U Ngu A Orwan We Kwagh Ér U̱ Civir Aôndo Kpa?

USHIA yange hingir tor u tartor u Yuda u ken imbusutariyan la zum u a lu anyom 16 yô. A tema tor anyom 50, hii ken inyom i 829 zan zan 778 C.S.Y. (Cii man Shighe u Yesu) la. Ushia za hemen u ‘eren kwagh u dedoo sha ishigh ki TER’ hii iyev na je. Kanyi yange i wase un u dondon gbenda u perapera? Bibilo kaa ér: “[Ushia] ver ishima u keren Aôndo sha ayange a Sekaria, u a lu tesen er i̱ civir Aôndo la. Sha ayange a a lu keren TER la yô, Aôndo na un mkpeyol.”—2 Kroniku 26:1, 4, 5.

Se fa kwagh u Sekaria, orwasen tor mhen ne kpishi ga, gadia ka heen tseegh i er kwagh na ken Bibilo ye. Kpa er Sekaria lu “tesen ér i̱ civir Aôndo” yô, a wase tor u lu iyev ne u eren kwagh u dedoo. Takerada u i yer ér The Expositor’s Bible la kaa ér ikyav tese wang ér Sekaria lu “or u fan icighanruamabera tsema tsema shi lu a mkav sha kwagh u kwaghaôndo kpaa shi fa u tesen mbagenev kwaghfan na ne.” Or u timen ken Bibilo ugen ôr kwagh u Sekaria ér: “Yange fa akaaôron a profeti kuma un, . . . lu or u fan takerada, u civir Aôndo kpoghuloo shi lu orperapera kpaa; a̱ shi kpa yange wase Ushia kpishi u eren akaa a dedoo.”

Yehova ver Ushia doo doo sha igbenda kposo kposo sha ci u aeren a na a perapera la, nahan “lu a tahav kpishi je,” gadia “Aôndo wase un.” Yange za ikyura sha akaaeren a na sha ci u lu eren perapera “sha ayange a Sekaria” lu uma la cii. (2 Kroniku 26:6-8) Aôndo ne Ushia mkpeyol cii yô maa a undu atesen a Sekaria, ortesen na la. “Ishima gengese [Ushia], nahan a er kwaghbo, a per tindi u TER, Aôndo na.” Yange er kwagh sha ibume, nahan i ta un angev mbu ndôhôr ishima sha kwavyolough, mbu yange un u eren tom na u tor tsembelee.—2 Kroniku 26:16-21.

U ngu a or u wan we kwagh, u nan wasen we “u keren Aôndo” je kpa? Wea lu gumor shin organden, wea lu nomsoor shin kwase kpa u fatyô u lun a or u wan we kwagh. De lahan imba or la ga, gadia kwaghwan u nan la una wase u ú za hemen u eren kwagh u dedoo sha ishigh ki Yehova. Kegh ato a Orkristu u nan vie ne, shi er kwagh u nan we u la kpaa. Mayange de huren kwaghwan u injaa u or u nan lu ‘tesen we ér u̱ civir Aôndo’ ne ga.—Anzaakaa 1:5; 12:15; 19:20.