Tar Cii Ua Fatyô u Lun ken Mzough Kpa?

KA BEM a lu keghen tar wase ne ken hemen shin ka mtimi? Ka inja er akaa ne cii nga keghen tar wase ne nahan.

Sha nahan yô, mbahemen tar mbagenev mba a vangertiôr ér tar cii ua fatyô u lun ken mzough, alaghga ve hen nahan sha ci u aluer tar cii ngu ken mzough ga yô, ua vihi je a gande. Kpa, mbampin mba ve lu shin heen ne na yô, cier ior kpishi iyol. Ka mbampin mba shon je ne: Ka hanma ityar i lu a ubom mba bughur wuan ior kpishi? Iyange igen ityar ne ia ta ubom mbanaa? Aluer ityar ne ta ubom mban yô, kanyi ia eree?

Ihyom man ayôôso yange tar ne u lun ken mzough je ka kwagh u nyian a mi ga. Kwagh ka a er i vihi yô, er kwaghaôndo ma a ser mbamzeyol mban yô, we ve a wa inyatine. Orgen u tôôn abaver u i yer un ér James A. Haught la kaa ér: “Hanma kwagh u a ne ve ior ve luun ken mzough ga cii ve a ihyom, man ka kwaghaôndo jighilii je a ne ve ior ve lu ken mzough ga ye. Er ior kpishi ve ne jighjigh ér kwaghaôndo ka a wase ior ve lu ior mba ‘dedoo’ nahan kpa, ikyav tese wanger wanger ér kwaghaôndo ne ior mba eren akaa a vihin tsung.” Orngeren ityakerada ugen u i yer ér Steven Weinberg la kpa nger kwagh sha kwagh ne, ér: “Ka kwaghaôndo tseegh una na ve ior mba ma ve lu a aeren a dedoo kpa vea hingir u eren aferakaa ye.”

Se fatyô u veren ishima ser tar cii ua lu ken mzough kpa? Een, se fatyô! Kpa er se hen ken ngeren u a dondo ne nahan, ka uumace shin ukwaghaôndo mba ior ve eren la vea zua tar cii ga.

[Blurb on page 3]

Tar ne ngu er an-bom u a sôôn bughur yôô?