Seer Zuan a Mfe U Vough Sha “Gbashima” Je

MBACIVIR Yehova cii mba keren ér a̱ lumun ve. Er i lu isharen yase la yô, se nôngo sha gbashima se seer taver nen jighjigh wase shi se civir un kpoghuloo kpaa. Nahan kpa, apostoli Paulu wase se u nengen a kwaghbo u alaghga se tagher a mi, u Mbayuda mba ve lu uma sha ayange a na la kpa tagher a mi la. A nger ér: “Mba a ishima i tseen sha kwagh u Aôndo kpa ka sha gbenda u kwaghfan ga.” (Rom. 10:2) Nahan yô, jighjigh u nan wase kua mcivir u se civir Yehova la cii a de haren sha mkende u ken ishima yase tseegh ga. Gba u se lu a mfe u vough sha kwagh u Orgban se kua awashima na kpaa.

Paulu zua ieren i Aôndo a lumun a mi la vea isharen i zuan a mfe u vough la ken ngeren na ugen. Yange er msen ér “ma i iv” mbadondon Kristu a ‘mfe u fan Aôndo sha kwaghfan cii man mkav, sha u vea zenden zende u u kom Ter, vea doon Un ken akaa cii, vea umen atam ken hanma tom u dedoo, shi vea vesen ken kwaghfan u Aôndo’ yô. (Kol. 1:9, 10) Kpa hii nan ve i lu hange hange u se lu a ‘mfe u voughloo’? Man doo u se seer lun a mfe ne sha ci u nyi?

Mfe Wasen Se u Nan Jighjigh

U fan Aôndo man awashima na sha gbenda u vough, er i pase ken Bibilo nahan la ka kwagh u vesen u a ne ve se lu a jighjigh u nan yô. A mfe u vough ne shio yô, jighjigh u se ne Yehova la una lu er iyou i í kov haav mbu i̱ sha ayia, mbu ahumbe aa kar a taver ga kpa mbua sough kera la nahan. Paulu wa se kwagh ér se er Aôndo icighantom sha “tahav mbu mhen” wase shi se ‘gema mhen wase’ kpaa. (Rom. 12:1, 2, NW ) U henen Bibilo hanma shighe la una wase se u eren kwagh ne.

Pania u keke ugen ken tar u Poland, iti na ér Ewa, a kaa ér: “Aluer m ngu henen Mkaanem ma Aôndo hanma shighe ga yô, me kera fa Yehova me seer ga. Mlu wam u kwase Kristu la una saa ishe, nahan jighjigh u m ne Aôndo la una vôr, man kwagh ne una na yô me hingir u vihin ikyaryan yam vea Yehova je kpaa.” Imba kwagh la i de eren se ga! Nenge ase kwagh u or u yange fa Yehova seer ve saan un iyol sha ci u Yehova lumun un la.

“Atindiakaa a Ou, Doom Ishima Zee!”

Atsam a i nger ken Pasalmi 119 ken Ubibilo asev la pase se er ishima yange i lu orngeren pasalmi ne ker sha kwagh u atindi man mbampase man uiniezwa kua akaaôron a jirigh a Yehova yô. A nger ér: “Doom ken ishima u wan akaawan a Ou ikyo, . . . Mbampase Ou kpaa ka iember yam je.” Shi a nger ér: “Atindiakaa a Ou, doom ishima zee! Kam kwagh u shin henen sha mi didi.”—Ps. 119:16, 24, 47, 48, 77, 97.

Ishember i “doom ken ishima” la tese u shin henen sha Mkaanem ma Aôndo didi, sha iember. Asember ne tese ér yange doo orpasalmi kpishi u henen Mkaanem ma Aôndo. Kpa u ngu wer yange kende di a kende orpasalmi ken ishima tsô maa doo un u henen Mkaanem ma Aôndo ga. Yange sar un tsung u ‘henen sha atindi’ a Yehova didi sha er una fa mkaanem nam yô. Se fatyô u nenge er ieren i orngeren pasalmi ne i tese er yange sar un u fan Aôndo man ishima na vough nahan.

Ieren na ne tese gbar gbar ér Mkaanem ma Aôndo yange ma doo un ishima sha mimi. Nahan se fatyô u pinen ayol a ase ser: ‘Mo kpa Mkaanem ma Aôndo doom ishima sha mimi nahan kpa? Ka doon mo u ôron ivur Bibilo shi timen sha mi hanma iyange kpa? M eren msen  shi m henen Mkaanem ma Aôndo sha gbashima kpa?’ Aluer se na mlumun sha mbampin mban ser een yô, se mba “vesen ken kwaghfan u Aôndo.”

Ewa kaa ér: “Hanma shighe yô ka m nôngon mer me hemba henen kwagh sha inja. Hii shighe u yange m ngohol antakerada u ‘See the Good Land’ la je, hanma kwa u ka mea henen Bibilo yô m nôngo u yaren tom a mi. Shi ka m nôngo u keren akaa agen ken takerada u Insight on the Scriptures la kua ityakerada igen kpaa.”

Shi nenge ase kwagh u orgen u i yer un ér Wojciech vea kwase na Małgorzata, mba ve lu a ityom kpishi i nengen sha tsombor la. Kanyi ve er sha er vea fatyô u henen Bibilo hen tsomboro? Ve kaa ér: “Ka se ker ian i se hen Mkaanem ma Aôndo sha tseeneke wase yô. Nahan shighe u ka sea lamen ayol a ase shi sea tema kwaghhenen wase u hen tsombor yô, se ôron akaa a doon se a se zough a mi ken Bibilo yase i henen sha tseeneke la.” Er ve henen Bibilo sha tseeneke ve tsembelee yô, kwagh la na ve iember kpishi shi a wase ve u ‘vesen ken kwaghfan u Aôndo.’

Ver Ishima sha Kwagh u Ú lu Henen La

Se Mbakristu se na jighjigh ser sar Aôndo u “ior cii ve̱ war ve̱ ar sha mfe u fan mimi la.” (1 Tim. 2:3, 4) Kwagh ne tese ér ka a inja u se henen Bibilo kpoghuloo shi nôngon ser se ‘kav i kpaa.’ (Mat. 15:10) Man kwagh u una wase se u eren kwagh ne yô ka u veren ishima sha kwagh u se lu henen la. Man ka kwagh u ior i Berea mba sha ayange a tsuaa mbara er shighe u Paulu za pase ve loho u dedoo je la, a kaa ér: “Ve rumun kwaghôron la sha gbashima shi ve lu timen ken icighanruamabera ayange ayange sha u vea nenge shin akaa la aa lu nahan yô.”—Aer. 17:11.

Ú dondon ikyav i ior i Berea ne shighe u ú lu henen Bibilo la sha u henen i̱ sha gbashima shi den wer kwagh môm a dan ishima you ga kpa? Aluer Orkristu yange nana nengen ér Bibilo i henen ka tom u vesen je kpa, nana fatyô u dondon ikyav i ior i Berea la. Heela tseegh ga, ior mbagenev ka vea been iyol yô, ve kera gba fantyô u ôron takerada shi henen kwagh ga, kpa doo u Orkristu nana dondo ieren ne ga. Aluer or a beeyol shin nana lu iyev kpa nana fatyô u veren ishima shighe u nan lu henen Bibilo yô. Man er u lu ôron takerada la, ver ishima u zuan a kwagh u ú ôr ior mbagenev kpaa yô. U tesen ikyav yô, u fatyô u ôron nomou shin kwase wou gayô ma ijende you i ken Kristu kwagh u ú zough a mi u doon we shighe u ú lu henen Bibilo sha tseeneke wou la. Aluer u ngu eren nahan yô, u kôr kwagh shon u saa a mi ken ishima you shi una wase mbagenev kpaa.

Shighe u ú lu henen kwagh yô, dondo ikyav i Esera u civir Aôndo sha ashighe a tsuaa la. Yange “ver ishima na sha u timen sha atindi a TER.” (Esera 7:10) Ú er kwagh ne nena? Ú fatyô u keren ijiir i u hen kwagh her a kpe u iyol yô. U teman inya u henen kwagh yô, er msen Yehova a na u kwaghfan shi a wase u sha er u kav kwagh u ú lu henen la yô. (Yak. 1:5) Pine iyol you wer, ‘M wa ishima mer me hen nyi hen shighe u m tem u henen Bibilo nee?’ U nguren ôron Bibilo yô, ver ishima sha atôakaa a vesen la. Shi u fatyô u ngeren akaa a u soo u yaren tom a mi la shin eren ikyav hen avur a u soo u umbur la. Hen sha gbenda u ú fatyô u yaren tom a kwagh u ú hen la shighe u ú dugh kwaghpasen shin i gbe u ú tsua kwagh u ú er shin u lu taver mbananjighjigh a  we imôngo ishima yô. Shighe u ú hen kwagh u bee kera yô, hide time sha kwagh u ú hen la. Kwagh la una wase u u umbur kwagh u ú hen la.

Ewa pase er ka un er kwagh ne yô, ér: “Ka mea ôron Bibilo yô, m ôr avur agen a a gbe a zough sha avur a m lu ôron la kpaa, shi ka m nenge ken Watch Tower Publications Index shi m yar tom a tser u Watchtower Library on CD-ROM la. Shi ka m nger akaa shin inya sha er me yar tom a mi shighe u m dugh kwaghpasen yô.”

Ndera doon mbagenev u henen Bibilo sha gbashima hegen anyom imôngo, shi ka hembe saan ve iyol u fan kwagh u Aôndo kpaa. (Anz. 2:1-5) Nahan kpa, mba a ityom i eren kpishi shi ka taver ve u veren shighe jighilii u henen kwagh sha tseeneke ve. Aluer kape we kpa kwagh wou a lu la yô, u sôr shighe u henen kwagh u ver nena?

Me Zua a Shighe Hana?

Alaghga we kpa ka lun we ican u keren shighe u eren akaa a doon we ishima la ga. Ior kpishi nenge ér kwagh u una wase ve u veren ishima sha kwagh u ve lu henen la yô, ka u tsuan kwagh u vea fatyô u eren yô, er u ôron Bibilo jimin cii been nahan. Sha mimi yô, alaghga a lu inja er ka ican u ôron avur a a er kwagh u icombor i ior mba tsev la, man a a pase kwagh u tempel u tsuaa la vighe vighe la, shin a lu ican u ôron kwagh u akaaôron a profeti a taver, a a lu inja er a zua sha ayange ase ne ga la. Nahan kpa, nôngo u eren akaa a aa wase u u kuren awashima wou la yô. U tesen ikyav yô, cii man u ôr avur a Bibilo a a lu inja er a taver la yô, vande timen sha kwagh u yange na ve i nger a la man er avur shon aa fatyô u wasen we yô. U fatyô u eren kwagh ne sha u timen ken takerada u, “All Scripture Is Inspired of God and Beneficial” la, ngu ken ijô je kuma er 50 nahan.

Ka wea gbidyen kwar sha kwagh u ú lu ôron ken Bibilo la yô, i hemba maan we iyol. Aluer u er nahan yô, u nenge a ior mba i lu ôron kwagh ve la kua kwagh u a lu zan hemen la cii ken ishima you. Aluer u dondo akaawan ne yô, kwaghhenen wou una seer doon shi una lu u a inja kpaa. Nahan u hemba keren ian i teman henen kwagh cii. Shi a kera taver we u ôron Bibilo ayange ayange ga.

 Er akaawan ne aa wase se asange asange nahan kpa, tsombor u u ngee a akaaeren di ua er nena? Tema hen nen sha mbamtsera mba ne zua a mi aluer ne mba henen Bibilo hen tsombor imôngo la. Aluer ne tema ne lam imôngo yô, alaghga ne tsua u nderen tugh tugh hanma iyange ôron Bibilo shin veren iyange igen i ne eren nahan yô. Er ne lu lamen sha ikyaa ne la, adooga ne mase nengen ner hemba doon u ne de akaa agen sha er ne zua a shighe u henen Bibilo imôngo yô. U tesen ikyav yô, icombor igen ka ia yaan kwaghyan ia been nahan maa i time sha ivur Bibilo i sha iyange la gayô í ôr avur a Bibilo. Ka i tôô miniti 10 shin 15 sha u timen ken Ruamabera shin ôron avur a Bibilo a i gbe u a ôr ken hanma sati la, cii ve i kura ikyav mbi i ye kwaghyan a mi la kera shin i yem eren akaa agen ye. Sha hii la alaghga kwagh ne una wa taver tsombor u eren, kpa shighe a karen yô, a hoghol u shi a saan u iyol u eren nahan kpaa.

Wojciech vea Małgorzata mba se vande ôron kwagh ve ne ôr kwagh u yange wase tsombor ve yô, ve kaa ér: “Yange se vihi shighe kpishi sha akaa a ikyoo ga. Kpa se sôr shighe wase, nahan se de u vihin shighe kpishi sha u tindin ior a ilyoho i e-mails. Shi se pande shighe u se eren anumbe man iemberyolough la, nahan se ver shighe jighilii u se henen Bibilo kpoghuloo yô.” Mayange je tsombor ne vaa afanyô sha mser u ve ser akaa ken uma ve ne ga, man kape tsombor wou kpa ua vaa afanyô ga je la.

U Seer Zuan a Mfe u Vough la Ngu a Inja!

U henen Mkaanem ma Aôndo sha gbashima la ngu a ume “atam ken hanma tom u dedoo.” (Kol. 1:10) Aluer u ngu eren nahan yô, ior cii vea nengen a mzehemen wou. Nahan u lu or u nan vie ken jijingi, u nan kav mimi mba ken Bibilo tsema tsema yô. Shi akaa a u er la kpa u hemba tsuan a eren a sha inja shi u hemba wasen mbagenev tsembelee kpaa, shi u kera eren kwagh er mba ve fe Ruamabera i kom ve ga la ga. U hemban cii yô, u seer kporom hen Yehova . Aeren a na kpa aa hemba doon we ishima, man kwagh ne una due ken igbar shighe u u lu ôron mbagenev kwagh na la.—1 Tim. 4:15; Yak. 4:8.

Wea lu iyev shin wea lu organden shin wea fa kwagh nan nan kpa, nôngo sha afatyô wou cii ver shighe sha u henen Mkaanem ma Aôndo sha gbashima man a ishima i gbar gbar kpaa. Shi fa wer iniôngon you la ia hungur Yehova ga. (Heb. 6:10) Una na u iveren na mgbeghaa je.

[Box on page 13]

KA SEA ‘SEER LUN A MFE U VOUGH’ YÔ . . .

Se taver jighjigh u se ne Aôndo la shi se zenden zende u u kom Yehova yô.—Kol. 1:9, 10

Se zua a mfe, nahan se er kwagh sha kwaghfan sha u tsuan akaa a se soo u eren la sha inja.—Ps. 119:99

I doo se u wasen mbagenev u kporom hen Yehova.—Mat. 28:19, 20

[Pictures on page 14]

Alaghga a lu kwagh u ican u keren ijiir i henen Bibilo i kwagh u danen we a lu ga yô, kpa hemba doon u eren nahala

[Picture on page 15]

Icombor igen ka ia yaan kwaghyan ia been nahan maa i ôr Bibilo