Ú Pasen Ior Kwagh u Jighjigh u Nan Wou sha Hanma Ian i I Dugh Cii Kpa?

YANGE i dugh ikyaren igen ken tar u Poland, nahan i pine mpin ér: “Ma mimi u aie a nongo sha mi ga ngu je kpa?” Ngeren u tesen er a nger ikyaren ne kaa ér: “Kwagh gba se a mimi u aie a nongo sha mi ga la ga. Or môm kpa kwagh gba nan a mi ga. Ma mimi u aie a nongo sha mi ga je kpa ngu mape sha won ga.” Nahan wankwase Shiada u Yehova ugen, mba yer un ér Agata, ngu anyom 15 shi ze kôleeji kpaa, yange tsua ian ne u pasen mbagenev kwagh u jighjigh u nan na.

Agata sôn Yehova ér a tese un kwagh u una er yô, cii ve hii u kohol ngeren mba vea wase un una nger ikyaren la ye. Yange zua a kwagh u ôr kwagh sha mpin shon ken Iyoukura i Julai 1, 1995 la. Tsô a ôr kwagh u mpin u injaa u Pontiu Pilatu pine Yesu la, ér: “Ka nyi i lu mimi?” (Yohane 18:38) Agata nger wener, mpin la lu u nyiman kwagh, inja er lu kaan ér: ‘Mimii? Mimi ngu je kpa? Ma mimi ngu mape ga’ nahan. Agata nger wener “mpin u Pilatu la umbur un akaawan a yange gba u vea dondo ve vea nger ikyaren shon la.”

Shi a ôr kwagh u mhen u ior ve lu a mi ér kwagh u mbagenev ve lumun ér ka u mimi la adooga mbagen vea nenge ér ka u mimi ga, man alaghga ve cii vea lu “shami” la. Nahan a pine wener, “Ka hanmô wase nana lumun ér atindi a i we sha kwagh u igirgi i purugh la ka a mimi ga, kpa a doo nan u nyôron i?” Pin nahan cii yô maa á ôr kwagh u Bibilo, ér: “Akaa a ior ve fe ér ka a mimi la cii tese wanger wanger ér mimi je se fatyô u suur sha Mkaanem ma Aôndo.” Á pase ishimaveren na ér hanma or u i sar nan u fan mimi cii, a gba u nana wa ishima tsung ve nana fa un ye.

Agata ya iyua i vesen, shi i na un ian ér a na kwaghôron klase jimin cii a ungwa. Mbayevmakeranta mbagenev kpishi lumun ér a hen Bibilo a ve. Doo Agata kpishi er un zough a ian i pasen mbagenev kwagh u un ne jighjigh a mi la nahan. Mimi je, aluer se ker aan a pasen mbagenev akaa a se ne jighjigh a mi yô, kwagh u dedoo una due ker keng. Ka aan a nyi u lu a mi a pasen mbagenev akaa a u ne jighjigh a mi laa?