U Samber A Loho U Dedoo Sha Ityouv Mbi Iwoo Mbi Andes

SE IOROV 18 se tema hen inya ken iyou. Se lu kunden wuhe ken aba a se yaven ker la, se lu ungwan er ura lu nôôn cam cam haan sha haav mbu iyou yô. Er se nenge anyou u se tsaan ker la lu côugh côugh yô, se hen ser alaghga ka se se lu ior mba hiihii mba tsaan ker ye.

Iorov 18 yange ve za hen ijiir ne sha ci u nyi? Ityôkyaa yô, se soo ser se er sha tindi u Yesu a we ér i pase loho u dedoo ‘zan zan i ar ken ikighir i tar’ la. (Aer. 1:8; Mat. 24:14) Yange se za u za pasen kwagh ken ningir u ken tar u Bolivia u a lu ca, a lu sha iwo i Andes la.

Ka Ican u Zan sha Ajiir La

Ican i se hii tagher a mi yô, lu u se aren hen ape se lu zan la. Yange se va mase kaven ser shighe ngu jighilii u mato a ze sha ajiir ne ga. Mato u yange gba u una tôô se la ve yô, se mase kaven er lu mato u kiriki yô, nahan gba u se mbagenev se tile sha. Kpa se cii se nyôr hen ape se lu zan la.

Awashima wase yô, lu u pasen ior mba ve lu ken agar a a lu sha ityouv mbi iwoo mbi Andes, ken tar u Bolivia la Bibilo. Nahan se mba za hongo mato yô, mba ve lu a ikyav kpishi la kôr gbenda yemen sha nongo er ve lu unden sha ityough ki iwoo la.

 Agar la lu a kiriki, kpa ayou a hen agar ne lu sarem sarem, nahan hanma gar u sea soo u zan her yô, se vihi shighe kpishi. Yange se zende naleghaa kpa i lu inja er ya ugen shi ngu ken hemen nahan. Ashighe kpishi se tsume sha igbenda i i lu nzughul nzughul la.

“Hii Nan Ne Vande Van Ga?”

Gôgôzende wase la kpiligh kwase ugen iyol je yô, a na se kicin na kua ikyôn ér se yôr. Er se tese orgen kwagh u Bibilo i tese sha kwagh u mlu u mbakpenev yô, a pine se ér, “Hii nan ne vande van ga?” Atesen a Bibilo la doo un kpishi je yô shighe u se mough u yemen ken agar agen yô, a dondo se ijime lu pinen se mbampin. Orgen di lu a vande ungwan kwagh u Mbashiada mba Yehova ga, shi ityakerada yase kpa doo un ishima tsung. Yange sugh se kigh kigh er se ve un inya yô shi na se amakuli a sha iyou igen ér se tsa her.

Ime yange i wa hen tugh mbu gen je yô, se samber tenti wase henpe mbaabanyam dugh zwa yô. Fese nahan maa ve gba nyiman se. Kpa er se vôr kpishi yô se fatyô u moughon ga, nahan kpa se wuese kpishi er ve kera za hemen u nyiman se ga yô.

Sha hiihii la, iyol nyoon se kpishi sha ci u se yav hen inya, kpa tugh mbu il yô se gba yaven tsô. Sev mbu aven yô, se nenge a apev a ior lu a gba kahan kwagh shimi ga la man er abeen lu karen shin apev zeee, shi senou kpa cir sha ityouv mbi iwoo, nahan se kera wa ikyo sha kwagh u iyol nyoon yase la ga. Ayôôso nga hen ajiir ne ga  saa di ihyuran i shin kungwa uwagh man amo a inyon tsô.

Se mba ee iyol shin kungwa uwagh se mba been yô, se time ken ivur Bibilo i sha iyange la imôngo shi se ya kwagh, maa se kôr gbenda ave unden yemen sha agar a icaa la. Iniôngon yase la saa gbilin ga. Yange se zua a kwase ganden ugen, man er se tese un ken Bibilo ser iti i Aôndo ka Yehova yô kwase ne haa mliam ashe. Yange doo un tsung. Nahan hii u teren iti i Aôndo ken mbamsen nav hen shighe la.

Organden ugen kaa ér Aôndo umbur un, maa a gba wan icam kaan ér mbatyomov tindi se. Oruange ugen u vihi un iyol je fatyô u duen ken iyou na ga yô kaa a vese ér or môm hen gar na kpa nan va nenge un angev ga. Kpiligh un iyol er se mough ken gar u La Paz je se ve un inya nahan. Orgen di doo un kpishi er Mbashiada mba Yehova ka ve za sha uya mba iorov sha u za lamen a ve, kpa ukwaghaôndo mbagenev yô ka ve gbidye imemegh ér ior ve za sha ucôôci vev nahan.

Ningir la cii ngu a usu u latriki ga, nahan ime ka ia waan yô ior ve nyôr shi ve nder shighe u sev mbu av yô. Yange se hii u pasen kwagh sha ahwa ataratar pepe sha er se kohol ior hen ya yô. Aluer se hii kwaghpasen pepe ga yô, ior kpishi vea yar ken atev. Ior mbagenev mba ve hii tom yô, gba ve ishima u ungwan Mkaanem ma Aôndo ma se lu pasen la, nahan ve na ibua ve ian ér i mem sha er vea ungwa loho u se lu pasen la yô. Ior kpishi mba se kohol ve hen uyaav vev yô tar butu u i er sha akôv a iyôngo ér se tema shi ve lôhô tsombor ve cii ér u kumba u ungwa mkaanem ma Aôndo.

“Ne Hungur a Mo Ga”

Nahan kpa, u ior mbara ve seer zuan a mfe u ken Bibilo yô, gba u se sôr ve acin imôngo. Ior kpishi yange ve zamber se ér se hide se va hen Bibilo a ve. Kwagh ne na yô, se hide se za sôr ior mba ken agar a ken tar u Bolivia mba se pase ve kwagh la acin imôngo.

Shighe u se hide se za hen ajiir la kwagen yô, doo kwase ganden ugen tsô a kaa ér: “Ne mbam er ka ônov nahan. Gadia ne hungur a mo ga.” Orgen sugh se kpishi sha tom u se lu eren la, shi kaa ér se hide se va kwagen yô se tsa hen ya na. Injar i vesen i se zua a mi sha iniôngon yase yô, se ungwa ser kwase ugen u yange se due kwaghpasen kwagen ve se lam a na yô, yem ken gartamen shi ngu pasen loho u dedoo hegen kpaa.

Mkurem ma ken stove u se yôron a mi la kua kwaghyan wase cii bee sha iyange i masetyô i se due kwaghpasen hen ijiir la la. Nahan se kohol ikyon kpishi se keer usu se er kwaghyan u se mase shin a mi la se ya maa se kôr gbenda ave hiden ken gar wase sha angahar. Yange shi se ukilomita je kuma imôngo cii ve se mase nyôron ape mato una tôô se la ye. Ica i gbe ga yô maa ime wa.

U Hiden ken Gar Wase

U hiden yemen ken gar wase la kpa se tagher a mzeyol sha gbenda, gadia mato wase la za vihi sha gbenda. Shighe kar yô se nyôr gongulo a ior shimi poo se mase yemen.

Yange se pase ior mba se nyôr gongulo a ve imôngo la kwagh, gadia sar ve u fan er i hii ve se lu ape ve tôô se la yô. Er ior mbara ve lamen kpishi ga nahan kpa, mba ior mba soon mbagenev kpishi shi mba a inja i dedoo kpaa.

Yange se mba moughon u hiden yô se nyôr mato u vesen se vihi ahwa ataankaranyiin sha gbenda, akondo a ase heen cica cii shi wuhe kôr se kpishi. Nahan kpa, se zende gbilin ga. Shighe u se lu hiden la, se sôr ian i va henen Bibilo a kwase ugen u lu ken gar u vesen yô.

Yange doo se kpishi u pasen ior mba ken agar a icaa la loho u dedoo. Yange se pase kwagh ken agar anyiin man angarev mba kiriki mbagenev kpishi. Yange se hen sha mkaanem man. Ma kaa ér: “Angahar a or u nan ve a loho u dedoo, a doo u nengen a mi sha iwo tsô, u nan yee bem, u nan ve a loho u dedoo, u nan yee myom.”—Yes. 52:7; Rom. 10:15.

[Picture on page 17]

Wa iyol kegh a kegh u pasen loho u dedoo