Dondo Hemen U Aôndo Sha Hanma Kwagh
Dondo Hemen U Aôndo Sha Hanma Kwagh
“Er Aôndo ne A lu Aôndo wase gbem sha won yô; Una lu orhemen wase zan zan ku kpaa.”—PS. 48:14.
1, 2. Doo u se dondo hemen u Yehova, á lu mbamhen asev ga sha ci u nyi, man ka mbampin mba nyi ve due?
KA SEA nengen shin sea ungwan agbilinakaa yô, alaghga se hen ser akaa la ka a bo ga. (Anz. 12:11) Aluer mimi je se soo u eren kwagh u a doo sha ci u Orkristu ga yô, ashighe kpishi ishima yase ia kaa a vese ér kwagh u se soo u eren la ka u bo ga. (Yer. 17:5, 9) Nahan orpasalmi tese ieren i sha kwaghfan, gadia a er msen hen Yehova ér: “Tindi iwanger You kua mimi Wou, ve̱ hemen mo.” (Ps. 43:3) Yange suur sha Yehova, lu sha kwaghfan na u a yen la ga man ma ijiir igen lu i una zua a kwaghwan u injaa ne ga. Doo u se kpa se de ser Aôndo a hemen se er orpasalmi kpa er nahan.
2 Ka hange hange u suur sha hemen u Yehova a u suur sha akaa agen sha ci u nyi? Ka hanma shighe i doo u se ker hemen na? Ka aeren a nyi nahan i doo u se lu a mi sha er hemen ne ua wase se, man Yehova kuran se nyian nena? Ngeren ne na mbamlumun sha mbampin mba injaav mban.
Doo u Se Suur sha Yehova sha ci u Nyi?
3-5. Se fatyô u suur sha Yehova vangertiôr sha ci u nyi?
3 Yehova ka Ter wase u sha. (1 Kor. 8:6) A fa kwagh u hanma wase cii vindi vindi shi a fa kwagh u a lu ken ishima yase kpaa. (1 Sam. 16:7; Anz. 21:2) Tor Davidi yange kaa a Aôndo ér: “Mtem wam man mmough wam kpaa We U fa, U fa mhen wam ken ica je. Gadia er kwaghôron a lu a duem ken zwa ga je tsô, We TER U fa cii.” (Ps. 139:2, 4) Er Yehova a fe se vindi vindi yô, una fa kwagh u a doo sha ci wase ga he? Heela tseegh ga, Yehova hemba kwaghfan cii. A fa hanma kwagh shi ngu a nenge i hemba hanma orumace shi ngu a fa kwagh u una due ken hanma kwagh u se hii u eren cii. (Yes. 46:9-11; Rom. 11:33) Ka “Aôndo u A lu a kwaghfan Un tswen” yô.—Rom. 16:27.
4 Heela tseegh ga, se doo Yehova ishima shi keren kwagh u doon sha ci wase hanma shighe cii. (Yoh. 3:16; 1 Yoh. 4:8) Er a lu Aôndo u erdoo yô, ne se hanma kwagh wuee. Orhenen Yakobu nger ér: “Hanma nagh ku dedoo man hanma iwua i vough kpaa ka Sha hen Ter u iwanger ve dugh, ve senen ye.” (Yak. 1:17) Mba ve de ér Aôndo a hemen ve yô, ka ve zua a mtsera u vesen ken erdoo na la.
5 U masen kuren yô, Yehova ka uhembanagee. Orpasalmi ôr kwagh u Yehova nahan ér: “Or u nan tem ken ijiir i yeren i Uhembansha yô, nana tsa ken mure u Uhembanagee cii. Me kaa a TER mer: U ngu ijiir yam i yeren man iyouutya yam, Aôndo wam u m suur sha a We ne.” (Ps. 91:1, 2) Ka sea dondon hemen u Yehova yô, se lu keren u yeren ken Aôndo u a gbe inya sha won ga la. Shighe u ican i tser se je kpa Yehova ngu a wase se. (Ps. 71:4, 5; Ôr Anzaakaa 3:19-26.) Sha kpôô yô, Yehova fa kwagh u a hembe doon sha ci wase yô, shi a soo ér se zua a kwagh u a hembe doon yô shi ngu a tahav mbu nan se kwagh a hembe doon la kpaa. Nahan aluer se venda hemen na yô, se er kwagh sha ibume. Kpa ka hanma shighe nahan i doo u una hemen se?
Ka Hanma Shighe i Doo u Aôndo Una Hemen Se?
6, 7. Ka hanma shighe i gbe u se dondo hemen u Yehova?
6 Sha kpôô yô, gba u Aôndo una hemen se ken ayange a uma wase cii, hii iyev zan zan shighe u se beeyol je kpaa. Orpasalmi kaa ér: “Er Aôndo ne A lu Aôndo wase gbem sha won yô; Una lu orhemen wase zan zan ku kpaa.” (Ps. 48:14) Mbakristu mba fan kwagh mba den u keren hemen u Aôndo ga, er orpasalmi kpa er nahan.
7 Kpa, ashighe agen kwagh ngu a hemba gban se a iwasen na cii. Shighe ugen ka se lu ken “mkighir” shin ken ican, er tôvacan shin icôron uange nahan, shi a de se tom kpoo je kpaa. (Ps. 69:16, 17) Hemba doon u se suur sha Yehova sha ashighe ne cii, shi se lu a vangertiôr ser una na se agee a wan ishima shi una wase se se er kwagh u vough kpaa. (Ôr Pasalmi 102:17.) Kpa, ka shighe u ican i tser se tseegh i gbe u una wase se ga, gba u una wase se sha ashighe agen kpaa. U tesen ikyav yô, gba u Yehova una hemen se shighe u se dugh u pasen ior loho u dedoo u Tartor na la ve se fatyô u pasen ve kwagh tsema tsema ye. Shi se er kwagh sha kwaghfan aluer se dondo hemen u Yehova shighe u se soo u tsuan anumbe a eren shin iyolwuhan man hwe u eren shin ahuraior a ase shin tom u se er shin makeranta u henen kua akaa agen yô. Sha mimi yô, hanma kwagh u se soo u eren cii gba u se dondo hemen u Aôndo.
Kwaghbo u a lu sha u Vendan Hemen u Aôndo Yô
8. Mye u Ifa ya ityamegh ki kon u i ta icin sha mi la tese ér nyi?
8 Kpa fa wer gba u a sar se u dondon hemen u Yehova. Aluer se venda hemen u Aôndo kpa una kighir se ga. Ka Ifa yange hii vendan hemen u Yehova ye, ieren na la tese kwaghbo u ka a due shighe u or vende hemen u Aôndo yô. Shi hen ase sha kwagh u ieren na la i tese yô. Ifa yange ya ityamegh ki kon u i ta icin sha mi la sha ci u a soo u ‘hingir er Aôndo nahan, fan kwagh u dedoo man kwagh u bo.’ (Gen. 3:5) Ieren na la tese ér a soo u ngohol ian i Aôndo la, nahan tsuan kwagh u dedoo man kwagh u bo iyol na, nahan kera dondon hemen u Yehova ga. Kwagh ne na yô Ifa gema ijime a hemen u Yehova la. Yange soo u lun sha tseeneke na. Kape nom na, Adam kpa hemba ato vough je la.—Rom. 5:12.
9. Aluer se venda kwaghwan u Yehova yô, kanyi se lu erene, man ka ieren i sha kwaghfan ga sha ci u nyi?
9 Kape nyian kpa aluer se venda hemen u Yehova ve se lu tesen ser se soo u tsuan kwagh u dedoo man kwagh u bo ayol a ase je la. U tesen ikyav yô, nenge ase kwagh u or u nan lu a ieren i nengen ufoto mba ijimbagh hanma shighe la. Aluer nan ngu Orshiada u nan ze mbamkombo mba Mbakristu yô, nan fa kwaghwan u Yehova sha ikyaa ne. Gba u nana ter kwagh u hôngorough tsô kpaa ga, man u kenger imba kwagh la a isharen i bo je yô hemba vihin cii. (Ef. 5:3) Er nan lu vendan kwaghwan u Yehova yô, nan ngu vendan hemen Na. (1 Kor. 11:3) Imba ieren la tese kwaghfan ga cii, gadia Yeremia kaa ér: “or u zenden la, mvershigh u iaven i angahar a nan ngu sha ikyev i nan ga.”—Yer. 10:23.
10. Doo u se yaren tom a ian i se lu a mi i eren kwagh u se soo la sha inja sha ci u nyi?
10 Mbagenev vea lumun a mkaanem ma Yeremia la ga, nahan vea lu henen ér, er Yehova a ne se ian i eren kwagh u se soo la yô, mayange una tsaha se sha kwagh u se tsough u eren la ga. Kpa doo u se umbur ser ian i or lu a mi i eren kwagh u nan soo la ka iyua shi ka tom u vesen kpaa. Se cii se va pase Aôndo hanma kwagh u se tsough u ôron shi eren cii. (Rom. 14:10) Yesu kaa ér: “Ka sha m-iv u ken ishima man zwa u er kwagh ye.” Shi a kaa ér: “ka ken ishima man aferakaa a henen kua iwoo-or man idya man iiv man mbampase mba sha aie man ityuhwanev ve dugh ye.” (Mat. 12:34; 15:19) Sha nahan yô, iliam yase man ieren yase ka i tese kwagh u a lu se ken ishima yô. Ka a tese kwagh u se lu jim jim la. Ka nahan ve Orkristu u nan lu a kwaghfan ka nan ker kwaghwan u Yehova sha hanma kwagh u nan soo u eren ye. Ka nana er nahan yô, Yehova a nenge ér ‘ishima i nan ngi jighilii’ nahan a er a nan “dedoo.”—Ps. 125:4.
11. Se hen nyi sha kwagh u Mbaiserael laa?
11 Umbur kwagh u Mbaiserael la. Shighe u yange ikyurior la ia tsua u eren akaa a dedoo, shi ia ungwan imo i Yehova yô, a kura ve. (Yos. 24:15, 21, 31) Ashighe kpishi yange ve yar tom a ian i ve lu a mi la sha inja ga. Yehova yange kaa a ve sha shighe u Yeremia la ér: “Ve wa ikyo ga, man shi ve ver ato kpaa ga, kpa ve za sha mbamhen vev man sha mcighir u asema ve a bo la, ve hide ijime, ve za hemen ga.” (Yer. 7:24-26) Nenge er i vihi sha wono! Mayange se de ser mcighir u asema ase sha asaren a bo a na se venda kwaghwan u Yehova shi se eren akaa sha mbamhen asev nahan se ‘hide ijime, se kera zan hemen ga’ ze.
U Dondon Kwaghwan u Aôndo la Wa Nyi man Nyi Kere?
12, 13. (a) Ka aeren a nyi nahan ka a wase se u dondon kwaghwan u Yehova? (b) Jighjigh u nan ngu a inja sha ci u nyi?
12 Mdoo u Yehova a doo se ishima la ka a na se soo u dondon akaawan a na. (1 Yoh. 5:3) Nahan kpa, Paulu shi ôr kwaghgen u i gbe u se lu a mi yô, a kaa ér: “Ka sha jighjigh u nan se lu zenden ye, ka sha mnenge a nenge ga.” (2 Kor. 5:6, 7) Jighjigh u nan ngu a inja sha ci u nyi? Yehova ngu a “hemen [se] sha igbenda i perapera,” man igbenda ne ngi ne se mba hingir yôughyôugh shin se mba lun sha ian i vesen ken tar ne ga. (Ps. 23:3) Sha nahan yô, gba u se har jighjigh shin ishima yase sha averen a ken jijingi a ka se zua a mi sha u eren Yehova tom la. (Ôr 2 Mbakorinte 4:17, 18.) Man jighjigh u nan ngu a wase se nahan shighe u se lu a kwaghyan man akondo yô i kuma se.—1 Tim. 6:8.
13 Yesu yange tese ér mcivir u mimi wa ieren i nan ayol a ase la kpa ker, man saa or a lu a jighjigh u nan ve nana fatyô u nan iyol i nan ye. (Luka 9:23, 24) Mbakristu mba jighjigh mbagenev na ayol a ve sha akaa kpishi, ve wa ishima a ican man mkighir man mnyagh u sha kwavyolough kua tôvacan je kpaa. (2 Kor. 11:23-27; Mpa. 3:8-10) Ka jighjigh u nan u ve lu a mi taveraa la a wasen ve u wan ishima a ameen ne a iember ye. (Yak. 1:2, 3) Jighjigh u nan taveraa la ka a na se lu a vangertiôr ser ka ieren i sha kwaghfan u dondon kwaghwan u Yehova sha hanma ian cii. Ka i lu sha iwasen yase hanma shighe cii. Se mba a vangertiôr ser mba ve we ishima a ican la vea zua a mtsera u vesen u a hembe ican i ve lu yan hegen ne yô.—Heb. 11:6.
14. Yange gba u Hagai una hide a iyol na ijime sha ci u nyi?
14 Nenge ase er iyol hiden a mi ijime kpa ka i wase se u dondon kwaghwan u Yehova yô. Kwagh u Hagai, u lu kpankwase u Sarai la tese mimi u mkaanem man. Shighe u Sarai fa ér una kera mar ga yô, a na Aberaham Hagai, nahan Aberaham tsa a na man a wa iyav. Tsô Hagai hingir u lahan ngô na. Nahan Sarai “er un ican tsung,” tsô a yevese un. Ortyom u Yehova za kohol Hagai kaa a na ér: “Hide hen ngôu, hire a iyol you ijime, lu sha ikyev na.” (Gen. 16:2, 6, 8, 9) Alaghga yange a doo Hagai u eren sha kwaghwan la ga. Cii man a er sha kwaghwan u ortyom la yô, gba u una de iyol gengese. Nahan cii kpa, Hagai hide a iyol ijime, er sha kwaghwan u ortyom la nahan mar wan na u nomso Ishemael ken ya u Aberaham.
15. Pase er a gba u se hide a ayol a ase ijime nyian ve se dondo kwaghwan u Yehova sha akaa agen yô.
15 Alaghga a gba u se kpa se hide a ayol a ase ijime ve se lumun kwaghwan u Yehova ye. Adooga a gba u mbagenev vea hide a ayol a ve ijime ve vea lumun ér iemberyolough i ve eren la vihi Yehova ishima ye. Afaerenga Orkristu nana vihi orgen ishima ker nahan a gba u nana zamber. Shin nana er kwagh u sha mi ga nahan a gba u nana lumun ibo. Kpa aluer or er kwaghbo u vesen di ye? A gba u nana hide a iyol i nan ijime nahan nana pase mbatamen kwaghbo u nan la. Alaghga a dugh nan ken tiônnongo sha je kpaa. Kpa aluer nan soo u hiden ken tiônnongo yô, a gba u nana hide a iyol i nan ijime shi nana de isholibo i nan la kpaa. Anzaakaa 29:23 na se ishima surun sha ambaakaa ne, a kaa ér: “Mgengeseyol u or una hire a nan ijime, kpa u nan hidi a iyol i nan ijime yô, nana zua a icivir.”
Yehova Hemen Se Nena?
16, 17. Se zua a mtsera kpishi ken iwasen i Aôndo a ne se ken Bibilo la nena?
16 Ka Bibilo i Aôndo a ne i nger la i̱ lu imbor i vesen i Aôndo a we se kwagh ye. (Ôr 2 Timoteu 3:16, 17.) Aluer se soo u zuan a mtsera u vesen ken Mkaanem ma Aôndo yô, doo u se de ser kwagh a tser se tsô se ker iwasen ken Ruamabera ga. Kpa se timen ken Bibilo ayange ayange. (Ps. 1:1-3) Aluer se mba eren nahan yô, se fa kwagh u a lu ken Mkaanem ma Aôndo yô. Nahan se hingir u lun a mbamhen mba Aôndo shi se wa iyol se kegh a kegh u hemban mbamzeyol mba ve tser se abu je kpaa.
17 Heela tseegh ga, ka hange hange u se gbidye kwar sha kwagh u se hen ken Ruamabera la shi se er msen sha kwagh shon kpaa. Ka sea gbidye kwar sha avur a Bibilo yô, se nenge er avur la aa wase se shighe u kwagh a tser se yô. (1 Tim. 4:15) Kwagh ka una tser se yô se sôn Yehova ser a wase se se fa kwagh u i doo u se er yô. Nahan Yehova una na se jijingi na sha er a wase se se umbur akaawan a ken Ruamabera a yange se ôr ken Bibilo shin ken ityakerada i pasen akaa a ken Bibilo la yô.—Ôr Pasalmi 25:4, 5.
18. Yehova yaren tom a mzough u anmgbianev u kuran se nena?
18 Gbenda ugen u se ker iwasen i Yehova yô ka hen anmgbianev asev mba ken Kristu. Ka Mbahemenev mba Shin Tine mba “wanakiriki u jighjigh man u fan kwagh” mba ve ne se kwaghyan u ken jijingi sha ungeren vev man mbamkombo mba tiônnongo kua mbamkohol la a lu ityôugh ki mzough u anmgbianev ne ye. (Mat. 24:45-47; Aer. 15:6, 22-31) Heela tseegh ga, ior mba vian ken jijingi, hemban je yô mbatamen mba ka ve na se iwasen shi ve kôôm se ken Ruamabera la kpa mba ken mzough u anmgbianev ne. (Yes. 32:1) Ikyaior i mbamaren vev ve lu Mbakristu kpa vea seer zuan a iwasen. Aluer mbamaren vev ka Mbakristu yô, ka Aôndo a ne ve tahav ér ve tesen igbenda na ye.—Ef. 6:1-3.
19. Ka sea dondo kwaghwan u Yehova hanma shighe yô se zua a averen a nyi?
19 Sha kpôô yô, igbenda ngi kpishi i Yehova a ne se kwaghwan yô, man doo u se yar tom a i sha inja kpaa. Tor Davidi ôr kwagh u ikyurior i Iserael shighe u ve eren kwagh sha jighjigh la ér: “Uter asev lu suur sha a We; ve suur, nahan U yima ve je; ve vaa a We, man ve war ye; ve suur sha a We, ve va ahenge ga.” (Ps. 22:3-5) Aluer se suur sha kwaghwan u Yehova vangertiôr yô, se kpa se “va ahenge ga.” Ishimaverenkeghen yase ia saa ishe ga cii. Aluer se mba suur sha kwaghfan wase ga, kpa se ‘wa Ter igbenda yase sha ikyev’ yô, se zua a averen kpishi hegen je kpaa. (Ps. 37:5) Aluer se za hemen u ungwan imo i Yehova shi wan ishima a ican yô, se zua a averen gbem sha won. Tor Davidi nger ér: “kwagh u mimi doon TER ishima, man shi te mba i doo Un a ve la kera ga. Mba koson ve gbem . . . Mbaperapera vea ya dyako u tar, vea lu ken u gbem.”—Ps. 37:28, 29.
Ú Fatyô u Pasen Kpa?
• Se mba dondon kwaghwan u Yehova sha ci u nyi?
• Shighe u se vende hemen u Yehova yô, kanyi se lu erene?
• Ka sha akaa a nyi nahan i doo u Orkristu nana hide a iyol i nan ijime?
• Yehova kuran se nyian nena?
[Study Questions]
[Pictures on page 8]
Ú dondon hemen u Yehova sha hanma kwagh ken uma wou kpa?
[Picture on page 9]
Ifa yange venda hemen u Yehova
[Picture on page 10]
Ka aeren a nyi yange gba u Hagai una lu a mi sha u dondon kwaghwan u ortyom laa?