“Mba I Sar Ve U Zuan A Uma U Tsôron Yô” Mba Ngohol Loho Ne

“Mba i sar ve u zuan a uma u tsôron yô, ve na jighjigh.”—AER. 13:48, NW.

1, 2. Mbakristu mba tsuaa mbara yange ve er nena sha kwaghôron u profeti u Yesu ôr ér a pase loho u dedoo a tser tar cii laa?

 TAKERADA u Aerenakaa ôr er Mbakristu mba tsuaa mbara yange ve er sha kwaghôron u profeti u Yesu ôr ér a pase loho u dedoo u Tartor a tser tar cii la. (Mat. 24:14) Mbapasenkwagh sha gbashima ver mba vea dondo ve la cii ikyav i dedoo. Er mbahenen mba Yesu lu pasen kwagh ken Yerusalem sha gbashima yô, ior udubu imôngo kua “upristi kpishi kpaa” va ken tiônnongo u sha derianyom u hiihii la.—Aer. 2:41; 4:4; 6:7.

² Mbamishen mba sha derianyom u hiihii la yange ve wase ior kpishi ve hingir Mbakristu. U tesen ikyav yô, Filibu za ken gar u Samaria, za pase ve kwagh nahan ikpelaior ver ato a na. (Aer. 8:5-8) Paulu yange za ken Shiperu man Ashia u Kiriki man Masedonia man Grika kua Italia man sha ajiir agen kpaa vea akar a na, ve lu pasen loho u Kristu. Mbayuda man Mbagrika kpishi mba ve lu ken agar a Paulu pase kwagh ker la na jighjigh. (Aer. 14:1; 16:5; 17:4) Titu lu pasen kwagh ken Krete. (Titu 1:5) Peteru di lu pasen kwagh ken Babilon, man shighe u nger washika na u hiihii ken inyom i 62-64 la nahan, Mbakristu lu pasen kwagh kpoghuloo ken gar u Ponti man Galatia man Kapadoshia man Ashia kua Bitinia. (1 Pet. 1:1; 5:13) Ashighe ne lu a doon kpen kpen. Mbakristu mba sha derianyom u hiihii la yange ve pase kwagh sha gbashima je yô, mbaihyomov vev kaa ér “ve vihi tar” sha kwaghpasen ve la.—Aer. 17:6; 28:22.

3. Ka akaa a dedoo a nyi mbapasen kwagh u Tartor ve lu zuan a mi nyian ken tom ve, man ka wea ôr akaa ne nahan i doo u ga he?

³ Kape tiônnongo u Kristu u ainge ne kpa ior ve lu van ker lugh lugh je la. Ka wea ôr ibaver i sha inyom i Mbashiada mba Yehova wea nenge akaa a dedoo a a lu eren tar sha won cii la nahan ka i doo u ga he? Saan we iyol er Mbashiada mba Yehova yange ve hen Bibilo a ior mba hemban miliôn ataratar ken inyom i tom i 2007 la gaa? Shi ior mba yange ve va ku umbur u Yesu Kristu ken inyom i i kar la tese ér ior mba kuman er miliôn pue nahan, mba ve lu Mbashiada mba Yehova ga, man i sar ve u ungwan loho u dedoo yange ve va ku umbur ne. Kwagh ne tese ér tom shi se her vese.

4. Ka unô ve lu ngohol loho u Tartor nee?

⁴ Er lu sha derianyom u hiihii la nahan, nyian kpa “mba i sar ve u zuan a uma u tsôron” mbara mba ngohol loho ne. (Aer. 13:48, NW) Yehova ngu van a ambaaior la ken nongo na. (Ôr Hagai 2:7.) Ka ieren i nyi i gbe u se lu a mi sha tom u  pasen kwagh ne ve ia wase se u eren tom u sunda ne doo doo?

De Sangen a Sange Ior Mba u Pase Ve Kwagh Ga

5. Ka unô Yehova a lumun ve?

⁵ Mbakristu mba sha derianyom u hiihii la yange ve fa ér “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una rumun nan.” (Aer. 10:34, 35) Or u nan soo u yan ikyar i dedoo a Yehova yô, gba u nana na nagh ku ipaa ku Yesu kura jighjigh. (Yoh. 3:16, 36) Shi “sar [Yehova] u ior cii ve̱ war ve̱ ar sha mfe u fan mimi la.”—1 Tim. 2:3, 4.

6. Kanyi i doo u mbapasen loho u Tartor vea er ga, man ka sha ci u nyi?

⁶ Aluer mbapasen loho u dedoo tôô ér ma nongoior shin mbaatsanev shin mbainyarev shin mlu u or shin mba ve eren kwaghaôndo ugen shin ma kwagh ugen una yange or u ungwan loho u dedoo yô, ka sha mi ga. Hen ase yôô: Er or u yange nan hii pasen we mimi u ken Bibilo la nan nyagh u ga nahan saan we iyol ga he? Nahan doo u se kpa se venda u pasen mba i sar ve u ungwan loho u waren uma ne kwagh ga.—Ôr Mateu 7:12.

7. Doo u se ôron mba se pasen ve kwagh la ijir ga sha ci u nyi?

⁷ Yehova ver Yesu ér a lu Orjir, nahan se mba a ian i kuren or môm ijir ga. Ityôkyaa yô, se fatyô u ôron ior ijir er Yesu nahan ga, sha ci u se mba “ôron ijir sha kwagh u [se] nenge sha ashe” shin se “ongo sha ato [ase]” la tseegh. Kpa Yesu yô, fe mbamhen asev man asema ase vindi vindi.—Yes. 11:1-5; 2 Tim. 4:1.

8, 9. (a) Cii man Saulu hingir Orkristu yô, lu nyi oro? (b) Kwagh u apostoli Paulu la tese se nyi?

⁸ Ior kposo kposo hingir mba civir Yehova. Ikyav i tseegh tseegh yô ka Saulu u Tarsu, u va hingir apostoli Paulu la. Saulu lu Orfarishi u tôv Mbakristu a ican kpoghuloo yô. Er na jighjigh ér Mbakristu mba civir Yehova sha mimi ga yô, hingir u tôvon ve a ican. (Gal. 1:13) Sha mnenge u or yô, taver u henen ér una hingir Orkristu. Kpa Yesu nenge a kwagh u dedoo ken Saulu, nahan a tsua un ér a er tom u injaa. Nahan Saulu hingir u lun môm ken ior mba tseen ishima sha tom ken tiônnongo u sha derianyom u hiihii la.

⁹ Kwagh u apostoli Paulu la tese se nyi? Alaghga ior mbagenev hen haregh wase vea soon u ungwan loho wase ga. Adooga a lu inja er or môm ken ve kpa nana hingir Orkristu u mimi ga nahan, kpa se gba uwer u pasen ve kwagh ga. Ashighe agen ior mba i lu inja er vea kegh ato a loho wase ga je kpa vea hingir u keghen ato. Se ‘gba nen uwer’ u pasen hanma or cii kwagh ga.—Ôr Aerenakaa 5:42.

Averen Nga sha ci u Mba Ve ‘Gbe Uwer’ u Pasen Kwagh Ga La

10. Er nan i doo u se gba uwer u pasen ior mba inja ve i cier iyol la kwagh ga? Ôr uvande-eren mba ve er hen ijiir you yô.

¹⁰ Mluashe u or una fatyô u bumen se. U tesen ikyav yô, orgen u i yer un ér Ignacio * la yange hii u henen Bibilo a Mbashiada mba Yehova shighe u i wuhe un ken purusu ken tar ugen ken Imbusutariyan i Amerika yô. Ior yange ve cian un sha ci u wa tswam. Mbakwarev mba yange ve er akaa ve teen ken purusu la ve kaa a Ignacio ér a anger ior mba ve lu ve a anzô ve lu soon u kimbin ga la. Nahan kpa, er Ignacio za hemen u henen Bibilo shi eren sha akaa a a lu henen la yô, a undu inja na i tswam la hingir u lun a ior ken bem. Ior kera tindin un ér a kighir ior ve kimbi anzô a ve ga, nahan fa er Bibilo man jijingi u Aôndo a gem uma na yô. Shi a wuese mba pasen kwagh u Tartor mba yange ve nyagh un ga, ve hen Bibilo a na la.

11. Ka se hide se za sôr ior sha ci u nyi?

¹¹ Ityôkyaa i i ne ve ka se hide se za sôr mba se vande pasen ve loho u dedoo yô, mbamlu vev man inja ve ia fatyô u geman. Alaghga shighe u se sôr nan se hide la, nan gba angev gayô i de nan tom shin or u doon nan ishima sar ku. (Ôr Orpasenkwagh 9:11.) Akaa a a lu  zan hemen shin tar la aa na ior vea hen sha mlu ve u ken hemen. Akaa ne aa na or u yange nan soo u ungwan loho wase ga kpa nana hingir u ungwan. Nahan se gba nen uwer u pasen ior loho u dedoo sha hanma ian i i dugh cii ga.

12. Doo u se nengen ior mba se pasen ve kwagh la nena, man ka sha ci u nyi?

¹² Uumace mba a ieren i ôron mbagenev ijir shi sangen a sange ior. Nahan kpa kwagh u hanma or gba Yehova ishima. Nengen a aeren a dedoo a hanma or cii. (Ôr 1 Samuel 16:7.) Se nôngon u eren nahan ken tom wase u pasen kwagh. Uvande-eren kpishi tese akaa a dedoo a ka sea nengen ior mba se pasen ve loho u dedoo la sha inja ve a due ker la.

13, 14. (a) Pania ugen yange zua a kwase ugen shighe u due kwaghpasen kpa kwagh fa gban un a na ga sha ci u nyi? (b) Kwagh ne tese se nyi?

¹³ Anmgbian u kwase ugen u a eren tom pania, i yer un ér Sandra la yange lu pasen kwagh ken icile igen ken Caribbean maa za zua a kwase ugen u i yer un ér Rutu la. Kwase ne eren iniongo i kwaghaôndo i í yer ér Carnival la kpoghuloo. Yange i na un torkwase u iniongo shon ken tar la kwa har. Kwagh u Sandra lu ôron la doo un je zua ga, nahan ve sôr ian i henen Bibilo ve ver. Sandra kaa ér: “Er m nyôr ken iyou i Rutu yô, m hii nengen a zege foto u tôô shighe u wuha iyol i iniongo i kwaghaôndo la, kua uiyua mba ya sha iniongo shon la kpaa. Tsô m kure ikyaa mer er a ze iti kpishi shi a eren iniongo la kpoghuloo yô, mimi una doo un ishima ga. Nahan m de u za henen kwagh a na.”

¹⁴ Shighe kar yô, Rutu za mkombo ken Iyou i Tartor. Mba been mkombo yô, a pine Sandra ér, “Er nan ve u de u va henen kwagh a moo?” Sandra zamber a na ér a ya un anyi, nahan hide hii u henen kwagh a na. Rutu za hemen u henen kwagh kpoghuloo shi geman uma na kpaa, tsô a tôô ufoto nav mba iniongo i kwaghaôndo la kera shi hii u eren akaa ken tiônnongo, nahan a mase tseghan uma na sha ci u Yehova. Sandra yange mase kaven er ieren na la lu sha mi ga yô.

15, 16. (a) Shighe u Kwaseshiada ugen pase anngô u nom na kwagh la lu nyi i due kere? (b) Hii nan i doo u se lumun ser mlu u or u hen tsombor wase a yange se u pasen nan kwagh ga?

¹⁵ Mbashiada mba Yehova kpishi pase mba hen tsombor ve mba ve lu mbananjighjighga la kwagh, man kwagh u doon due ker shin er lu inja er vea ungwa ga nahan kpaa. Nenge ase ikyav i anmgbian u kwase ugen u ken tar u Amerika, u i yer un ér Joyce ne. Yange i hii u wuhen anmgbian u nom na ken purusu shighe u lu iyev la je. Joyce kaa ér: “Ior yange ve shi kaan ér a saa uma na ishe sha ci u teen mcimbim ma bov shi iin shi eren akaa a bo agen kpa kpishi. Er eren akaa ne nahan cii kpa, m pase un kwagh kuma anyom 37.” Er Joyce gba uwer u pasen anmgbian u nom na kwagh ga yô, a va hingir u henen Bibilo vea Mbashiada mba Yehova shi gema uma na kpaa. Semberee ne, anmgbian u nom u Joyce ne er batisema sha mkohol u vesen ken kpentar u California, ken tar u Amerika. Joyce kaa ér: “Yange saan  mo iyol tsung. Doom kpishi er m gba uwer u pasen un kwagh ga nahan.”

¹⁶ Ashighe agen a taver se u ôron anmgbianev asev mbagenev mimi mba ken Bibilo sha ci u mlu ve. Nahan kpa Joyce yô, taver un u lamen a anmgbian u nom na ga. Gadia or a gba fan ishima i orgen tsô ga. Alaghga or la nana lu keren kwaghaôndo u mimi a ishima i môm. Nahan de yangen nan u zuan a kwaghaôndo u mimi la ga.—Ôr Anzaakaa 3:27.

Takerada u Injaa u Henen Bibilo a Ior

17, 18. (a) Ibaver i sha tar cii tese ér takerada u Bibilo Tese Ér Nyi Jimi? la ngu a inja nena? (b) Ka uvande-eren mba doon mba nyi u hen kwagh a ior ken takerada ne ve u zough a mi?

¹⁷ Se zua a ibaver sha tar cii i tesen ér takerada u henen Bibilo a ior u i yer ér Bibilo Tese Ér Nyi Jimi? la doo mbaasemaamimi kpishi. Anmgbian u kwase ugen ken tar u Amerika, u eren tom pania, u i yer un ér Penni la hii u henen Bibilo a ior kpishi ken takerada ne. Penni henen kwagh a mbaganden uhar shi ve taver ken ukwaghaôndo vev kpaa. Yange fa kwagh u ior mbara vea er shighe u vea ôr mimi mba ken Ruamabera mba i nger ken takerada u Bibilo Tese la ga. Kpa a kaa ér: “Er í nger takerada ne sha alô sha alô shi u taver u kaven ga shi í pase akaa ker tiônôô yô, ve lumun kwagh u ve lu henen la a iyol nyoon shio ér ka mimi.”

¹⁸ Orpasenkwagh ugen ken tar u Britain, mba yer un ér Pat. Yange hii u henen Bibilo a kwase ugen u yevese ityav ken tar ugen ken tar u Ashia yô. Kwase ne yevese undu tar na shighe u shojapetali kôr nom na kua mbayev nav mba nomso yem a mi, kera nenge a ve ga yô. Yange i nande ya na shi ior kpishi yav a na sha igyosogh. Akaa ne cii na yô uma due un ishima, nahan nôngo u wuan iyol na acin imôngo. Kpa Bibilo i lu henen la na un ishimaverenkeghen. Pat nger ér: “Mgber u i gber takerada u Bibilo Tese la sha gbenda u taver ga man akav a i tese ker wang la bende a kwase shon kpishi je.” A za hemen u henen kwagh kpoghuloo, nahan a hingir orpasenkwagh u nan lu a er batisema ga yô shi sar un u eren batisema sha mkohol u una gba la. Sha mimi yô, ka sea wase mbaasemaamimi vea fa ishimaverenkeghen i Ruamabera a ne la shi ia doo ve nahan i saan se iyol kpen kpen.

“Sé Gba Nen Uwer u Eren Akaa a Dedoo Ga”

19. Hingir torough torough u eren tom u pasen kwagh ne sha ci u nyi?

¹⁹ Hanma iyange i sev mbu av yô, ka i hemba lun torough torough u eren tom wase u pasen ior kwagh shi geman ve hingir mbahenen  ne cii. Hanma inyom yô, iorov udubu imôngo mba i sar ve u civir Aôndo yô ka ve ngohol loho u se pasen ne. Nahan kpa, “iyange i vesen i TER mgbôghom,” inja na yô mba ve lu ken ime i ken jijingi cii mba “zan ze ze ze hen ijiir i sôngon.”—Sef. 1:14; Anz. 24:11.

20. Doo u hanmô wase nana kange ishima u eren nyi?

²⁰ Se fatyô u wasen mba ve lu zan hen ijiir i sôngon la. Saa se dondo ikyav i Mbakristu mba sha derianyom u hiihii mba yange ve ‘gba uwer ga sha u tesen man u ôron ken tempel man sha uya uya ér Yesu ka Kristu’ la ve se fatyô u wasen ambaaior la ye. (Aer. 5:42) Dondo ikyav ve la sha u wan ishima a ahendan shi veren ishima sha “gbenda u ú tesen kwagh la” man sha u pasen ior kwagh a u sangen a sange shio. Nahan yô, “sé gba nen uwer u eren akaa a dedoo ga,” sha ci u aluer se taver ishima yô se zua a averen kpishi gadia Aôndo una lumun se.—2 Tim. 4:2; ôr Mbagalatia 6:9.

[Footnote]

Ú Na Mlumun Wer Nyi?

• Ka unô ve lu ngohol loho u dedoo nee?

• Doo u se sangen a sange mba se pase ve kwagh ga sha ci u nyi?

• Ka akaa a doon a nyi i zough a mi sha u henen kwagh a ior ken takerada u Bibilo Tese Ér Nyi Jimi? laa?

[Study Questions]

[Pictures on page 13]

Mbaasemaamimi udubu imôngo mba ngohol loho ne

[Pictures on page 15]

Kwagh u apostoli Paulu la tese se nyi?

[Picture on page 16]

Mbapasen loho u dedoo mba sangen a sange mba vea pase ve loho u dedoo ga