Yehova Una Ta Mba I Doo Un A Ve La Kera ga
Yehova Una Ta Mba I Doo Un A Ve La Kera ga
“[Yehova] te mba i doo Un a ve la kera ga. Mba koson ve gbem.”—PS. 37:28.
1, 2. (a) Ka akaa a nyi yange kar mtil sha mimi u mbacivir Aôndo ken derianyom u sha pue C.S.Y. laa? (b) Yehova yange kura mbacivir un sha mimi sha akaa atar a nyi?
KEN derianyom u sha pue C.S.Y. (Cii man Shighe u Yesu) la, vegher u ken imbusutarimese u ikyurior i Iserael la lu eren ayôôso, nahan i pav tar la ker u hingir sha tseeneke u ú, sha er ayôôso aa bee yô. Nahan Yerobiam u lu tor ve u he la ver kwaghaôndo ken tar la jimin cii sha er una seer taver mtemtor na yô. Yange soo ér hanma or u un lu hemen nan cii yô, nana ungwan un. Tsô mbacivir Yehova mbajighjigh vea er nena? Vea za hemen u ungwan imo i Aôndo, u ve lu civir la a ishima i môm kpa? Ior udubu udubu za hemen u ungwan imo i Yehova a ishima i môm; shi er ve lu civir Yehova sha mimi yô, a kura ve kpaa.—1 Utor 12:1-33; 2 Kron. 11:13, 14.
2 Nyian kpa, mba karen mtil sha mimi u mbacivir Aôndo. Bibilo wa se kwagh ér: “Lu nen geng ge geng shi kuran nen kpaa, [gadia] orihyom wen diabolo ngu zenden er begha u tan kume nahan, keren or u una ya yô.” Se fatyô u ‘hendan a na, tilen dông sha jighjigh wase u nan’ kpa? (1 Pet. 5:8, 9) Se time nen sha akaa a yange er hen shighe u i ver Yerobiam tor ken inyom i 997 C.S.Y la, nahan se nenge nen kwagh u se hen sha mi yô. Yange i er mbacivir Yehova sha jighjigh ican hen shighe la kpen kpen. Shi ve tagher a mbavendan mimi zum u ve lu eren ityom i taver yô. Sha ashighe a ve lu tagher a mbamtaver la cii, Yehova ta ve kera ga, nyian kpa una ta mba ve civir un sha mimi mbara kera ga.—Ps. 37:28. *
Shighe u i Lu Eren Ve Ican Yô
3. Er nan ve Tor Davidi hemen ior sha tswam ga?
3 Se hii timen nen sha akaa a yange na ve Yerobiam hingir tor la. Anzaakaa 29:2 kaa ér: “Iferor ka nana tema tor yô, ior ve shir asema.” Shighe u Davidi lu tor u Iserael u tsuaa la, ior shir asema ga. Er Davidi lu vough ga nahan kpa, a civir Aôndo sha mimi shi a suur sha a na kpaa. Davidi yange hemen ior sha tswam ga. Yehova yange ya ikyur a na ér: “Ya wou kua tartor wou vea tile dông sha ishigh yough gbem; ikyônough yough ki torough kia lu her gbem sha won.”—2 Sam. 7:16.
4. Solomon man ior mba hemen ve la zua a averen sha ci u ve er nyi?
4 Shighe u Solomon, wan u Davidi hii u hemen la, bem gba ken tar u Iserael shi kpe hanma or cii iyol; hemen na la tese er Hemen u Kristu Yesu u Anyom Dubu la ua lu yô. (Ps. 72:1, 17) Ken ikwe pue kar ihiar i Iserael la cii, ma kwe môm tsô lu a ityôkyaa i hembanato ga. Nahan kpa, Solomon man Mbaiserael cii yange ve zua a averen sha ci u ve ungwan imo i Yehova. Yehova kaa a Solomon ér: “Aluer wea zaan sha akaawan a Am, wea ôron ijir sha atindi Am, man wea waan ikyo sha atindi Am cii, ú eren sha mi yô, Mo kpaa, Me kure kwaghôron Wam a we, u lu M ôr a teru Davidi la, man shi Me tema hen Mbaiserael, Me gbihi ior Av Iserael mayange ga.”—1 Utor 6:11-13.
5, 6. Shighe u Solomon de u civir Aôndo la, lu nyi i eree?
5 Solomon yange va been iyol yô, ishima na kera lu sha Yehova ga nahan hingir u civir mbaaôndo mbaaiev. (1 Utor 11:4-6) Tegh tsegh tsô, Solomon de u kuran atindi a Yehova nahan hingir u tswamen ior kpoghuloo. Yange tswam ior kpishi, nahan shighe u va kpe kera la ior vaa a wan na Rehobiam, u hingir tor sha ityough nagh la ér a pande ikyav mbi yuhwan mbi ter na wa ve la. (1 Utor 12:4) Yehova yange er nyi shighe u Solomon de u dondon un laa?
6 Bibilo kaa a vese ér: “Ishima vihi TER a Solomon, sha ci u ishima na i gem, a de u dondon . . . Aôndo u Iserael, u A ande hen a na kwa har la” yô. Yehova kaa a Solomon ér: “Er u . . . we ikyo sha ikyuryan Yam man akaawan a Am, a M we u la ga yô, mimi je, Me tsuwe tor her a we kera, Me na wanakiriki wou.”—1 Utor 11:9-11.
7. Er Solomon kera lu tor ga nahan kpa Yehova wa mba civir un sha mimi ikyo nena?
7 Yehova maa tindi profeti Ahiya ér a za shighe or u nana yima Mbaiserael la mkurem. Or shon yô lu Yerobiam, u lu ortom u Solomon shighe u Solomon lu tor la. Er Yehova bunde ikyur i Tartor i ya vea Davidi la ga nahan kpa, a lumun ér i pav ikwe pue kar ihiar i Iserael la ker ikpen ihiar. Yange gba u a na Yerobiam ikwe pue, i ihiar la di ia lu a tsombor u Davidi, u Tor Rehobiam tile sha ityough ki u la. (1 Utor 11:29-37; 12:16, 17, 21) Yehova kaa a Yerobiam ér: “Aluer wea ver ato sha kwagh u Me wa u cii, wea zenden sha igbenda Yam, wea eren kwagh u lun vough sha ashe Am ú waan akaawan a Am man atindi a Am ikyo er Davidi wanakiriki Wam lu eren nahan yô, Me lu a we, Me maa u icôronya, er lu M maa Davidi nahan, Me gema Iserael Me na u.” (1 Utor 11:38) Yehova yange nôngo kwagh sha ci u ior nav, due a ve ken ican kera.
8. Ka atsan a nyi a tseren mbacivir Aôndo nyiana?
8 Tswam de ishar nyian. Orpasenkwagh 8:9 kaa ér: “Or ka nana lu a tahav sha orgen yô, nan eren nan ican.” Alaghga mbakpengav mba wan hua man mbahemenev mba wan ifer vea na inyaregh kia za iban shi akaa a taver ishe. Ashighe kpishi mbahemenev mba gomoti man mbakpengav kua mbahemenev mba kwaghaôndo ka ve tese ior inja i mimi ga. Sha nahan yô, mbacivir Aôndo mbamimi nyian mba yan “ican ken ishima tsung sha ci u ijimba i eren i mbaaferev mbara,” vough er orperapera Loti kpa yange ya ican ken ishima nahan. (2 Pet. 2:7) Er ka se nôngo tsung sha u kuran atindi a Aôndo, se keren iyongo ga nahan kpa, ashighe kpishi mbahemenev mba wan tswam ka ve tôv se a ican.—2 Tim. 3:1-5, 12.
9. (a) Yehova er nyi sha u yiman ior nava? (b) Se na jighjigh ser Yesu una za hemen u civir Aôndo sha mimi sha ci u nyi?
9 Se lumun a mimi u vesen ne ser: Yehova una ta mba ve civir un sha mimi la kera ga! U tesen ikyav yô, hen sha iyol i Aôndo a we u va timin mbahemen tar mba ve we afer yum la. I sôr hanma kwagh u Tartor u Mesiya, ú Aôndo á we sha ikyev i Kristu Yesu la cii i bee. Yesu Kristu hemen sha, nôngo u kuman anyom deri hegen. Kera shi ica ga tsô una due a hanma or u nan cie iti i Aôndo cii ken ican kera. (Ôr Mpase 11:15-18.) Yesu yange civir Aôndo sha mimi zan zan kar kpen. Mayange je una va mba a lu hemen ve la ahenge er Solomon er nahan ga.—Heb. 7:26; 1 Pet. 2:6.
10. (a) Se tese ser Tartor u Aôndo gba se ishima nena? (b) Shighe u se lu yan ican yô, doo u se lu a vangertiôr ser nyi?
10 Tartor u Aôndo ka gomoti jim jim, una va kar a nyityô ican cii kera. Gba u se na Yehova Aôndo man Tartor na jighjigh. Vangertiôr u se lu a mi sha Tartor u Aôndo la una wase se se venda mwe u mbagenev ve we Aôndo ikyo ga la shi se lu a ishima i tseen sha u eren akaa a dedoo. (Titu 2:12-14) Ka se nôngo sha afatyô wase cii sha er se lu a acôghor iyol ken tar ne ga yô. (2 Pet. 3:14) Sea lu yan atsan nan nan kpa, se lu nen a vangertiôr ser Yehova una kura se shighe u i lu karen jighjigh wase yô. (Ôr Pasalmi 97:10.) Heela tseegh ga, Pasalmi 116:15 taver se ishima ér: “Sha ishigh ki TER yô, ku u uicighan Nav ka kwagh u injaa kpishi.” Mbacivir Yehova doo un ishima je ka kwagh u una de ér i tim ve jimin cii ga.
Shighe u Se Tagher a Mbavendan Mimi Yô
11. Yerobiam yange kera tile sha mimi ga nena?
11 Hemen u Tor Yerobiam la yange ma u va ior mba Aôndo a mkpeyol, nahan kpa aeren a na gema kar a kar mtil sha mimi u ior mba Aôndo. Er i na Yerobiam icivir shi lu tor nahan je kpa kuma un ga, nahan a gba keren u kuran ian na i tor la. Tsô a gba henen ken ishima na ér: “Aluer ior mban vea kôndo sha u za nan nagh ken iyou i TER ken Yerusalem yô, asema a ior aa shi á hide hen ter ve, Rehobiam, tor u Yuda; nahan vea wuam, vea hide hen Rehobiam tor u Yuda.” Yerobiam maa ver mcivir u he u ior hingir u civir anibuav uhar mba sha zenaria yô. “A ver u môm ken Betel, ugen a ver ken Dan. Kwagh ne gema hingir kwaghbo; gadia ior ve za civir u môm hen Betel ugen di hen Dan. A gema ajiir a taven sha hingir utempel; shi a tôô ior wue wue a ver ve upristi, mba ve lu ônov mba Levi ga yô.” Yerobiam shi ver iyange na i eren “iniongo sha ci u Mbaiserael,” tsô a unde sha “atse u za nanden kwaghhumandoon.”—1 Utor 12:26-33.
12. Shighe u Yerobiam ver mcivir u wanbua la, mbacivir Aôndo mbamimi mba ve lu ken tartor u Iserael u ken imbusutarimese mbara er nyi?
12 Mbagenev mba ve lu civir Aôndo sha mimi ken tartor u Iserael u ken imbusutarimese la vea er nena? Mbalevi mba ve lu ken agar a i na ve ken tartor u Iserael u ken imbusutarimese la timbir u duen ken tar la kera ga, vough er uter vev mba tsev mbajighjigh mbara kpa er nahan. (Eks. 32:26-28; Num. 35:6-8; Dut. 33:8, 9) Yange ve undu uidyako vev ve mough a icombor ve ve yem ken imbusutariyan, ken tar u Yuda ér vea za civir Yehova a mzeyol shio. (2 Kron. 11:13, 14) Mbaiserael mbagenev mba ve lu shir ken Yuda yô tsua u saan ken tar la, kera yemen ken tar ve ga. (2 Kron. 10:17) Yehova yange ver ian i mba a va mar ve ken tartor u Iserael u ken imbusutarimese mbara kpa vea de u civir wanbua, vea hide a va civir Yehova sha mimi ken Yuda yô.—2 Kron. 15:9-15.
13. Mbavendan mimi mba karen jighjigh u nan u ior mba Aôndo nyian nena?
13 Nyian kpa mbavendan mimi mba anger ior mba Aôndo. Mbahemen tar mbagenev tim kwaghaôndo u sha ishima ve ken Tar ve shi mba kighir ior mba ve lu ken tar ve la ér ve eren kwaghaôndo u ve tim la. Mbahemenev mba Mbakristu Mbaaiev man mbagengeseyol mbagenev tsua ayol a ve ér ve mba upristi. Kpa ka Mbakristu mba mimi mba i shigh ve mkurem mbara tseegh ve lu “nongo u upristi mba sha inja i tor” ye.—1 Pet. 2:9; Mpa. 14:1-5.
14. Doo u se nenge mbamhen mba mbavendan mimi nena?
14 Mbavendan mimi mba fetyô u tsughun mbacivir Aôndo mba mimi nyian sha mbamhen vev ga, vough er Mbalevi mbajighjigh mba ken derianyom u sha pue C.S.Y. mbara kpa mbavendan mimi fatyô u tsughun ve ga nahan. Mbakristu mba i shigh ve mkurem man akar a ve cii ka ve venda mbamhen mba mbavendan mimi a atimbir shio. (Ôr Mbaromanu 16:17.) Se mba ongo imo i mbahemenev mba gomoti mba tar ne, nahan kpa ka Tartor u Aôndo se shiren u tom sha mimi ye. (Yoh. 18:36; Rom. 13:1-8) Se mba palegh mba ve sengen ér ve mba civir Aôndo, kpa ve gem ve nyiman un sha aeren a ve la cii.—Titu 1:16.
15. Doo u se na “wanakiriki u jighjigh man u fan kwagh” jighjigh sha ci u nyi?
15 Shi hen ase sha ian i Yehova a ver sha er mbaasemaamimi vea due ken tar u bo ne vea nyôr ken paradiso u ken jijingi u a gbe un hegh la. (2 Kor. 12:1-4) Iwuese i se lu a mi la ka i mgbegha se u dondon hemen u ‘wanakiriki u jighjigh man u fan kwagh u ter na a we un ya sha ikyev sha u a naan ve kwaghyan sha ashighe ashighe’ la. Kristu wa wanakiriki ne ‘ya na sha ikyev.’ (Mat. 24:45-47) Nahan yô, aluer sea fa er i hii ve wanakiriki ne a tsough u eren ma kwagh shin eren ga je kpa, ngula tseegh kuma u vendan kwaghwan na shin undun mimi hiden yemen ken tar u Satan ga. Kpa jighjigh u se ne wanakiriki la una mgbegha se se hide a ayol a ase ijime, se lumun kwaghwan la shi se kegh shighe u Yehova una sôr hanma kwagh cii la.
Shighe u Se lu Eren Tom u Aôndo a Ne Se Yô
16. Ka tom u nyi yange i na profeti ugen ken Yuda?
16 Yehova yange na Yerobiam ibo sha ieren na i vendan mimi la. Yehova tindi profeti na ugen ken Yuda ér a za ken Betel a za ôr kwagh a Yerobiam shighe u lu nanden nagh sha atse a na la. Yange gba u profeti ne una ôr Yerobiam loho u jirigh u vihin tsung. Sha mimi yô, lu tom u taver kpen kpen.—1 Utor 13:1-3.
17. Yehova yange kura profeti na nena?
17 Yerobiam yange ungwa loho u jirigh u Yehova la nahan ishima vihi un kpen kpen. Tsô a naregh uwegh sha or u Aôndo a genger imo sha ishimavihin a kaa ér: “Kôr un.” Kpa, cii man mbatomov mba tor ve kôr or u Aôndo nahan, ave ave la je “uwegh nagh ku a naregh sha a na la saa nelôô, a kera fatyô u hiden a ku ga. Atse kpaa pav, mtwem kpaa haa inya.” Nahan Yerobiam kaa a profeti la ér a sôn Yehova a hide un a uwegh nagh her. Profeti la er nahan maa uwegh nagh hide her. Nahan Yehova kura profeti na sha ikyev i kwagh u bo.—1 Utor 13:4-6.
18. Er se civir Yehova a mciem shio nahan, kor se nena?
18 Ashighe agen ka sea due u pasen loho u Tartor shi geman ior hingir mbahenen yô, ior mbagenev ve hendan a vese shin ve soo u eren se ayôôso je kpaa. (Mat. 24:14; 28:19, 20) Kpa, mayange se gba nen uwer u pasen kwagh sha gbashima sha ci u ior venda u keghen ato a vese yum ga. Se kpa “sé civir [Yehova] a mciem iyol ga, sha mimi” vough er profeti u sha ayange a Yerobiam u i ter iti na ga la kpa er nahan. * (Luka 1:74, 75, NW ) Se mba veren ishima ser Yehova a kura se sha ivande nyian ga. Nahan kpa, er se lu Mbashiada nav yô ngu kuran se sha icighan jijingi na man sha ikyev i mbatyomov nav. (Ôr Yohane 14:15-17; Mpase 14:6.) Aôndo una undu mba ve ze hemen u pasen mkaanem nam a mciem shio la ga.—Fil. 1:14, 28.
Yehova Una Kura Mba i Doo Un a Ve La
19, 20. (a) Se fatyô u lun a vangertiôr ser Yehova una undu se ga sha ci u nyi? (b) Ka mbampin mba nyi se time sha mi ken kwaghhenen u a dondo nee?
19 Yehova ka Aôndo wase u wang. (Mpa. 15:4; 16:5) “Eren dedoo ken ityom Na cii.” (Ps. 145:17) Shi Bibilo taver se ishima ér: “Sôron gbenda u mba i doo Un a ve la.” (Anz. 2:8) Shighe u mba i doo Aôndo a ve la ve tagher a mbamtaver shin mbavendan mimi shin ve lu eren tom u taver yô, vea fatyô u lun a vangertiôr ér Yehova una kura ve shi una wase ve kpaa.
20 Kwagh u i doo u se hen sha mi hegen yô, ka un ne: Mea lu tagher a ameen shin tôvacan je kpa, kanyi ia wasem me za hemen u civir Yehova sha mimi? Shin se fatyô u pinen ayol a ase ser, me seer civir Aôndo sha mimi nena?
[Footnotes]
^ Inja i ishember i ken zwa Heberu i í gem ken Bibilo ér “mba i doo Un a ve,” i í er kwagh u i̱ ken ngeren ne la wa “mtil sha mimi” man u “civir Aôndo a ishima i môm” kpa ker. Man ka kwagh u i lu ôron kwagh sha mi ken ngeren ne je la.
^ Ken kwaghhenen u una dondo ne, se va hen se fa aluer profeti la yange una za hemen u ungwan imo i Yehova shin una za hemen ga kpaa, kua kwagh u yange er un la cii.
Ú Na Mlumun Wer Nyi?
• Shighe u kwagh u bo tser mbacivir Yehova mba mimi yô, yange tese ér un undu ve ga nena?
• Doo u se nenge mbavendan mimi man mbamhen vev nena?
• Yehova kor mbacivir un mba mimi shighe u ve lu eren tom ve u Mbakristu la nena?
[Study Questions]
[Map/Picture on page 5]
TARTOR U KEN IMBUSUTARIMESE (Yerobiam)
Dan
SHEKEM
Betel
TARTOR U KEN IMBUSUTARIYAN (Rehobiam)
YERUSALEM
[Picture]
Shighe u Yerobiam ver mcivir u wanbua la, Yehova undu mbacivir un sha mimi ga
[Picture on page 3]
Yange gba u Solomon kua Mbaiserael cii vea er kwagh keng ve vea zua a averen ye