Ikyaior—Er Nen Akaa A Nan Aôndo Icivir
Ikyaior—Er Nen Akaa A Nan Aôndo Icivir
“Kar iyol you sha u ú taver sha u civir Aôndo yô.”—1 TIMOTEU 4:7.
1, 2. (a) Paulu yange wuese Timoteu sha ci u nyi? (b) Agumaior nga ‘karen ayol a ve sha u vea taver sha u civir Aôndo’ nyian nena?
“M KERA ngu a orgen u nan lu ishima i môm a ven u nana ver ishima sha kwagh wen sha mimi nahan ga. . . . A er tom a mo imôngo sha Loho u Dedoo er wan vea ter nahan.” (Mbafilipi 2:20, 22) Apostoli Paulu yange nger mkaanem man sha u wuese gumor ugen. A nger ma hen Mbakristu mba ve lu ken Filipi ken derianyom u hiihii la. Paulu lu ôron kwagh u ana? Lu ôron kwagh u Timoteu, u yange lu ikyar na i kiriki, u zenden vea na la. Sha mimi yô, mkaanem ma Paulu nger sha u pasen er Timoteu a doo un ishima shi un ne un jighjigh ne, yange ma a taver Timoteu ishima je a zua ga!
2 Agumaior a a cie Aôndo, er Timoteu nahan la nga kwagh u injaa hen ior mba Yehova kpen kpen. (Pasalmi 110:3) Nongo u Aôndo ngu a agumaior nyian kpishi, a a eren tom u pania man tom mishen yô. Agumaior agen na ayol a ve, mba eren tom u maan kwagh, mbagenev mba eren tom shin Betel. Shi doo u a wuese agumaior a a eren ityom ken tiônnongo kpoghuloo shin er a lu a ityom igen ave nahan kpaa. Agumaior ne nga zuan a mkom u mimi sha ci u ve tsua u eren akaa a nan Yehova, Ter wase u sha la icivir. Sha kpôô yô, mba ‘karen ayol a ve sha u vea taver sha u civir Aôndo yô.’—1 Timoteu 4:7, 8.
3. Ka mbampin mba nyi se time sha mi ken kwaghngeren nee?
3 Wea lu gumor yô, u ngu a akaa a ken jijingi a u we ishima u eren kpa? Kanyi ia wase u shi ia taver we ishima u tsuan akaa a ken jijingi a u eree? U hendan a isharen i zendan akaa a iyolough ityô la nena? Aluer u wa ishima u eren akaa a nan Aôndo icivir yô, ú hen wer Aôndo una ver u nena? De se time sha uma u Timoteu man tom u yange er la tsô se zua a mbamlumun sha mbampin mban.
Ka An Yange Nan Lu Timoteu?
4. Sav ôron akaa a Timoteu yange er zum u a hingir Orkristu la.
4 Timoteu yange vese ken gar u Lisetera, angar u kiriki u ken Galatia, ken tiôntar u Mbaroma. A̱ shi nan kpa, yange fa kwaghaôndo u Mbakristu shighe u lu anyom pue kar, zum u Paulu lu pasen kwagh ken gar u Lisetera ken inyom i 47 la. Inja i Timoteu yange i ngôôr doon anmgbianev mba ken gar la ga. Anyom nga kar ahar yô, Paulu shi za zende ken gar u Lisetera. Mba er un mzehemen u Timoteu yô, maa a tsua un ér a̱ lu ikyar-tom na u eren tom u mishen. (Aerenakaa 14:5-20; 16:1-3) Er Timoteu lu zan hemen ken mcivir u Aôndo yô, i na un ityom i vesen. Ityom ne kua tom u hange hange u za taver anmgbianev asema la kpaa. Zum u Paulu lu ken purusu ken gar u Roma ve nger Timoteu washika la, Timoteu lu ortamen u ken Kristu ken gar u Efese hen shighe la. A̱ shi nan kpa lu ken inyom i 65 la Paulu nger un washika ne ye.
5. Sha kwagh u 2 Timoteu 3:14, 15 a ôr yô, ka akaa ahar a nyi nahan yange wase Timoteu u tsuan akaa a ken jijingi a una erene?
5 Sha mimi yô, Timoteu yange tsua akaa a ken jijingi a una er yô. Kanyi yange i mgbegha un ve er nahana? Paulu ter akaa ahar ken washika na u sha uhar u a nger Timoteu la, a yange na ve er nahan yô. A nger wener, ‘lu ken akaa a i tese u, u ne a jighjigh la, gadia u fa ve mba u hen sha ikyev ve la. Man shi u fa er hii iyev je u kav icighanruamabera’ yô. (2 Timoteu 3:14, 15) Se hii timen sha gbenda u Mbakristu mbagenev yange ve wase Timoteu u tsuan akaa a una er yô.
De Mbagenev Ve Wase U
6. Yange i tese Timoteu nena, man a ngohol ityesen la nena?
6 Mbamaren mba Timoteu yange ve eren kwaghaôndo môm ga. Ter na lu Orgrika. Ngô na, Unise man ngô na u tamen Loisi lu Mbayuda. (Aerenakaa 16:1) Hii shighe u Timoteu lu iyev la je, Unise man Loisi tese un mimi u ken Ruamabera u ken zwa Heberu la. A̱ shi nan kpa, mba va hingir Mbakristu yô ve tese un atesen a Mbakristu, nahan a na a jighjigh. Sha mimi yô, ityesen i injaa ne yange i wase Timoteu kpishi. Paulu kaa ér: “M ngu umbur jighjigh u nan u mimi u a lu ken a we, u a vande lun ken ngôu u tamen Loisi man shi ken ngôu Unise kpaa, shi m fa dedoo mer ngu ken we kpaa.”—2 Timoteu 1:5.
7. Agumaior kpishi nga a unô ioro, man vea wase ve nena?
7 Nyian ne, agumaior kpishi nga a mbamaren mba cian Aôndo kua mbamaren mba vesen mba ve fe iwasen i eren akaa a ken jijingi er Loisi man Unise nahan yô. Ikyav i tesen yô, kwase ugen u i yer un ér Samira umbur er mbamaren nav yange ve tema ve lam a na shighe gôgônan sha u wan un kwagh, zum u lu anyom pue kar la yô. A kaa ér, “Baba man mama yange ve tesem u lun a mnenge u Yehova sha akaa kposo kposo man u nan ishima sha tom u pasen kwaghaôndo kpaa. Yange ve shi taver mo ishima ér m er tom u pasen kwagh hanma shighe cii la.” Samira yange ungwa kwaghwan u mbamaren nav la, nahan ngu eren tom u Betel ken tar na hegen. Aluer mbamaren ou wa u kwagh ér u tsua akaa a ken jijingi yô, nôngo ungwa kwaghwan ve la. Mba nôngon ér i kpe u iyol.—Anzaakaa 1:5.
8. Ikyar i injaa i Timoteu ya a anmgbianev nav mba ken Kristu la wase un nena?
8 Shi doo u ú ya ikyar a anmgbianev ou mba ken Kristu sha gbenda u wasen we. Mbatamen mba ken tiônnongo u Timoteu kua mba ken tiônnongo u ken gar u Ikonium, u yange gba ica a gar u Timoteu kuma er ukilomita 30 nahan la fa Timoteu tsembelee. (Aerenakaa 16:1, 2) Timoteu yange ya ijende a Paulu, or u tseen ishima sha kwagh. (Mbafilipi 3:14) Uwashika mba Paulu nger la tese ér Timoteu lu or u ngohol kwaghwan shi taver un u dondon ikyav i mbananjighjigh ga. (1 Mbakorinte 4:17; 1 Timoteu 4:6, 12-16) Paulu nger wener: “We u lu a mo mangeraa sha ityesen man ieren yam man ishimaveren yam man jighjigh u nan man ishima i wan man dooshima man ishima i taver.” (2 Timoteu 3:10) Sha mimi yô, Timoteu dondo ikyav i Paulu la jighilii. We kpa, aluer u ngu ikyua a ior mba ken tiônnongo mba ve taver ken jijingi yô, vea wase u ú er akaa a injaa a ken jijingi.—2 Timoteu 2:20-22.
Timen ken “Icighanruamabera”
9. Dugh u yan ikyar a ior mba dedoo sha yô, ka nyi kwagh igen i gbe u ú er ve u “kar iyol you sha u ú taver sha u civir Aôndoo”?
9 Ka shighe u ú ye ikyar a ior mba dedoo tseegh ú fatyô u tsuan akaa a ken jijingi aa ú er yee? Ei. Gba u ú timen ken “icighanruamabera” vighe vighe er Timoteu nahan. Alaghga ka fe doon we u henen kwagh ga, kpa umbur wer Timoteu yange ‘kar iyol na sha er una taver sha u civir Aôndo yô.’ Ka i gba u mbaanumbev vea zer karen iyol iwer imôngo sha er vea hemba iniumbe yô. Nahan gba u we kpa u na iyol you, shi u nôngo kwagh tsung ve ú fatyô u eren akaa a ken jijingi a u we ishima u eren la ye. (1 Timoteu 4:7, 8, 10) Kpa alaghga u pine wer, ‘aluer m ngu henen Bibilo yô, kwagh ne una wasem u eren akaa a m we ishima u eren la nena?’ De se time sha igbenda itiar i kwagh ne una wase u yô.
10, 11. Er nan u hen wer Icighanruamabera una taver we ishima u tsuan akaa a ken jijingi a u eree? Tese ikyav.
10 Hiihii yô, icighanruamabera una wase u u lu a ishimataver i dedoo. Icighanruamabera pase se aeren a dedoo a Ter wase u sha la. A pase se dooshima na u hemban u á tese sha ci wase man msaanyol u tsôron u a ver sha ci u mbacivir un mba jighjigh la. (Amoshi 3:7; Yohane 3:16; Mbaromanu 15:4) U nguren fan kwagh u Yehova seer yô, una hemba doon we ishima cii shi á hemba saren we u tseghan uma wou sha ci na kpaa.
11 Agumaior a ken Kristu kpishi kaa ér ve mba henen Bibilo sha tseeneke ve hanma shighe, nahan kwagh ne wase ve kpishi u ngohol mimi ave ahar. U tesen ikyav yô, Adele yange vese hen tsombor u Mbakristu, kpa gema wa ishima u eren akaa a ken jijingi ga. A kaa ér, “mbamaren av yange ve zaan mkombo a mo ken Iyou i Tartor, kpa m henen kwagh sha tseeneke wam ga shi m keghen ato ken mbamkombo kpaa ga.” Kpa zum u anmgbian u Adele u kwase er batisema yô, kwaghaôndo u mimi hii u doon Adele ishima hen shighe la. A kaa ér, “yange m hii u ôron Bibilo, m wa ishima u ôron i jimin cii. M lu ôron i kpuaa kpuaa. Mea ôr yô, m nger akaa agen a m er la shin takerada. Akaa a yange m ngeren la m ngu a mi her zan zan nyian. Yange m ôr Bibilo m bee ken inyom i môm.” Kwagh ne yange taver Adele ishima, tsô a tsegha iyol na sha ci u Yehova. Adele gba iwan kpishi, nahan cii kpa, ngu eren tom u pania shin tom u orpasen ivangeli hanma shighe la hegen.
12, 13. (a) Aluer gumor ngu henen Bibilo yô, kwagh ne una wase nan u geman inja nena? (b) Tese ikyav i kwaghfan u mimi u Mkaanem ma Aôndo ma lu a mi la.
12 Kwagh u sha uhar yô, Bibilo ia wase u ú gema inja. Paulu yange kaa a Timoteu ér, “icighanruamabera” cii “ngu a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a agoyol sha ci u hanma tom u dedoo.” (2 Timoteu 3:16, 17) Aluer u ngu gbidyen kwar sha akaa a ken Mkaanem ma Aôndo hanma shighe shi u ngu eren sha akaawan a ken Bibilo yô, jijingi u Aôndo una wase u ú sôr inja. Una wase u ú hingir u lun a aeren a dedoo, er u hiden a iyol ijime man ishimataver man u eren tom taveraa nahan, shi anmgbianev ou mba ken Kristu vea doo u ishima sha mimi. (1 Timoteu 4:15) Timoteu yange lu a aeren ne, nahan lu or u injaa hen Paulu man tiônnongo na kpen kpen.—Mbafilipi 2:20-22.
13 Kwagh u sha utar yô, Mkaanem ma Aôndo ka wuna u kwaghfan u mimi. (Pasalmi 1:1-3; 19:7; 2 Timoteu 2:7; 3:15) Ma a wase u ú kôr ijende a ior sha kwaghfan shi ú eren iemberyolough i dedoo man akaa agenegh kpa sha inja. (Genese 34:1, 2; Pasalmi 119:37; 1 Mbakorinte 7:36) Aluer u tsua akaa a dedoo yô, kwagh ne una wase u u er akaa a ken jijingi a u we ishima u eren la.
“Nôngo Ityav mbi Dedoo”
14. Er nan ve u tsuan akaa a ken jijingi a ú er la i lu kwagh u zange ga?
14 Gba u se na ishima yase sha u eren akaa a nan Yehova icivir, ka kwagh u a hembe doon u se er je ne. Nahan kpa ka kwagh u a hembe leghem u eren ne ga. Ikyav i tesen yô, shighe u i gbe u ú tsua ma tom u ú er shin kwagh u ú hen ken makeranta yô, alaghga anmgbianev ou man mbakov wou man atica a kwagh wou a gbe a ishima, a a ne jighjigh ér makeranta u vesen man tom u dedoo ngu ne or mzehemen u mimi man msaanyol la vea kighir we ér u er ishima ve. (Mbaromanu 12:2) A gba u ú “nôngo ityav mbi dedoo mbi jighjigh u nan” sha er ú “naregh [ú] kôr uma u tsôron” u Yehova a ver sha ci wou la “gbang” yô.—1 Timoteu 6:12; 2 Timoteu 3:12.
15. Alaghga tsô, Timoteu yange tagher a ahendan a nyi?
15 Alaghga ú hemba tagher a ikyaren i vesen cii shighe u ior mba hen tsombor wou mba ve ne jighjigh ga la ve vende akaa a ú soo u eren la yô. Adooga tsô Timoteu kpa yange tagher a imba ikyaren ne. Takerada ugen kaa ér, alaghga tsombor u Timoteu lu tsombor u “ior mba fan takerada, mba lun a kwagh ave kpaa.” Adooga tsô ter na yange soo ér a za makeranta u vesen shi a er kpenga u yange tsombor na eren la. * A̱ shi nan kpa, ishima yange i vihi ter u Timoteu ker kpishi zum u a mase kaven er Timoteu a hembe soon u eren tom u mishen vea Paulu, shin er tom la lu u inyar ga shi u ngee a mbamzeyol nahan kpaa!
16. Gumor ugen yange tagher vanger a ahendan a ter na nena?
16 Nyian ne kpa, agumaior a a lu Mbakristu nga tagher a mbamzeyol mban. Orgen eren tom ken afishi a branci u Mbashiada mba Yehova, mba yer un ér Matthew. A kaa wener: “Shighe u m hii tom u pania la, ishima vihi terem a mo kpishi. Er m lu eren tom u esen ayou sha er me zuan a inyaregh ki me za hemen u pasen kwagh hanma shighe yô, terem nenge ér makeranta u m ze la cii ‘saa ishe.’ Hanma shighe yô, a nahan mo tar, a kaan a mo ér mea lu eren tom u injaa yô ma m zough a inyaregh kpishi.” Matthew yange tagher vanger a ahendan a ter na ne nena? A kaa ér, “m za hemen u ôron Bibilo hanma shighe, m gbaan uwer ga cii, shi m eren msen hanma shighe, hemban je yô shighe u ishima i soo u vihin mo ker yô.” Ishimataver i Matthew ne, va a kwagh u injaa, gadia ter na hide doo vea na. Matthew shi seer kporom ikyua a Yehova kpaa. A kaa wener, “Yehova kosom ashighe kpishi shi taver mo ishima shi wasem u tsuan akaa a dedoo kpaa. Luun er mea ver ishima u eren akaa a ken jijingi ga yô, Yehova ma a wasem nahan ga.”
Ver Ishima u Eren Akaa a ken Jijingi
17. Alaghga mbagenev vea tule mba ve soo u eren tom u pasen kwagh hanma shighe la ishima sha lan nena? (Mateu 16:22)
17 Alaghga mbananjighjigh a we imôngo je kpa vea tule u ishima sha lan ér u̱ de eren akaa a ken jijingi a u we ishima u eren la ga. Adooga mbagenev vea pine ér, ‘Saa u lu pania keng keng-nee?’ ‘U lu er mbagenev nahan kpa, u za hemen u pasen kwagh her. Zua a tom u dedoo, lu a inyaregh sha er kper u hingir puung ga yô.’ Alaghga kwaghwan ve ne una lu inja er ka u dedoo nahan, kpa aluer u ungwa ve yô, ú fatyô u kaan wer ú ngu karen iyol you sha er u taver sha u civir Aôndo je kpa?
18, 19. (a) U er nan man u ver ishima sha u eren akaa a ken jijingii? (b) Pase akaa a ú lu gumor kpa, ú de wer a kar u sha ci u Tartor la.
18 Adooga tsô Mbakristu mbagenev mba sha shighe u Timoteu la kpa lu a imba mhen ne. (1 Timoteu 6:17) Paulu yange wase Timoteu sha u a̱ ver ishima u eren akaa a ken jijingi. A taver un ishima wener: “Ma orutya u nan lu nôngon ityav ave yô nan cimin iyol i nan sha akaa a uma u tar ne ga, gadia ka u nana̱ er kwagh u doon or u a tsough nan sha ci u utya la.” (2 Timoteu 2:4) Mayange orshoja u nan lu ken utya nana lumun ér akaa a mbaaderapupuu ve eren la a̱ dan nan ga. Ka i gba u hanma shighe yô nana eren kwagh u kurutya a kaa ér nana er la sha er nana war uma u nan man u mbagenev kpaa yô. Er u lu orshoja u Kristu yô, doo u we kpa u ver ishima sha kwagh môm. De zende uyôughyôughmbaakaav ityô, mba vea cimin we u kera fatyô u eren tom wou u waren uma u ior ga la ga.—Mateu 6:24; 1 Timoteu 4:16; 2 Timoteu 4:2, 5.
19 Hemba doon u ú lu a ishima i nan iyol you sha u eren tom u Tartor. De kaan wer u ker uma u kundu kundu ga. “Er u lu orutya u Kristu Yesu yô, de keren akaa a nan we mkpeyol ga.” (2 Timoteu 2:3, mgem u Bibilo i i yer ér The English Bible in Basic English la) Shighe u Timoteu zenden vea Paulu la, á hen u lun a ishima i kwagh kuman un, tar yange ua taver un kpishi je kpaa. (Mbafilipi 4:11, 12; 1 Timoteu 6:6-8) We kpa u fatyô u eren nahan. U ngu a ishima i den wer akaa agen a kar u sha ci u Tartor kpa?
Averen a Ú Zua a Mi Hegen man ken Hemen Yô
20, 21. (a) Pase averen agen a or ka nana eren akaa a ken jijingi ve nan zua a mi yô. (b) U kange ishima we u er nyi?
20 Timoteu er tom a Paulu imôngo kuma er anyom 15 nahan. Yange nenge er í lu timin atôônanongo a he yemen ken haregh u ken imbusutarimese i Zegemnger u Mediterenia, ape loho u dedoo samber je nôngo u yisan la. Uma na yange hemba doon shi hemba zuan a mkom kpaa. Luun er yange una lu er ior mba hen shighe la yô uma na ma doo nahan ga. (2 Mbakorinte 11:26, 27) Aluer we kpa, u ver ishima u eren akaa a ken jijingi yô, u zua a averen a ken jijingi a hemban doon la cii. U lu ikyua a Yehova, shi u doo anmgbianev ou mba ken Kristu ishima shi vea naan we icivir kpaa. Er ishima ma i nyian we sha akaa kpishi shi ma u tagher a ican sha ci u u ngu keren inyaregh kpoghuloo la yô, u gema u zua a msaanyol u mimi u or ka nana na iyol i nan u eren kwagh sha ci u mbagenev ve nan zua a mi la. Man kwagh u hemban doon je yô, u “kôr ave sha uma u a lu uma jim la”—inja na yô u zua a uma u tsôron ken Paradiso.—1 Timoteu 6:9, 10, 17-19; Aerenakaa 20:35.
21 Nahan aluer u ngu a hii u karen iyol you sha er u taver sha u civir Aôndo ga yô, hii ase hegen je. Kporom ikyua a ior mba ken tiônnongo mba vea wase u ú tsua akaa a ken jijingi a ú er la, shi lumun kwaghwan ve kpaa. Ver ishima u ôron Mkaanem ma Aôndo hanma shighe. Kange ishima gbang gbang wer mayange je u dondo ieren i tar u lu a mi i zendan uyôughyôughmbaakaav ityô la ga. Hanma shighe yô, umbur wer aluer u tsua akaa a nan Aôndo icivir a ú er ken uma wou yô, Aôndo u “A ne se akaa cii wuee sha u se̱ er kwagh a mi” la tôndo zwa a we ér una ver u doo doo hegen je man ken hemen kpaa.—1 Timoteu 6:17.
[Footnote]
^ Makeranta u henen yange u doo Mbagrika ishima kpen kpen. Orgrika ugen, u i yilan un ér Plutarch, u yange lu sha shighe u Timoteu la ôr kwagh ken ngeren na ugen u i yer ér Moralia, I, “The Education of Children” la wener: “Mfe-takerada u dedoo ka imbor i hanma kwagh u dedoo. . . . M nenge mer, ka kwagh u ka a wase or nan lu a ieren i dedoo shi i saan nan iyol kpaa je ne. . . . Kwagh ugen môm ngu a iwasen ga shi a gba kwagh ga; a kuma u se na ishima sha mi kpaa ga.”
Ú Umbur Kpa?
• Agumaior aa zua a iwasen i eren akaa a ken jijingi hana?
• Er nan ve u ôron Bibilo hanma shighe i lu kwagh u injaa?
• Agumaior aa palegh ieren i tar u lu a mi i zendan uyôughyôughmbaakaav ityô la nena?
• Aluer or nan ngu eren akaa a ken jijingi yô ka averen a nyi nana zua a mi?
[Study Questions]
[Picture on page 26]
Timoteu yange tsua akaa a injaa a una er yô
[Pictures on page 27]
Ka akaa a nyi nahan yange wase Timoteu?
[Pictures on page 28]
U ngu nôngon wer u er akaa a ken jijingi kpa?