Iyua I Tsôron I Orgban Se A Ne Se Yô

ITYOUGH ki Bibilo ki hiihii kira ter akaa a mbatôvonkwaghfan u sangen yeke ve ne jighjigh ér saa aa lu ve uma una fatyô u lun shin tar wase kua ityar igen i í ningir iyange la. Nahan akaa a ityough kin ki ter ne kpiligh we iyol ga he? Man akaa shon yô kanyi?

Cii man uma a lu yô, saa mngerem ma a lu, vough er i ôr ken Genese 1:2 nahan. Shi gba u tar ua tser wese wese sha er mngerem ma ma lu shin u la ma a gba akpoo ga yô. Sha nahan yô, gba u tar ua lu ikyua ikyua a iyange yum ga shi ua lu ica a i̱ yum kpaa ga. Takerada u Genese ôr kwagh u iyange acin imôngo man tom u i eren sha tar yô.

Gba u tar ua lu a ahumbe nungwa nungwa ken ikyasenahumbe ve ior vea fatyô u lun shin u ye. I ôr kwagh u injaa ne ken Genese 1:6-8. Imendenev mbi mbi lu sha tar, i er kwagh u mbi ken Genese 1:11, 12 la kpa wase sha u seer nan se ahumbe a se ôôn ne. Er i ôr ken Genese 1:9-12 nahan, gba u tareghnyaagh ua lu sha ajiir agen sha er uzendenya vea fatyô u lun uma sha mi yô. U masen kuren yô, gba u tar wase kua ityar igen i í ningir iyange la ia kpeese akuma akuma shi ia lu sha ihiange i i vough sha er inyom ia aven shi fam ua gbaan yô. Tar wase ne yô, ka tahav mbu uwer u lu a mi u urugh akaa tilen a mi ijiir i môm la mbu ne ve u kpeese ye. I ôr kwagh u uwer man iwasen i u ken Genese 1:14, 16.

Er Mose lu a mfe u kwaghfan u sangen yeke ga nahan kpa, lu nyi i wase un ve ôr akaa a i ter sha heenee? Yange Mose gba fan fan iwasen i akaa ne shighe u mbakov na lu a zua a imba mfe ne ga la tsô shinii? Ka nahan ga, ka Orgban u sha man tar yange na un mfe la ye. Se fatyô u nengen a mimi u kwagh ne sha gbenda u i ôr akaa a kwaghfan u sangen yeke ken takerada u Genese la.

Bibilo tese ér akaa a kpilighyol a se nengen a mi sha won cii, i gba á a awashima je. I ôr ken Pasalmi 115:16 ér: “Usha ka Usha mba TER, kpa tar yô, A na ônov mba iorov.” Shi i ôr ken Pasalmi ugen ér: “U tim tar sha amagh a u, sha er u̱ de tenger mayange ga yô.” (Pasalmi 104:5) Aluer ka Orgban se a gbe sha man tar u doonashe ne kua akaa a a lu shin u cii yô, se na jighjigh ser ngu a tahav mbu sôron u. Inja na yô, we kpa u fatyô u suur sha Aôndo vangertiôr wer una kure ityendezwa na i kpilighyol i a kaa ér: “Mbaperapera vea ya dyako u tar, vea lu ken u gbem” la. (Pasalmi 37:29) Jighilii yô, Aôndo ‘gba tar ér u̱ lu gbilin dang ga,’ kpa “A maa u sha er” uumace mba ve tese iwuese sha akaa a a er la ve “tema sha u” gbem sha won yô.—Yesaia 45:18.

I pase se ken Ruamabera ér, Yesu yange va shin tar ér una va wase se se lu a mkav sha kwagh u Aôndo shi una pase se awashima na u va nan uumace mba ungwan tindi uma u tsôron la. (Yohane 3:16) Se na jighjigh ser, ica a kera gba ga tsô Aôndo una “tim mba ve lu vihin tar la” kera, kpa ior mba ken akuraior a sha tar cii, mba bem a doo ve ishima shi ve ne jighjigh a gbenda u myom u Aôndo a ver la yô vea war. (Mpase 7:9, 14; 11:18) Nenge er uma una doo hen shighe u ior vea lu fan akaa seer shi ember akaa a doon tsung a Aôndo a gbe la gbem yô!—Orpasenkwagh 3:11; Mbaromanu 8:21.

[Picture Credit Line on page 6]

NASA photo