Mbampin Mba Mbaôron Takerada Ne Ve Pin La

Er i er ken Genese 27:18, 19 nahan, lu kwaghbo je Yakob er shighe u kaa ér un ngu Isou la ga he?

Alaghga ú vande fan kwagh u Isou man Yakob. Shighe u Isaka beeyol la a kaa a Isou ér a wua swase a na un una ya. A kaa a na ér: “Ishima yam i̱ ver u doo doo, er m lu a kpe ga ne.” Rebeka yange ungwa kwagh u nom na ôr ne, tsô a er kwaghyan u nyohon, been yô a kaa a Yakob ér: “Za a [kwaghyan ne] hen teru, a̱ ya, a̱ ver u doo doo, er a lu a kpe ga ne.” Nahan, Yakob hua akondo a anngô na Isou, shi hua aive a wan ivo sha môm shi zer sha ave kpaa, tsô a za a kwaghyan la hen ter na. Isaka pin Yakob ér, “Ka we ana, wan wama?” yô, a gema a kaa ér: “Ka mo wan wou u iunda Isou.” Isaka yange na un jighjigh, tsô a ver un doo doo.—Genese 27:1-29.

Bibilo pase se vighe vighe er i hii ve Rebeka man Yakob er kwagh nahan ga, kpa ikyav tese ér yange ve vande wan ishima u eren kwagh nahan ga. Gba u se fa ser Mkaanem ma Aôndo na Rebeka man Yakob ishô shin ibo sha kwagh u ve er la ga, nahan kpa ieren ve la bugh se gbenda u eren aie shin icugh ga. Kpa, Bibilo gema ta a ta iwanger sha kwagh u yange er la.

Kwagh u se hii fan sha kwagh u Isou man Yakob yô, i pase wanger wanger ér lu Yakob gba u ter na una ver un doo doo ye, lu Isou ga. Sha ci u Yakob vande yamen dyako u waniunda hen anngô na Isou, u i mar ve ahina la. Isou lu or u wuese kwagh ga, gadia a tee dyako na u waniunda sha ci u kwaghyan ér una war ijen. “Isou laha dyako na u waniunda la.” (Genese 25:29-34) Nahan Yakob yange za hen ter na sha u za ngohol iveren i i lu sha ci na yô.

Kwagh u sha uhar yô, Isaka yange mase kaven er lu Yakob un ver un doo doo yô, kpa kwagh gba un u hiden ngohol i ga. Alaghga yange umbur kwagh u Yehova vande ôron a Rebeka cii i mase maren ahina ne la. Yehova kaa ér: “U vesen la una shiren u kiriki.” (Genese 25:23) Shi kwagh ugen yô, zum u Yakob lu moughon u yemen ken tar u Haran la, Isaka ver un doo doo, seer sha iveren i vande nan un la.—Genese 28:1-4.

Kwagh ugen yô, gba u se fa ser Yehova yange fa hanma kwagh u lu zan hemen cii, shi kwagh gba un shami kpaa. Iveren i Isaka na Yakob la zua sha kwagh u Aôndo tôndozwa a Aberaham la. (Genese 12:2, 3) Luun er Aôndo yange una soo ér Yakob a zua a iveren la ga yô, ma yange. Kpa Yehova taver Yakob ishima ér: “Ka ken a we kua ken tsombor wou je man akuraior a sha won cii aa zua a iveren ye.”—Genese 28:10-15.