Er Se Fa Mcivir U Mimi Yô

UKWAGHAÔNDO kpishi senge ér ityesen ve due hen Aôndo. Nahan yô, doo u se wa mkaanem ma Yohane, apostoli u Yesu ôr ne ikyo. A kaa ér: “Ne mbadoon mo ishima, de kera gbe nan nen hanma jijingi jighjigh tsô ga, kpa kar nen ujijingi, shin ka her Aôndo ve dugh jeou? Gadia mbaprofeti mba aiev kpishi due, mba zenden sha won.” (1 Yohane 4:1) Kpa se er nan ve se kar ma kwagh se fa una due hen Aôndo yôô?

Hanma kwagh u a dugh hen Aôndo di tsô yô a tese aeren a na, hemban je yô ieren na i vesen la, ka dooshima je la. U tesen ikyav yô, tahav mbu se lu a mi mbu ungwan ihyuma, er ihyuma i ahuuv man uimondon shin bredi u i sember kaan la nahan cii tese ér se doo Aôndo ishima. Ashe a se nengen kwagh, er mdugh u iyange shin kokombo u doonashe shin ahan a wanye u kiriki la nahan cii tese ér se doo Aôndo ishima. Tahav mbu se lu a mi mbu ungwan ityogholough mbi doon man amo a annyonov shin imo i or u doon se ishima la kpa tese ér se doo Aôndo ishima. Er se yen nahan kpa, mlu wase jimin cii tese dooshima u Aôndo. Ka nahan ve ka sea na or kwagh yô i saan se iyol ye, vough er Yesu yange ôr nahan, wener: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Ka i doo se u tesen mbagenev dooshima sha ci u i gba se “sha inja i mlu u Aôndo.” (Genese 1:27) Yehova ngu a aeren kposo kposo, nahan kpa ka dooshima a lu ieren na i hemban cii ye.

Gba u takerada u ú dugh hen Aôndo yô, ua tese dooshima na. Ukwaghaôndo mba tar ne mba a ityakerada i ngise kpishi. Ityakerada ne ôr kwagh u dooshima u Aôndo tsembelee kpa?

Sha mimi yô, ityakerada i ngise i ukwaghaôndo kpishi ôr kwagh kpuaa tseegh u pasen er se doo Aôndo ishima yô shin er Aôndo una doo se ishima yô. Nahan yô, ior umiliôn kpishi ka vea pine ér, “Hii nan ve akaa a Aôndo a gbe la a tese ér se doo un ishima, kpa a gem a de ér se ya icanaa?” kpa ve zua a mlumun ga. Ityakerada i ukwaghaôndo i ngise cii, ka Bibilo tseegh i pase kwagh u dooshima u Aôndo vighe vighe ye. Shi i̱ tese se er se eren kwagh a mbagenev sha dooshima yô.

Takerada u Ú Er Kwagh u Dooshima La

Bibilo i i lu Mkaanem ma Aôndo la pase ér Yehova ka “Aôndo u dooshima.” (2 Mbakorinte 13:11) Bibilo pase er dooshima yange mgbegha Yehova gba uumace a angev iyol shio shi lu u vea kpe kpaa ga yô. Kpa er ve hemba Aôndo ato yô, ican i yan maa hii. (Duteronomi 32:4, 5; Mbaromanu 5:12) Yehova yange er kwagh sha er una sôr mzeyol ne yô. Mkaanem ma Aôndo kaa ér: “Gadia tar ne doo Aôndo  ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yohane 3:16) Icighanruamabera shi seer ôron se kwagh u dooshima u Aôndo ér á ver gomoti u vough, Yesu ngu hemen gomoti shon sha er una hide a va uumace mba ungwan imo i Aôndo a bem yô.—Daniel 7:13, 14; 2 Peteru 3:13.

Bibilo sav ôron kwagh u i gbe u uumace vea er yô, ér: “Ter Aôndo wou A̱ doo u ishima a ishima you cii man a uma wou cii man a mfe wou cii. Ngun ka tindi u tamen man ka u hiihii kpaa. Man u sha uhar u a lu er un yô, or u nan we ndor a we yô, nana̱ doo u ishima er we iyol you nahan. Ka atindi ahar ne je man atindi . . . [a] har sha mi ye.” (Mateu 22:37-40) Bibilo kaa ér ka Aôndo yange mgbegha ior ve nger i ye. Er Bibilo i tese aeren a na wanger wanger yô, se na jighjigh ser ka hen “Aôndo u dooshima” Bibilo i dugh ye.—2 Timoteu 3:16.

Nahan kwagh ne una wase se u fan takerada u ngise, u u dugh hen Aôndo mimi mimi yô. Dooshima shi ka a wase se u fan mbacivir Aôndo sha mimi, gadia mba tesen mbagenev dooshima er Aôndo kpa a eren nahan.

Er Se Fa Mba Aôndo a Doo Ve Ishima Yô

Mba ve soo Aôndo sha mimi cii mba kposo, hemban je yô hegen u se lu ken shighe u Bibilo i kaa ér ka “ayange a masejime” ne. Ior “mbawan ayol a ve ikyo tseegh man mba inyaregh ki doo ve ishima . . . man mba iember i iyolough i hembe doon ve a Aôndo” la mba hemban ngeen a ngee.—2 Timoteu 3:1-4.

Ú fa ior mba Aôndo a doo ve ishima nena? Bibilo kaa ér: “Ka dooshima u Aôndo ne, ka u se̱ kuran atindi a Na.” (1 Yohane 5:3) Aôndo ka una doo ior ishima yô, dooshima ne a mgbegha ve ve kuran atindi a Bibilo. U tesen ikyav yô, Mkaanem ma Aôndo ma a atindi sha kwagh u yavaor man ivaa i eren. Ka mba ve vese ayol a ve tseegh i gbe u vea yaven ayol a ve ye, shi ivaa ka kwagh u gbekeke. (Mateu 19:9; Mbaheberu 13:4) Zum u kwase ugen ken tar u Ishpania, u a hen kwaghaôndo ken makeranta za mkombo u Mbashiada mba Yehova kumba lu henen atindi a Bibilo a sha kwagh u aeren a dedoo yô, a kaa ér: “Akaa a yange i ôr ken mkombo ne sha u tan iwanger sha Bibilo kua shi mzough u ior mban ve lu a mi hen atô ve la, man inja ve i doon tsung kua aeren a ve a dedoo la taver mo ishima zum u m due mkombo ne m lu hiden yô.”

Ka Aôndo tseegh Mbakristu mba mimi ve soo kwagh na ga, mbawanndor a ve kpa doo ve ishima. Nahan kwagh ne kpa una wase se u fan Mbakristu mba mimi. Tom u vesen u ve eren yô, ka u ôron mbagenev kwagh u Tartor u Aôndo. Ka Tartor ne tseegh ua bee a mbamzeyol mba uumace ye. (Mateu 24:14) Mba wasen mbawanndor a ve ér ve fa Aôndo sha er vea zua a mbamtsera mba been mayange ga yô, man ka cii kwagh u una va ve a mbamtsera mban je ne. (Yohane 17:3) Igbenda igen kpa ngi i Mbakristu mba mimi ve tesen dooshima yô. Mba ne mba ican i tser ve la iwasen. U tesen ikyav yô, zum u tar tenger ken tar u Italia vihi akaa kpishi yô, ipipaabaver igen ken tar la kaa ér Mbashiada mba Yehova “wase hanma or u kwagh a er nan cii kua mba ve eren kwaghaôndo ve ga kpaa.”

Aôndo doo Mbakristu mba mimi ishima, kua mbawanndor a ve, shi ve doo ayol a ve kpaa. Yesu kaa ér: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”—Yohane 13:34, 35.

Dooshima u a lu hen atô u Mbakristu mba mimi ne kaha kposoo? Kwase ugen u yesen ônov, mba yer un ér Ema, na jighjigh nahan. Kwase ne eren tom ken gar u La Paz, ken tar u Bolivia. Ieren i mbavia a mbavia i ior mba ken gar ne na yô kwagh fe gban mbanyarev a atsanaior ga. Kwase ne kaa ér: “Kwa u hiihii u m za mkombo u Mbashiada mba Yehova la, m nenge gumor ugen u wuha iyol tsembelee yô, tema lu lamen a kwase ugen u ken agar. Er i lu je m ngu a nenge kwagh nahan ga. Hii hen shighe la je, m fa mer ka ior mba Aôndo je ne.” Gumkwase ugen ken tar u Brazil, mba yer un ér Miriam, un kpa kaa wener: “Yange m saan sha ishi ma shighe môm ga, mea lu vea tsombor wam je kpaa.  Lu hen atô u Mbashiada mba Yehova m hii nengen a dooshima u mimi ye.” Orhemen gbaatom u nan abaver u ityôugh ki televishen ki gen ken tar u Amerika nger wener: “Aluer ior kpishi mba eren uma er kwaghaôndo wen a tese nahan yô, tar u Amerika ua lu er u lu nahan ga. M ngu ortôônabaver u m fe mer i tim nongo wen ne sha dooshima man sha jighjigh u ne ne Orgbanakaa kpoghuloo la yô.”

Ker Mcivir u Mimi

Mba fe mcivir u mimi sha dooshima. Yesu yange pase wener aluer or zua a mcivir u mimi yô ka inja er nan zua a gbenda u vough nan ngu zan sha u nahan. Ka gbenda ne tseegh or nana zende sha u ve nana zua a uma u tsôron ye. Yesu kaa ér: “Nyôr nen hen hunda u hogholoo, gadia gbenda u zan ken mtim la gbangese, ngu bele bele kpaa, man ior mba ve nyer her yô, ve ngee tsô. Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô.” (Mateu 7:13, 14) Ka nongo u Mbakristu mba mimi u lu zenden vea Aôndo imôngo sha gbenda u mcivir u mimi ne ye; nongo ne ngu môm tseegh. Nahan yô, doo u ú gba eren nyityô kwaghaôndo u sha ishima you tsô ga. Aluer u zua a gbenda ne, u ngu zenden sha u yô, ka gbenda u hemban doon je u zough a mi ye, gadia ka gbenda u dooshima.—Mbaefese 4:1-4.

Aluer u ngu zenden sha gbenda u mcivir u mimi ne yô u zua a iember je a gande! A lu inja er u ngu zenden vea Aôndo nahan. Ú hen kwaghfan hen Aôndo kua dooshima kpaa, nahan kwagh ne una wase u u tema kundu kundu a mbagenev. Aôndo shi una pase u ityôkyaa i se lu uma shi u kav uityendezwa nav shi u lu a ishimaverenkeghen kpaa. Nahan mayange je u vaa afanyô wer u zua a mcivir u mimi yum ga.

[Picture on page 3]

Ken ityakerada i ngise i ukwaghaôndo cii, ka Bibilo tseegh i pase se dooshima u Aôndo ye

[Pictures on page 5]

Se fa Mbakristu mba mimi sha dooshima ve