shi nan lumun atesen a na yô, nan ngu vengese mlehe u Yesu a lu lôhôn ior er Davidi kpa yange lôhô ior nav nahan, wener: ‘Va nen, ne mbayev, va ver nen ato her a mo; me tese ne u cian TER.’ (Pasalmi 34:11) Davidi yila ior nav mbara ér “mbayev” kpa lu shami, gadia ve nengen un ér ngu orhemen ve. Nahan Davidi wase mbadondon un mban ér ve cian Aôndo sha er vea lu ken mzough shi Aôndo kpa una lumun ve yô. Kwagh ne ka ikyav i dedoo hen mbamaren mba ve lu Mbakristu la kpen kpen! Yehova na ve tahav sha ônov vev mba nomso man mbakasev ér ve “yese . . . ve sha mkôôm man kwaghwan u Ter.” (Mbaefese 6:4) Mbamaren ka vea ôron akaa a ken jijingi a ônov vev shi vea henen Bibilo a ve hanma shighe yô, ve wase ve u cian Yehova sha er a kpe ve iyol yô.—Duteronomi 6:6, 7.

Er Se Cian Aôndo Yô

8, 9. (a) Er nan ve i lu kwagh u doon kpishi u eren akaa a tesen ér se mba cian Aôndo? (b) U kuran zwa wase la wa nyi man nyi kere?

⁸ Er se vande ôron nahan, aluer se mba cian Yehova kpa kwagh ne una yange se iember ga. Davidi pine wener: ‘Ka anti je uma a sar nan, man nan soo u tsan sha won, sha er nana nenge a akaa a dedoo?’ (Pasalmi 34:12) Sha mimi yô, mcie u cian Yehova ka kwagh u vesen u una wase se u tsan sha won, nengen a akaa a dedoo yô. Nahan kpa ka kwagh u ican u kaan ér, “M cie Aôndo” ga. Kpa gema ka kwagh u ican kpishi u tesen sha ieren yase ser se mba cie Aôndo. Nahan, Davidi za hemen pase se er se cia Aôndo yô.

⁹ ‘Kura zwa wou u̱ de er kwaghbo ga, man ityumbuzwaagh you kpaa, i̱ de er kwagh u icughugh ga.’ (Pasalmi 34:13) Jijingi u Aôndo yange mgbegha apostoli Peteru ter mkaanem ma ken Pasalmi 34 man zum u a wa Mbakristu kwagh ér ve doo ayol a ve er ka anmgbianev nahan a bee kera la. (1 Peteru 3:8-12) Aluer se mba kuran zwa wase ser u̱ de er kwaghbo ga yô, a gba u se palegh anger. Kpa hanma shighe yô se ôron kwagh u una maa a maa mbagenev yô. Shi se taver ishima sha u ôron kwagh sha mimi kpaa.—Mbaefese 4:25, 29, 31; Yakobu 5:16.

10. (a) Pase inja i kwagh u a lu u den ifer yô. (b) U eren akaa a dedoo wa nyi man nyi kere?

¹⁰ ‘De ifer, eren akaa a dedoo, ker bem, zende un ityô kpaa.’ (Pasalmi 34:14) Se mba palegh akaa a Aôndo a vende a la, er idya man u nengen ufoto mbaijimbagh man iv man akombo a civir man ipila man msôrom ma hunden kua u man mcimbim ma bov nahan. Shi se mba palegh iemberyolough i ior ve eren akaa a hôngorough angan la kpaa. (Mbaefese 5:10-12) Kpa se mba gem se mba eren akaa a dedoo a shighe wase. Kwagh u hemban doon u se er yô, ka u pasen ior kwagh u Tartor hanma shighe shi geman ve ser ve hingir mbahenen sha er vea zua a myom yô. (Mateu 24:14; 28:19, 20) Akaa a dedoo agen a se er yô, ka u wan agoyol sha mbamkombo asev mba Mbakristu shi zan ve shi eren iyua sha u suen tom u pasen kwagh tar sha won cii shi nengen sha Iyou i Tartor man Mbakristu mba ve lu mbaatsanev la kpaa.

11. (a) Davidi er sha mkaanem nam ma yange ôr sha kwagh u keren bem la nena? (b) U ‘ker bem’ ken tiônnongo nena?

¹¹ Davidi ver se ikyav i dedoo sha kwagh u keren bem, zenden un ityô. Yange zua a ian kwa har i ma wua Saulu yô. Kpa sha ikwa ne cii, Davidi palegh ipila. Ken masejime yô, a ôr kwagh a Saulu sha icivir sha er una nôngo bem a lu yô. (1 Samuel 24:8-11; 26:17-20) Aluer kwagh ngu eren ken tiônnongo u una vihi bem u tiônnongo yô ka nyi se eree? Se “ker bem, [se] zende un ityô kpaa.” Nahan, aluer se nenge ser iyongo ngi se a or u nan jighjigh a vese imôngo yô, se er kwagh u Yesu yange wa se ne, ér: “Za vande himen a anngôu.” Se eren nahan yô,  maa se za hemen a akaa agen a ken mcivir u mimi a se lu eren la.—Mateu 5:23, 24; Mbaefese 4:26.

Mcie u Cian Aôndo Ve a Mbamtsera Mgbeghaa Je

12, 13. (a) Ka mbamtsera mba nyi mbacian Aôndo ve zough a mi nyiana? (b) Ka injar i vesen i nyi mbacivir Aôndo sha mimi ve sôôn zuan a mini?

¹² ‘Ashe a TER nga sha mbaperapera, A kegh ato sha u ungwan myer ve kpaa.’ (Pasalmi 34:15) Akaa a Aôndo yange er a Davidi la tese ér mkaanem man ka ma mimi. Se ember nyian kpishi shi ishima yase ngi bem bem sha ci u se fa ser ashe a Yehova nga sha a vese. Se na jighjigh ser hanma shighe yô una kure mbamgbe asev, a lu shighe u ican i tser se kpoghuloo je kpaa. Se fa ser, er i tsengeôron nahan, ica a gba ga tsô Gogi u Magogi una ta num sha mbacivir Aôndo sha mimi cii, shi vea tagher a “iyange i TER i vesen i cieryol” la kpaa. (Yoel 2:11, 31; Esekiel 38:14-18, 21-23) Nyityô kwagh i se tagher vanger a mi hen shighe la cii kpa mkaanem ma Davidi man ma a kure sha a vese, ma kaa ér: ‘Ve yila; TER ungwa ve, A dugh ve ken atsan a ve cii.’—Pasalmi 34:17.

¹³ Hen zum la se nenge er Yehova una kende a iti na i hemban la sha yô, nahan a doo se je a gande! Se hemba cian Aôndo hen shighe la cii shi se na un icivir tsung, kpa mba ve hendan a na yô vea kpe ku u kunya. ‘TER tsughur ishigh a mbaerenkwaghbo, sha u Una tim m-umbur u ma i umbur ve sha won la kera yô.’ (Pasalmi 34:16) Shighe u Aôndo una yima se sha gbenda u vesen una nyôr a vese ken tar u perapera u he la se zua a injar i vesen je a lu kwagh u ôron ga!

Uityendezwa Mba Ve Wasen Se u Wan Ishima Yô

14. Ka akaa a Ruamabera a er a nyi nahan aa wase se u wan ishima a atsana?

¹⁴ Kpa hegen u se lu ken tar u u saa ishe cica cii shi tswam kpa u ngee ker ne yô, saa se wa ishima keng ve se za hemen u ungwan imo i Yehova ye. Mcieaôndo ka kwagh u vesen u una wase se u ungwan imo i Aôndo yô. Er se lu ken ashighe a ican yô, mbacivir Yehova mbagenev tagher a atsan a vihin kpishi a ka a na asema a vihi ve shi ve hingir gbuu kpaa yô. Nahan kpa, ve fa ér aluer ve suur sha Yehova yô, una wase ve u wan ishima. Mkaanem ma Davidi ma dondon man ka ma nan se ishimasurun i mimi. Ma kaa ér: ‘TER ngu ikyua a mba asema a vihin ve la, yem mba ve lu a ishima i zamber yô.’ (Pasalmi 34:18) Davidi shi za hemen ôr kwagh u taver se asema wener: ‘Atsan a orperapera ngee, kpa TER ka A dugh nan ken a cii.’ (Pasalmi 34:19) Aluer atsan tser se nan nan kpa, Yehova ngu a agee a yiman se.

15, 16. (a) Ka ibaver i vihin i nyi Davidi yange ungwa shighe u nger Pasalmi 34 bee laa? (b) Kanyi ia wase se u wan ishima a ahendana?

¹⁵ Davidi yange ngeren a nger Pasalmi 34  been nahan maa a ungwa kwagh u er ior mba ken gar u Nobu, mba Saulu wua ve cica cii kua upristi kpishi la. Nahan, a shi nan kpa Davidi ure kpishi, gadia a fa ér ka er un yevese Saulu un kar ken gar u Nobu la ve ishima i vihi un a er kwagh nahan ye! (1 Samuel 22:13, 18-21) Se fa keng ser, Davidi gema hen Yehova ér a wase un, nahan zua a msurshima, sha ci u a fa wener mba va ‘nderen mbaperapera.’—Aerenakaa 24:15.

¹⁶ Se kpa ishimaverenkeghen i mnder u shin ku la ngi taver se ishima nyian. Se fa ser mbaihyomov asev vea fatyô u eren se kwaghbo u tsan gbem sha won ga. (Mateu 10:28) Davidi kpa yange na jighjigh nahan, ka nahan ve a kaa ér: ‘A kura akuhe a orperapera cii, môm môm kpaa u sombo ga’ ye. (Pasalmi 34:20) Mkaanem ma ken ivur ne yange ma kure sha Yesu kpôô kpôô. Er i na Yesu ican tsung, i wua un nahan kpa, i “sombo” kuhe na môm tsô kpaa ga. (Yohane 19:36) Kpa a fatyô u ôron kwagh u i nger ken Pasalmi 34:20 ne sha a vese kpaa. Ivur ne taver se ishima ér aluer ka nyi ahendan je Mbakristu mba i shigh ve mkurem man akar a ve, a a lu “iyôngo igen” la a tagher a mi je kpa, or môm nana fatyô u bulan ve gbekeke ga. U ôron kwagh ne sha ikyav yô, a fatyô u sombon akuhe a ve mayange ga.—Yohane 10:16.

17. Ka nyi ia va tser mbaihyomov mba ior mba Yehova, mba ve gem asema ga laa?

¹⁷ Kpa gema mbaaferev yô kwagh ve kaha. Ica a gba ga tsô vea sunda kwaghbo u ve lee la. ‘Kwagh u bo una wua mbaaferev; man shi mba ve ker mbaperapera ihyom yô, á na ve ibo.’ (Pasalmi 34:21) Mba ve hendan a ior mba Aôndo cii vea tagher a kwaghbo u hemban vihin cii. Sha shighe u m-ande u Yesu Kristu la, vea “ya mtsaha u mtim u tsôron.”—2 Mbatesalonika 1:9.

18. Se fatyô u kaan ser i yima “zegeikpelaior” kera kpaa nena, man kanyi ia er ve ken hemene?

¹⁸ Davidi mase kuren pasalmi na ne sha mkaanem ma taver se ishima man: ‘TER ngu paan uma u mbayev Nav; mba ve suur sha a Na cii yô, á na ve ibo ga.’ (Pasalmi 34:22) Tor Davidi yange ôr kwagh ken mkur u mtemtor na u anyom 40 la wener: ‘Aôndo yima uma wam ken atsan am cii.’ (1 Utor 1:29) Ica a gba ga tsô mbacian Yehova vea hide a kenger ken ijime er Davidi nahan, vea ember er Yehova a yem ve, ve kera lu a imoshima i bo sha ci u asorabo a ve ga man er a yem ve sha ikyev i ameen a ve tagher a mi cii la yô. Mbakristu kpishi mba i shigh ve mkurem yem sha hegen. “Zegeikpelaior” ngi duen ken akuraior cii va kohol asande a anmgbianev mba Yesu mba ve mase shin la sha u civir Aôndo, nahan Yehova lumun ve. Kwagh ngu nahan sha ci u ve na jighjigh ér awambe a Yesu a hee inya la nga a tahav mbu yiman uumace. Sha shighe u Anyom Dubu a Mtemtor u Kristu la, nagh ku ipaa kura ku a wase ve sha gbenda u vesen, nahan vea hingir vough.—Mpase 7:9, 14, 17; 21:3-5.

19. Mba ve lu “zegeikpelaior” la kange ishima ér vea er nyi?

¹⁹ Er nan ve i lu u “zegeikpelaior” i mbacivir Aôndo vea zua a mbamtsera mbanaa? Ka sha ci u ve kange ishima ér vea za hemen u cian Yehova, vea civir un a mciem shi vea ungwan imo na sha icivir tsung. Sha kpôô yô, mcie u cian Yehova una na uma wase una doo hegen je shi una wase se se “kôr ave sha uma u a lu uma jim la”—ka uma u tsôron u se zua a mi ken tar u he u Aôndo je la.—1 Timoteu 6:12, 18, 19; Mpase 15:3, 4.

Ú Umbur Kpa?

• Er nan i doo u se cia Aôndoo, man inja i u cian un yô ér nyi?

• Doo u mcieaôndo una bende a ieren yase nena?

• Aluer se mba cian Aôndo yô se zua a injar nena?

• Ka uityendezwa mba nyi vea wase se u wan ishima?

[Study Questions]

[Picture on page 28]

Mbacian Yehova mba eren kwagh sha kwaghfan sha ajiir a i cir tom ve la

[Picture on page 30]

Kwagh u hemban doon u se er a mbawanndor a vese yô ka u pasen ve loho u dedoo u Tartor