Kwagh U A Ne Uma A Hembe Lun A Inja Yô
Kwagh U A Ne Uma A Hembe Lun A Inja Yô
“Cia Aôndo, waan atindi Na ikyo.”—ORPA. 12:13.
1, 2. U̱ timen ken takerada u Orpasenkwagh la una wase se nena?
TÔÔ wer orgen lu a hanma kwagh u sar un cii. Or ne lu tor shi lu môm ken mba hemban ngeen a inyaregh sha tar sha shighe na la cii, shi fa kwagh tsura kpaa. Yange er akaa kpishi, nahan kpa a pine iyol na ér, ‘Kanyi jim i ne uma a hembe lun a inja?’
2 Imba or ne yange nan lu kpôô kpôô, anyom kar hegen kuma er dubu utar nahan. Iti na lu Solomon, man i pase se ken takerada u Orpasenkwagh er yange lu keren kwagh u a hembe lun a inja ken uma la yô. (Orpa. 1:13) Se fatyô u henen akaa kpishi sha kwagh u Solomon la. Kwaghfan u a lu ken takerada u Orpasenkwagh la una wase se se tsua akaa a se er ve uma wase una lu a inja yô.
“Ka di u Zendan Ahumbe Ityô Tsô”
3. Ka mimi sha kwagh u uma wase u nyi i doo u se fa?
3 Solomon kaa ér Aôndo gba akaa a doon kpishi shin tar, ka akaa a doon a kpilighyol a been mayange ga a se ember gbem yô. Nahan kpa se fatyô u timen sha akaa a Aôndo a gbe la been ga, gadia se mba tse gbem ga. (Orpa. 3:11; 8:17) Ayange a ase nga ciôn tsô, nga a kar kera fefa. (Yobu 14:1, 2; Orpa. 6:12) Kwagh ne a̱ wase se se eren kwagh sha kwaghfan sha ayange a se lu uma ne cii. U eren kwagh sha kwaghfan la ka kwagh u taver tsô, gadia tar u Satan ne ua soo ér se er kwagh sha kwaghfan ga.
4. (a) Solomon tese kwaghbo u a lu ken u keren akaa a gbilinigh ken uma wase la nena? (b) Ka akaa a nyi se time sha mi?
4 Solomon yar tom a ishember i “gbilinkwagh” la ken takerada u Orpasenkwagh kuma kwa 30 sha u tesen kwaghbo u a lu ken u keren akaa a gbilinigh ken uma wase la. (Orpa. 1:2, 3) Ashighe agen Solomon ka a yar tom a ishember i “gbilinkwagh” la vea ishember i “ka u zendan ahumbe ityô tsô” la ijiir i môm. (Orpa. 1:14; 2:11) Sha kpôô yô, iniôngon i or nan nenge ér nana kôr ahumbe cii kpa ka di gbilinkwagh tsô. Hanma or u nan lu zendan ahumbe cii nana zua a kwagh môm ga. Man kape u keren mbamtsera mba ve lu a inja ga la kpa i lu je la. Se mba tse ken tar u ainge ne gbem ga, nahan doo u se eren akaa a aa na se saa aveve la ga. Nahan yô, de se time sha akav a Solomon a tese ér ior mba keren la, nahan se gema se palegh kwaghbo u una due ker la. Se hii nengen sha kwagh u inyaregh ki keren man uyôughyôughmbaakaav mba ombon la. Se been yô, se time sha mluainja u eren tom u Aôndo a lumun a mi yô.
Iemberyolough i Keren Ngi Ne Msaanyolo?
5. Solomon yange ker uma u injaa hana?
5 Solomon yange ker uma u injaa sha iemberyolough, vough er ior nyian kpishi ve eren nahan. A kaa ér: “M nyume ishima yam hanma kwagh u iember ga.” (Orpa. 2:10) Yange ker iemberyolough hana? Orpasenkwagh ityough 2 kaa ér Solomon ker gbenda u una er man a kpe un iyol sha wain yô, kpa yange kôr iyol na tsaha nahan fatyô u eren ishule i ikyon shi maa uya shi ungwan atsam shi yaan kwaghyan u dedoo kpaa.
6. (a) Ka kwaghbo u ember uma ga sha ci u nyi? (b) Ka mnenge u vough u nyi i doo u se lu a mi sha kwagh u iemberyolough?
6 Bibilo yange or u ember vea azende a nan shinii? Mayange ga. Ikyav i tesen yô, Solomon kaa ér u or yan kwaghyan u dedoo sha er i kpe uma u nan iyol ken tom u nan u sha ican la ka sha ikyev i Aôndo a dugh ye. (Ôr Orpasenkwagh 2:24; 3:12, 13.) Yehova iyolna kpa lôhô ikyaior ér i ‘ember, ishima kpaa i̱ lu ve saan saan’ akuma akuma. (Orpa. 11:9) Doo u se memen shi se ember kpaa. (Nenge Marku 6:31.) Nahan kpa, doo u iemberyolough ia hingir tamen kwagh ken uma wase ga. Doo u se eren iemberyolough akuma akuma sha ci u aluer se er za kaa ikyaa inya yô, ia kera wase se ga. Solomon yange nenge ér aluer or ver ishima sha u zendan iemberyolough tseegh yô, “ka di u zendan ahumbe ityô tsô.”—Orpa. 2:10, 11.
7. Doo u se tsua iemberyolough sha kwaghfan sha ci u nyi?
7 Ka hanma iemberyolough cii i doo sha ci wase ga. Akaa agen a ior ve eren la ka a bo kpishi sha ci u ka a vihi ikyar i dedoo i se ye vea Yehova la shin eren akaa a dang agenegh kpaa. Ior umiliôn kpishi vihi uuma vev sha u man mcimbim ma bov shi man msôrom kpishi shin gbidyen do sha ci u ve ‘soo u ember.’ Yehova wa se kwagh ér aluer se de ishima yase shin ashe ase mgbegha se u eren akaa a bo yô, se sunda kwagh u se lee la kpee je.—Gal. 6:7.
8. Doo u se hide se gbidye kwar sha uma wase sha ci u nyi?
8 Aluer se ver iemberyolough hiihii ken uma wase yô, ia yange se u eren akaa a a hembe lun a inja la. Umbur wer se mba tse gbem ga, shi ka se gba angev ashighe agen shi mbamzeyol kpa mba tseren se. Sha ityôkyaa ne yô, Solomon shi kaa ér se hemba zuan a iwasen shighe u se ze ku iin u ma anmgbian wase u nomso shin u kwase u ken Kristu la a shighe u se ze “hen ya u iniongo” yô. (Ôr Orpasenkwagh 7:2, 4.) Sha ci u nyi? Aluer se ungwa kwaghôron u kuu u or u civir Yehova u nan kpe la shi se gbidye kwar sha uma u nan yô, kwagh la una na se hide se hen sha uma wase kpaa. Nahan se kure ikyaa sha u sôron akaa ken uma wase sha er se yar tom a uma wase u a mase shin la sha gbenda u injaa yô.—Orpa. 12:1.
Uyôughyôughmbaakaav Vea Na Se Mkomo?
9. Solomon yange nenge inyaregh ki ombon nena?
9 Shighe u Solomon nger takerada u Orpasenkwagh la lu or u hemban lun a inyaregh sha won cii. (2 Kron. 9:22) Yange lu a inyaregh ki eren kwagh u a soo cii. A nger ér: “Hanma kwagh u a sar ashe am yô, m nyume a ga.” (Orpa. 2:10) Nahan kpa va kav er uyôughyôughmbaakaav ve ne mkom ga yô. Nahan mase kaan ér: “Or u azurfa a doo nan yô, azurfa una kuma nan ga; u nan keren inyaregh ki ngeen kpaa, mtsera una kuma nan ga.”—Orpa. 5:10.
10. Kanyi ia na se mkom u mimi man inyareghe?
10 Er uyôughyôughmbaakaav ve tse gbem ga nahan kpa vea fatyô u benden a vese. Kwagh u i sember tôvon ken tar u Amerika yô tese ér ior kpishi mba ve sember nyôron yunivasiti yô kaa ér kwagh u ve we ishima yô ka u “hingir mbainyarev.” Aluer ve hingir mbainyarev je kpa, a saan ve iyol mimi he? A saan ve iyol ga. Mbatimen sha akaa kaa ér, shighe u uyôughyôughmbaakaav ve hingir tamenkwagh ken uma u or yô, ka i hemba taver nan u zuan a msaanyol man mkom cii. Solomon vande kuren ikyaa ér kwagh a lu nahala. A nger ér: “M kohol azurfa man zenaria, man akaainjaa a u tor man a sha ityar kposo kposo . . . nahan kpaa lu gbilinkwagh cii, ka di u zendan ahumbe ityô tsô.” * (Orpa. 2:8, 11) Aluer se gema uma wase cii se na sha u eren Yehova tom a ishima i môm yô, se zua a averen kpishi kua inyaregh kpaa.—Ôr Anzaakaa 10:22.
Tom u U Ne Mkom Yô
11. Ruamabera tese ér tom ka kwagh u injaa nena?
11 Yesu yange kaa ér: “Terem ngu eren tom her, Mo kpaa M ngu eren tom.” (Yoh. 5:17) Ikyav tese wang ér Yehova man Yesu yange ve zua a mkom ken tom u gban akaa la. Bibilo tese ér shighe u Yehova gba tar bee la doo un tsung, i̱ kaa ér: “Tsô Aôndo gema nenge hanma kwagh u Un er yô, lu u doon tsung.” (Gen. 1:31) Shi mbatyomov kpa er ve nenge kwagh u Aôndo er la yô, ve cii ve “ger amo sha iember.” (Yobu 38:4-7) Solomon kpa kape nenge ér tom u injaa ka kwagh u doon je la.—Orpa. 3:13.
12, 13. (a) Iorov uhar pase mkom u ve zough a mi sha u eren tom sha mimi la nena? (b) Ashighe agen tom u sha tôndo ua fatyô u van or ahenge sha ci u nyi?
12 Uumace kpishi fa er tom u sha mimi u ve a mkom yô. U tesen ikyav yô, or u kpelan kwagh ugen mba yer un ér José, a kaa ér, “Zum u ka wea kpela kwagh u ú soo la wea bee nahan i lu u er u unde gôgôwo yô.” Orkpenga ugen di mba yer un ér Miguel, * a kaa ér: “Tom ngu ne or mkom, sha ci u ka u wase nan u nengen sha tsombor u nan doo doo. Shi or ka nana er tom yô nan nenge ér nan er gwa kwagh kpaa.”
13 Nahan kpa, ityom igen ngi di ityô i môm tsô, or fetyô u duen a mbamhen mbahev sha i ga. Ashighe agen ka i nzughul a ior hen ijiirtom ve je kpaa. Shi er Solomon a tese nahan, alaghga oruhwe u nan lu ijende i or u nan lu a tahav yô nana ya dyako i or u nan er tom kpoghuloo la. (Orpa. 2:21) Akaa agen kpa aa fatyô u van or ahenge. Alaghga u ngu eren kasua zuan a inyaregh doo doo, kpa inyaregh ki va ban shi aikyôr shin akaa agen na yô kasua shon gba. (Ôr Orpasenkwagh 9:11.) Or u nan lu nôngon kpoghuloo ér nana za ikyura la ashighe kpishi ka i lu nan nan va ahenge ye, sha ci u ka nan nenge ér nan er ‘tom u nan sha ci u ahumbe.’—Orpa. 5:16.
14. Ka tom u nyi u ne mkom u mimi?
14 Tom ugen ngu u mayange je ua fatyô u van or ahenge ga yôô? Orkperan kwagh u i yer un ér José, u i vande ôron kwagh na la kaa wener: “Aluer u kpera kwagh kpa anyom a a karen yô, alaghga una saa shin una vihi je kpaa. Kpa ityom i se er sha u civir Aôndo la yô, ia saa ishe mayange ga. M ungwa imo i Yehova sha u pasen ior loho u dedoo, nahan m wase mbagenev hingir Mbakristu mba cian Aôndo, man kwagh ne una wase ve gbem. Ka tom u u hembe doon cii je ne.” (1 Kor. 3:9-11) Miguel kpa kaa wener, tom u pasen loho u dedoo u Tartor hemba nan un mkom a tom u uke. A kaa ér: “Kwagh môm kpa hemba iember i or ka nan zua a mi shighe u nan tese or mimi u ken Bibilo man nan nenge ér a kôr or shon sha mtema la ga.”
“Kende Ruam Wou”
15. Kanyi jighilii ka i na ve uma a hemba lun a inja?
15 Kanyi jighilii i ne ve uma a hembe lun a inja? Aluer se mba eren akaa a dedoo shi se mba civir Yehova a shighe wase u a vese ga ne yô, se zua a mkom u mimi. Se fatyô u seer taver ikyaryan yase vea Aôndo, shi se ver ônov asev dyako i eren sha atindiakaa a ken Bibilo, shi se wase mbagenev ser ve fa Yehova, shi se kôr ikyar i dedoo vea anmgbianev asev mba nomso man mba kasev. (Gal. 6:10) Akaa ne cii ka a va a iwasen i tsôron shi mba ve eren akaa ne kpaa ka ve zua a averen. Solomon ôr kwaghôron u sha ikyav sha u wasen se u fan er i doo u se eren a mbagenev doo doo yô. A kaa ér: “Kende ruam wou shin mnger, gadia ayange á va kar kpishi, tsô ú zua a mi.” (Orpa. 11:1) Yesu kpa wa mbahenen nav kwagh ér: “Na nen, nahan ne kpaa á na ne.” (Luka 6:38) Yehova iyolna kpa tôndo zwa ér una na mba ve eren a mbagenev doo doo la injar.—Anz. 19:17; ôr Mbaheberu 6:10.
16. Ka hanma shighe nahan i doo u ikyaior ia tsua kwagh u ia er a uma ve?
16 Bibilo wa ikyaior kwagh ér i tsua kwagh u ia er a uma ve la sha kwaghfan er ve lu iyev her ne. Aluer i er nahan yô ia vaa afanyô ken anyom a ken hemen la ga. (Orpa. 12:1) Aluer ikyaior vihi anyom a ve a uye ne sha u zendan asaren a taregh, nahan i va mase kaven ér mba zendan a zenda ahumbe ityô tsô nahan a vihi kpen kpen.
17. Kanyi ia wase ú u tsuan uma u a hembe lun a inja?
17 Yehova ngu er Ter u lun a dooshima nahan, gadia a soo ér ne ember uma shi ne eren akaa a dedoo shi ne palegh akaa a gbilinigh a nanden ne ityough la kpaa. (Orpa. 11:9, 10) Kanyi ia wase ne u eren akaa nee? Tsua akaa a ú er ve ú seer eren Aôndo tom yô, shi nôngo kpoghuloo er sha akaa a u tsough la kpaa. Anmgbian ugen mba yer un ér Javier, yange gba u una tsua tom tweregh u ua kimbin un inyaregh kpishi yô, gayô una tsua u eren tom u pasen kwagh hanma shighe. Kwagh ne er anyom kar hegen er 20 nahan. A kaa wener: “Er tom tweregh u ne mkom nahan kpa, kwagh môm hemba iember i ka mea wase ior kpishi u fan mimi ve m zua a mi la ga. Tom u pasen kwagh hanma shighe wasem u ember uma sha ishima yam. Kpa ka m var afanyô sha ci u yange m hii tom ne fele ga.”
18. Shighe u Yesu lu shin tar la uma na lu a inja sha ci u nyi?
18 Ka kwagh u a hembe lun u injaa u nyi i doo u se lu a mini? Takerada u Orpasenkwagh kaa ér: “Iti i mimi hemba doon a mkurem ma doon tsung; man shi iyange i kuugh hemba doon a iyange i maren or la.” (Orpa. 7:1) Uma u Yesu hemba pasen kwagh ne wang a hanma kwagh cii. Yange er iti i dedoo a Yehova. Yesu yange kpe sha ci u jighjigh u nan, nahan a kende a hementor u Ter na sha, shi a na iwom a uma na kpaa, iwom ne bugh se gbenda u zuan a myom. (Mat. 20:28) Shighe u Yesu lu shin tar sha anshighe kpuaa la, a ver se ikyav i dedoo i se dondo sha u eren uma u a hembe lun a inja cii yô.—1 Kor. 11:1; 1 Pet. 2:21.
19. Ka kwaghwan u injaa u nyi Solomon a we se?
19 Se kpa se fatyô u eren iti i dedoo a Aôndo. Hemba doon u se lu a iti i dedoo sha ishigh ki Yehova a u lun a inyaregh kpishi la. (Ôr Mateu 6:19-21.) Doo u hanma yange yô, se ker igbenda i eren akaa a doon Yehova man a aa na uma wase una hemba lun a inja yô. U tesen ikyav yô, se fatyô u pasen mbagenev loho u dedoo shi seer nyôôso ivese yase kua tsombor wase kpaa, shi se fatyô u seer taver ikyaryan yase vea Yehova sha u henen kwagh se tseegh shi zan mbamkombo kpaa. (Orpa. 11:6; Heb. 13:16) Nahan u soo wer u ember uma u a hembe lun a inja laa? Aluer u soo yô, za hemen u dondon kwaghwan u Solomon ne, a kaa ér: “Cia Aôndo, waan atindi Na ikyo; gadia ngun ka kwagh u ior cii ma ve er je ne.”—Orpa. 12:13.
[Footnotes]
^ Solomon zuan a myohom ma zenaria sha hanma inyom kuman utalenti 666.—2 Kron. 9:13.
^ I musan iti la.
Ú Na Mlumun Wer Nyi?
• Kanyi i doo u ia mgbegha se se gbidye kwar zulee sha akaa a se tsough u eren laa?
• Doo u se nenge iemberyolough man uyôughyôughmbaakaav nena?
• Ka tom u nyi ua na se mkom u tsôrono?
• Ka kwagh u injaa u nyi i gbe u se lu a mi?
[Study Questions]
[Picture on page 23]
Doo u se nenge anumbe a eren nena?
[Picture on page 24]
Tom u pasen kwagh ngu hembe nan mkom sha ci u nyi?