Gbenda U Dedoo U Sôron Mzeyol

AGUMAIOR agen atar ken tar u Central Africa soo u zan mkohol u vesen ken tar ve. Nahan vea za mkohol ne nena? Ijiir la gba ica je kuma ukilomita 90, shi gbenda kpa doo ga, u lu ihyundu ihyundu, shi kwaghhendan kpa ve lu a mi ga. Tsô ve za ker akeke atar, kpa akeke shon doo kuma ga.

Ortamen ugen ken tiônnongo nenge mzeyol ve la nahan a na ve ikyekye na, lu tse ikyekye, kpa i taver iyol her. Shi a pase ve kwagh u un kua mbagenev yange ve er sha u zan mkohol u vesen yô. Ortamen la kaa a ve ér vea fatyô u zan mkohol sha ikyekye i môm. Kwagh u gba u vea er ne lu kwagh u taver ga, kpa gba u vea wa iyol tsembelee. Tsô iorov utar vea za mkohol sha ikyekye i môm nena?

Anmgbianev mba utar mbara mough pepe pepe kange ikyav vev sha ikyekye u yemen, sha er vea zende atetan shighe u oo ua ta la ga yô. U môm ken a ve henda ikyekye la gba yemen, mba uhar di gema lu zan un ijime sha angahar. Anmgbian u lu nahan ikyekye la naha i̱ ka kom umita 500 nahan yô, a gema i̱ aa ikyav shami a lian ken itine kon. Nahan kpa a ver i̱ sha er mbagenev mbara vea nenge a mi, kpa orgen nana va “tôô” i̱ ga yô. Un di kar gba yemen sha angahar.

Mbauhar mbara mba va nyer her yô, môm ken a ve tôô i̱ henda, ugen la di lu zan un ijime sha angahar zan zan umita 500. Nahan er ve wa iyol tsembelee shi ve kange ishima yô, anmgbianev mba utar mbara kera zende sha angahar kuma ukilomita 90 ga, kpa ve zende ukilomita 60 tseegh. Iniôngon ve la yange i due gbilin ga. Yange ve kohol imôngo vea anmgbianev vev mba nomso man mba kasev sha mkohol u vesen la ve ungwa akaaôron saan saan. (Dut 31:12) Ú fatyô u nôngon sha afatyô wou cii zan mkohol u vesen hen ningir wou ken inyom ne kpa?