Ka ‘Aôndo A Ne Mvese Ye’!
Ka ‘Aôndo A Ne Mvese Ye’!
“Un u a môôr la ngu ma kwagh ga, shin un u a ur mngerem la kpaa ga, saa Aôndo u A ne mvese la.”—1 KOR. 3:7.
1. “Se mba mbashirentom a Aôndo imôngo” sha nyi gbenda?
APOSTOLI Paulu pase ian i se cii se lu a mi la ér se mba “mbashirentom a Aôndo imôngo.” (Ôr 1 Mbakorinte 3:5-9.) Tom u Paulu lu ôron kwagh u u la lu tom u geman ior hingir mbahenen. A kar u sha tom u lôôn kwagh shi urun mngerem. Aluer se soo u zan ikyura ken tom ne yô saa se ker iwasen hen Yehova. Paulu umbur se ér ka ‘Aôndo a ne mvese ye.’
2. Mfe u se fe ser ka ‘Aôndo a ne mvese’ la una na se lu a mnenge u vough sha tom wase u pasen kwagh ne sha ci u nyi?
2 Kwagh la una na se lu a mnenge u vough sha tom wase u pasen kwagh ne. Sea er tom taveraa sha u pasen shi tesen ior Bibilo kpa shighe u kwagh u dedoo a dugh ker yô ka Yehova se wuese un ye. Sha ci u nyi? Sha ci u sea nôngo nan nan kpa se fatyô u fan er or ka nan vese nan hingir orhenen u Yesu la ga, nahan se mba a tahav sha mvese u nan la ga. Tor Solomon yange kaa vough shighe u nger ér: “Kape tom u Aôndo u A er akaa cii kpaa u fe u ga la.”—Orpa. 11:5.
3. Tom u geman ior hingir mbahenen man u lôôn ivor kpôô kpôô la gba zua sha nyi gbenda?
3 Er se fe gbenda u or ka nan vese nan hingir orhenen ga yô iyol kpe se a tom wase u geman ior hingir mbahenen nee? Mayange ga. Kwagh ne na yô tom wase hemba doon se cii, shi u hemba maan se iyol kpaa. Tor Solomon kaa ér: “Lôô ivor you pepe, man aikighe kpaa de hiden a uwegh ou ga; gadia u fa i ia doo la ga, shin ka ngin shin ka ngira, shin ihiar cii ia doo u.” (Orpa. 11:6) Ka sea lôô ivor kpôô kpôô je kpa se mba fe i ia mende ga. Akaa nga kpishi a se fe sha kwagh ne ga yô. Kape tom wase u geman ior hingir mbahenen ne kpa u lu je la. Yesu ôr anzaakaa ahar ken ityough ki sha unyiin ki Ivangeli i Marku sha u tan iwanger sha kwagh ne. De se nenge ase nen kwagh u se hen ken anzaakaa a ahar ne yô.
Anza a Inyaagh Kposo Kposo
4, 5. Pase inja i injakwagh i Yesu i sha kwagh u ortanivor la.
4 Yesu ôr kwagh u ortanivor u yar lu tan ivor man ivor ne haa sha ajiir kposo kposo, er i nger ken Marku 4:1-9 nahan. Ijiir la kaa ér: “Ver nen ato! Ortanivor yar sha u una ta ivor. Tsô ngur tan yô, ivor igen pande haa sha kpegbenda; inyon va, va sange i, ya. Igen haa sha ikyuu ape inya i civir ga yô; nahan i mende fese sha ci u inya i ze i kom i ga yô. Oo ngu te yô, i hia; i uma sha ci u i lu a amise ga yô. Shi igen haa ken usaa; usaa vese imbishi i, i mar ga. Igen yô, haa hen inya i dedoo, i mende i vese i via iyiagh i wa asange hemba ivor la kwa ikyundugber, igen kwa akunduatar, igen kwa akunduataan.”
5 Sha ashighe a i ngeren Bibilo la, a soo u lôôn ma ivor yô, i ta a ta i. Ortanivor nan haa ivor i nan shin ikyondo gayô shin ikya nan taan i, í tsendan i za haan ica. Nahan injakwagh ne tese ér ortanivor la ta ivor na sha anza a inyaagh kposo kposo sha apera ga. Kpa ivor la haa sha ajiir kposo kposo.
6. Yesu pase injakwagh i ortanivor la nena?
6 Yesu yange ôr injakwagh ne maa de ér se ker a ker mbaahaba ve se fa inja na ga. Yange pase inja i injakwagh ne ken Marku 4:14-20. Á kaa ér: “Ortanivor ka nan ta kwaghôron. Mba ve lu sha gbenda henpe i te kwaghôron la, ka mba ka vea ungwa yô, fese je Satan a va, a ngohol kwaghôron u i lee ken asema a ve la kera. Nahan mba i te ve ivor sha ikyuu la kpaa, ka mba ka vea ungwa kwaghôron yô, fese je ve ngohol un saan saan, kpa ve lu a mise ker ayol a ve ga, nahan ve taver asema anyangem kpeghee, tsô er mkighir u sha ican shin mtev u sha ican una mough a ve sha ci u kwaghôron la yô, fese je ve nôngo gbev. Man mba i te ve ivor ken usaa yô, ka mba ka vea ungwa kwaghôron kpa anzughul a tar ne a nyian ishima kua icugh i inyar man asaren a sha akaa agen cii vea va yô, ve imbishi kwaghôron la, nahan a kera ume atam ga. Mba i te ve ivor hen inya i dedoo yô, ka mba ka vea ungwa kwaghôron la, ve ngohol un, ve ume atam, ugen kwa ikyundugber, ugen akunduatar man ugen akunduataan.”
7. Ivor man inya i i lu kposo kposo la tile sha ityou ki nyi?
7 Fa wer Yesu kaa ér i ta ivor kposo kposo ga. Kpa a ôr kwagh u ivor i môm i i her sha ajiir kposo kposo shi i um atam kposo kposo yô. Inya i hiihii la taver iyol gbang gbang, i sha uhar la di ngi avande avande, i sha utar la usaa mende sha i, i sha unyiin la ka i dedoo shi i doo iyiagh kpaa. (Luka 8:8) Man gema ivor la di kanyi? Ivor la ka kwaghôron u Tartor u a lu ken Mkaanem ma Aôndo la. (Mat. 13:19) Inya i i lu kposo kposo la tile sha ityou ki nyi? Inya la ka asema a ior a a lu kposo kposo la.—Ôr Luka 8:12, 15.
8. (a) Ortanivor la tile sha ityough ki ana? (b) Hii nan ve i lu hanma or nan lumun loho u dedoo ne ga?
8 Ka an nan lu ortanivor laa? Ortanivor la ka mba ve lu eren tom vea Aôndo imôngo la, ka mba ve lu pasen loho u dedoo u Tartor je la. Ka ve lôô shi ve uu vough er Paulu man Apolo nahan. Shin er ka ve er tom taveraa nahan kpa kwagh u ka a due ker la ngu a lu kwagh môm ga. Sha ci u nyi? Sha ci u asema a ior mba ve ongo loho la nga kwagh môm ga. Ortanivor u ken injakwagh la yange lu a tahav sha kwagh u una due ken ivor i lu tan la ga. Nahan mfe ne a suur se cii asema, hemban je yô anmgbianev asev mba nomso man mba kasev mba ve ndera pasen kwagh sha ajiir agen anyom imôngo kpa ior ve lumun ga la. * Er nan ve kwagh a lu nahana?
9. Ka mimi u surun ishima u nyi yange apostoli Paulu man Yesu ve ôr kwagh sha mi?
9 Mba karen jighjigh u ortanivor la sha kwagh u una due ken tom u nan la ga. Paulu yange ter kwagh ne shighe u kaa ér: “Hanmô ve nana zua a injar i nan iyol i nan sha inja i tom u nan” la. (1 Kor. 3:8) Ka er or er tom la a na nan injar ye, ka kwagh u una due ken tom u nan la ga. Shighe u mbahenen mba Yesu hide kwaghpasen la kpa a kimbir oron imba kwagh ne. Mbahenen mba Yesu yange ve hide kwaghpasen a iember sha ci u ujijingi mba bov je kpa hingir sha ikyev ve ken iti i Yesu. Er saan ve iyol nahan kpa Yesu kaa a ve ér: “De ember nen er ujijingi ve lu sha ikyev yen ga, kpa ember nen er i nger ati a en Sha yô.” (Luka 10:17-20) Aluer ortanivor la nan ngu geman ior kpishi hingir mbahenen ken tom u nan la ga kpa u ngu wer nan wa a wa hwev ken tom u nan shin jighjigh u nan yina a yina nan ga. Jighilii yô, kwagh u ka a due ken tom wase la har sha ishima i or u nan ongo loho wase la. Kpa ka Aôndo a ne mvese ye!
Kwagh u I Gbe u mba Ve Ongo Loho la Vea Er Yô
10. Kanyi ia tese ér or u nan ongo loho la nan ngu inya i dedoo shin i bo?
10 Gema mba ve ongo loho la di ye? I vande veren kwagh u vea er yôô? Ei. Ka ve vea tsua kwagh u ve soo u lun la ye. Jighilii yô, ishima i or ia fatyô u geman sha gbenda u dedoo shin u bo. (Rom. 6:17) Yesu ôr ken injakwagh na la ér ‘mbagenev ka vea ungwan kwaghôron’ yô, fese je Satan a va ngohol un kera. Kpa ka keng keng kwagh a lu nahan ga. I wa Mbakristu kwagh ken Yakobu 4:7 ér ve “hendan a Diabolo,” tsô una yevese ve. Yesu shi ôr kwagh u mbagenev ér ve ngohol loho u tartor la saan saan, kpa er ‘ve lu a mise ken ayol a ve ga’ yô, fese je ve nôngo gbev. Kpa i wa mbatomov mba Aôndo kwagh ér ve ‘wa amise . . . i tim ve ker dông’ sha er vea fatyô u kaven “igbanger man iniembe man mtav man mze u dooshima u Kristu u a gande u fan la a lu yô.”—Ef. 3:17-19; Kol. 2:6, 7.
11. Or a palegh anzughul a tar ne a nyian ishima kua icugh i inyar u nyôron imbishi kwaghôron ken ishima i nan nena?
11 I pase kwagh u mbagenev mba ve ungwa loho la ér ka mba ka ve ongo kwaghôron la kpa “anzughul a tar ne a nyian ishima kua icugh i inyar” ve kar ve nyôr ve imbishi kwaghôron la yô. (1 Tim. 6:9, 10) Vea palegh kwagh ne nena? Apostoli Paulu na mlumun ér: “Inyaregh ki saren ki̱ de luun ken uma wen ga. Kwagh u ne lu a mi yô, a̱ kuma ne, gadia A kaa er: Mayange Me undu u ga, Me kende u kpaa ga.”—Heb. 13:5.
12. Hii nan ve mba ve lu er ka inya i dedoo mbara ka ve ume atam kposo kposoo?
12 Yesu mase ôron ér, ivor i i her sha inya i dedoo la “ume atam, ugen kwa ikyundugber, ugen akunduatar man ugen akunduataan.” Er mba ve lumun loho u dedoo mbagenev ve lu a ishima i dedoo shi ve ze hemen ken jijingi nahan kpa, kwagh u vea fatyô u eren ken tom u yôôn loho u dedoo ne ngu kwagh môm ga. U tesen ikyav yô, iyolbeen shin icôronuange ia na yô mbagenev vea kera fatyô u eren tom u pasen kwagh er ma ve er la ga. (Nenge Marku 12:43, 44.) Heen kpa alaghga ortanivor la nana lu a tahav sha kwagh ne ga, kpa a doo nan u nengen er Yehova a ne mvese yô.—Ôr Pasalmi 126:5, 6.
Ortanivor u Nan Yav La
13, 14. (a) Pase inja i injakwagh i Yesu a er sha kwagh u ortanivor la. (b) Ka an nan til sha ityough ki ortanivor laa, man ivor la di kanyi?
13 Se zua a injakwagh igen sha kwagh u ortanivor ken Marku 4:26-29. Ijiir la kaa ér: “Tartor u Aôndo ngu nahan; ka er or u nan te ivor shin inya; nan yav, nan nder, tugh man tetan, man ivor la kpaa mende, i vese, kpa nan fa er i hii man i mende ga; gadia inya iyol i i gba nan iyiav tsô; hiihii ka ikya, u dondon ka ishagher, man ken masetyô yô, ka asange a vian ken ishagher. Man shighe u iyiagh kia via yô, fese je nan za a louji keregh, sha ci u shighe u sundan a kom yô.”
14 Ortanivor ne ka ana? Mbagenev ken Mbakristu Mbaaiev na jighjigh ér ka Yesu iyol na a lu ortanivor ne ye. Kpa a fatyô u kaan ér Yesu yav nahan a fa shighe u ivor la i mende i vese ga ze. Yesu fa mvese u ivor la je ka u henen a hen ga. Kpa ortanivor ne nan ngu kwagh môm a ortanivor u i vande ôron kwagh na la. Ve cii ve tile sha ityough ki hanma orpasenkwagh u Tartor u nan te ivor i Tartor sha u pasen kwagh sha gbashima la. Ivor i í te shin inya la ka loho u nan pasen la. *
15, 16. Ken injakwagh i Yesu i sha kwagh u ortanivor la, ka mimi sha kwagh u mvese u kpôô kpôô man u ken jijingi u nyi a ere?
15 Yesu kaa ér ortanivor la “nan yav, nan nder, tugh man tetan.” Kwagh ne tese ér ortanivor la nan ngu eren tom u nan ga ze. Kpa a tese a tese kwagh u ior kpishi ve eren ayange ayange tsô. Asember a i yar tom a mi ken ivur ne la tese ieren i or yaven tugh kpa nderen tetan, kwagh u a ze hemen shighe gôgônan yô. Yesu pase kwagh u za hemen hen shighe la yô. A kaa ér: “Ivor la kpaa mende, i vese.” Yesu shi za hemen wener: “Kpa nan fa er i hii man i mende ga.” Kwagh u Yesu lu ôron heen jighilii yô ér, ivor la mende “iyol i i.” *
16 Yesu lu ôron heen ér nyi jimi? Fa wer kwagh u i lu ôron heen jighilii yô ka mvese u ivor la man gbenda u i lu vesen kure kure la. Bibilo kaa ér: ‘Gadia inya iyol i i gba nan iyiav tsô; hiihii ka ikya, u dondon ka ishagher, man ken masetyô yô, ka asange a vian ken ishagher.’ (Mar. 4:28) Ivor ne vese kure kure man sha adondo adondo kpaa. A fatyô u kighir ivor ne sha apera ér i̱ vese ga. Kape ior mba ve hingir mbahenen mbara kpa kwagh ve a lu je ne. Yehova ka una na mimi ian u vesen ken ishima i or u mimi yô, mimi ne a vesen sha adondo adondo.—Aer. 13:48; Heb. 6:1.
17. Ka unô ka ve ember shighe u vor u mimi u um atam laa?
17 Ka sha nyi gbenda nahan ortanivor la kpa nan lu sundan ‘fese je er shighe u iyiagh kia via’ laa? Yehova ka una na mimi u sha kwagh u Tartor una vese ken ishima i mbahenen mba hev yô, ka ve za hemen ken mimi zan zan nahan mdoo u Aôndo a doo ve ishima la a mgbegha ve u tseghan ayol a ve sha ci na kpaa. Shi ka ve tese ikyav i iyoltseghan ve ne ken igbar nahan i er ve batisema shin mnger. Anmgbianev mba nomso mba ve ze hemen u vesen ken jijingi yô ka ve va hingir u seer lun sha aan a tom ken tiônnongo je kpaa. Kpa ka ortanivor la tseegh nan sondo atam a Tartor aa ivor i i um atam ken orhenen shon ga, mbapasenkwagh mbagenev mba yange ve lôô ivor shon ga kpa ka ve sunda. (Ôr Yohane 4:36-38.) Sha mimi yô, “orlôôn man orsundan [ka ve] ember imôngo.”
Ityesen hen a Vese Nyian
18, 19. (a) Se time sha anzaakaa a Yesu ne nahan a taver we ishima nena? (b) Se hen nyi ken kwaghhenen u a dondo nee?
18 Se time sha anzaakaa a ahar a i nger ken Marku ityough ki sha 4 kin nahan se hen nyi? Se nenge wang er se lu a tom u eren yô, ka tom u tan ivor je la. Mayange mbamtaver shin akaa a zan iyol agen a se tagher a mi ken tom wase la a de yangen se u eren tom ne ga. (Orpa. 11:4) Er se tagher a mbamtaver ken tom ne nahan kpa, se fa er se lu sha ian i civirigh i lun mbashirentom vea Aôndo yô. Ka Yehova a ne mvese u ken jijingi ye, gadia ka a ver iniôngon yase man i mba ve lumun loho u dedoo la kpaa. Se kav er se fatyô u kighir or môm môm ser nana hingir orhenen ga yô. Shi se kav kpaa ser, aluer ior mba se pasen ve kwagh mbara hingir mbahenen ga je kpa iyol i de kpen se ga. Se fa ser ka u se lun jighjigh hen Yehova man shi ian i civirigh i a ne se ér se pase “loho u dedoo u tartor ne, . . . sha u u̱ lu mpase hen akuraior cii” la i lu kwagh u tesen ér se mba zan ikyura ken jijingi ye, nahan kwagh ne kundu se iyol kpen kpen.—Mat. 24:14.
19 Kanyi igen kpa Yesu a tese se sha kwagh u mvese u mbahenen mba hev man tom u Tartoro? Se zua a mlumun sha mpin ne ken anzaakaa agen ken ngeren mba Ivangeli. Se time sha anzaakaa ne agen ken kwaghhenen u a dondo ne.
[Footnotes]
^ Nenge kwagh u Anmgbian u i yer un ér Georg Fjölnir Lindal, u a er tom ken tar u Iceland, u i er kwagh na ken 2005 Yearbook of Jehovah’s Witnesses, sha peeji 210 zan zan 211 la. Shi nenge uvande-eren mba anmgbianev asev mba ve ze hemen u pasen kwagh ken tar u Ireland sha mimi anyom imôngo, shin er ior ve lu ungwan loho ve la ga nahan kpaa la, er i er ken 1988 Yearbook of Jehovah’s Witnesses, peeji 82 zan zan 99 nahan.
^ I vande pasen ken Iyoukura ér ivor la tile sha ityough ki aeren a or a i gbe u aa via la, man ijiir i or vese her la ka i bende a aeren a nan. Kpa fa nen ner, ivor i ken injakwagh i Yesu la gema hingir ivor i bo shin i hôôn ga. Kpa i mende, i via kpaa.—Nenge Iyoukura (zwa Buter) i Jun 15, 1980, peeji 17 zan zan 19.
^ Ka ken Aerenakaa 12:10, ape i er kwagh u hunda u iyôgh gba bughun “iyol i u tsô” la tseegh shi i ter ishember ne ye.
Ú Umbur Kpa?
• Tom u tan ivor kpôô kpôô man u pasen loho u Tartor la zua sha nyi man nyi?
• Yehova karen jighjigh u orpasenkwagh u Tartor sha nyi kwagha?
• Ka akaa a lun kwagh môm sha mvese u kpôô kpôô man u ken jijingi a nyi Yesu a er kwagh sha mini?
• “Orlôôn man orsundan [ka ve] ember imôngo” nena?
[Study Questions]
[Pictures on page 13]
Hii nan ve Yesu a tee orpasenkwagh u Tartor u Aôndo a kar sha ortanivoro?
[Pictures on page 15]
Mba ve til sha ityough ki inya i dedoo mbara mba pasen kwagh u Tartor er ve fetyô la sha gbashima je
[Pictures on page 16]
Ka Aôndo a ne mvese ye