Mbampin mba Mbaôron Takerada Ne Ve Pin La

Se kav kwagh u Paulu yange ôr shighe u kaa ér cii man kwasecôghol nana zua a iwasen ken tiônnongo u Kristu yô saa nana lu “kwase u nan er nom môm” tseegh la nena?—1 Timoteu 5:9.

Er apostoli Paulu lu ôron kwagh u kwasecôghol yô, kwagh u kaa ér “kwase u nan er nom môm” la tese m lu u nan shighe u nan lu a̱ hingir kwasecôghol ga la. Kwagh ne tese ér saa kwasecôghol nana er nom môm tseegh ken uma u nanaa? Shin Paulu lu ôron kwagh ugen kposoo? *

Mbagenev hen ér Paulu yange lu ôron kwagh u kasev mba côgholov mba ve er nom môm tseegh yô. Sha ajiir agen kpishi, aluer kwasecôghol kera er nom ga yô, ityô ka i nenge ieren la ér ka i dedoo. Nahan kpa ieren ne zua sha uwashika mbagenev mba Paulu nger la ga. Ikyav i tesen yô, yange pase Mbakristu mba ken Korinte ér sha mnenge na yô aluer kwasecôghol gba lun tsô yô á hemba saan nan iyol, kpa shi za hemen ér ‘nana fatyô u eren nom sha ishima i nan, kpa i̱ lu ken Ter tseegh.’ (1 Mbakorinte 7:39, 40; Mbaromanu 7:2, 3) Heela tseegh ga, Paulu nger Timoteu washika kaa ér: “Sarem pe kasev mba côgholov mba ve lu a mhem iyol yô, ve̱ er noov.” (1 Timoteu 5:14) Sha nahan yô, kwasecôghol yange nana hide a er nom kpa i lu kwagh u bo ga.

Tsô Paulu lu kaan ér nyi ken washika u nger Timoteu laa? Ka ken ivur ne tseegh ishember i “kwase u nan er nom môm” la i lu ye. Ken zwa Grika yô, inja i kwaghôron ne ér “kwase u nan lu a or môm” tseegh yô. Kwagh er doo yô, ishemberkwaghôron ne i zua a kwagh u Paulu a er acin imôngo ken uwashika nav mbagenev la. Ken uwashika mbara, á ôr kwagh u “or u kwase môm,” u ken zwa Grika yô, i lu “nomsoor u kwase môm” la nahan. (1 Timoteu 3:2, 12; Titu 1:6) Paulu yange yar tom a ishemberkwaghôron i nomsoor u kwase môm ne shighe u lu ôron akaa a or a er ve nana kuma u lun orkuran u ken Kristu shin diakon yô. Paulu lu kaan heen ér aluer or soo u lun a tom ken tiônnongo u Kristu man nan vôso kwase yô, saa nana eren a kwase u nan sha mimi, shi nana lu or u i fe nan sha ieren i idyaa kpaa ga yô. * Er i lu nahan yô, ishemberkwaghôron i ken 1 Timoteu 5:9 la kpa ngi tesen ér: Aluer kwasecôghol soo ér i wase nan ken tiônnongo yô, saa nana lu kwase u yange nan lu jighjigh hen nom u nan shi nan eren kwagh sha inja shighe u nom u nan lu uma la. Akaa agen a Paulu a seer ôron la kpa nga ôron kwagh shon môm tsô.—1 Timoteu 5:10.

[Footnotes]