Ior Mba Keren Akaawan A Injaa

Me nenge sha iyol yam nena?

Me er nan ve tsombor wam ua hemba lun saan saana?

Kanyi me er ve a dem tom ga?

I LU nahan u pine mpin nahan vee? Man u shi zua a mbamlumun mba wasen we je kpa? Hanma inyom yô, ka i gber ityakerada kposo kposo i kuma er 2,000 nahan sha u wan ior kwagh sha akaa ne kua agenegh kpaa. Hanma inyom yô, ior mba ken tar u Ingila ka ve vihi inyaregh ki kuman er udola umiliôn 150 nahan sha u yamen ityakerada i i lu a akaawan sha kwagh u or a er ve nana nôngo a mbamzeyol mba uma yô. Ken inyom môm tseegh, ka i zua a inyaregh ken tar u Amerika ki kuman er udola umiliôn 600 nahan sha ityakerada i wasen ior u sôron mbamzeyol vev. Ka we tswen u lu keren akaawan sha er u nôngo a mbamzeyol mba uma ga.

Or u ngeren takerada ugen ôr kwagh sha kwagh u akaawan a a lu ken ityakerada kpishi yô, wener: “Ityakerada i he igen kpishi ka i lu kwagh u ior ve vande ngeren la ka i hide i kimbir ye.” Sha mimi yô, akaawan a ken ityakerada ne kpishi ka i hide i kimbir kwagh u a lu ken takerada u u hembe tsan sha won cii la. Ka takerada shon i hembe samber a mi sha tar cii ye. I gema takerada ne jimin cii shin avegher a u ken ijô 2,400 nahan. I gber ukôpi mba takerada ne hemba biliôn 4 man tiôn tar sha won cii. Takerada shon ka Bibilo.

Bibilo ôr jighilii ér: “Icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa.” (2 Timoteu 3:16) Yange i nger Bibilo ér i lu takerada u wasen ior u sôron mbamzeyol ga. I nger i sha u pasen uumace awashima u Aôndo. Nahan kpa, Bibilo ngi a akaawan kpishi a tesen er se nôngo a mbamzeyol mba ve tseren uumace yô, shi i tôndo zwa ér aluer or er sha akaawan ne yô a kpe nan iyol. (Yesaia 48:17, 18) Ma zwa u or nan lamen man ityô i nan dugh her shin makeranta u nan hen cii kpa shighe u nan er akaawan a ken Bibilo yô, aa wase nan. Er nan u ôr ngeren u a dondo ne sha er u nenge iyol you aluer kwagh u Bibilo i er sha kwagh u mkpeyol man tsombor man tom u eren la ka kwagh u injaa shin ka u injaa ga yô?