Palegh “Jijingi U Taregh”
Palegh “Jijingi U Taregh”
“Se yô, ka jijingi u taregh se ngohol ga, kpa ka jijingi u A dugh her Aôndo la.” —1 KOR. 2:12.
1, 2. (a) Yange i veren ilyaku ken tar u Ingila ape i dughun aka a igirgidogo shin inya la sha ci u nyi? (b) Ka kwaghbo u nyi Mbakristu ve tagher a mini?
KEN inyom i 1911 la, mbahemenev mba ken tar u Ingila wa tindi u kuran ior mba dughun aka a igirgidogo. Yange gba u a veren mbailyaku uhar hen hanma ijiir i dughun aka a igirgidogo. Sha ci u nyi? Usu yange ua hii u hian ape i lu dughun aka yô, mba waren ior mbara ve za a ilyaku hen ijiir shon. Annyonov mban mba ngôôr ungwan ihuma i bo ga, er ihuma i bo i mnyim ma matoo nahan. Ihuma i bo yange ia samber sha ahumbe yô, annyonov mban ve ule je yô ve osough sha kwagh u ve til sha mi ken keji la ve gba. Akav ne yange a wase kpen kpen. Ahumbe a bo ne nga a kala ga, shi nga a ihuma kpaa ga man ka a wua or sha u yangen awambe a nyian u zenden a ahumbe a se ôôn la ken iyol. Aluer mba waren ior mbara fa er ahumbe a bo a lu hen ijiir la ga yô, vea kura a nahan vea hume, shin vea kpe je kpaa.
2 Mlu wase u Mbakristu ngu kwagh môm a u mba dughun aka shin inya la. Sha nyi gbenda? Shighe u Yesu na mbahenen nav tom u pasen loho u dedoo tar sha won cii la, yange fa ér mbahenen nav vea tagher a akaa a bo ken tar u Satan a lu hemen ú, u jijingi u taregh kpa a dumbur ker ne. (Mat. 10:16; 1 Yoh. 5:19) Kwagh u mbahenen mba Yesu yange gba un ishima je yô, er msen hen Ter na sha ci ve hen tugh mbu cii man a wua un la. A kaa ér: “M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer.”—Yoh. 17:15.
3, 4. Yesu yange ta mbahenen nav icin ér nyi, man gba u kwagh a gba se a icintan la sha ci u nyi?
3 Yesu yange ta mbadondon un icin ér ve ver ishima sha akaa a bo a aa fatyô u vihin ikyaryan ve vea Yehova la. Kwagh u Yesu ôr la ngu se mba se lu ken shighe u mkur ne a inja. Yange wa mbahenen nav kwagh ér: “Kuran nen . . . sha er né kuma u waren akaa a á va er la cii, man né tile sha ishigh ki Wan u or yô.” (Luka 21:34-36) Yesu shi tôndo zwa a ve ér Ter na una na ve icighan jijingi, una wase ve u umbur akaa a ve hen la shi una wase ve vea lu per ken ayange a masejime a ve lu ker ne, shi vea taver ishima kpaa.—Yoh. 14:26.
4 Sha ayange a ase ne di ye? Icighan jijingi shon wasen se nyian kpa? Aluer ka nahan yô, se er nan ve se zua a mini? Jijingi u taregh kanyi, man eren tom nena? Man se hemba jijingi u taregh ne nena?—Ôr 1 Mbakorinte 2:12.
Ngohol Icighan Jijingi, i De Lu Jijingi u Taregh Ga
5, 6. Icighan jijingi una er nyi sha ci wase, kpa cii man se zua a mi yô, se er nyi?
5 Ka sha derianyom u hiihii la tseegh Aôndo yange na ior icighan jijingi na ga, ne se nyian kpaa. Icighan jijingi u Aôndo ne una na se agee a eren kwagh u vough shi eren tom u pasen kwagh kpaa. (Rom. 12:11; Fil. 4:13) Shi una wase se se lu a aeren a dedoo, er dooshima man sar sar man mlu u dedoo nahan. Aeren ne ka avegher a “ityamegh ki Jijingi.” (Gal. 5:22, 23) Nahan kpa, Yehova Aôndo kighir ior a icighan jijingi na ga.
6 Nahan doo u se pine ayol a ase ser, ‘Me er nan ve me zua a icighan jijingi?’ Bibilo kaa a vese ér akaa nga kpishi, a i gbe u se er yô. Kwagh u injaa môm u se er yô, se sôn Aôndo ser a na se icighan jijingi na. (Ôr Luka 11:13.) Kwagh u injaa ugen yô, se henen Mkaanem ma Aôndo shi se eren sha akaa a se hen la. (2 Tim. 3:16) Kpa ka hanma or nana tôô Bibilo nana ôr tsô maa Aôndo una na nan icighan jijingi na ga. Kpa aluer Orkristu u nan civir Aôndo sha mimi nan ôr Mkaanem nam yô, nana fatyô u timen sha mbamhen man mbamnenge mba ior mba i er kwagh ve ken Mkaanem ma Aôndo la. Shi doo u se fa ser Yehova tsua Yesu ér a tile sha ityough Nagh shi ka ken iti na Aôndo a ne se icighan jijingi ye. (Kol. 2:6) Nahan se dondo nen ikyav i Yesu la shi se eren nen sha atesen a na kpaa. (1 Pet. 2:21) Aluer se mba nôngon ser se dondon Kristu hanma shighe yô, icighan jijingi kpaa se zuan a mi hanma shighe.
7. Jijingi u taregh benden a ior nena?
7 Kpa jijingi u taregh yô, urugh ior u eren aeren a Satan. (Ôr Mbaefese 2:1-3.) Jijingi u taregh ne eren tom sha igbenda kposo kposo. Taver ior asema u peren atindi a Aôndo, er se nenge ior ve eren nyian nahan. Shi mgbeghan ior u lun a “isharen i iyolough, man isharen i ashee man ihyagh i uma.” (1 Yoh. 2:16) Shi samber a aeren a iyolough, er idya man akombo a civir man ahir a eren man iyuhe kua ishimanyoon man ihyundugh ki msôrough nahan. (Gal. 5:19-21) Shi mgbeghan ior u samber a alam a mbavendan mimi, a a vihin kwagh u wang la. (2 Tim. 2:14-18) Aluer or de jijingi u taregh ne ér a hemen nan yô, ka keng nana hingir u dondon Satan.
8. Se cii se mba a ian i tsuan nyi kwagha?
8 Se fatyô u palegh mbamzeyol mba taregh cii ga. Gba u hanma or nana tsua kwagh u nan soo ér a̱ hemen nan la. Aluer ka icighan jijingi shin ka jijingi u taregh kpaa. Mba jijingi u taregh a lu hemen ve hegen ne vea fatyô u hemban un nahan nan icighan jijingi ian ér a̱ hemen ve. Nahan kpa, mba icighan jijingi a lu vanden hemen ve kera la di vea fatyô u nan jijingi u taregh ian ér a hemen ve. (Fil. 3:18, 19) De se time nen sha akaa a se er ve se hendan a jijingi u taregh yô.
Ver Ishima sha Akav a U Hii u Nengen a Mi La
9-11. Ka akaa a nyi se lu eren ve aa tese ér alaghga jijingi u taregh ngu hemen se?
9 Mba dughun aka a igirgidogo shin inya, mba ken tar u Ingila, mba se vande ôron kwagh ve la yange ve lu a ilyaku ér a wase ve vea fa ihuma i bo i mkure tsuaa sha er vea kura i̱ ga yô. Yange or u dughun aka nana nenge annyon ne una gba ken keji yô, nan fa je ér gba u nana kar hen ijiir la kera fese, sha er nana war yô. Man gema mlu wase u ken jijingi la yô, kanyi ia wase se ve se fa shighe u jijingi u taregh a lu hemen se?
10 A shi nan kpa shighe u se hii fan mimi u a lu ken Mkaanem ma Aôndo ve se tsegha iyol yase sha ci u Yehova la, se ôron Bibilo kpoghuloo. Shi se eren msen sha gbashima hanma shighe. Shi yange i doo se u zan mbamkombo mba tiônnongo, shi se nengen mbamkombo mban ser ka kwagh u taver se ishima, se nengen ve er ka mngerem ma ndôhôr ma or u imura i ker nan nan za asegh sha mi ken taaikyôngo nahan. Akaa ne wase se se hendan a jijingi u taregh.
11 Shi se mba nôngon u ôron Bibilo hanma iyange kpa? (Ps. 1:2) Se mba eren msen sha gbashima hanma shighe er yange se vanden eren nahan kpa? Se mba ze mbamkombo mba ken hanma sati la cii sha u tesen ser ve doo se ishima kpa? (Ps. 84:10) Shin se kera mba a ieren i dedoo ne ga? Sha mimi yô, alaghga se lu a akaa a eren kpishi, aa a ya se shighe kua agee nahan a taver se u civir Aôndo sha inja yô. Nahan kpa, aluer aeren a ase a dedoo la kera nga ga yô, ka sha ci u se na jijingi u taregh ian ngu hemen se shinii? Aluer ka nahan yô, doo u se nôngo sha afatyô wase cii se hide se lu a aeren a injaa a yange se vande lun a mi la ga he?
“Asema a En a̱ De Yoho” Ga
12. Yesu yange kaa a mbahenen nav ér ve ver ishima sha nyi, man lu sha ci u nyi?
12 Kanyi igen se er ve ia wase se u palegh jijingi u taregha? Shighe u Yesu ta mbahenen nav icin ér ve “kuran” la, sember tan ve icin sha akaa a bo agen. A kaa a ve ér: “Ver nen ishima sha ayol a en, asema a en a̱ de yoho sha hua u sha kwaghyan man sha ihyundugh man sha akaa a nyian ishima a uma ne ga, iyange la i̱ de va bulun ne er kwaghhônon nahan ga; gadia kape ia va bul a bul” je la.—Luka 21:34, 35.
13, 14. Ka mbampin mba sha kwagh u kwaghyan man kwaghman mba nyi i doo u se pine ayol a ase?
13 Hen ase sha icintan la. Yesu yange se u yan kwagh shin man kwagha? Mayange ga! Yange fa kwagh u Solomon ôr ne, ér: “M fa ma kwagh u hemban doon ve ngu ga, saa u ember man u eren akaa a dedoo sha ayange a ve lu uma la cii. Man shi er hanma or nana̱ ya kwagh, nana̱ ma kwagh, i̱ doo nan iyol ken tom u nan ye ican sha mi la cii; kwagh ne ka iyua i Aôndo je.” (Orpa. 3:12, 13) Yesu yange fa er jijingi u taregh ne a taver ior asema ér ve de ker ayol ave tsaha sha kwaghyan man kwaghman ga yô.
14 Aluer jijingi u taregh yange se u nengen a akaabo a a lu sha u or yan kwagh man u man kwagh karen ikyaa inya la ga nahan, se fa sha nyi? Se fatyô u pinen ayol ase asange asange ser: ‘Ka mea ôr akaa a i we se ken Bibilo shin ken ityakerada yase sha kwagh u hua u eren la nahan m er nena? Ka i lum er m venda kwaghwan ne mer ngu a inja ga shin a taver gande shin m nenge mer ieren yam la ngi shami shinii? * M nengen kwagh u i we sha kwagh u ikyôhô i man la nena? M me i akuma akuma shin m palegh “msôrom ma hunden” kpa? Ka m hure kwaghwan ne kera mer a bende a mo gaa? Ior mbagenev ka vea ôrom ér m me msôrom kpishi nahan ka m nyiman shin m vihi ishima a ve? M taver mbagenev asema mer ve venda kwaghwan u Bibilo sha kwagh u msôrôô?’ Sha kpôô yô, ieren i or ia tese aluer nan lumun ér jijingi u taregh a hemen nan shin nan venda yô.—Nenge Mbaromanu 13:11-14.
De Lumun Wer Ishimanyian i̱ Hemba Ú Agee Ga
15. Ka ieren i nyi Yesu a te se icin sha mini?
15 Kwagh ugen u injaa, u una wase se u palegh jijingi u taregh yô, ka u panden ishimanyian. Yesu yange fa ér er se lu vough ga yô, ishima ia fatyô u nyian se sha akaa a uma ne. Nahan á kaa a mbadondon un sha dooshima ér: “Asema a̱ de nyian” ne ga. (Mat. 6:25) Aluer kwagh gba se sha akaa aa a lu a injaa er u eren ishima i Aôndo man u eren ityom i ken tiônnongo shi koson tsombor wase nahan yô, ka sha inja je. (1 Kor. 7:32-34) Nahan se hen nyi sha icintan i Yesu laa?
16. Jijingi u taregh bende a ior kpishi nyian nena?
16 Jijingi u taregh kua ihyagh i uma ne bende a ior kpishi shi i na ior hingir u henen sha akaa sha gbenda u vea fatyô u tôôn a tôô angev je kpaa. Tar ua soo ér se na jighjigh ser inyaregh ki ve a mkpeyol shi ua soo ér se fa ser ka uyôughyôughmbaakaav mba se lu a mi la vea na ve se gba kwagh ye, ka aeren a ase a Mbakristu ga. Mba ve lumun ér mhen ne a nzughul a ve yô, ka ve er tom kpoghuloo ér vea hingir mbainyarev shi vea yam akaa a he man a hemban kehen man a i sember duen a mi ken kasua la. (Anz. 18:11) Mhen u kpeegh u lun a inyaregh ne yangen or u vesen ken jijingi.—Ôr Mateu 13:18, 22.
17. Se lumun ser ishimanyian i ya tor ken a vese ga nena?
17 Aluer se ungwa tindi u Yesu a we ne yô, una wase se se lumun ser ishimanyian i ya tor ken vese ga. Yesu kaa ér: “Vande keren nen tartor Na man perapera [u Aôndo].” Yesu taver se ishima ér aluer se er kwagh ne yô, se zua a akaa a a gbe se ishima la. (Mat. 6:33) Se tese ser se na ityendezwa ne jighjigh nena? Gbenda môm yô, ka u vanden keren perapera u Aôndo, sha u dondon akaawan a Aôndo a we sha kwagh u inyar la nahan eren kwagh u vough. U tesen ikyav yô, se mba eren anyighe sha kpandegh ku tan ga, shi se mba eren aie u “cuku” ken kpenga kpaa ga. Ka se nôngo sha afatyô wase cii se kure iceghzwa i se er a or sha kwagh u inyar la. Shi ka sea lu or a injô kpa se kimbi nan, sha er ‘een wase una lu een’ heregh yô. (Mat. 5:37; Ps. 37:21) Ieren i mimi ne ia na or nana hingir orinyar ga, kpa Aôndo una lumun nan, shi nana lu a imoshima i wang, ishima kpa ia pande u nyian nan sha akaa.
18. Ka ikyav i nyi Yesu a ver sha ci wase, man aluer se mba dondon un yô, kwagh ne una wase se nena?
18 U vanden keren Tartor u Aôndo la wa u fan akaa a a hembe lun hange hange la ker. Hen ase sha ikyav i Yesu ne. Ashighe agen yange a hua ikyondo i taver ishe. (Yoh. 19:23) Yange yaan kwagh shi maan kwagh aa akar a na a dedoo la. (Mat. 11:18, 19) Kpa gurgur u eren lu kwagh u vesen ken uma na ga. Kwaghyan u Yesu yô, lu u eren ishima i Yehova. (Yoh. 4:34-36) Aluer se dondo ikyav i Yesu ne yô, uma una lu se a inja! A saan se iyol u wasen mba i lu nzughul a ve la u zuan a ishimasurun ken Ruamabera. Shi kwagh wase una doo tiônnongo ishima shi una wase se kpaa. Shi se na a saan Yehova iyol. Aluer se sôr akaa a a hembe lun hange hange la se ver sha inja yô, uyôughyôughmbaakaav man iemberyolough ia lu kwagh u vesen ken uma wase ga. Kpa akaa ne nga wasen se u civir Yehova. Nahan aluer se mba eren tom u suen Tartor u Aôndo kpoghuloo yô, jijingi u taregh ne una fatyô u yan tor sha a vese ga.
Za Hemen u ‘Veren Ishima sha Jijingi’
19-21. Se ‘ver ishima sha jijingi’ nena, man gba u se er kwagh ne sha ci u nyi?
19 Ka mhen u ken ishima or ka nan er tom sha mi ye. Ashighe kpishi ka akaa a ior ve henen ken ishima la ka a mgbegha ve u eren aeren a dang ye. Nahan apostoli Paulu umbur se ér se ver ishima sha mhen wase. Á nger ér: “Mba ve lu ken iyol yô, mba veren ishima sha akaa a iyolough; kpa mba ve lu ken jijingi yô, gema ka akaa a jijingi ve veren ishima sha mi ye.”—Rom. 8:5.
20 Se er nan ve se lumun ser jijingi u taregh a hemen mbamhen asev man aeren a ase ga? Se kura asema ase sha u veren ishima sha akaa a se henen ken ishima la; se nôngo sha afatyô wase cii se palegh mbaaie mba tar ne. U tesen ikyav yô, shighe u se lu tsuan iemberyolough yô, se palegh u nengen anumbe a a taver ior asema u eren idya shin ipila la. Se umbur nen ser icighan jijingi u Aôndo shin jijingi u wang u Aôndo una lumun u lun ken ishima i i hôngor ga. (Ps. 11:5; 2 Kor. 6:15-18) Kwagh ugen yô, se na jijingi u Aôndo ian ser a hemen mbamhen asev sha u ôron Bibilo hanma shighe shi eren msen shi gbidyen kwar sha kwagh u se hen la shi zan mbamkombo hanma shighe. Shi ka sea pasen kwagh hanma shighe yô, se lu eren tom a jijingi la imôngo.
21 Sha kpôô yô, gba u se palegh jijingi u taregh kua asaren a yolough a jijingi ne a lu mgbeghan ior ér ve er la. Aluer se mba eren kwagh ne yô, iniôngon yase ia saa ishe ga, gadia Paulu nger ér: “Ishimaveren i iyolough yô ka ku, kpa ishimaveren i jijingi ka uma man bem.”—Rom. 8:6.
[Footnotes]
^ Hua ka kwagh u ken ityou. Or u eren hua ka nan ya kwagh shi nan ma kwagh i kar ikyaa inya. Ka fe or u wan hua sha indi i nan ga, kpa ka fe nan sha ieren i nan sha kwaghyan. Or nana lu a undu akuma akuma shin nana ndahar kpa nana wa hua. Ashighe agen or ka nana kehe a gande yô, i lu angev gayô mar u nan. Aluer or kehe shin nan ndahar kpa nan ngu yan kwagh ka karen ikyaa inya yô, nan ngu or u eren hua.—Ôr “Mbampin mba Mbaôron Takerada Ne Ve Pin La” ken Iyoukura (zwa Buter) i Novemba 1, 2004.
Baver We Kpa?
• Se er nyi ve se zua a icighan jijingi?
• Jijingi u taregh una fatyô u benden a vese sha nyi gbenda?
• Se palegh jijingi u taregh nena?
[Study Questions]
[Picture on page 21]
Cii man se yar tom shin se yem makeranta yô, doo u se sôn icighan jijingi
[Pictures on page 23]
Se lu nen a mbamhen mba wang shi se eren nen kpenga sha gbenda u vough shi se lu nen a inja i vough