Aeren a Dedoo a i Gbe u Agumaior Aa Hen Yô

KWASE ugen, mba yer un ér Gladys, eren tom ken makeranta ugen ken gar u Mendoza ken tar u Argentina. Iyange igen, er lu karen hen klase ugen yô, a nenge tica ugen lu ôron mbayevmakeranta na mbanongo-unyiin takerada u i yer ér Takerada Wam ú Akaaôron a Bibilo la. * Gladys pase tica la ér un ngu Kwaseshiada u Yehova, shi kaa a na ér una tese un er una ôr takerada la ve ua wase un kpishi yô. Kwagh u Gladys tese tica la doo un kpishi, nahan a wa ishima ér una gema tesen ú ken klase hanma shighe. Nahan kpa, gba u una vande tôôn ian hen mbavesen mba makeranta la. Er i lumun ér a tesen u yô, doo un je zua ga.

Ayange nga kar yô, tica ne na mbayevmakeranta na tom ér hanma ve nana ôr ityough ki takerada ne i môm sha ishigh ki mbakov vev sha iyange i makeranta la ver ér i taver mbayev ishima u ôron ityakerada la. Kwagh u tica ne er ne doo mbayevmakeranta kpishi, sha ityôkyaa ne yô tashan u televishen ugen lôhô un imôngo teman. Mba ngur ôron kwagh u mbayevmakeranta yô, or u hemen imôngo teman shon ne pine un ér, “U eren a mbayev mba ken klase wou nena ve ve taver we ityough ga?” Tica ne kaa ér un ngu tesen ve takerada ugen, mba yer u ér Takerada Wam ú Akaaôron a Bibilo. A za hemen ér ka kwaghaôndo un lu tesen ve ga, kpa takerada ne wase un u maan aeren a dedoo ken ve, er u nan or icivir man u wan mbagenev ikyo shi lun ken mzough nahan, kua u eren kwagh ken ijoughave shi taver ityough ga shi tesen mbagenev dooshima kpaa. Nahan ve mase gban zwa môm ér akaa ne cii ka aeren a dedoo a i gbe u agumaior aa hen yô.

U soo u tesen ônov ou aeren a dedoo nee? Pine ase Orshiada u Yehova Takerada Wam ú Akaaôron a Bibilo ú doon tsung ne nana na u kôpi wou.

[Footnote]