Zenden Sha Igbenda I Yehova
Zenden Sha Igbenda I Yehova
“Hanma or u nan cie TER, shi nan zenden sha igbenda Na yô, saan nan iyol.”—PS. 128:1.
1, 2. Hii nan se fe ser or a fatyô u zuan a msaanyol u mimi?
HANMAOR cii soo u zuan a msaanyol. Kpa u ngu wer aluer or soo u zuan a msaanyol shin nan ngu keren msaanyol tseegh tsô maa a saan nan iyol ga.
2 Nahan cii kpa or a fatyô u zuan a msaanyol u mimi. Pasalmi 129:1 kaa ér: “Hanma or u nan cie TER, shi nan zenden sha igbenda Na yô, saan nan iyol.” Se fatyô u zuan a msaanyol aluer se mba civir Aôndo shi se mba zenden sha igbenda na sha u eren ishima na yô. Kwagh ne una bende a vese man aeren a ase nena?
Lu Or u Mimi
3. Ieren i mimi zua sha iyol i se tsegh sha ci u Aôndo la nena?
3 Mba ve cie Yehova cii mba ior mba mimi vough er un kpa a lu u mimi nahan. Yehova yange kure uityendezwa mba er a Iserael u tsuaa la cii. (1 Utor 8:56) Iyol i se tsegh sha ci u Aôndo la ka ityendezwa i hemban cii i se er a na yô, man aluer se mba eren msen hanma shighe yô se kôr cio u eren sha ityendezwa yase la. Se fatyô u eren msen er Davidi, orngeren pasalmi kpa er nahan. A kaa ér: “Gadia Aôndo, We, U ungwa uiceghzwa av. . . . me waan icam i wuese iti You gbem. . . me kuren uiceghzwa av ayange ayange.” (Ps. 61:5, 8; Orpa. 5:4-6) Saa se lu ior mba mimi ve se fatyô u lun ahuraior a Aôndo ye.—Ps. 15:1, 4.
4. Yefeta man wan na u kwase yange ve er nan sha ityendezwa i er a Yehova laa?
4 Shighe u Mbaajiriv lu hemen Mbaiserael la, Yefeta bum a Yehova ér aluer a na Mbaamon sha ikyev na yô, nyityôkwagh i ia due hen ihinda i ya na sha u va keghen un gbenda zum u una hide ityav cii, una gema i una na Yehova “nagh ku nanden sha mi.” Kwagh ka a er yô, lu wan u Yefeta u môm môm la je due sha u va keghen un gbenda ye. Er Yefeta man wan na u kwase u lu iniunkwase her la na Yehova jighjigh yô, kwagh ne wase Yefeta u eren sha ityendezwa na la vough. Wan u Yefeta u kwase la yange lumun ér una lu kwav nahan una er Yehova tom ken icighanjiir, shin er ior i Iserael nengen mar man kwase shin nom u eren ér ka zegekwagh nahan kpaa.—Mbaj. 11:28-40.
5. Hana yange er kwagh sha mimi sha nyi gbenda?
5 Hana u lu kwase u cian Aôndo la kpa lu a ieren i mimi. Yange lu vea nom na Elkana, u lu Orlevi la kua Penina u lu wuhe na la sha tar u iwoogh u Eferaim. Penina yange mar mbayev kpishi nahan hanma shighe u tsombor ve ua za ken tabernakel yô, a shi bamen Hana u mar ga la. Shighe ugen tsombor ve za ken tabernakel nahan Hana tôndo zwa ér aluer un mar wan u nomso yô una gema un una na Yehova. Ica i gbe ga yô a wa iyav a mar wan u nomso, nahan a ii un iti ér Samuel. Wan la den atumba yô, Hana za a na hen ya u Aôndo hen Shilo a za gema un a na Yehova “sha ayange a uma na cii.” (1 Sam. 1:11) Nahan Hana er sha ityendezwa na la vough, shin er fa ér una va mar mbayev mbagen ken hemen ga nahan kpaa.—1 Sam. 2:20, 21.
6. Ieren i mimi i Tikiku la yange i due ken igbar nena?
6 Tikiku u lu Orkristu u sha derianyom u hiihii la yange lu or u eren kwagh sha mimi shi lu “ortom u jighjigh” kpaa. (Kol. 4:7) Tikiku yange mough zende vea apostoli Paulu ken Grika ve kar ken Masedonia ve yem ken Ashia u Kiriki shi alaghga ve za ken Yerusalem kpaa. (Aer. 20:2-4) Alaghga Tikiku lu “anmgbian” u wase Titu u kohol iyua sha ci u anmgbianev mba ken Yudia mba ve lu mbaatsanev la. (2 Kor. 8:18, 19; 12:18) Shighe u i hii wuhen Paulu ken purusu ken Roma la, yange tindi Tikiku u lu or u mimi la a uwashika hen anmgbianev mba nan jighjigh mba ve lu ken Efese man Kolose la. (Ef. 6:21, 22; Kol. 4:8, 9) Zum u i wuhe Paulu sha kwa u sha uhar la kpa lu Tikiku Paulu tindi un ken Efese ye. (2 Tim. 4:12) Aluer se mba ior mba mimi yô, se kpa se zua a averen ken tom u se lu eren Yehova ne.
7, 8. Se fatyô u kaan ser Davidi man Yonatan yange ve lu ahuraior a mimi sha ci u nyi?
7 Aôndo soo ér se lu ahuraior a mimi. (Anz. 17:17) Yonatan, wan u tor Saulu yange ya ikyar vea Davidi. Zum u Yonatan ungwa ér Davidi wua Goliati yô, “ishima i Yonatan maa zua a ishima i Davidi. Davidi doo Yonatan ishima je er ka uma na iyol na nahan.” (1 Sam. 18:1, 3) Shighe u Saulu soo u wuan Davidi la kpa Yonatan ta un icin. Nahan Davidi yevese za yer, kpa Yonatan za kohol un shi er ityendezwa a na kpaa. Saulu nôngo u wuan Yonatan sha ci u a lam vea Davidi, kpa ahuraior a ahar ne hide zua nahan seer taver ikyaryan ve. (1 Sam. 20:24-41) Mba va zough sha kwa u masetyô yô, Yonatan taver Davidi “ishima ken Aôndo.”—1 Sam. 23:16-18.
8 Yonatan kpe ken ityav mbi Iserael lu nôngon vea Mbafiliti la. (1 Sam. 31:6) Nahan Davidi dugh icam sha kwelegh kaa ér: “Ican tsulem ken ishima sha ci wou anngôm, Yonatan; u doom tsung; dooshima wou la kam kwagh u kpilighyol, hemba dooshima u ukase.” (2 Sam. 1:26) Davidi man Yonatan lu ahuraior a mimi.
‘Hiden a Iyol You Ijime’ Hanma Shighe Cii
9. Mbaajiriv ityough 9 tese er i doo u hiden a iyol ijime nena?
9 Saa se ‘hiden a ayol a ase ijime’ ve se lu ahuraior a Aôndo ye. (1 Pet. 3:8; Ps. 138:6) Mbaajiriv ityough 9 tese er i doo u hiden a iyol ijime yô. Yotam wan u Gidion kaa ér: “Yange igen ikyon za sha u ia za kôr kon ugenegh tor.” Tsô i kaa a kon u olev man u tur man u wain ér ve va tema tor kpa ve venda. Ikyon ne tile sha ityou ki ior mba mimi mba ken Iserael mba kwagh gba ve u teman tor sha mbagenev ga yô. Kpa saa u a lu a inja sha ci u usu tseegh la yô gema tile sha ityough ki Abimeleki u gengeseiyol shi wuan ior kpaa, u lu keren ér una tema tor la. Er ‘Abimeleki tema tor sha Iserael anyom atar’ nahan kpa, yange kpe ku swendegh. (Mbaj. 9:8-15, 22, 50-54) Nenge er i doo u ‘hiden a iyol jime’ sha wono!
10. U hen nyi sha kwagh u Herode yange na “Aôndo icivir ga” laa?
10 Sha derianyom u hiihii la ayôôso gba hen atô u Herode Agripa, Tor u Yudia, u gengeseiyol la vea ior mba ken gar u Tiru man Shidon, nahan ve va u va keren bem vea tor. Iyange igen yô, Herode va ôr kwagh a ior, nahan ior gbidye awer kaa ér: “Ka imo i Aôndo je, ka i or ga!” Er Herode venda icivir la ga yô, ortyom u Yehova wua un “sha ci u a ne Aôndo icivir ga yô.” (Aer. 12:20-23) Aluer se fa u nan kwaghôron tsema tsema shin se fa u tesen ior mimi mba ken Bibilo je kpa doo u se naan Aôndo icivir sha hanma kwagh u a ne se mfe u eren cii.—1 Kor. 4:6, 7; Yak. 4:6.
Taver Ishima Lu Icihi
11, 12. Kwagh u Enoki la tese ér Yehova ne mba ve civir un la agee man ishimataver nena?
11 Aluer se mba zenden sha igbenda i Yehova a iyol i hiden a mi ijime yô, una na se ishimataver man agee. (Dut. 31:6-8, 23) Enoki u lu kov u sha utaankaruhar hii sha Adam je la yange taver ishima zende vea Aôndo sha mimi, shin er ior mba sha ayange a na la lu mbaaferev nahan kpaa. (Gen. 5:21-24) Yehova yange na Enoki ishimataver sha er una pase ior mba sha ayange a na la loho u ageegh sha ci u akaaôron a ve man aeren a ve a vendan Aôndo la yô. (Ôr Yuda 14, 15.) U ngu a ishimataver kuma u ú pase ior ajiraôron a Aôndo kpa?
12 Yehova yange tim tar sha Mngerem ma Deemee ma ma va sha ayange a Noa la. Nahan kpa kwaghôron u profeti u Enoki la taver se ishima, sha ci u mbafanaôndoga mba sha ayange ase ne kpa Aôndo una va a uicighan Nav udubu udubu vea va tim ve. (Mpa. 16:14-16; 19:11-16) Yehova ka a ungwa mbamsen asev nahan a na se agee sha er se pase ior loho na yô, aluer ka loho u sha kwagh u ajiraôron a na shin sha kwagh u averen a se va zua a mi ken Tartor na la kpaa.
13. Se fatyô u lun a vangertiôr ser Aôndo una na se ishimataver man agee a wan ishima a mbamzeyol sha ci u nyi?
13 Gba u Aôndo una na se agee man ishimataver ve se fatyô u hemban mbamzeyol mba se tagher a mi la ye. Shighe u Isou vôso ônkasev mba Mbahiti uhar la, “ve gema ve na [mbamaren mba Isou] Isaka vea Rebeka ishima i vihin kpishi.” Rebeka kaa ér: “Nyôrom iyol a ônkasev mba Mbahiti mban. Aluer Yakob [wan wase] una er kwase ken ônkasev mba Mbahiti, inja mban nahan, ken ônkasev mba hen tar ne yô, me shi me lu uma sha won sha ci u nyi?” (Gen. 26:34, 35; 27:46) Nahan Isaka maa tindi Yakob ér a za ker kwase hen ior mba civir Yehova. Er Isaka man Rebeka lu a tahav mbu vea gema kwagh u Isou er la ga nahan kpa, Aôndo na ve kwaghfan man ishimataver kua agee a wasen ve u lun jighjigh hen a Na her. Aluer se sôn iwasen hen Yehova yô, una na se.—Ps. 118:5.
14. Wankwase u kpeghee u ken Iserael yange tese ishimataver nena?
14 Uderimbaanyomov mba karen imôngo yô, ikyumutya i Mbashiria va kôr wankwase u kpeghee ken Iserael yem a mi uikyangen za ver un hen ya u Naaman, u lu kurutya u Mbashiria u gba imande la. Er wankwase la ungwa uivande mba Elisha, profeti u Aôndo lu eren la yô, wankwase la gema kaa a ngô na ér: ‘Terem ma a ze ase hen profeti u Yehova ken Iserael, nahan ma a bee un imande!’ Naaman za ken Iserael nahan i bee un imande na la sha ivande. (2 Utor 5:1-3) Kwagh u wankwase ne er la ka ikyav i dedoo hen ikyaior i i suur sha Yehova ér a na ve ishimataver vea pase atica ve man mba ve ze makeranta a ve imôngo kua mbagenev kwagh la.
15. Obadia u eren tom ken ya u Tor Ahaba la tese ishimataver nena?
15 Aôndo ne se ishimataver u wan ishima a tôvacan. Nenge ase kwagh u Obadia u eren tom ken ya u Tor Ahaba, u lu uma sha ayange a profeti Eliya la. Shighe u Torkwase Yesebel na zwa ér i wua uprofeti mba Aôndo la, Obadia za yer uprofeti mba Aôndo iorov deri ken “bar, akunduahargber, akunduahargber.” (1 Utor 18:13; 19:18) U fatyô u wasen Mbakristu mba i lu tôvon ve a ican, er Obadia yange wase ior mba Yehova nahan kpa?
16, 17. Aristareku man Gayu yange ve er nena shighe u i lu tôvon ve a ican laa?
16 Aluer mba tôvon se a ican kpa se fatyô u lun a vangertiôr ser Yehova una sue se. (Rom. 8:35-39) Aristareku man Gayu, ior mba ve shiren tom vea Paulu imôngo la yange ve tagher ishigh a ikpelaior i toron asema i kuman udubu imôngo ken agirigi u anumbegh ken gar u Efese. Demetriu u varen iwa i azurfa la wa ior kwagh nahan ve hii u eren ayôôso. Un man mbavareniwa mbagenev yange ve var akav a tempel u inmgbianaôndo u i yilan ér Artemi la, man tom ve ne vaan ve a mtsera kpishi. Nahan shighe u Paulu va pase kwagh ken gar la yô, mbagenev ken a ve kpishi de u civir akombo a yange ve civir la. Ior mba toron asema mbara kpera Aristareku man Gayu va a ve ken agirigi u anumbegh, gba genger amo kaan er: “Artemi u Mbaefese ka zegekwagh je!” Aristareku man Gayu yange ve hen ér vea war ga, kpa orngeren u gar la va yange ikpelaior la ayôôso.—Aer. 19:23-41.
17 Luun we yange wea tagher a ahendan la nahan ma u za hemen u pasen kwagh her kpa? Ikyav cuku kpa tese ér Aristareku man Gayu yange ve de tom ve u pasen kwagh la ga kpa ve za hemen u taver ishima her. Er Aristareku lu ken Tesalonika yô, fa je ér loho u dedoo u un lu pasen la ua na ior vea tôv un a ican. Sha shighe ugen la, udangmbaiorov mough ayôôso a Paulu ken gar la shighe u lu pasen kwagh ker yô. (Aer. 17:5; 20:4) Er Aristareku man Gayu lu zenden sha igbenda i Yehova yô, Aôndo na ve agee man ishimataver i wan shima a tôvacan.
Waan Akaa a Mbagenev Ikyo
18. Priseka man Akula yange ve “waan” akaa a mbagenev “ikyo” nena?
18 Aluer mba tôvon se a ican hegen shin mba tôvon ga je kpa, se za hemen u wan akaa a Mbakristu mbagenev kpa ikyo. Priseka man Akula yange ve “waan” akaa a mbagenev “ikyo.” (Ôr Mbafilipi 2:4.) Alaghga nom man kwase ne yange ve na Paulu ijiir i tsan ken Efese, ape Demetriu u varen iwa i azurfa la wa ior kwagh ve er ayôôso a na la. Alaghga ayôôso la yange na yô Akula man Priseka ‘ver mon ve’ sha ci u Paulu. (Rom. 16:3, 4; 2 Kor. 1:8) Nyian kpa, kwagh u anmgbianev asev mba i lu tôvon ve a ican la na yô se mba eren kwagh “sha kwaghfan er iyô” nahan. (Mat. 10:16-18) Se mba eren tom wase u pasen kwagh ne sha kwaghfan sha er se pase mba ve lu tôvon anmgbianev asev a ican la ati a ve shin se pase ve ma kwagh ugen sha iyol ve ga yô.
19. Dorka yange eren aeren a dedoo sha ci u mbagenev nena?
19 Igbenda ngi kpishi i se fatyô u wan akaa a mbagenev ikyo yô. Mbakristu mbagenev mba ken ican, man adooga se lu sha ian i wasen ve. (Ef. 4:28; Yak. 2:14-17) Ken tiônnongo u sha derianyom u hiihii la, kwase u nan nagh mgbeghaa ugen lu ken gar u Yopa, i yilan un ér Dorka. (Ôr Aerenakaa 9:36-42.) Dorka “lu a aeren a dedoo kpishi, man iwua i nan kpaa,” man alaghga uiyua mbara kua uriga man akondo a yange kor sha ci u kasev mba côgholov yô. Kasev mba côgholov mbara yange ve vaa un tsung shighe u kpe ken inyom i 36 la. Aôndo yange na apostoli Peteru tahav nder Dorka shin mbakpenev, man a shi nan kpa hii shighe la je za hemen u pasen loho u dedoo shi eren aeren a dedoo agen sha ayange a uma na cii. Doo se kpishi u lun a kasev Mbakristu mba tangen iyol ga la nyian ga he?
20, 21. (a) U̱ taver mbagenev ishima la gba zua sha u wan akaa a mbagenev ikyo nena? (b) Ú taver mbagenev ishima nena?
20 Ka se wa mbagenev ikyo sha u taver ve asema. (Rom. 1:11, 12) Shila u lu ikyar tom u Paulu la yange taver anmgbianev mbagenev asema kpishi. Shighe u mbatamen mba ken Yerusalem kure ikyaa i sha kwagh u icôngo ken inyom i 49 la, ve tindi anmgbianev mba ken Kristu mba sha ajiir kposo kposo a uwashika. Yange ve tindi Shila man Yuda man Barnaba kua Paulu ken Antioki. Mba za nyer ken Antioki yô, Shila man Yuda “nyôôso anmgbianev asema sha akaaôron kpishi, shi ve taver ve asema kpaa.”—Aer. 15:32.
21 Shighe kar yô i wuhe Paulu man Shila ken Filipi, kpa tartenger nahan i dugh ve ken purusu kera. Sha mimi yô, yange a doo ve u pasen or gaadi la kwagh shi nengen er un a ya na cii hingir mbananjighjigh nahan. Shila man Paulu ve taver anmgbianev asema cii ve mase duen ken gar la ye. (Aer. 16:12, 40) Nahan we kpa taver mbagenev asema sha kwaghôron wou man ishima you i tseen sha tom u kwaghpasen la vough er Paulu man Shila nahan. Shi aluer u ngu a ma “kwaghôron u taver ior ishima yô, ôr.”—Aer. 13:15.
Za Hemen u Zenden sha Igbenda i Yehova
22, 23. Aluer se mba henen sha akaa a ior mba i er kwagh ve ken Bibilo la yô, kwagh ne una wase se nena?
22 Se wuese kpishi er i nger akaa a ior yange ve er la ken Mkaanem ma Yehova, “Aôndo u a taver ior cii asema” la nahan. (2 Kor. 1:3, mgem u Byington.) Aluer se soo u zuan a iwasen sha akaa a ior mba i er kwagh ve ken Bibilo la yô, a gba u se er tom sha akaa a injaa a se hen la ken uma wase shi se lumun ser jijingi u Aôndo a hemen se.—Gal. 5:22-25.
23 Aluer se mba henen sha akaa a ior mba i er kwagh ve ken Bibilo la yô, kwagh ne una wase se u lun a aeren a doon Aôndo ishima. Kwagh ne una taver ikyar yan yase a Yehova u “A ne. . . kwaghfan man mfe kua iember” la. (Orpa. 2:26) Nahan se na a saan Aôndo iyol. (Anz. 27:11) Se kange nen ishima u eren nahan sha u zenden sha igbenda i Yehova gbem.
Ú Na Mlumun Wer Nyi?
• Ú tese wer ú ngu or u mimi nena?
• Hii nan i doo u se ‘hiden a ayol a ase ijime’?
• Akaa a ior a i er ken Bibilo la taver se ishima nena?
• Se tese ser se wa akaa a mbagenev ikyo nena?
[Study Questions]
[Picture on page 8]
Yefeta, or u mimi la vea wan na u kwase yange ve er sha ityendezwa ve la vough shin er taver ve u eren nahan kpaa
[Picture on page 10]
Igyumior, ne hen nyi sha kwagh u wankwase u Iserael laa?
[Picture on page 11]
Dorka yange kure mbamgbe mba Mbakristu nena?