Ú Umbur Kpa?

Doo ú u ôron ngeren mba i sember duen a mi ken Iyoukura ne kpa? Yô, de se nenge wea fatyô u nan mlumun sha mbampin mba ve dondo ne yô:

• Lu hanma shighe mbafankwagh mbara za nenge Yesuu?

Bibilo igen kaa ér: “Mbaahiriv mbara yange ve za nenge Yesu ape i gbir un shin anar u haan ilev kwaghyan, hen tugh mbu i mar un la, er mbakuranilev za nenge un nahan ga. Iwer yange i kar imôngo cii ve ve za nenge Yesu ye.” Hen shighe la Yesu lu “Wanikyundan” nahan lu ken iyou hen ya na. (Mat. 2:7-11) Luun er yange a ne Yesu zenaria man akaa a injaa agen hen tugh mbu i mar un la nahan kpa Maria yange ma za na nagh ken tempel ayange 40 ken hemen sha annyonov uhar tseegh yee?—1/1, peeji 31.

• Kanyi kwagh ior kpishi vea er ve uma ve una hemba lun a inja?

Alaghga u pine wer: ‘Me fatyô u sôron mlu wam shi panden akaa a m eren la kpa?’ Amy yange er nahan. Yange lu a inyaregh kpishi kpa saan un iyol ga. Nahan a mase kaven wener, er un lu keren mzehemen ken tar ne yô, shi cuku ma un tsum ma un undu jighjigh u nan. Nahan a hide a ver akaa a Tartor hiihii ken uma na, shi hide hii u eren tom u pania u keke kpaa. Amy mase kaan wener: “Shighe u m lu eren tar ne tom la saan mo iyol ga, kpa hegen yô saan mo iyol kpishi.”—1/15, peeji 19.

• Ka “kov” u nyi Yesu a er kwagh u ú ken Mateu 24:34?

Yesu yange una ôron kwagh u “kov” sha gbenda u bo yô, i lu aferaior a sha ayange a na la a lamen a ve shin a ôron kwagh ve ye. Kpa hen shighe ne yô Yesu lu lamen a mbahenen nav mba lu u ica a gba ga tsô a shighe ve mkurem sha icighan jijingi la. Ka ve kpa vea fatyô u gbidyen kwar sha kwagh u i er ken Mateu 24:32, 33 la zulee ye. Nahan ka inja er Yesu yange lu ôron kwagh u mbadondon un mba ken derianyom u hiihii la, kua mba ainge kpaa nahan.—2/15, peeji 23-4.

• Ka aeren a injaa a i tese ken Yakobu 3:17 a nyi i doo u se lu a mini?

U se lun wang yô, gba u se venda akaabo ave ave je. (Gen. 39:7-9) Shi se lu bem bem a mbagenev, nahan se palegh tswam man nyityô ieren i ia yange se u lun ken bem a mbagenev cii. Nahan doo u hanmô wase nana pine iyol i nan ér: ‘I fam ér m ngu or u van a bem shin i fam ér m ngu or u van a ayôôso? M zeren eren ayôôso a mbagenevee? M zeren nyoon ishima a mbagenevee? Shin m den mbagenev kwaghbo ve shi m hanger mer saa ve lumun a hanma kwagh u m er cii ga?’—3/15, peeji 24-25.

• Er nan ve Yesu bugh orapirashe ugen ashe kure kure? (Mar. 8:22-26)

Bibilo na mlumun sha mpin ne jighilii ga. Kpa alaghga Yesu er kwagh ne nahan sha er ilyanegh kia wa orapirashe la ashe ga yô. Alaghga lu dooshima u Yesu lu a mi sha orapirashe la yange na ve bugh un ashe kure kure ye.—4/1, peeji 30.