“Sha Kpôô yô, Ka Icighanti i Aôndo i Hemban Je Ne”

Ka Nicholas u Cusa yange ôr mkaanem man zum u a lu nan kwaghôron ken inyom i 1430 la ye. * Nicholas lu or u veren ishima sha akaa kpishi. Ikyav i tesen yô, yange ver ishima u henen zwa Grika man zwa Heberu man kwaghfan u taregh man u henen kwaghaôndo man ayenge kua akaa a sha kwavaôndo kpaa. Zum u a lu anyom 22 la, hingir ikpuror u fan atindi a kwaghaôndo u Mbafada. Ken inyom i 1448 la, i tsua un ér a lu môm ken mbahemenev mba kwaghaôndo mba i yer ve ér cardinal la.

Nicholas u Cusa yange ver iyouci i nengen sha mbabeenyol ken Kues, anyom kar hegen nôngo u kuman er 550 nahan; mba yer iyouci shon hegen ér Bernkastel-Kues. Geri u Kues ngu ken vegher u imbusutariyan i gar u Bonn ken tar u Jamani; Kues gba ica a gar u Bonn kuma er umai 80 nahan. Ka hen ijiir ne i môm môm Cusa a koson ityakerada na man uihyurenruamabera nav mba ve hembe 310 la ye. Môm ken ve yô, ka ngeren u mbayiase u i yer ér Codex Cusanus 220, u i nger kwaghôron u Cusa yange na ken inyom i 1430 ker la. Ken kwaghôron u Nicholas u Cusa shon, u a lu a itinekwagh ér In principio erat verbum (Sha hiihii je Imo lu) la, a nger iti i Yehova ken zwa Latin ér Iehoua. * I nger kwagh u iti i Aôndo sha peeji u sha 56 la ér: “Ka Aôndo a ne iyol na iti la ye. Iti la ngi a asangaabaacaa anyiin. . . . sha kpôô yô, ka icighanti i Aôndo i hemban je ne.” Mkaanem ma Nicholas u Cusa man zua sha kwagh u i nger ken ngeren u hiihii u Ruamabera u Mbaheberu sha kwagh u iti i Aôndo la.—Eks. 6:3.

Ngeren u mbayiase u ken mhii u derianyom u sha 15 la ngu môm ken ungeren mbatsev mba i nger Asangaabaacaa Anyiin a ken Zwa Heberu la ér “Iehoua” yô. Ngeren ne kpa seer eren shiada ér mbangeren akaa kpishi yange ve hemban ngeren iti i Aôndo sha asember a a ze kwaghmôm a “Yehova” yô uderimbaanyomov imôngo.

[Footnotes]

[Picture on page 16]

Iyou i koson ityakerada i Cusa