Akaaôron A Yesu La A̱ Bende A Uma wou
Akaaôron A Yesu La A̱ Bende A Uma wou
“Un u Aôndo A tindi Un la, ngu ôron akaaôron a Aôndo.”—YOH. 3:34.
1, 2. Se kar akaaôron a Yesu a er ken Ityesen na i sha Uwo la sha nyi, man se fatyô u kaan ser ka “akaaôron a Aôndo” sha ci u nyi?
MÔM ken udaimomdi mba i hembe fan ve nyian yô, ka u i yer ér 530-carat Star of Africa la. Daimondi ne doo kpen kpen! Er Daimondi ne a doo nahan kpa, akaa a Yesu a er ken Ityesen na i sha Uwo la hemba doon cii. Kwagh ne a de kpiligh se iyol ga, sha ci u ka Yehova yange na Kristu akaaôron a injaa la ye. Bibilo ôr kwagh u Yesu ér: “Un u Aôndo A tindi Un la, ngu ôron akaaôron a Aôndo.”—Yoh. 3:34-36.
2 Alaghga Ityesen i Yesu i sha Uwo la yange ia kuma ihwa ga, nahan kpa, ityesen na la ter akaaôron 21 a ken ityakerada anigheni i ken Ruamabera u ken Zwa Heberu la. Ityesen i Yesu la ka “akaaôron a Aôndo” jighilii. Nahan se hen nen ase sha er se er tom sha akaaôron a injaa a Wan u Aôndo u môm môm yange ôr ken ityesen na i sha uwo la.
“Za Vande Himen a Anngôu”
3. Yesu yange ta mbahenen nav icin sha kwagh u ishimanyoon, been yô, wa ve kwagh ér nyi?
3 Saan se Mbakristu iyol, sha ci u se mba a jijingi u Aôndo, man vegher u ityamegh ki jijingi ne yô, ka msaanyol man bem. (Gal. 5:22, 23) Yesu yange soo ér mbahenen nav ve de te bem man msaanyol u ve lu a mi la kera ga, nahan a ta ve icin ér or u nan vihin ishima gbem yô, nana fatyô u wuan or. (Ôr Mateu 5:21, 22.) Yesu shi kaa ér: “Aluer wea va a iwua you u va nan sha atse a nanden nagh sha mi la, man wea umbur her er kwagh a zua anngôu a we yô, undu iwua you her hen kpe atseegh la, za vande himen a anngôu la, man ú hide, ú va na iwua you ye.”—Mat. 5:23, 24.
4, 5. (a) Ka “iwua” i nyi Yesu a ter ken Mateu 5:23, 24? (b) Er nan ve i doo u himen iyongo a anngô wase?
4 “Iwua” i Yesu yange ôr kwagh ter la ka nyityô kwagh i yange ior naan nagh a mi ken tempel ken Yerusalem cii. U tesen ikyav yô, iniav mbi nan sha uzendenya yange mbi lu kwagh u hange hange, sha ci u mbi lu gbenda môm u ior mba Yehova civir un yô. Nahan kpa, Yesu yange va ôr kwagh u a hembe lun a inja a iniav mbira yô, a kaa ér aluer iyongo zua se a anngô wase yô, se hime i vea nan cii ve se za na Aôndo iyua yase la ye.
5 Kwagh u Yesu a er ér ‘se hime a anngô wase’ la tese se nyi? A tese se ér, gbenda ú se eren kwagh a mbagenev la ngu benden a mlu wase vea Yehova. (1 Yoh. 4:20) Yange or nana za a nagh ku nan Aôndo ken tempel sha ashighe a tsuaa la, kpa nana̱ nzughul a ahuraior a nan yô, nagh ku nan la ku lu gbilin kwagh.—Ôr Mika 6:6-8.
Doo u Se Hiden a Iyol Yase Ijime
6, 7. Aluer se er ma anmgbian kwagh u vihin man se soo ser se ker bem vea nan yô, er nan ve i doo u se hide a iyol yase ijime?
6 Aluer se mba hiden a ayol a ase ijime ga yô, se fatyô u himen iyongo a anngô wase ga. Mba ve hidi a ayol a ve ijime yô, mba nyiman kwagh shin mba hendan kwagh a anmgbianev vev mba ken Kristu sha u keren ishô ga. Aluer se mba nyiman kwagh shi hendan kwagh ayol a ase yô, se vihi mlu wase vea mbagenev, di er tiônnongo u Kristu u ken Korinte u tsuaa la kpa imba mlu ne lu sha anshighe ugen la nahan. Apostoli Paulu yange ôr kwagh var var sha imba mlu ne, ér: “Kwagh hemba ne a hemba je er ne lu a ajir ayol a en yô. Kera guda u ne gba ngohol ibo sha apera tsô gaa? Kera guda u kwagh a̱ gba saan ne tsô gaa?”—1 Kor. 6:7.
7 Yesu yange kaa ér awashima wase u za kohol anngô wase u iyongo i zough se a nan la yô, ka u za nan nan ibo ser, se ker ishô ga. Kpa awashima wase yô, ka u za himen iyongo a nan. Aluer se soo ser se hime iyongo yô, se pase er ishima i lu se ker la sha mimi. Shi se fa ser anngô wase ugen la kpa, kwagh u a ze hemen hen atô wase la doo nan ga. Aluer se kav er ibo i lu i yase yô, se hide a iyol yase ijime, se zamber a anngô wase u se er nan kwagh u vihin la.
“Aluer Ishe You i ken Iyan Ia Na U Anzughul Yô”
8. Pase semakwagh u Yesu a er ken Mateu 5:29, 30 la.
8 Yesu yange wa se kwagh sha kwagh u aeren a wang ken Ityesen na i sha Uwo la. Yange fa ér iyol yase i i yen ne ngi a tahav mbu vihin se. Sha nahan yô, a kaa ér: “Aluer ishe you i ken iyan ia na u anzughul yô, dugh i, ta kera; gadia á lu u guda u ilyeghegh you i môm ki saa a u ma i gbihi iyol you jimin ken gehena la. Man shi aluer uwegh ough ku yanegh kua na u anzughul yô, tôndo ku, ta kera, gadia á lu u guda u ilyeghegh you i môm ki saa, a u iyol you jimin ma i nyer ken gehena la.”—Mat. 5:29, 30.
9. “Ishe” yase shin “uwegh” asegh ku a na se “anzughul” nena?
9 “Ishe” i Yesu a er kwagh u í la ka tahav mbu se lu a mi mbu veren ishima sha kwagh la, man “uwegh” kura di ka ave a se eren kwagh a mi la. Aluer se wa ikyo ga yô, alegh a yolough ne aa na se “anzughul” angahar nahan se de u “zenden vea Aôndo.” (Gen. 5:22; 6:9) Shighe u i mee se ér se hemba Yehova ato yô, doo u se er kwagh sha kpaver nahan se hemba imeen la, inja er se dugh ishe yase se ta kera shin se tôndo uwegh asegh se ta kera nahan.
10, 11. Kanyi ia wase se u palegh idyaa?
10 Se tsaha ashe ase, aa de u kenger akaa a hôngorough nena? Yobu u cian Aôndo la yange kaa ér: “M ya ikyur a ashe am; nahan á er nan man me kenger sha iniunkwasa?” (Yobu 31:1) Yobu yange lu a kwase shi kange ishima ér una per atindi a wang a Aôndo ga. Sea vôso kwase shin sea lu kwav kpa, se lu nen a ishima i Yobu kpa lu a mi la. Kwagh u una wase se u palegh idya yô, ka u se lumun ser icighan jijingi u Aôndo a̱ hemen se, gadia jijingi ne wasen mba Aôndo a doo ve ishima la u kôron iyol tsaha.—Gal. 5:22-25.
11 Sea soo ser se palegh idya yô, doo u se pine ayol a ase ser, ‘M lumun mer ashe am a kende isharen i ôron shin nengen akaa a ijimbagh a a lu ken ityakerada man sha televishen kua sha Intanet laa?’ Shi se umbur nen mkaanem ma orhenen Yakobu a er man. A kaa ér: “Hanma or ka i mee nan zum u asaren a nan iyol i nan ka a urugh nan a hôn nan la. Zum u isharen ka i jile iyol kera yô, i gema i mar isholibo. Isholibo di ia va vese yô i gema i dugh ku.” (Yak. 1:14, 15) Aluer or u nan tsegh iyol i nan sha ci u Aôndo nan zer “kenger” kwase shin nomsoor u a lu u nan ga, ér nana yav a nan yô, doo u nana sôr inja i nan, inja er nan dugh ishe i nan, nan ta kera shi nan tôndo uwegh ku nan, nan ta kera nahan.—Ôr Mateu 5:27, 28.
12. Ka kwaghwan u Paulu u nyi una wase se u nôngon a isharen i eren idyaa?
12 Aluer se er kwagh a ave ase sha inja ga yô, a a er akaa a vihin tsung, a a na se per atindi a wang a Yehova, nahan doo u se kange ishima, se za nen hemen u lun a aeren a wang. Nahan yô, se dondo nen kwaghwan u Paulu ne, a kaa ér: “Wua nen alegh a en a shin tar la kera, ka idya man hôngor man ityoronshima man isharen i bo man hua u eren, ka akombo a civir je la.” (Kol. 3:5) Ishember i “wua” la i tese kwagh u hange hange u i gbe u se er sha er se nôngo a isharen i eren idya yô.
13, 14. Ka hange hange u se palegh mbamhen man aeren a hôngorough sha ci u nyi?
13 Aluer se soo ser se kura uma wase yô, a gba u se tôndo alegh a yolough a ase, er ave man angahar nahan sha ikyav, se ta kera. Gba hange hange u se “ta” ishe yase man ave ase “kera” sha ikyav, se er kwagh ne sha u den u henen sha akaa a hôngorough man aeren a a vihi ikyaryan yase vea Yehova la. Sea soo ser, se war mtim u tsôron, u gehena a til sha ityough nagh la yô, gba u mhen wase man aeren a ase a a lu wang shi se lu wang ken jijingi kpaa.
14 Er se ye dyako i isholibo man mlu u lun vough ga yô, gba u se nôngo kwagh tsung ve se lu wang ye. Paulu nger ér: “M ngu gbidyen iyol yam m ngu veren i ken kpan je, sha u i̱ de lu u m ôr mbagenev kwaghaôndo kera man mo iyol yam yô, m̱ gema m̱ yina sha ikyaren ga.” (1 Kor. 9:27) Nahan se kange nen ishima se er nen sha kwaghwan u Yesu a we sha kwagh u aeren a wang la, sha er mayange je, se er kwagh u una laha nagh ku ipaa ku Yesu kura ga yô.—Mat. 20:28; Heb. 6:4-6.
‘Naan Nen’ Nagh
15, 16. (a) Yesu ver se ikyav i nan nagh nena? (b) Inja i mkaanem ma Yesu ma i nger ken Luka 6:38 la ér nyi?
15 Akaaôron a Yesu man ikyav na i dedoo i a ver se la i̱ wase se se hingir mba nan nagh. Mve u Yesu va shin tar sha ci u iwasen i se uumace mba se yen ne ka nagh ku vesen kpen kpen. (Ôr 2 Mbakorinte 8:9.) Yesu yange undu icivir i lu a mi sha la a ishima na, hingir orumace va shin tar va na uma na sha ci u se uumace mbaasorabo, kwagh ne bugh mbagenev gbenda u za yan dyako i Tartor u sha la vea na imôngo. (Rom. 8:16, 17) Sha nahan yô, Yesu iyol na taver se ishima ér se naan nagh wuee, a kaa ér:
16 “Na nen, nahan ne kpaa á na ne; ikyaren i dedoo, i kindigh, i yegher, i ivin poo, á na i sha ikyum yen, gadia ikyaren i ne karen a mi ne, ka i á va kar ne sha min ye.” (Luka 6:38) Ishember i “ikyum” la umbur se kwagh u mbateen kasua mbagenev yange ve er shighe u or yam kwagh a ve yô, yange ve kura akaa a nan yam la ve ombo nan shin ikyum. Nahan se kpa aluer se mba nan nagh wuee yô, a doo mbagenev u ve kpa nan se kwagh shighe u se lu ken ican yô.—Orpa. 11:2.
17. Yehova ver se ikyav i vesen i nyi, man ka nagh ku nyi ku a fatyô u van se a iembere?
17 Kwagh u ior mba ve ne nagh mgbegha la doo Yehova ishima, shi veren ve doo doo kpaa. Yehova iyol na ver se ikyav i vesen i nan nagh, a na Wan na u môm môm la “sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yoh. 3:16) Paulu nger ér: “Or u tangen iyol lôôn cuku yô, ka di cuku je nana sunda ye, kpa or u nan lee wuee yô, nana sunda di wuee je. Hanma or nana̱ na er nan we ken ishima i nan la nahan, i̱ de lu zunguruu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.” (2 Kor. 9:6, 7) Aluer se mba yaren tom a shighe wase man tahav asev man inyaregh yasegh u suen mcivir u wang yô, a saan se iyol shi se zua a injar kpee je.—Ôr Anzaakaa 19:17; Luka 16:9.
“De Tôngon Korough sha Hemen Wou” Ga
18. Ka akaa a nyi nahan se er ve Ter wase u sha la una ‘na se injar’ ga?
18 “Ver nen ishima sha perapera wen la, de eren nen un sha ishigh ki iorough i̱ lu sha ci u ve̱ nenge ga; á lu nahan yô, ne kera mba a injar hen Ter wen u A lu Sha la ga.” (Mat. 6:1) “Perapera” u Yesu a er kwagh sha mi heen ne ka aeren a a lu sha ishima i Aôndo yô. U ngu wer Yesu yange ôr kwagh u perapera yô, tese ér or nana de civir Aôndo ken igbar ga ze, gadia un iyol na kaa a mbahenen nav ér “iwanger [ve] i̱ wanger sha ishigh ki iorough.” (Mat. 5:14-16) Kpa aluer se mba eren kwagh ser ior “ve nenge” i doo ve, er mba eren anumbe nahan yô, Aôndo una ‘na se injar’ ga. Aluer ka awashima wase la yô, mayange je se ya ikyar i dedoo vea Aôndo ga, shi se ember averen a Tartor na ua va a mi la kpaa ga.
19, 20. (a) Yesu yange kaa ér se de “tôngon korough” shighe u se lu eren “iyua i mhôôn” la ga, nahan lu ôron ér nyi jimi? (b) Se de ser uwegh asegh ku imesegh ku fa kwagh u ku yanegh ku lu eren ga nena?
19 Aluer se mba eren kwagh sha gbenda u vough yô, se er sha kwaghwan u Yesu ne, a kaa ér: “Nahan shighe u wea eren [iwua i sha mhôôn, NW ] yô, de tôngon korough sha hemen wou, er mbaatsereghev ve eren ken ushinagoge kua sha igbenda sha u vea zua a icivir hen ior la nahan ga. Mimi je, M kaan ne ne, ve ngohol injar ve kera ve.” (Mat. 6:2) Yange i eren “iyua i sha mhôôn” sha u wasen mbaatsanev. (Ôr Yesaia 58:6, 7.) Yesu man mbahenen nav kpa yange ve wasen mbaatsanev. (Yoh. 12:5-8; 13:29) Yange i tôngon ikyor shighe u a̱ wasen mbaatsanev la ga, nahan a shi nan kpa, shighe u Yesu kaa ér “de tôngon korough” sha hemen wou shighe u u lu eren “iyua i sha mhôôn” ga la, lu ôron kwagh sha injakwagh. Doo u se yôô iyua yase er Mbafarishi mba Mbayuda eren nahan la ga. Yesu yange kaa a ve ér mba mbaimangerev, sha ci u mba yôôn uiyua vev mba ve “eren ken ushinagoge kua sha igbenda” la. Mbaimangerev mbara yange ve “ngohol injar ve kera.” Iwuese i ior wuese ve man mkônom ma hiihii ma ve teman sha mi ken shinagoge vea mbatesen la lu cii injar ve je la, gadia Yehova yô, lu u una na ve kwagh môm ga. (Mat. 23:6) Kpa mbahenen mba Yesu yô, yange gba u vea er nena? Yesu kaa a ve kua se cii, ér:
20 “Kpa shighe u wea eren iwua yô, de rumun uwegh ough ku imesegh ku̱ fan kwagh u ku yanegh ku eren la ga; sha er iwua you i̱ lu ken myer yô, man Teru u A nengen ken myer la, Una na u injar you.” (Mat. 6:3, 4) Ave ase nga eren tom ken mzough. Nahan u se den ser uwegh asegh ku imesegh ku fa kwagh u ku yanegh ku lu eren ga la inja na yô, se de yôôn iyua i se lu eren ser se wase mbagenev la ga, shin sea er i u wasen mba ve lu ikyooso ikyooso vea vese, er uwegh ku imesegh a uwegh ku iyan nahan kpa, se de yôôn ga.
21. Injar i un u a “nengen ken myer” una na se la i wa nyi man nyi kere?
21 Aluer se mba tan ihyagh sha “iyua yase i sha mhôôn,” i se lu eren ser se wase mbagenev la ga yô, or môm tsô nana fa kwagh sha mi ga. Nahan Ter wase u “A nengen ken myer la, Una na [se] injar.” Er Ter wase u sha la a lu sha, shi i lu kwagh u mayange je uumace vea nenge a na ga yô, se kaa ser ngu ken “myer” hen vese. (Yoh. 1:18) Injar i Yehova u a “nengen ken myer la” una na se yô, una wase se se ya ikyar i dedoo vea na, shi una de se asorabo a ase shi una na se uma u tsôron kpaa. (Anz. 3:32; Yoh. 17:3; Ef. 1:7) Injar ne i hemba iwuese i uumace vea wuese se la ica je.
Akaaôron a Injaa a Yesu la a̱ Doo Se Ishima Tsung
22, 23. Doo u se ver ishima sha akaaôron a Yesu sha ci u nyi?
22 Ityesen i Yesu i sha Uwo la ngi a akaa a injaa a ken jijingi kpishi, a a er kwagh sha akaa kposo kposo yô. Ngi a akaa a injaa a a na se msaanyol ken tar u u mgbough a mbamzeyol ker ne. Nahan aluer se lumun ser, akaaôron a injaa a Yesu ne a kôôm aeren a ase man gbenda u se eren kwagh la yô, se zua a msaanyol kpee je.
23 Yesu una ver hanma or u nan “ongo” akaaôron a na shi nan “eren” sha mi la cii doo doo. (Ôr Mateu 7:24, 25.) Nahan se kange nen ishima, se er nen sha akaawan a Yesu ne. Se mase timen sha akaaôron a ken Ityesen i Yesu i sha Uwo la ken kwaghngeren u masetyô ne.
U Na Mlumun Wer Nyi?
• Doo u se hime iyongo a anmgbian wase u ken Kristu sha ci u nyi?
• Se lumun ser ‘ishe yase i ken iyan’ la i na se gbev ga sha ci u nyi?
• Doo u se eren iyua nena?
[Mbampin Mba Ngeren u Henen]
[Foto u sha peeji 11]
Doo u se ‘hime iyongo’ a anmgbian wase u ken Kristu!
[Foto u sha peeji 13]
Yehova veren ior mba ve ne nagh wuee la doo doo