Tese Nen Ônov Enev Ve̱ Soo Yehova
Tese Nen Ônov Enev Ve̱ Soo Yehova
“Er avaan ka a lu sha uwegh ku orageegh nahan, kape ônov mba nomso mba i mar ve, mbamaren vev ve lu iyev her, ve lu la.”—PASALMI 127:4.
1, 2. Ônov mba er ‘avaan a sha uwegh ku orageegh’ nena?
ORKERENAVAAN dugh ivaan ken gbandeavaan na wa sha ada hôn sha kwagh u a soo u tan la. A naregh ada la dông, sha agee je. Er igbila i dugh un iyol cica cii nahan kpa, a tamber a nenge kwagh u a soo u tan la tsembelee. Ka kom un yô, a pase ivaan la! Una ta kwagh u a ker la kpa? Akaa nga kpishi a aa na una ta shin una ta ga yô, er mfe na man ahumbe a a lu karen hen shighe la man mlu u ivaan i a ker la nahan.
2 Tor Solomon kaa ér ônov mba er ‘avaan a sha uwegh ku orageegh’ nahan. (Pasalmi 127:4) Nenge ase mpase u injakwagh i sha kwagh u orkerenavaan ne. Orkerenavaan u ken injakwagh ne wa ivaan sha ada na la fele je ngôôr ga. Gba u una naregh i una pase fese sha er una ta kwagh u a lu keren la yô. Kape mbamaren kpa shighe u ve lu a mi u wasen ônov vev sha er vea soo Yehova la a vese ga je la. Shighe u mbayev ka ve vese ve undu ya, ve lu sha tseeneke ve la vese ga. (Mateu 19:5) Mbayev shin avaan a mbamaren ka ve naregh ve ker la aa ta kwagh u i ker la kpa? Inja na yô, Aôndo una za hemen u doon mbayev ishima shi vea za hemen u civir un shighe u vea vese a lu sha tseeneke ve la kpa? Akaa nga kpishi a aa na kwagh a lu nahan shin una lu ga yô. Akaa atar ken akaa shon yô, ka mfe u tesen ônov u ormaren nan lu a mi la man ijiir i ônov ve vese her la man er wanye nan ngohol tsaha u ormaren u nan la. De se time nen sha atôakaa ne vighe vighe. Hiihii yô, se time sha aeren a ormaren u fan ityesen.
Mbamaren mba Fan Ityesen Mba Veren Ônov Vev Ikyav i Dedoo
3. Er nan ve i gbe u mbamaren vea eren akaa a ve ôron a ônov vev laa?
3 Yesu ver mbamaren ikyav i dedoo, gadia eren akaa a yange tesen ior ér ve̱ er la. (Yohane 13:15) Kpa gema na Mbafarishi ibo, sha ci u ve eren akaa a ve kaan a ior ér ve̱ er la ga. (Mateu 23:3) Saa mbamaren vea eren kwagh u ve kaan a ônov vev ér ve eren la keng ve Yehova una doo ônov vev ishima ye. Aluer mbamaren mba ôron kwagh kpa eren kposo yô, kwaghôron ve una lu er ada u a lu a kwar ga nahan.—1 Yohane 3:18.
4. Ka mbampin mba nyi i doo u mbamaren vea pine ayol a ve, man ka sha ci u nyi?
4 Er nan ve ikyav i mbamaren i lu kwagh u injaa yumu? Mbaganden ka vea dondon ikyav i Yesu yô, Aôndo a doo ve ishima, nahan aluer ônov kpa mba dondon ikyav i mbamaren vev yô Yehova una doo ve ishima. Azende a wanye aa fatyô u wasen nan u lun or u dedoo shin aa ‘vihi mbamlu mba nan mba dedoo’ la. (1 Mbakorinte 15:33) Ken uma u anye cii, hemban je yô shighe u ka nan henen a hen kwagh la, ka mbamaren mba nan ka ve hemba lun azende a nan a sôngo sôngo ye shi ka ve kpa ka ve hemba eren akaa a aa bende a uma u nan ye. Nahan yô, hanma ormaren nana̱ pine ase iyol i nan mbampin mban: ‘M ngu nyi ijende? M ngu veren wan wam ikyav i ia wase un u lun a aeren a dedoo kpa? Ka ikyav i nyi m lu veren sha akaa a injaa er msen u eren man Bibilo i henen nahana?’
Mbamaren mba Fan Ityesen Mba Eren Msen a Ônov Vev Imôngo
5. Msen u mbamaren ve eren la una tese mbayev nyi?
5 Ônov ou vea fatyô u seer henen kwagh u Yehova ken mbamsen mba u eren la. Aluer u ngu sughun Yehova shighe u ne tem kwaghyan mba ungwan shi u ngu eren msen shighe u ne tem Bibilo i henen mba nengen yô, vea kure ikyaa ér nyi? Vea fa ér ka Yehova a ne se kwaghyan ye, nahan doo u se sugh un, shi ka un kpa a tesen se akaa a mimi a ken Bibilo ye. Ka ityesen i injaa je ne.—Yakobu 1:17.
6. Mbamaren vea wase ônov vev vea nenge ér kwagh ve gba Yehova ishima nena?
6 Nahan kpa, aluer u ngu eren msen vea tsombor wou sha shighe u kwaghyan shin shighe u henen Bibilo tseegh ga, shi u ngu teren akaa a a ze u iyol man ônov ou ken mbamsen mbara kpaa yô, u hemba wasen ve cii. Kwagh ne una wase ônov ou vea fa ér Yehova ngu ken tsombor wen, shi we hanma wen ikyo kpaa. (Mbaefese 6:18; 1 Peteru 5:6, 7) Orgen ôr kwagh u wan na wener: “Hii iyange i se mar wan wase u kwase la je, se hii u eren msen vea na. Er lu vesen yô, se gba eren msen vea na sha kwagh u yan ikyar a ior mba dedoo man sha akaa agen a a bende a na yô. Iyange i môm tsô kpa se hôr msen a na ga, zan zan iyange i kar eren nom la.” U nenge wer doo u we kpa u eren msen vea ônov ou hanma iyange gaa? U hen wer doo u ú wase ve ve̱ nenge Yehova ér ka Huror ve, u a ne ve akaa a iyolough shi a tesen ve akaa a ken jijingi shi a wasen ve u sôron mbamzeyol vev mba ken ishima je kpaa ga he?—Mbafilipi 4:6, 7.
7. Kanyi Mbamaren vea er ve ia wase ve u eren msen sha akaa a zan ônov vev iyoloo?
7 Kpa, aluer u soo u eren msen hen Yehova sha kwagh u a lu zan wan wou iyol jighilii yô, gba u ú fa akaa a wan wou la a eren yô. Nenge ase kwagh orgen u a yese ônov mba kasev uhar a er yô. A kaa ér: “Sha mkur u hanma Sati yô, yange m pine iyol yam mbampin uhar, mer: ‘Kanyi ishima i hembe zan ônov av iyol sha mi ken kasua nee? Man kanyi i doon i er ve?’” Mbamaren, ne nenge ner doo u ne pinen mbampin mban nahan ga he? Eren nen mbamsen vea ônov enev sha mbamlumun mba ne zough a mi sha mbampin mban la. Aluer ne mba eren nahan yô, ne tese ve u eren msen hen Yehova, Un u A ongo mbamsen la, shi ityesen ne ia wase ve u soon kwagh na kpaa.—Pasalmi 65:2.
Mbamaren mba Fan Ityesen mba Taver Ônov Vev Ishima Ér Ve Henen Kwagh
8. Er nan i lu hange hange u mbamaren vea wase ônov vev vea henen Mkaanem ma Aôndo hanma shighee?
8 Ieren i mbamaren sha kwagh u henen Bibilo ia bende a ikyar i wan ve nan ye vea Aôndo la nena? Ahuraior ka aa lamen ayol a ve shi aa keghen ato ayol a ve yô, ikyaryan ve la i hemba taver a taver. Gbenda môm u se keghen ato a Yehova yô, ka u henen Bibilo sha iwasen i ityakerada i “wanakiriki u jighjigh” a ne se la. (Mateu 24:45-47; Anzaakaa 4:1, 2) Nahan aluer mbamaren soo u wasen ônov vev u yan ikyar a Yehova gbem shi soon kwagh na kpaa yô, gba u vea taver ve ishima ér ve̱ henen Mkaanem ma Aôndo hanma shighe.
9. A wase mbayev vea lu a ieren i henen kwagh tsembelee nena?
9 Mbamaren vea wase ônov vev vea henen kwagh tsembelee nena? Sha ingin kpa vea hemba tesen ônov vev tsembelee sha ikyav i dedoo i ve ver la. Ônov ou mba nengen er i maan we iyol u henen kwagh hanma shighe kpa? Sha mimi yô, alaghga ú lun a shighe ga, sha ci u ú ngu koson ônov ou, nahan adooga ú ngu henen er ú er man u zuan a shighe u ôron takerada shi henen kwagh kpaa yô. Kpa pine ase iyol you yôô, ‘Mbayev av mba kohol mo nengen televishen hanma shighe?’ Aluer ka nahan yô, u hen wer doo u ú tôô shighe la ú henen kwagh sha er ú ver ve ikyav i dedoo sha gbaa ne ga zee?
10, 11. Er nan i doo u mbamaren vea henen kwagh a tsombor ve hanma shighee?
10 Gbenda u injaa ugen u mbamaren vea tese ônov vev u ungwan Yehova yô, ka u henen Bibilo a tsombor ve hanma shighe. (Yesaia 30:21) Alaghga mbagenev vea pine ér, ‘Aluer mbamaren mba zan mbamkombo mba tiônnongo a ônov vev hanma shighe yô, ityôkyaa shi ngi i henen Bibilo a ve je kpa?’ Atôakyaa a doon nga kpishi je. Ka mbamaren jighilii Yehova a ne ve tom u tesen ônov vev la ye. (Anzaakaa 1:8; Mbaefese 6:4) Ka a henen Bibilo hen tsombor yô, mbayev ve fa ér ka shighe u ior kpishi ve va kohol imôngo tseegh i lu shighe u civir Aôndo ga, kpa ka kwagh u i gbe u a eren hen tsombor kpaa yô.—Duteronomi 6:6-9.
11 Heela tseegh ga, aluer mbamaren hen kwagh a tsombor ve tsembelee yô, kwagh ne una na ve ian i fan mhen u ônov vev sha kwagh u akaa a ken jijingi man aeren a dedoo agen kpaa. Ikyav i tesen yô, mbamaren vea fatyô u henen kwagh a ônov vev mba kiriki ken ityakerada, er u Hen Kwagh sha Ikyev i Ortesen Uhemban La nahan. * Ken hanma ikyumhiange i ken takerada ne yô, í nôngo u pinen mbayev mbampin mba vea wase ve u pasen mnenge ve sha akaa a i er kwagh sha mi la. Aluer mbamaren time sha avur a i ter ken takerada ne imôngo a ônov vev yô, vea wase ve u lun a mkav u ken ishima, nahan vea fa u “paven kwagh u dedoo a kwagh u bo.”—Mbaheberu 5:14.
12. Mbamaren vea hen akaa a a zough sha mbamgbe mba wan ve nena, man kanyi kwagh u nenge wer ia hemba wasen ônov ou sha gbaa nee?
12 Ônov ou vea nguren vesen yô, hii u henen akaa a a zough sha mbamgbe vev yô. Nenge er orgen vea kwase na yange ve wase ônov vev mbakasev uhar u henen sha kwagh u amar a vinen a i lôhô ve ken makeranta yô. Or ne kaa ér: “Yange se kaa a ônov asev ser ve wa iyol, zum u se tema kwaghhenen u tsombor wase kwagen yô, se er iniumbe, se se lu mbayev, ve di ve lu mbamaren. U môm ken ve nana̱ lu Baba, ugen nana̱ lu Mama, kpa ve̱ vande za tôvon sha kwagh u amar a vinen ken makeranta sha er vea ta se iwanger sha kwagh u i doo u se er yô.” Ka nyi yange i̱ eree? Or ne za hemen wener: “Kwagh u ônov asev mba kasev yange ve ôr sha u tan se iwanger sha atôakyaa a ve zough a mi ken Bibilo, a tesen ér doo u se za amar la ga la, doo se je zua ga. Kwagh u yange hemba doon se je yô, ka akaa a dedoo agen a ve pase ér se fatyô u eren sha ityough ki amar a za vinen ken makeranta la. Kwagh ne wase se u kaven mhen ve man asaren a ve kpaa.” Sha mimi yô, saa mbamaren vea waan ishima shi vea duen a mbamhen mba hev ve vea kôr cio u henen akaa a injaa a tsombor ve hanma shighe ye. Aluer ve er nahan yô, mayange iniôngon ve ia saa gbilin ga.—Anzaakaa 23:15.
Er Nen Akaa a Bem Una Lu hen Ya Wen Yô
13, 14. (a) Mbamaren vea er nan ve bem una lu hen ya? (b) Aluer ormaren lumun ibo sha kwagh yô, kanyi i dedoo ia fatyô u duen ken kwagh nee?
13 Aluer orkerenavaan ker ma kwagh ivaan shighe u ahumbe a lu kpishi ga yô, una hemba keren i jighilii, nahan una ta kwagh shon. Kape ônov kpa vea hemba hingir ior mba soon Yehova aluer mbamaren mba eren akaa a bem una lu hen ya je la. Yakobu nger wener: “Ityamegh ki perapera yô, ka i lôô ki sha bem sha ci u mba ve ker num la.” (Yakobu 3:18) Mbamaren vea er nan ve bem una lu hen ya? Gba u nom una soo kwase na kpishi, kwase kpa nahan. Aluer nom man kwase soo ayol a ve shi mba ne ayol a ve icivir yô, vea hemba lun sha ian i tesen ônov vev u lun a dooshima shi nan mbagenev icivir kua Yehova kpaa. (Mbagalatia 6:7; Mbaefese 5:33) Dooshima man icivir mba ve a bem. Shi aluer nom man kwase mba ken bem ayol a ve yô, vea hemba fan u sôron ayôôso a hen tsombor ve.
14 Kpa, er ivese i lun vough i lu ga nahan, kape tsombor u lun vough kpa u lu shin tar ga je la. Ashighe agen, alaghga mbamaren vea er kwagh a ônov vev u a zough sha aeren a ityamegh ki jijingi ga yô. (Galatia 5:22, 23) Shighe u kwagh a er nahan yô, doo u mbamaren vea er nena? Aluer ve lumun ér ve er shami ga yô, vea pande icivir ve sha ishigh ki wan ve shinii? Nenge ase ikyav i apostoli Paulu ne. Paulu yange lu ior kpishi er ter u ken jijingi nahan. (1 Mbakorinte 4:15) Nahan kpa, pase ken igbar er un eren kwagh u vough ga yô. (Mbaromanu 7:21-25) Kpa, er lu or u hiden a iyol ijime shi ôron kwagh sha mimi yô, se mba a icivir sha a na nyian kpishi. Er Paulu tsumen nahan kpa, yange nger tiônnongo u ken Korinte washika, ôr vangertiôr wener: “Lu nen mbakaven mo er mo kpaa, m kaven Kristu nahan.” (1 Mbakorinte 11:1) Aluer we kpa u ngu lumun ibo sha kwagh yô, alaghga ônov ou vea ver ishima sha kwaghbo wou la yum ga.
15, 16. Er nan i doo u mbamaren vea tese ônov vev u soon anmgbianev mba nomso man mba kasev mba ken Kristu, man vea er kwagh ne nena?
15 Kanyi igen mbamaren vea er sha er ônov vev vea vese hen ijiir i Yehova una doo ve ishima? Apostoli Yohane nger wener: “Aluer orgen nana kaa er: Aôndo doom ishima, man nan gema nan ngu kôron anmgbian u nan ihyom yô, nan ngu or u aiegh je. Gadia or u anmgbian u nan, u nan nenge a nan la, a doo nan ishima ga yô, Aôndo u nan nengen a Na ga la, A fatyô u doon nan ishima ga.” (1 Yohane 4:20, 21) Nahan yô, aluer u tese ônov ou wer anmgbianev vev mba nomso man mba kasev ve doo ve ishima yô, ka Aôndo je u lu kaan wer a doo ve ishima ye. Hanma ormaren nana pine iyol i nan mpin ne, ‘M hembe wuese tiônnongo shin m hembe lamen sha tiônnongoo?’ U fa nena? Kegh ato zulee ungwa kwagh u ônov ou ve ôron sha mbamkombo mba tiônnongo man sha mbagenev ken tiônnongo kpaa la. Alaghga ka mhen wou je ve ôron ye.
16 Mbamaren vea wase ônov vev u soon anmgbianev vev mba ken Kristu nena? Orgen mba yer un ér Peter, ngu a ônov mba nomso uhar, mba kuman anyom pue kar. A kaa ér: “Hanma shighe yô, ka se lôhô anmgbianev asev mba ve vie ken jijingi ser ve va ya kwagh a vese shi ve tema imôngo a vese kpaa, man kwagh ne va se a iember kpishi. Hii shighe u ônov asev lu iyev la je tsô se hii kwagh ne. Ve vese hen atô u ior mba Yehova a doo ve ishima yô, nahan ve nenge er u civir Aôndo i lu kwagh u nan or iember yô.” Orgen mba yer un ér Dennis, ngu a ônov mba kasev utaan, a kaa ér, “Yange se taver ônov asev mba kasev mban asema ser ve kôr ijende a mbaganden mba ken tiônnongo mba ve lu upania yô, shi hanma shighe u sea fatyô yô se er erdoo a ortamen u zenden sha vea kwase u nan.” We kpa wase ase ônov ou ve tôô ken ishima ér tiônnongo ka tsombor ve.—Marku 10:29, 30.
Kwagh u Wanye Nana Tsua Yô
17. Kanyi kwagh i gbe u ônov vea tsua er ve lu ganden ior laa?
17 Shi hide hen ase sha injakwagh i orkerenavaan la. Aluer nan fa ivaan i keren tsembelee, kpa ivaan i nan la hule yô, alaghga nana ta kwagh u nan ker la ga. Kpa, gba u mbamaren vea nôngo tsung vea sôr ivaan i hulen la, inja na yô, vea er kwagh ne sha u kôôm ieren i vough ga i anye ve nan lu a mi la. Nahan cii kpa, ka mbayev vea mase tsuan kwagh u vea er ye; aluer ka u vea de ér tar ne u̱ yem a ve shin vea de ér Yehova a̱ ‘kôôm gbenda’ ve kpa ka ve vea tsua ye.—Anzaakaa 3:5, 6; Mbaromanu 12:2.
18. Kwagh u wanye nan tsough u eren la una bende a mbagenev nena?
18 Er mbamaren ve lu a tom u vesen u tesen ônov vev “sha mkôôm man kwaghwan u Ter” nahan kpa, ka ônov vea mase tsuan or u ve soo ér vea vese a hingir ye. (Mbaefese 6:4) Nahan yô, mbayev pine ase nen ayol a en ner, ‘Me lumun ityesen i sha dooshima i mbamaren av kpa?’ Aluer ú lumun i yô, u ngu tsuan gbenda u uma u hemban doon cii. U na a saan mbamaren ou iyol kpen kpen. U hemban cii yô, u na a saan Yehova iyol.—Anzaakaa 27:11.
[Footnote]
^ Ka Mbashiada mba Yehova ve gber u ye.
Baver We Kpa?
• Mbamaren vea ver ônov vev ikyav i dedoo sha kwagh u msen u eren man Bibilo i henen nena?
• Mbamaren vea er akaa a van a bem hen ya nena?
• Kanyi kwagh i gbe u mbayev vea tsua ayol a ve, man kwagh u ve tsough u eren la una bende a mbagenev nena?
[Study Questions]
[Picture on page 28]
U ver wan wou ikyav i dedoo sha gbaa u henen kwagh sha tseeneke wou kpa?
[Picture on page 29]
Msaanyol lu hen ya u bem a lu her yô