Dondo Ormishen U Hemban Cii La

“Lu nen mbakaven mo er mo kpaa, m kaven Kristu nahan.”—1 KOR. 11:1.

1. Gba u se dondo Yesu Kristu sha ci u nyi?

 APOSTOLI PAULU yange dondo Yesu Kristu u a lu Ormishen u hemban cii la. Nahan a taver Mbakristu asema wener: “Lu nen mbakaven mo er mo kpaa, m kaven Kristu nahan.” (1 Kor. 11:1) Yesu yange hide a iyol na ijime nahan ôô mbaapostoli nav angahar sha u tesen ve er i doo u hiden a iyol ijime yô, been yô kaa a ve ér: “M ver ne ikyav i tesen sha er ne kpaa er nen er M er ne nahan.” (Yoh. 13:12-15) Nyian kpa, se Mbakristu se mba a tom u dondon Yesu Kristu sha kwaghôron wase man aeren a ase.—1 Pet. 2:21.

2. Aluer Mbahemenev mba Shin Tine tindi ú ér u za er tom u mishen ken tar ugen ga je kpa, ú lu a ishima i eren tom u ivangeli nena?

² Se vande henen ken ngeren u ken ijime la ser ormishen ka or u i tindi nan ér nana za er tom u ivangeli, inja na yô nana za pase mbagenev loho u dedoo yô. Nahan Paulu pine mbampin mba injaav sha kwagh ne. (Ôr Mbaromanu 10:11-15.) Ver ishima wer, apostoli Paulu pine ér: “Á er nan man vea ungwa aluer or u ôron kwaghaôndo nana lu ga yôô?” Been yô a ôr mkaanem ma ken kwaghôron u profeti u Yesaia, ér: “Angahar a mbayôôn loho u akaadoon la a doo tsô!” (Yes. 52:7) Aluer i tindi ú ér u za er tom u mishen ken ma tar ugen ga je kpa, ú fatyô u lun a jijingi u pasen ivangeli la, nahan dondon Yesu sha u pasen loho u dedoo sha ishimatseen. Inyom i i kar la, mbapasen kwagh u Tartor mba kuman iyenge 6,957,852 nahan “er tom u ivangeli” ken ityar i kuman 236.—2 Tim. 4:5.

“Se Undu Akaa Cii, Se Dondo U”

3, 4. Kanyi Yesu yange undu sha, man gba u se er nyi keng ve se lu mbadondon nava?

³ Yesu yange undu uma man iengem i vande lun a mi sha la, nahan “gema iyol Na hingir gbilin er A tôô mlu u ortom” la sha er una kôr cio u eren tom u i tindi un shin tar la kuren yô. (Fil. 2:7) Sea undu nyityô kwagh sha u dondon Kristu kpa kuma sha kwagh u Yesu yange undu sha, va shin tar la ga. Kpa er se lu mbadondon Yesu  yô, se fatyô u tilen her dông, lumun ser akaa a ken tar u Satan a yange se undu la a hide a sar se ga.—1 Yoh. 5:19.

⁴ Apostoli Peteru yange kaa a Yesu sha shighe ugen la ér: “Nenge ase, se undu akaa cii, se dondo U.” (Mat. 19:27) Shighe u Yesu lôhô Peteru man Anderia man Yakobu kua Yohane ér ve dondo sha a na la, ve undu ukper vev fese je ve dondo sha a na. Yange ve de tom u kôron ishu u ve eren la, ve hingir u eren tom u pasen kwagh u Tartor. Sha kwagh u i nger ken Ivangeli i Luka yô, Peteru kaa ér: “Nenge, se undu akaa ase, se dondo U.” (Luka 18:28) Se mbagenev kpishi yange se undu “akaa ase” cica cii sha er se dondo sha Yesu ga. Kpa se ‘nyiman ayol a ase’ nahan se hingir mbadondon Kristu shi se mba civir Yehova a ishima i môm kpaa. (Mat. 16:24) Kwagh ne va se a mbamtsera kpishi. (Ôr Mateu 19:29.) Aluer se dondo Kristu nahan se mba pasen kwagh sha gbashima yô a saan se iyol, hemban cii yô aluer se wase or nan kporom hen Aôndo man Wan na u ishima ishima la yô.

5. Ôr vande-eren u a tese kwagh u or u nan yem shir ken tar ugen nan za hen mimi u ken Bibilo ve nan er yô.

⁵ Orgen ken tar u Brazil, u i yer un ér Valmir, a lu ken gar ugen ken tar u Suriname hegen ne yange dughun zenaria. Shi lu or u wan idya, u msôrom ya tor ken a na yô. Shighe u lu ken gar la, Mbashiada mba Yehova hii u henen Bibilo a na. Yange henen kwagh hanma iyange, nahan ica gba ga maa er batisema. Er nenge ér tom na ngu yangen un u eren sha atesen a ken Bibilo yô, a de tom na la a hide ken tar u Brazil ér una za wase tsombor na u fa mimi. Ior kpishi mba ve undu ityar ve, ve yem ken ityar igen ka vea za hen mimi ken ityar shon yô, ve hide ken tar ve sha er vea wase mba hen tsombor ve man mbagenev ve fa mimi yô. Mbapasenkwagh u Tartor mba ve eren nahan cii mba tesen ishimatseen sha tom u ivangeli ne.

6. Aluer se fatyô u yemen sha ajiir a kwagh a hembe gban sha mbapasenkwagh u Tartor ga je kpa se fatyô u eren nyi?

⁶ Mbashiada kpishi yem sha ajiir a kwagh a hembe gban sha mbapasen kwagh u Tartor yô. Mbagenev je yô yem ken ityar igen sha u za pasen kwagh. Alaghga se ayol a ase se fatyô u eren nahan ga, kpa se fatyô u dondon Yesu sha u pasen kwagh sha afatyô wase cii.

Yehova Ne Se Ityesen i Ia Wase Se Yô

7. Ka imakeranta i nyi nahan i ver sha u tsaase mba ve soo u eren tom u pasen kwagh u Tartor tsema tsema?

⁷ Se zua a iwasen sha ityesen i  Yehova a lu nan se nyian ne di er Yesu kpa yange zua a ityesen hen Ter na nahan. Yesu iyol na kpa kaa ér: “Ken uprofeti i nger er: Ve cii Aôndo Una tese ve.” (Yoh. 6:45; Yes. 54:13) I bugh imakeranta nyian sha u tsaase se u pasen kwagh u Tartor. Sha kpôô yô, se cii se zua a iwasen kpishi ken Makeranta u Henen Tom u Hemen u Aôndo ken atôônanongo a ase. Upania ka ve za Makeranta u Henen Tom Pania. Mba ve tse ken tom pania mbagenev je yô za makeranta ne kwa har. Mbatamen man udiakon di ka ve za Makeranta u Tom u Tartor sha er vea tsaase gbenda u ve tesen kwagh la shi vea hemba eren mbananjighjigh a ve imôngo tom tsema tsema yô. Mbatamen man udiakon mba lun kwav kpishi za Makeranta u Tsaase Mbashiren Tom za ngohol ityesen, sha er vea wase mbagenev ken tom u pasen kwagh yô. Shi i tsaase anmgbianev mba nomso man mba kasev kpishi ken Makeranta u Bibilo u Watchtower u Gileadi la cii ve i mase tindin ve ér ve za er tom u mishen ye.

8. Anmgbianev mba nomso mbagenev nenge ityesen i Yehova a lu nan la nena?

⁸ Mbashiada mba Yehova kpishi sôr akaa a ve ver sha er vea za imakeranta ne yô. Orgen mba yer un ér Yugu, er soo u zan Makeranta u Tsaase Mbashiren Tom ken tar u Kanada yô, a de tom u sha tôndo u a eren la sha ci u or u tôô un tom la lumun u nan un ian i zan makeranta ne ga. Yugu kaa ér: “M vaa afanyô ga cii. Jighilii yô, luun er yange a nem ian i zan makeranta la yô, ma gba u me er tom vea kômpeni la gbem. Kpa hegen yô, m ngu a ian i eren hanma tom u Yehova una nam cii.” Ior kpishi de akaa a yange doo ve kpishi u eren la sha er vea za imakeranta ne vea za ngohol ityesen hen Aôndo yô.—Luka 5:28.

9. Ka kwagh u doon u nyi ngu a due ken iniongon yase man ityesen i Ruamaberaa?

⁹ Aluer se nôngo kpoghuloo se mba eren sha ityesen i Ruamabera yô, se fatyô u wasen ior u fan mimi. (2 Tim. 3:16, 17) Nenge ase kwagh u anmgbian ugen ken tar u Guatemala u i yer un ér Saulo ne. Yange i mar un a angev mbu ken ityou, nahan kwase u tesen un ken makeranta yô kaa a ngô u anmgbian ne ye a de kighir wan na ér a hen u ôron takerada ga, gadia kwagh la una na ishima a vihi un a vihi tsô. Nahan Saulo bee makeranta kpa fa u ôron takerada ga. Kpa Orshiada ugen yar tom a antakerada u i yer ér Apply Yourself to Reading and Writing la tese Saulo fa u ôron takerada. Shighe kar yô Saulo hingir u nan kwaghôron ken Makeranta u Henen Tom u Hemen u Aôndo. Ngô u Saulo due kwaghpasen sha uya uya, nahan za zua a tica u Sualo la. Tica u Saulo ongo ér a fa u ôron takerada yô a kaa ér ngô na una vaan kwagen yô a va vea na. Saulo ze vea ngô na u za nengen a tica na la yô, tica na la pine un ér, “Kanyi u soo u tesen mo?” Tsô Saulo hii u ôron ikyumhiange ken takerada u Bibilo Tese Ér Nyi Jimi? la. Tica la kaa ér, “Kpiligh mo iyol er u hingir u tesen mo yô.” Er doo tica ne yum yô a kuve Saulo.

Atesen a A Benden a Ishima i Or Yô

10. Ka ikyagh ki tomough ki injaa ki tesen ior mimi u Bibilo ki nyi se lu a mi?

¹⁰ Yesu yange har ityesen na sha akaa a Yehova tese un la kua sha akaawan a a lu ken Mkaanem ma Aôndo a ne i nger la. (Luka 4:16-21; Yoh. 8:28) Se mba dondon Yesu sha u eren sha akaawan a na shi tesen akaa a a lu ken Ruamabera la. Nahan se cii se mba henen kwagh môm shi se mba lamen zwa môm, man kwagh ne wasen mzough wase u anmgbianev la kpaa. (1 Kor. 1:10) Doo se kpishi er “wanakiriki u jighjigh man u fan kwagh” a ne se ityakerada i pasen akaa a ken Bibilo sha er ia wase se se za hemen u tesen ior ken mzough shi eren tom wase u ivangeli tsema tsema yô. (Mat. 24:45; 28:19, 20) Môm ken ityakerada ne yô ka takerada u Bibilo Tese, u u lu ken ijô 179 la.

11. Anmgbian u kwase ugen ken Etiopia yange yar tom a takerada u Bibilo Tese la nahan hemba ahendan nena?

¹¹ Aluer se mba enen Bibilo a or ken takerada u Bibilo Tese la yô, kwagh ne una fatyô u nan or u nan lu hendan a vese nana gema ishima. Sha shighe ugen la, pania u kwase ugen ken tar u Etiopia, mba yer un ér Lula, lu henen Bibilo vea kwase ugen nahan anngô u kwase shon u kwase  va nyôr maa kaa ér ve de u henen Bibilo la. Lula kpe iyol time sha ikyav i í tese sha kwagh u jebu inyar ken iyough ki sha 15 ki takerada u Bibilo Tese la vea kwase ne. Nahan kwase ne kaa ér ve za hemen a kwaghhenen ve. Shighe u Lula hide za u za henen Bibilo vea kwase u lu henen kwagh a na la, anngô na la kpa tema her shi kaa ér un kpa i hen kwagh a na, je yô kaa ér una kimbi inyaregh sha kwaghhenen shon kpaa. Ica gba ga tsô gba henen kwagh kwa tar ken hanma sati shi za ikyura ken mimi kpaa.

12. Ka ikyav i nyi i tese ér agumaior kpa aa fatyô u tesen ior mimi mba ken Bibilo?

¹² Agumaior kpaa aa fatyô u yaren tom a takerada u Bibilo Tese la wasen mbagenev. Keanu u ken tar u Hawaii, ngu anyom 11, yange lu ôron takerada ne ken makeranta nahan wan ugen u ve lu klase môm yô pine un ér, “Er nan ve u ember uiniongo ga?” Keanu maa ôr mlumun u i ne ken ngeren u seer u takerada shon la sha itinekwagh i i kaa ér: “Doo u Se Ember Uiniongo?” la. Been yô maa bugh ken ngeren u tesen atineakaa u takerada la tese wan shon, maa pine un ér a tsua itinekwagh i i hembe doon un u lamen sha mi la. Nahan hii u henen Bibilo a wan shon. Ken inyom i tom i i kar la, Mbashiada mba Yehova hen Bibilo a iorov 6,561,426, man kpishi ken ve yar tom a takerada u Bibilo Tese la. Ú henen Bibilo a ior ken takerada ne kpa?

13. Bibilo i henen ia fatyô u benden a ior sha nyi gbenda?

¹³ Aluer se mba yaren tom a takerada u Bibilo Tese la sha u henen Bibilo a ior yô, kwaghhenen la una bende a mba i sar ve u eren ishima i Aôndo la kpishi. Anmgbian ugen vea kwase na mba ve lu eren tom u ikpur pania ken tar u Norway yô hii Bibilo i henen vea tsombor ugen u u mough ken tar u Zambia yô. Tsombor ne lu a ônov mba kasev utar, nahan ve kera soo u maren wan ugen ga. Sha ityôkyaa ne yô, ngô u mbayevkasev mbara hidi we iyav yô tsombor ne kaa ér vea vihi iyav mbula. Ka masen shin kpuaa u vea za nenge a ortwer yô ve hen ityough ki ki kaa ér, “Nengen Uma Er Aôndo Kpa A Nengen La.” Er tsombor ne nenge foto u wan u ken uya u a lu ken ityough ki ve hen la yô, kwagh la bende a ve nahan ve kaa ér vea kera vihi iyav mbula ga. Yange ve za hemen ken jijingi shi ve ya wan u nomso u ve mar la iti kwagh môm vea anmgbian u nomso u lu henen Bibilo a ve la.

14. Ôr vande-eren u a tese ér aluer se mba eren sha akaa a se tesen la yô akaa a dedoo aa due ker la.

¹⁴ Kwagh u vesen u na ve Yesu fa ityesen yô yange eren sha kwagh u tesen ior la. Ieren i Mbashiada mba Yehova mba ve dondon ikyav i Yesu la doo ior kpishi. Yange í ii orkasua ugen ken tar u New Zealand akaa a ken mato shi í ii un ikpa a akaa a injaa ker. Nahan za ôr ordasenda kwagh u er un ne, ordasenda la kaa a na ér: “Kwagh u una na ve una zua a ikpa na la yô, saa di aluer  Orshiada u Yehova nana nenge a mi nahan nana tôô ve una zua a mi ye.” Kwase Shiada ugen u teen pipa i̱ tôôn abaver nenge a ikpa ne maa tôô. Orkasua ne fe ér anmgbian u kwase ne zua a i yô, a va hen ya u anmgbian ne. Va nengen ér ngeren u lu un a inja kpishi la kpa ngu ken ikpa shon her yô, ishima gba un shimi. Anmgbian u kwase ne kaa a orkasua ne ér, “Er m lu kwase Shiada u Yehova yô, hemba kan kwagh u vough u hiden a ikpa ne a akaa a a lu ker la cii nan or u i lu i nan la.” Kwagh ne kpiligh orkasua ne iyol kpen kpen shi mase umbur kwagh u ordasenda la ôr un shighe u za ôr un kwagh u er un la. Sha kpôô yô, Mbakristu mba mimi mba eren akaa sha atesen a a lu ken Bibilo la vough, shi mba dondon Yesu kpaa.—Heb. 13:18.

Dondo Gbenda u Yesu Eren Kwagh a Ior La

15, 16. Kanyi se er ve ior vea soo loho u se pasen nee?

¹⁵ Gbenda u Yesu eren kwagh a ior la na yô ior soo loho u pasen la. Ikyav i tesen yô, dooshima na man iyol na i hiden a mi ijime la na yô mbaatsanev kpishi vaan hen a na. Yange mhôônom kôron un a mba ve va hen a na la nahan a sur ve asema sha u lamen a ve kundu kundu shi a bee mbagenev kpishi iangev vev kpaa. (Ôr Marku 2:1-5.) Se fatyô u eren uivande nyian ga, kpa se fatyô u nan mimi doon ior ishima sha u eren a ve sha dooshima shi hiden a iyol yase ijime shi mhôônom kôron se a ve kpaa.

¹⁶ Ikpur pania ugen, mba yer un ér Tariua, yange za hen ya u orbeenyol ugen ken icile i Kiribati ken imbusutariyan hen pe ior ve fe lun ga yô, mba yer orbeenyol ne ér Beere. Shin er orbeenyol ne soo u ungwan ga nahan kpa, er Tariua nenge er or ne kpe alegh yô, kunya kôr un a na kpishi. Nahan a pine orbeenyol ne ér: “U fa kwagh u Aôndo a tende zwa ér una va er sha ci u mba ve lu uange man mbabeenyol kpa?” Pin nahan yô, maa a ôr kwagh u i nger ken kwaghôron u profeti u a lu ken takerada u Yesaia la. (Ôr Yesaia 35:5, 6.) Er kwaghôron ne kôr orbeenyol la ken ishima yô a kaa ér, “M ôr Bibilo hegen anyom imôngo shi ormishen u ken kwaghaôndo wam tem imôngo a mo anyom kar hegen imôngo, kpa m ngu a nenge a imba kwagh ne ken Bibilo ga.” Nahan anmgbian ne hii Bibilo i henen a Beere shi a za ikyura ken jijingi kpaa. Er yange kpe a legh nahan kpa, hegen yô a er batisema shi ka un a lu nengen sha nongo u u lu ca a mbagenev la hen ijiir la ye, heela tseegh ga, ngu a zende ken icile la cii a pasen ior loho u dedoo ne.

Za Hemen u Dondon Yesu

17, 18. (a) Ú er nan ve u za ikyura ken kwaghpasen wouwe? (b) Mba tom u pasen kwagh u gbe ve ishima la vea zua a nyi?

¹⁷ Aluer se mba a aeren a dedoo a Yesu kpa lu a mi la yô, se fatyô u eren tom u ivangeli ne tsema tsema, er uvande-eren mba doon mba i zough a mi ken tom kwaghpasen ve tese kwa imôngo imôngo nahan. Sha mimi yô, aluer se kpa se mba eren tom u ivangeli ne sha gbashima er Kristu nahan yô, a doo kpishi.

¹⁸ Shighe u mbagenev ken derianyom u hiihii la hingir mbahenen mba Yesu la, Peteru pine ér: “Ka nyi je sé va zua a mini?” Yesu kaa a ve ér: “Hanmô u nan undu uya shin anmgbianev mba nomso, shin mba kasev, shin ter, shin ngô, shin ônov, shin ishule sha ci u iti Yam yô, nana shi á zua a mi kwa akunduatar shi nana zua a uma u tsôron kpaa.” (Mat. 19:27-29) Aluer se za hemen u dondon Yesu Kristu u a lu Ormishen u hemban cii la yô, mkaanem man maa kure sha a vese.

Ú Kaa We Nyi?

• Yehova ngu tsaase se u eren tom u pasen kwagh ne nena?

• Er nan ve takerada u Bibilo Tese la u lu wasen se ken tom u kwaghpasen wase?

• Se dondo gbenda u Yesu eren kwagh a ior la nena?

[Study Questions]

[Picture on page 17]

Shighe u Yesu kaa a Peteru man Anderia man Yakobu man Yohane ér ve dondo sha a na la ve timbir ga ve dondo sha a na

[Picture on page 19]

Ityakerada er u “Bibilo Tese” la ka i wase se u tesen ior kwagh ken mzough