Mkaanem ma Yehova Ma Uma Je U Ôron Takerada u Mpase Asav-asav—Vegher u sha Uhar

KANYI i lu keghen mba ve civir Yehova Aôndo man mba ve civir un ga mbara ken hemenee? Mlu u Satan man azôv a na ken hemen una kure nena? Ka averen a nyi uumace mba ungwan imo i Aôndo vea zua a mi shighe u Hemen u Kristu u Anyom Dubu laa? I na mbamlumun sha mbampin mban kua mbagenev kpaa ken Mpase 13:1–22:21. * Mtom man ôr kwagh u mbampase mba sha mnenge mba masetyô mba utaankarunyiin mba ken mbampase mba pue kar ataratar mba i na apostoli Yohane shighe u derianyom u hiihii zurum u kuusu la.

Yohane nger ér: “Saan or u ôron akaaôron a profeti ne iyol kua mba ve ongo ve we ikyo sha akaa a i nger keregh la kpaa.” (Mpa. 1:3; 22:7) Aluer se mba ôron takerada u Mpase shi eren sha akaa a se er la yô, aa bende a ishima yase shi aa taver jighjigh u se ne Aôndo man Wan na, Yesu Kristu la shi ishimaverenkeghen yase kpa ia hemba taver cii. *—Heb. 4:12.

I HAA AGBANDE A ATAANKARAHAR A IYUGH I AÔNDO LA SHIN TAR

(Mpa. 13:1–16:21)

Mpase 11:18 kaa ér: “Akuraior yuwe kpa iyugh [i Aôndo] gema va man shi shighe u . . . á tim mba ve lu vihin tar la kpaa.” Mpase u sha mnenge u sha anigheni ôr kwagh u “inyam . . . [i lun] a akor pue man ityouv itiankarihiar,” u tesen er i hii ve i gbe u iyugh i Aôndo ia va yô.—Mpa. 13:1.

Ken mpase u sha mnenge u sha utaankarunyiin la, Yohane nenge a “Waniyôngo tile sha uwo u Shion. Ior lu a Na imôngo ve kuma dubu deri man akunduahar kar unyiin.” I paa ve ken ior. (Mpa. 14:1, 4) Mbatyomov maa yôô akaayôôn. Ken mpase u sha mnenge u a dondo la, Yohane nenge a ‘mbatyomov utaankaruhar lu a atsan ataankarahar.’ Ikyav tese ér ka Yehova iyol na a tindi mbatyomov mbara ér ve za haa “agbande a ataankarahar a iyugh i Aôndo” la sha avegher kposo kposo aa tar u Satan ne ye. Agbande ne nga a ajiraôron man acin a tan sha kwagh u ijir i Aôndo una va ôr la. (Mpa. 15:1; 16:1) Mbampase mba sha mnenge mba uhar mban ôr kwagh u ajiraôron a Tartor, a a gbe a zough sha kwaghtseren u sha utar man mtenge u tôngon korough ku sha utaankaruhar la.—Mpa. 11:14, 15.

Mbamlumun sha Mbampin mba sha Akaa a ken Ruamabera:

13:8—Kanyi i lu “ruamabera u uma u Waniyôngo”? Ruamabera ne ka u sha injakwagh; ka mba vea tema tor vea Yesu Kristu ken Tartor na u sha la tseegh i nger ati a ve ken ruamabera ne ye. Mbakristu mba i shigh ve mkurem mba ve shi shin tar, mba ve lu a ishimaverenkeghen i yemen sha la kpa i nger ati a ve ken ruamabera ne.

13:11-13—Inyam i i lu a akor ahar la er kwagh inja er darakon nahan shi i er usu due Sha sen shin tar nena? Er inyam i i lu a akor ahar la, ka Tahav mbu Tar cii mbu Amerika vea Ingila je la, i lu ôron kwagh er darakon nahan yô, tese ér tahav mbun mbu anger ior shi mbu kighir ve ér ve lumun hemen u mbu. I er usu due Sha sen shin tar sha ci u i senge ér ngi profeti, gadia i senge ér i hemba aferakaa ken ityav  mbi tar cii mbi ihiar mbi yange i nôngo ken derianyom u sha ikyundu la, shi i hemba gomoti u ityemimôngo kpaa.

16:17—“Ahumbe” a i hee gbande u sha utaankaruhar sha mi la kanyi? “Ahumbe” la tile sha ityough ki mhen u Satan, “jijingi [shin isharen i] lu eren tom ken ônov mba ihyembeato” la. Hanma or u nan lu vegher u botar u Satan ne yô, nan ôôn ahumbe a bo ne.—Ef. 2:2.

Ityesen hen Avese:

13:1-4, 18. “Inyam” la tile sha ityough ki ugomoti mba uumace, man i due “shin zegemnger,” inja na yô, inyam la due shin zegemnger u kpianger u uumace. (Yes. 17:12, 13; Dan. 7:2-8, 17) Inyam i Satan a ver shi a ne i tahav ne ngi a namba 666, man namba ne tese ér inyam ne i yina kpishi je. Er se fe kwagh u inyam ne yô, kwagh ne wase se u palegh i, shi kpiligh se iyol a i je u se civir i, er uumace kpishi ve lu eren nahan ga.—Yoh. 12:31; 15:19.

13:16, 17. Er alaghga se tagher a mbamtaver ken akaa a se eren ayange ayange, er u ‘yamen kwagh shin teen kwagh’ nahan kpa, mayange se de nen ser inyam la i kôôm uma wase ga. Aluer se ngohol ‘ikyav i inyam la sha uwegh asegh shin sha icul’ yô, ka inyam la ia kôôm mbamhen asev man aeren a ase ayange ayange ye.

14:6, 7. Loho u mbatyomov ve lu yôôn la tese ér, gba u se yôô loho u dedoo u Tartor u Aôndo a ver la torough torough. Doo u se wase mba se henen Bibilo a ve la ve cian Aôndo sha mimi shi ve naan Yehova icivir kpaa.

14:14-20. Shighe u “sunda u shin tar,” ka sunda u mba vea war mtim je la, ua bee yô, shighe a kuma u ortyom una haa “wain u shin tar” u a sondo la “shin zegeihungwa u shoghor wain u iyugh i Aôndo” la. Hen shighe la a tim wain la, ka gomoti u ifer u Satan a ver ér a hemen uumace je la, kua “asume” na a ifer la cii kera vindi vindi gbem sha won. Mayange se de nen ser wain u shin tar la a hôngor se sha ma gbenda môm ga.

16:13-16. ‘Ujijingi mba hwangerev mba utar’ mbara tile sha ityough ki mbaaie mba azôv a lu samber a mi, sha er utor mba tar ne vea gema ishima sha mhee u i lu haan agbande ataankarahar aa iyugh i Aôndo shin tar la ga, kpa vea za hemen u hendan kwagh a Yehova yô.—Mat. 24:42, 44.

16:21. Shighe u mkur u tar ne una mase shin cuku la, alaghga ajiraôron a Yehova sha botar u Satan ne aa kua mkaanem ma ajiraôron a Aôndo ma ma lu inja er ka mngerem ma gban akpor nahan la. Nahan kpa, uumace kpishi vea za hemen u tuhwan Aôndo heregh.

TOR U A HEMBE LA NGU HEMEN

(Mpa. 17:1–22:21)

“Zegebabilon” u a lu tartor u kwaghaôndo u aiegh sha tar cii la ka vegher u ndôhôrshima u botar u Satan ne. Mpase u sha mnenge u sha pue kar môm la ôr kwagh na ér ka “zegeidyakwase” u a ‘tem sha inyam i nyian bong’ yô. “Akor pue” a inyam shon i a tem sha i la aa tim un vindi vindi. (Mpa. 17:1, 3, 5, 16) I kar zegeidyakwase la sha “zegegar,” nahan i yôô mgbe na, shi i ta ior mba Aôndo icin torough torough ér ve ‘due ken a na kera.’ Ior kpishi vaa mtim u zegegar la. Nahan kpa, iember gema ngi Sha, sha ci u “ivaa i zuan i Waniyôngo” la. (Mpa. 18:4, 9, 10, 15-19; 19:7) Ken mpase u sha mnenge u sha pue kar utar la, or u a hende “nyinya u pupuu” la ngu nôngon ityav a akuraior. A tim botar u Satan ne.—Mpa. 19:11-16.

Man gema “tseyô” u a lu Diabolo man Satan la yô, kwagh na una kure nena? Ka hanma shighe a “kende un ken ber u usu”? Ka kwagh môm ken akaa a i er ken mpase u sha mnenge u sha pue kar unyiin la je la. (Mpa. 20:2, 10) Mbampase mba sha mnenge mba uhar mba masetyô mbara pase er uma una lu ken atô u hemen u anyom dubu la yô. Er “mpase” u i na Yohane la zulum u been yô, a nenge a ‘ifi u mngerem ma umam, lu kuan senen hen atô u gbenda u ken gar la,’ shi i lu lôhôn mba “imura i ker” ve yô.—Mpa. 1:1; 22:1, 2, 17.

 Mbamlumun sha Mbampin mba sha Akaa a ken Ruamabera:

17:16; 18:9, 10—Hii nan ve ‘utor mba tar ne’ ve zungu sha ci u nongo u ve ayol a ve ve tim u kera laa? Ijungwen ve la ka i wan ayol a ve ikyo tseegh. A timin Zegebabilon kera cii yô, utor mba tar ne vea mase kaven er yange lu ve a iwasen kpishi yô. Yange senge ér un ngu kwaghaôndo u mimi, nahan lu inja er aeren a ve a sha mkighir la ka a vough nahan. Zegebabilon shi yange wase sha u tesen agumaior u nôngon ityav kpaa. Shi ve wase sha u nan ior ungwan tindi kpaa.

19:12—Ma orgen nan fa iti i Yesu ga, saa Un tseegh sha nyi gbenda? Ka inja er iti ne tile sha ityough ki aan a tom, er a i ter ken Yesaia 9:6, a Yesu a lu sha mi sha shighe u iyange i Ter ne nahan. Ma orgen nan fa iti la ga, saa Un tseegh, sha ci u ka Yesu tseegh a lu sha aan a tom la shi a fe inja i u lun sha aan a tom la ye. Nahan kpa, Yesu na mba ve lu nongo u kwase na u he la ian i lun sha aan a tom la, sha nahan yô, ngu ‘ngeren iti na i he la sha a ve.’—Mpa. 3:12.

19:14—Ka unô vea kohol Yesu sha u nôngon ityav mbi Armagedon mbilaa? ‘Akumautya a Sha’ aa dondo Yesu sha u nôngon ityav mbi Aôndo la, a lu mbatyomov kua mba i shigh ve mkurem mba ve hembe, ve yem sha la.—Mat. 25:31, 32; Mpa. 2:26, 27.

20:11-15—Ka unô i nger ati a ve ken “ruamabera [shin “takerada”] u uma”? Ruamabera ne ka u i nger ati a mba vea zua a uma u tsôron la cii ker yô, ka Mbakristu mba i shigh ve mkurem mbara man mba ve lu ken zegeikpelaior mbara kua mbajighjigh mba civir Aôndo mba a va nder ve ken “mnder u mbaperapera” la cii. (Aer. 24:15; Mpa. 2:10; 7:9) Aluer mba a va nder ve ken “mnder u mbaperapera” mbara er sha “akaa a i nger ken uruamabera” mba a bugh ken atô u anyom dubu la yô, a nger ati a ve ken “ruamabera u uma.” Nahan kpa, a fatyô u koghun ati a ve ken ruamabera la kera. A nger ati a mba i shigh ve mkurem mbara ken ruamabera u uma la gbem sha won shighe u vea tile sha mimi zan zan vea kar kpen la. (Mpa. 3:5) Mba vea lu uma gbem sha won shin tar mbara di, a nger ati a ve ken ruamabera u uma la gbem sha won shighe u vea ya ikyaren i masetyô ken mbee u anyom dubu la.—Mpa. 20:7, 8.

Ityesen hen Avese:

17:3, 5, 7, 16. “Kwaghfan u a dugh sha la” wase se se fa inja i “kwaghmyer u kwase ne man shi inyam [i nyian bong] i a hende” la. (Yak. 3:17) Yange inyam i sha injakwagh ne due shighe u i ver Mzough u Ityar Sha Won Cii la, kpa i va nder un ken masejime, hingir Mzough u Ityar Cii. Er se fe kwaghmyer ne nahan, mfe ne a mgbegha se se pase nen loho u dedoo u Tartor u Aôndo man iyange i ijirigh i Yehova sha gbashima.

21:1-6. Se fatyô u lun a vangertiôr ser, averen a Tartor a i tsengeôron kwagh u a la cii aa kure shami vough. Sha ci u nyi? Sha ci u i ôr kwagh u uityendezwa mban ér: “I kure ve!”

22:1, 17. “Ifi u mngerem ma umam” la tile sha ityough ki akaa a Yehova a ser a ver sha u karen aa ku man isholibo i uumace mba ungwan imo i Aôndo la kera la. Nyian kpa a fatyô u zuan a mngerem man. Se vengese nen mlehe u i lu lôhôn se ér se va “ngohol mngerem ma umam gbilin” ne, shi se lôhô nen mbagenev kpa sha gbashima!

[Ngeren u shin kpe]

[Foto u sha peeji 5]

Uumace mba ungwan imo i Aôndo vea zua a averen sha ikyev i hemen u Tartor la