Ikyaior, Umbur Nen U A Gbe Ne La
Ikyaior, Umbur Nen U A Gbe Ne La
“Umbur u A gbe u la sha ayange a iyev ou.”—ORPA. 12:1.
1. Yehova tese vangertiôr ken ikyaior i i civir un la nena?
IKYAIOR i ken Kristu ngi Yehova kwagh u injaa man er aberavuregh a kundun iyol nahan. Je yô Yehova tsengaôron ér ikyaior man mbayevkasev vea “na nagh sha ayol a ve sha asema” a ve sha u eren Kristu tom, sha iyange i “ikyumutya” i Wan na la. (Ps. 110:3) Kwaghôron u profeti ne ngu kuren sha ayange a ase ne, sha ci u ior kera soo kwagh u Aôndo ga shi ve hemba veren ishima u eren asema a ve shi keren inyaregh shi hemban Aôndo ato. Nahan kpa Yehova fa ér ikyaior i i civir un yô ia lu kposo. Nenge imba vangertiôr u Yehova a lu a mi ken anmgbianev mba nomso man mba kasev mba ve lu ikyaior ne sha wono!
2. U̱ umbur Yehova la wa nyi man nyi kere?
2 Aôndo ka una nenge ikyaior ia umbur un u a gbe ve la nahan i doo un kpen kpen. (Orpa. 12:1) U̱ umbur Yehova la ka di u yilan sha iti na hanma shighe shin umbur kwagh na ken ishima tseegh tsô ga. Gba u se nôngo tsung sha er se eren kwagh u a doo un la hanma shighe shi se de atindiakaa a na a hemen se ken uma wase cii. Shi ieren ne kua u suur sha Yehova, fan ér ngu a awashima u dedoo sha ci wase. (Ps. 37:3; Yes. 48:17, 18) Kape ú nengen u a gbe u laa?
“Suur sha Ter a Ishima You Cii”
3, 4. Yesu yange suur sha Yehova nena, man ka hange hange u suur sha Yehova nyian sha ci u nyi?
3 Yesu Kristu ver se ikyav i dedoo i or u yange nan suur sha Aôndo yô. Yange er sha kwaghwan u a lu ken Anzaakaa 3:5, 6 la, ijiir la kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” Shighe u Yesu er batisema ica lu a gba ga la je, Satan va sha u va meen un ér a ngohol tahav man iengem i tar ne. (Luka 4:3-13) Kpa yange kan shio u tsughun Yesu. Gadia Yesu fa er “inyaregh man icivir kua uma” u mimi la a lu “injar i mhir u iyol ijime, cian TER” yô.—Anz. 22:4.
4 Hua man ieren i or soon iyol i nan tseegh la dumbur shin tar nyian. Er se lu ken tar ne yô, doo u se dondo ikyav i Yesu la. Shi fa wer Satan ngu nôngon sha afatyô na cii ér una mgbegha mbacivir Yehova sha gbenda u imbishi u u ze ken uma la kera. A soo ér hanma or yô nana za sha gbenda u gbangese, u u ze ken mtim la. Nahan mayange a de tsughun we ga. Kpa kange ishima wer u umbur u a gbe u la. Suur sha a na a ishima you cii, nahan kôr ave sha “uma u a lu uma jim la,” gadia una bunde ga shi ngu ikyua kpaa.—1 Tim. 6:19.
Ikyaior, Lu Nen Mbafankwagh
5. Ishima ngi u sha kwagh u mlu u ken hemen u tar ne nana?
5 Ikyaior ka ia umbur u a gbe ve la yô ve lu ikyaior i fan kwagh. (Ôr Pasalmi 119:99, 100.) Er ve lu a mhen u Aôndo yô, ka ve nenge ér mlu u ken hemen u tar ne vihi kpishi. Ken shighe u a vese ga ne kpa, ne ikyaior ne nenge er mlu u ken hemen la a cier ior iyol shi ishima i ze ve iyol sha mi kpaa yô. Aluer u ngu zan makeranta her yô, u ungwa kwagh u vihin ahumbe man u mtser u tar u lu seer a seer tseen la man ior mba paan akô kua mbamzeyol mbagenev kpaa. Ishima za ior iyol kpishi sha akaa a a lu zan hemen ne, kpa Mbashiada mba Yehova yô kav er akaa ne a lu ikyav i tesen mkur u tar u Satan ne yô.—Mpa. 11:18.
6. I tsume a ikyaior igen nena?
6 Kpa kwagh er vihi yô, ikyaior i civir Aôndo igen de u kuran shi hungur ve er shighe u tar ne a kera vese ga yô. (2 Pet. 3:3, 4) Mbagenev gba ken kwaghbo sha ci u ve ya ikyar a ior mba bov shi mba nengen ufoto mba ijimbagh. (Anz. 13:20) A vihi kpishi aluer Aôndo venda se ken shighe u mkur ne yô. Kpa gema hen kwagh sha kwagh u yange er Mbaiserael ken inyom i 1473 C.S.Y. (Cii man Shighe u Yesu) la, shighe u ve haa afo shin pev u Moabi, ikyua a Tar u Ityendezwa la. Kanyi yange i er here?
Mbaiserael Zulum u Nyôron ken Tar u Ityendezwa Cii Ve Gba Ye
7, 8. (a) Ka ayom a nyi Satan yange yar tom a mi shin pev u Moabi? (b) Ka ayom a nyi Satan a lu yaren tom a mi nyiana?
7 Satan yange soo ér Mbaiserael ve de nyer ken tar u ityendezwa la ga. Er Satan soo ér Balaam a wa ve ifan kpa kan shio yô, a va a ayom agen sha u meen ve ér ve per tindi u Yehova nahan a de kera lumun ve ga. Yange yar tom a ônkasev Mbamoabi sha u meen Mbaiserael, man hen shighe ne Diabolo kôr mbagenev. Tsô Mbaiserael hii u eren idya a ônkasev Mbamoabi shi ve gure ve civir Baal u Peor kpaa. Er ve zulum u nyôron ken Tar u Ityendezwa la nahan kpa, Mbaiserael mba kuman iorov 24,000 kpe. Nenge i vihi sha wono!—Num. 25:1-3, 9.
8 Nyian kpa se mgbôghom a tar u ityendezwa u u hembe doon yô, ka tar u he je la. Er Satan a vanden eren nahan, nyian kpa ngu yaren tom a isharen i ijimbagh sha u vihin ior mba Aôndo. Kwagh kera gba ior i tar ne a aeren a wang ga, nahan ka ve tôô ér ijimba i eren shin u nomsoor yaven a nomsoor ugen la ka kwagh u or nana tsua a ishima i nan yô. Anmgbian u kwase ugen kaa ér: “Ka hen ya man ken Iyou i Tartor tseegh i tesen ônov av ér Aôndo venda ieren i nomso yaven a ayol a ve la kua idya ye.”
9. Kanyi alaghga ia er shighe u “sarbang u uye” laa, man ikyaior ia nôngo a zayol ne nena?
9 Ikyaior i i umbur u a gbe ve la fa ér u nom yaven a kwase u nan la ka iyua i i̱ gbe i zough vea uma kua mar yô. Nahan ve fa ér ka mba ve vese ayol a ve tseegh i gbe u vea yaven ayol a ve, er Aôndo a tese la ye. (Heb. 13:4) Kpa alaghga a taver ikyaior kpishi u lun wang shighe u “sarbang u uye” a taver ken a ve yô, ka shighe u isharen i yaven a or ka i taver nahan nan kera hen sha kwagh u una due ken ieren i nan la tsembelee ga la. (1 Kor. 7:36, NW) Shighe u mbamhen mba bov ve nyer u ken ishima yô ú er nena? Aluer kwagh ngu nahan yô, er msen sha gbashima hen Yehova a wase u har ishima you sha akaa a doon. Yehova ongo mba ve eren msen hen a na sha gbashima mbara hanma shighe cii. (Ôr Luka 11:9-13.) Iliam i maan a maa la kpa ia fatyô u kôôm mbamhen asev.
Tsua Akaa a Ú Er yô sha Kwaghfan
10. Ka mbamhen mba bov mba nyi i doo u se paleghaa, man ka mbampin mba nyi i doo u se pine ayol a ase?
10 Kwagh u a ne ve ikyaior i ken tar nyian kpishi i ar ave shi i keren asaren a iyolough yô, ka sha ci u ve ban a “mpase” shin mkav, inja na yô Aôndo ngu hemen ve ga shin mba a ishimaverenkeghen i dedoo ken hemen ga. (Anz. 29:18) Kwagh u ikyaior ne ngu er Mbaiserael mba sha ayange a Yesaia mba ve de u civir Aôndo ve gema ve lu keren ‘msaanyol man iember shi ve lu yan inyam shi man wain’ la nahan. (Yes. 22:13) Nahan hemba doon u henen sha averen a Yehova a ver sha ci u mba ve civir un sha mimi la a u tômon mkpeyol u ambaaior la. Aluer u ngu wanyekwaor u ú civir Aôndo yô, u ngu veren ashe a tar u he la saan saan kpa? U ngu nôngon sha afatyô wou cii wer u “zenden tsev tsev . . . [ú] keghen ishimaverenkeghen i dedoo” i Yehova a ver u sha ishi la kpa? (Titu 2:12, 13) Mlumun u ú na sha mpin ne la una wase ú u tsuan akaa a ú er yô.
11. Doo u ikyaior i ken Kristu i i lu zan makeranta her la ia hen kwagh kpoghuloo sha ci u nyi?
11 Tar ne soo ér ikyaior i hemba veren ishima sha u keren akaa a taregh. Kpa doo u ne mba ne lu zan makeranta her yô ne nôngo kwagh tsung sha er ne ya ikyaren tsembelee yô. Umbur nen ner, awashima wen ka u been makeranta zuan a tom u dedoo tseegh ga, kpa ka u lun a iwasen ken tiônnongo shi eren tom u pasen kwagh la kpa tsema tsema. Nahan yô, gba u ne fa u lamen tsembelee shi henen sha kwagh sha alô sha alô shi timen sha kwagh vea or kundu kundu shi nan mbagenev icivir kpaa. Nahan kpa, ikyaior i í henen Bibilo shi í nôngon tsung ér ia yar tom a akaawan a i̱ ken uma ve yô ka i hemba zuan a mtsera ken makeranta, nahan ve wa imaagh ki dedoo ki tsan gbem.—Ôr Pasalmi 1:1-3. *
12. Doo u icombor i ken Kristu ia dondo ikyav i nyi?
12 Yange lu hange hange u mbamaren vea tesen ônov vev ken Iserael u tsuaa la. Mbamaren yange ve tese ônov vev hanma kwagh cii, hemban je yô akaa a a gbe a zough sha mcivir u Aôndo yô. (Dut. 6:6, 7) Nahan ikyaior i ken Iserael i yange ia ngohol ityesen hen mbamaren vev kua mbaganden mba cian Aôndo yô ve zua a mfe man kwaghfan man mkav kua m-er u sha inja, man ka hen Aôndo tseegh se zua a aeren ne ye. (Anz. 1:2-4; 2:1-5, 11-15) Kape nyian kpa i doo u icombor i ken Kristu ia ver ishima sha ityesen je la.
Ver Ato a Mba Ú Doo Ve Ishima La
13. Ior ka ve wa ikyaior igen kwagh nena, man doo u vea wa ikyo sha ci u nyi?
13 Ior kposo kposo ka ve shi wan ikyaior kwagh, kua ior mba ve we mbayevmakeranta kwagh la kpaa, man kwaghwan ve la hembe lun sha u tesen mbayevmakeranta er vea za ikyura ken tar ne yô. Time ken Mkaanem ma Aôndo kua ngeren mba wanakiriki u jighjigh man u fan kwagh shi er msen hen Aôndo a hemen we sha er u tsua kwagh u ú er yô. Ken Bibilo i henen you la, u fa er Satan a hembe anen ikyaior man mbalanenkwagh vanger yô. U tesen ikyav yô, Ifa yange ban a mkav nahan ver ato a Satan, or u i fe un ga, u kwagh gba un sha mkpeyol u Ifa ga la. Kpa luun er yange una ver ato a Yehova u tese un dooshima la yô, ka kwagh u doon ma due ken kwagh la ye.—Gen. 3:1-6.
14. Doo u se ungwa kwaghwan u Yehova kua u mbamaren asev mba ve civir un la sha ci u nyi?
14 We kpa u doo u a gbe u la ishima, man a soo u a ishima na i môm je. A soo ér i saan we iyol gbem sha won, ka hegen tseegh ga. Nahan ngu kaan a mbacivir un cii kundu kundu, sha inja i ormaren, ér: “Ka gbenda je ne, za nen sha u.” (Yes. 30:21) Aluer Yehova doo mbamaren ou ishima sha mimi yô, ngula kpa ka iveren hen a we. Nahan shighe u ú lu tsuan kwagh u ú er yô, dondo kwaghwan ve la. (Anz. 1:8, 9) Fa wer ve soo ér we u zua a uma u tsôron, man ma kwagh môm ken tar ne kpa kuma sha uma u tsôron ga.—Mat. 16:26.
15, 16. (a) Ka vangertiôr u nyi se fatyô u lun a mi ken Yehova? (b) Kwagh u Baruki la tese se nyi i injaa?
15 Mba ve umbur u a gbe ve la ka ve lu a uma u akuma akuma, shi ve lu a vangertiôr ér mayange Yehova una “undu” ve ga, shi una “kende” ve kpaa ga. (Ôr Mbaheberu 13:5.) Er ieren i injaa ne i dugh kposo a mhen u tar ne yô, mayange se de ser jijingi u taregh a bende a vese ga. (Ef. 2:2) Nahan yô, de se time sha kwagh u Baruki, orngeren u Yeremia, u lu uma sha shighe u ican tser Yerusalem, sha ayange a masejime a gar la zan zan i kar timin un ken inyom i 607 C.S.Y. la.
16 Alaghga tsô Baruki lu keren akaa a vesen sha ci na hen shighe la. Yehova fa kwagh ne, nahan a ta Baruki icin ér a de kera keren “akaa a vesen” sha ci na ga. Baruki hide a iyol na ijime shi er kwagh sha kwaghfan ungwa icintan i Yehova la, nahan a war mtim u Yerusalem la. (Yer. 45:2-5) Kpa “akaa a vesen” a mba sha ayange a Baruki ombo kpishi kpa ve lu civir Yehova sha ishima i môm ga la cii saa ishe shighe u Mbakaldi (Mbababilon) tim Yerusalem la. Ve mbagenev kpishi kpa kpe sha shighe shon. (2 Kron. 36:15-18) Kwagh u yange er Baruki la tese se ér u yan ikyar i dedoo vea Aôndo la hemba ngun a inja a inyaregh man itizan ken tar ne.
Dondo Akav a Dedoo
17. Yesu man Paulu kua Timoteu cii ver mbacivir Yehova nyian ikyav i dedoo sha ci u nyi?
17 Mkaanem ma Aôndo na se akav a dedoo kpishi sha u wasen se se za hemen u zan sha gbenda u uma la. U tesen ikyav yô, Yesu hemba hanma orumace ugen cii kwaghfan, nahan kpa yange hemba haren ishima na sha u pasen “Loho u Dedoo u tartor” u ua wase ior gbem sha won la. (Luka 4:43) Apostoli Paulu kpa de tom u van a inyaregh kpishi u lu a mi la gema ver ishima sha u pasen loho u dedoo, sha er una na Yehova kwagh u hemban doon yô. Timoteu u lu “wan u mimi sha jighjigh u nan” la kpa dondo ikyav i dedoo i Paulu la. (1 Tim. 1:2) Nahan Yesu man Paulu kua Timoteu cii vaa afanyô sha kwagh u ve tsua u eren a uma ve laa? Mayange ga. Paulu kaa ér un nenge akaa a tar ne cii ér ka un “hôngor” sha ci u ian i injaa i civir Aôndo i un zua a mi la.—Fil. 3:8-11.
18. Anmgbian ugen u lu wanyekwaor yô gema uma na nena, man a vaa afanyô ga sha ci u nyi?
18 Ikyaior i ken Kristu nyian kpishi dondo ikyav i dedoo i Yesu man i Paulu kua i Timoteu la. U tesen ikyav yô, anmgbian ugen u a lu wanyekwaor, u yange eren tom u uke shi i kimbin un inyaregh kpishi yô, kaa ér: “Er m dondon atindiakaa a ken Bibilo yô, ica gba ga cii maa i nam mzehemen sha tom. Er m lu zuan a inyaregh kpishi nahan kpa, m nenge mer m ngu zendan a zenda ahumbe ityô tsô. Shighe u m za sha u za pasen mbavesen mba kômpeni la mer m soo u eren tom u pasen kwagh hanma shighe yô, ve kaa ér vea seer mo inyaregh, gadia ve hen ér aluer ve er nahan yô me kera za mape ga. Kpa m vande tsuan kwagh u me er cii m mase ôron ve ye. Yange taver ior kpishi u kaven er i hii ve m de tom u van a inyaregh kpishi mer me er tom u pasen kwagh hanma shighe yô. Mlumun wam yô, m soo u eren sha iyol i m tsegh sha ci u Aôndo la a ishima i môm. Hegen m hemba haren uma wam cii sha u civir Aôndo, nahan hemba saan mo iyol shi m zua a mkom u inyaregh man itizan cii vea fatyô u nan mo ga yô.”
19. I wa ikyaior kwagh ér i tsua nyi i injaa?
19 Ka kwagh u ikyaior udubu imôngo tar sha won cii i lu tsuan u eren je la. Nahan yô, ikyaior, ne nguren henen sha kwagh u ne tsua u eren ken hemen yô, umbur nen iyange i Yehova kpaa. (2 Pet. 3:11, 12) Kwagh u mba ve lu zan hemen ken tar ne la a de saren ne ga. Kpa dondo kwaghwan u mba ú doo ve ishima sha mimi la. Aluer ne koso “akaa a injaa sha ci wen Sha” yô ne koso a hen ijiir i hemban doon cii, shi ka cii ijiir i ne zua a mbamtsera mba tsôron kpaa je la. (Mat. 6:19, 20; Ôr 1 Yohane 2:15-17.) Umbur nen u a gbe ne la. Aluer ne er nahan yô Yehova una ver ne doo doo.
[Footnote]
^ Aluer u soo u seer timen sha kwagh u yunivasiti i henen yô, ôr Iyoukura i Oktoba 1, 2005, peeji 22-27.
Ú Fatyô u Umbur Kpa?
• Se tese ser se suur sha Aôndo nena?
• Kanyi i lu ityesen i hembana?
• Kwagh u Baruki la tese se nyi?
• Ka unô ve ver se akav a dedoo, man ka sha ci u nyi?
[Study Questions]
[Pictures on page 13]
Yehova ne se ityesen i hemban doon cii
[Picture on page 15]
Baruki yange ungwa icintan i Yehova nahan war mtim u Yerusalem. Nahan u hen nyi sha kwagh nee?