Taver Mbagenev u Hiden a Iyol Ijime

ALAGHGA ior kpishi vea hen ér ka a inja u hiden a iyol ijime ken tar u ainge ne ga. Ka mba ve keren u hemban mbagenev hanma shighe cii, shi i lu inja er mba zan ikyura la ior ve hembe nan ve icivir ye. Ambaaior ne wa imanger shi mba hanger ér saa vea zua a kwagh u ve soo la. Ior kpishi mba tômon uma u mbanyarev man u mba zan ati, kpa u mbaibanave man mbahiden a iyol ve ijime yô mba tem ga. Mba zan ikyura mba te ave vanger ér ka sha iniôngon ve man ve lu zan ikyura ye. Mba soon u hiden a iyol ijime ga kpa ka ve shi kenden a ayol a ve sha sha ci u mzehemen ve.

Or u ken tar u Kanada ugen u timen sha akaa kaa ér ior mba ken tar na “hingir mbawan ayol a ve ikyo tseegh man mba kenden a ayol a ve sha.” Mbagenev hen ér se mba ken tar u ior ve nengen ér taryan hemba ngun a inja a u kundun ishima eren kwagh u injaa yô. Shi ve fa er kwagh a hembe gban ior nyian u wan iyol ve ikyo tseegh yô. Nahan taver ior kpishi u hiden a iyol ijime ken tar ne.

Kpa, ka ior kpuaa tseegh vea nyiman ér doo u mbagenev vea hiden a ayol a ve ijime ye, gadia ka i doo ior u lun vea ve. Kpa ishima ka i za mbagenev iyol ér aluer ve hide a iyol ijime ken tar u ú gbe gesa yum ne yô, ior vea hen ér mba aseeraior.

Bibilo i i lu Mkaanem ma Aôndo la tsengaôron ér ken ayange a ase ne, ior vea hingir “mbahagher sha akaa man mbagengese iyol.” (2 Timoteu 3:1, 2) U lumun wer kwaghôron ne ngu kuren nyian gaa? U hen wer doo u ú hide a iyol you ijime ga he? Shin u hen wer ior vea nenge or u nan hidi a iyol ijime la ér nan ngu isheeror, u hanma or nana fatyô u nzughul a nan yôô?

Bibilo pase se atôakyaa a injaa kpishi, a a ne ve i gbe u se hiden a iyol ijime shi se lu a ieren ne kpaa yô. Shi i̱ pase ér doo u se lu a mnenge u vough sha kwagh u hiden a iyol ijime shi i̱ wa hanma or kwagh ér nana hiden a iyol ijime kpaa. Shi i̱ tese ér iyol i hiden a mi ijime ka ikyav i tesen ér or ngu or u taver ishima, nan ngu isheeror ga. Ngeren u a dondo ne una pase er i hii ve kwagh a lu nahan yô.

[Picture on page 3]

Doo u se gengeseiyol sha ci u mzehemen wasaa?