Ver Ishima Sha “Gbenda U Ú Tesen Kwagh La”
Ver Ishima Sha “Gbenda U Ú Tesen Kwagh La”
“Yôô kwaghôron . . . kôôm, yangen, waan kwagh, sha ishima i wan tsung man sha gbenda u ú tesen kwagh la kpaa.”—2 TIM. 4:2, NW.
1. Ka tindi u nyi Yesu yange na mbahenen nava, man ka ikyav i nyi a vere?
ER YESU been ior angev shighe u lu eren tom na u pasen kwagh shin tar la nahan kpa, ior hemba fan un ér ka ortesen, lu or u been ior angev tseegh ga. (Mar. 12:19; 13:1) Tom u pasen loho u dedoo u Tartor u Aôndo la yange u hemba gban Yesu ishima, man kape u gbe mbadondon un ishima nyian kpaa je la. Gba u Mbakristu vea za hemen u eren tom u i ne ve ér ve gema ior ve hingir mbahenen ne sha u tesen ior u eren akaa a Yesu yange wa tindi sha mi la cii.—Mat. 28:19, 20.
2. Kanyi i gbe u se er ve ia wase se u eren tom wase u pasen kwagh nee?
2 Gba u se za hemen u tsaase mfe wase u tesen ior kwagh la ve se fatyô u eren tom wase u geman ior hingir mbahenen la ye. Apostoli Paulu yange ôr kwagh u mluainja u mfe ne wanger wanger ken washika u nger Timoteu, u lu ikyar-tom na la. A kaa ér: “Ver ishima sha iyol you man ityesen you kpaa, taver ishima sha mi. Aluer ú er nahan yô, ú yima iyol you kua shi mba ve lu ungwan we la kpaa.” (1 Tim. 4:16) Ityesen i Paulu a er kwagh u i heen ne ka u tesen or kwagh ér nana fa tseegh tsô ga. Mbakristu mba fan ityesen ka ve tese ior kwagh sha gbenda u una kôr ve ken ishima shi una mgbegha ve vea sôr aeren a ve yô. Kpa saa se fa igbenda i tesen kwagh ve se tese ior kwagh a kôr ve ken ishima ye. Tsô se er nan ve se fa ‘igbenda i tesen ior kwagh’ shighe u se lu pasen mbagenev loho u dedoo u Tartor u Aôndo laa?—2 Tim. 4:2, NW.
Fa “Gbenda u Tesen Ior Kwagh”
3, 4. (a) Se fa ‘igbenda i tesen ior kwagh’ nena? (b) Makeranta u Henen Tom u Hemen u Aôndo ngu wasen se u tesen ior kwagh tsembelee nena?
3 Dikishenali igen pase “gbenda” u tesen ior kwagh la ér ka mfe u or zough a mi sha u henen kwagh shin eren kwagh gayô nengen er mbagenev ve eren kwagh yô. Gba u se ver ishima sha akaa a atar ne ve se fa u pasen mbagenev loho u dedoo ye. Kwagh u una wase se ve se fa itinekwagh i se lam a ior sha mi tsema tsema yô, ka u henen sha itinekwagh shon tsembelee shi eren msen kpaa. (Ôr Pasalmi 119:27, 34.) Aluer se mba nengen gbenda u mba fan ityesen ve tesen ior kwagh la yô, se hen igbenda shon nahan se kpa se fa u tesen ior kwagh. Shi aluer se mba eren sha akaa a se hen la yô, kwagh ne una wase se se tsaase mfe wase u tesen ior kwagh la.—Luka 6:40; 1 Tim. 4:13-15.
4 Yehova ka Ortesen se u Hembancii. Man ngu yaren tom a nongo na u shin tar la sha u tesen mbacivir un er vea er tom u pasen kwagh yô. (Yes. 30:20, 21) Nahan hanma tiônnongo yô, ka a nyôr mkombo u Makeranta u Henen Tom u Hemen u Aôndo ken hanma sati, makeranta ne ka u tese mba ve nyer u la er vea pase ior loho u dedoo u Tartor u Aôndo yô. Ka Bibilo i lu takerada u vesen u i henen ken makeranta ne ye. Mkaanem ma Aôndo ka ma pase se kwagh u se tese ior yô. Heela tseegh ga, ka ma pase se igbenda i injaa i se tese ior kwagh yô. Shi ka i umbur se ken Makeranta ne ér aluer se har ityesen yase sha Mkaanem ma Aôndo shi se mba pinen ior mbampin mba injaav shi tesen ve kwagh sha gbenda u una wanger ve shi se mba wan ve ikyo yô, se hemba fan u tesen ior kwagh. De se time sha atôakaa ne sha adondo adondo. Shi se hen er se tese mba se henen Bibilo a ve la kwagh ve una kôr ve ken ishima yô.
Har Ityesen You sha Mkaanem Ma Aôndo
5. Gba u se har ityesen yase sha nyi, man ka sha ci u nyi?
5 Yesu u a hembe fan ityesen a hanma or cii la yange tesen akaa a ken Ruamabera. (Mat. 21:13; Yoh. 6:45; 8:17) Yesu yange tesen ior kwagh na iyol na ga, kpa tesen ior kwagh u Un u a tindi un la. (Yoh. 7:16-18) Se mba dondon ikyav na la. Nahan aluer se mba pasen kwagh sha uya uya shin se mba henen Bibilo a ior kpa, ityesen yase i har sha Mkaanem ma Aôndo. (2 Tim. 3:16, 17) Sea lu a mfe nan nan kpa, mfe wase kuma sha iwasen man tahav mbu Ruamabera a lu a mi la ga. Bibilo ngi a tahav. Nahan nyityôkwagh i se soo ser or u se lu tesen nan la nana fa cii kpa, hemba doon u se tese nan kwagh u Ruamabera a er sha kwagh shon la nana ôr iyol i nan.—Ôr Mbaheberu 4:12.
6. Or u nan lu tesen orgen kwagh la nana wase or shon u fan kwagh u nan lu henen la nena?
6 Nahan kpa, u ngu wer or u nan lu henen Bibilo a or la nana de u wan agoyol sha kwaghhenen la ga. Kpa hemba doon u se vande wan agoyol sha er se fa avur a Bibilo a se shin or u se lu henen kwagh a nan la nana ôr shighe u se tem kwaghhenen yô. Hemba doon u se ôr avur a Bibilo a a sue ityesen yase la. Shi se wase or u se lu henen kwagh a nan la sha er nana kav avur a nan er la yô.—1 Kor. 14:8, 9.
Pinen Mbampin mba Injaav
7. Doo u se pinen or u se lu henen kwagh a nan la mbampin mba injaav sha ci u nyi?
7 Ka sea pinen mba se henen Bibilo a ve la mbampin sha inja yô, ve wase ve u henen sha kwagh shi kwagh u se lu henen a ve la a kôr ve ken ishima. Nahan doo u se pase or u se lu henen kwagh a nan la avur a Bibilo ga, kpa se na nan ian nana pase se á. Ashighe agen yô, se pine or u se lu henen kwagh a nan la mbampin sha er se wase nan u kaven kwagh u nan lu henen la yô. Aluer se mba pinen or u se lu henen kwagh a nan la mbampin yô, se wase nan u fan er i hii ve se ne jighjigh a kwagh u se lu tesen nan la, nahan nan kpa nana na jighjigh a mi.—Mat. 17:24-26; Luka 10:36, 37.
8. Se er nan ve se fa ishima i or u se lu henen kwagh a nan laa?
8 Gbenda u se yaren tom a ityakerada yase sha u henen kwagh a ior yô, ka u pinen ve mbampin sha er vea naan mbamlumun yô. Ior kpishi mba se henen Bibilo a ve la vea fatyô u ôron mbamlumun mba ve lu ken ikyumhiange i se pin ve mpin her la. Kpa ortesen u nan soo ér kwagh u nan lu tesen or la a kôr nan ken ishima yô, nana gba lumun a ikyar i or shon nan ne la tsô ga. U tesen ikyav yô, alaghga or u i lu henen kwagh a nan la nana pase kwagh u Bibilo i er sha kwagh u idya i eren la vough. (1 Kor. 6:18) Kpa aluer se pine nan mbampin sha kwaghfan mba vea wase se u fan mnenge u nan yô, alaghga vea na nana pase mhen u nan sha kwagh u nan lu henen la. Nahan or u nan lu tesen nan kwagh la nana pine nan ér: “Er nan Bibilo i vende ér mba ve lu a vôso ayol a ve ga ve de yaven ayol a ve ga? U nenge tindi u Aôndo a we ne nena? U nenge wer doo u kuran atindi a Aôndo?” Mbamlumun mba nana na la vea wase se u fan mhen u nan.—Ôr Mateu 16:13-17.
Tesen Ior Kwagh sha Gbenda u a Wanger Ve Yô
9. Shighe u se lu tesen ior Bibilo yô, doo u se umbur nyi?
9 Mimi mbagenev mba i pase ken Bibilo la taver u kaven ga. Kpa alaghga atesen a kwaghaôndo u aiegh tsume a ior mba se henen Bibilo a ve la. Er se tesen ior Bibilo yô, doo u se tese ve sha gbenda u a wanger ve yô. Mba fan ityesen ka ve tese ior Bibilo vough shi ve tese ve sha gbenda u a wanger ve shi a taver ve u kaven ga yô. Aluer se dondo kwaghwan ne yô, se tese ior mimi sha gbenda u a taver ve u kaven ga yô. De ze zwa sha hanma kwagh ga. Shi ka hanma kwagh u se er ken Bibilo cii se za zwa sha mi ga. Hemba veren ishima sha kwagh u vesen u ivur la i er sha u tan iwanger sha kwagh u ú lu ôron la tseegh. Er or u se lu henen Bibilo a nan la nan lu vesen ken jijingi yô, nana za hemen u kaven akaacimin a ken Ruamabera kure kure.—Heb. 5:13, 14.
10. Kanyi ia wase se u fan akumahiange a se hen vea or shighe u se tem Bibilo i henene?
10 Ka akumahiange a me nahan i doo u se hen vea or shighe u se tem kwaghhenene? Gba u se er kwagh sha kwaghfan. Mfe wase vea u or u se lu henen Bibilo vea nan la ngu kwagh môm ga, nahan doo u se umbur ser awashima wase yô, ka u maan jighjigh u or u se lu henen Bibilo a nan la. Nahan doo u se na nan ian sha er nana ôr Mkaanem ma Aôndo shi nana kav ma shi nana lumun mimi u ker la kpaa yô. Doo u se hen kwagh a nan akuma akuma sha er nana kav yô. Nahan kpa, se henen kwagh a nan sha er kwaghhenen la una za ikyura yô. Aluer kwagh u se lu henen vea or la wanger nan yô, se yem sha kwagh ugen.—Kol. 2:6, 7.
11. Se hen nyi sha gbenda u apostoli Paulu tesen ior laa?
11 Apostoli Paulu yange a pase ior loho u dedoo sha gbenda u taver ga, sha er vea kav yô. Er fa takerada kpishi nahan kpa, ôron kwagh sha asember a taver ga. (Ôr 1 Mbakorinte 2:1, 2.) Gbenda u taver ga u pasen ior Bibilo la ka u na mimi u ker la a doo ior shi a kuma ve kpaa. Saa or nana fa takerada ve nana fa mimi u ken Bibilo ga.—Mat. 11:25; Aer. 4:13; 1 Kor. 1:26, 27.
Wase Mba u Henen Bibilo a Ve la Mimi a Doo Ve Ishima
12, 13. Kanyi ia mgbegha or u se henen Bibilo a nan la u eren sha kwagh u nan lu henen laa? Tese ikyav.
12 Gba u se tese mba se henen Bibilo a ve la kwagh a kôr ve ken ishima ve se lu mba fan ityesen ye. Doo u se wase or u nan lu henen Bibilo la nana fa er kwagh u nan lu henen la a bende a nan shi a lu nan a inja yô, shi nana fa er aluer nan dondo kwaghwan u Ruamabera ve una wase nan yô.—Yes. 48:17, 18.
13 U tesen ikyav yô, alaghga se mba timen sha Mbaheberu 10:24, 25, ape i taver Mbakristu asema ér ve kohol imôngo ken dooshima sha er vea ngohol kwaghwan ken Ruamabera la. Aluer or u se henen Bibilo a nan la nan ngu a hii u zan mbamkombo mba tiônnongo ga yô, se fatyô u pasen nan er i eren mbamkombo mban man kwagh u a hen ken ma mkombo u una dondo la yô. Shi se fatyô u pasen nan er mbamkombo ve lu gbenda môm u se civir Aôndo man er ve wasen se asange asange yô. Maa se lôhô nan ser nana za. Aluer nan ngu eren sha atindiakaa a Ruamabera kpa, nana de eren ér i doo or u nan lu henen kwagh a nan la ga, kpa i lu sha ci u isharen i nan i ungwan imo i Yehova la.—Gal. 6:4, 5.
14, 15. (a) Kanyi or u se lu henen Bibilo a nan nana hen sha kwagh u Yehova? (b) Aluer or u se henen Bibilo a nan la nan fa aeren a Aôndo yô, kwagh ne una wase nan nena?
14 Kwagh u vesen u or ka nana hen Bibilo shi nana dondo akaawan a i ve nan zua a mi yô, ka nan hingir u fan Yehova shi a doo nan ishima kpaa. (Yes. 42:8) Ngu Ter u lun a dooshima man Orgban sha man tar tseegh ga, kpa pasen mba a doo ve ishima shi ve civir un la agee a na man aeren a na. (Ôr Ekesodu 34:6, 7.) Shighe u Mose lu duen a ikyurior i Iserael ken uikyangen ken Igipiti kera la, Yehova pase iyol na ér: “Me lu kwagh u me lu yô.” (Eks. 3:13-15, NW) Kwaghôron ne tese ér Yehova una hingir nyityô kwagh i a soo cii sha u kuren awashima na sha ci u ior nav. Nahan Mbaiserael hingir u fan Yehova ér ngu Oryiman ve man Orutya man Or u koson ior nav man Or u kuren uityendezwa nav shi eren akaa agen kpaa.—Eks. 15:2, 3; 16:2-5; Yos. 23:14.
15 Alaghga Yehova una er ivande sha u yiman ior mba se henen Bibilo a ve la er Mose nahan ga. Nahan kpa, aluer jighjigh ve za hemen u taver shi kwagh u ve lu henen la za hemen u doon ve ishima shi mba eren sha mi yô, vea fa ér doo u vea suur sha Yehova ér a na ve ishimataver shi a na ve kwaghfan shi a kôôm ve kpaa. Aluer ve er nahan yô, vea fa ér Yehova ngu Orwasen u fan kwagh shi a kuma u suur sha a na, shi ngu Orkuran shi kur mbamgbe vev cii.—Ps. 55:22; 63:7; Anz. 3:5, 6.
Kwagh u Nan a Gba U Ishima
16. Or u mfe a yen nan je kpa nana fa ityesen sha ci u nyi?
16 Aluer u hen wer u fa ityesen er ma u fe la ga kpa, ishima i de yinan we ga. Yehova man Yesu mba nengen sha tom u pasen kwagh u i lu eren tar sha won cii ne. (Aer. 1:7, 8; Mpa. 14:6) Vea ver iniôngon yase sha er aeren ase a dedoo aa bende a mba i sar ve u fan mimi la yô. (Yoh. 6:44) Aluer or u se lu henen Bibilo a nan la doo se ishima yô, dooshima la una cir mfe u a yen se la. Apostoli Paulu tese ér un fa er i doo u eren a mba se henen kwagh a ve la sha dooshima yô.—Ôr 1 Mbatesalonika 2:7, 8.
17. Se tese ser kwagh u hanma or u se lu henen Bibilo a nan yô gba se ishima nena?
17 Se kpa se fatyô u tesen ser kwagh u or u se henen Bibilo a nan la gba se ishima sha u seer fan nan. Er se lu henen Bibilo a nan yô, adooga se hemba fan mlu u nan cii. Alaghga se nenge ser nan ngu eren sha akaa a nan lu henen ken Bibilo la. Kpa adooga a gba u nana seer kôôm aeren a nan agen. Nahan aluer se wase or u se lu henen Bibilo a nan la ser nana er sha kwagh u nan lu henen la yô, se mba wasen nan sha dooshima ser nana hingir orhenen u Kristu.
18. Er nan i doo u se er msen vea or u se henen Bibilo a nan shi se ter iti i nana?
18 U hemban cii yô, se er msen vea or u se lu henen Bibilo a nan la shi se ter iti i nan ken msen kpaa. Doo u nana kav sha msen wase la ér se soo u wasen nan sha er nana seer fan Orgban u nan shi nana kporom hen a Na shi nana zua a iwasen sha kwaghwan Na kpaa yô. (Ôr Pasalmi 25:4, 5.) Aluer se er msen ser Yehova a ver iniôngon i or u se lu henen kwagh a nan la sha er nana er sha kwagh u nan hen la yô, kwagh ne una wase nan u ‘eren sha kwaghôron’ la. (Yak. 1:22) Shi er nan lu ungwan er se lu eren msen sha gbashima yô, nan kpa nana hen u eren msen. Ka sea wase or u se henen Bibilo a nan nana ya ikyar a Yehova nahan i saan se iyol kpen kpen.
19. Kanyi se hen ken ngeren u a dondo nee?
19 Doo se kpishi er Mbashiada mba Yehova mba hemban miliôn ataratar ve lu henen ‘igbenda i tesen ior kwagh’ sha er vea wase mbaasemaamimi u kuran akaa a Yesu a we tindi sha mi la cii yô. Ka akaa a dedoo a nyi se zough a mi ken tom wase u pasen kwagh nee? A na mlumun sha mpin ne ken ngeren u a dondo ne.
Baver We Kpa?
• Doo u Mbakristu vea fa ‘igbenda i tesen ior kwagh’ sha ci u nyi?
• Kanyi ia wase se u fan ityesene?
• Aluer mfe wase yina kpa kanyi ia wase se?
[Study Questions]
[Picture on page 9]
Ú nyôr Makeranta u Henen Tom u Hemen u Aôndo la vee?
[Picture on page 10]
Er nan i doo u kaan a or u ú henen Bibilo a nan wer nana ôr Bibilo?
[Picture on page 12]
Er msen vea or u ú henen Bibilo vea nan la shi ter iti i nan kpaa