Ú Umbur Kpa?

U ôr Iyoukura mba i sember gberen la nahan ve doo u kpa? Nenge ase aluer u fatyô u nan mlumun sha mbampin mban yô:

• Doo u se za hemen u tilen sha mimi wase u Mbakristu la sha ci u nyi?

Ka sea tile sha mimi yô, kwagh ne a wase se se ta ikyaa a hemen u Yehova sha ci u á doo se ishima shi se tese ser Satan ka or u aiegh. Shi ka sha mtil sha mimi wase Aôndo una ôr se ijir ye, nahan yô mtil sha mimi ngu hange hange sha ci u ishimaverenkeghen yase.​​—⁠12/⁠15, peeji 4-6.

• Ka atiatom a Yesu a nyi a tese tom u á er sha u kuren awashima u Aôndo?

Atiatom shon yô, ka Wan u môm môm. Imo. Un u A Lu Amen la. Orhimen u ikyuryan i he. Pristi u Tamen. Kua vor u ityendezwa la.​—⁠12/⁠15, peeji 15.

• Se seer iember i se zough a mi ken tom u pasen kwagh la nena?

Se er kwagh ne sha u sôron asema a ase sha er se hemba veren ishima sha igbenda i se wase mbagenev la. Shi se pasen kwagh ser se hii Bibilo i henen a ior. Aluer ior mba soon u ungwan loho wase ga yô, se gema gbenda u se pasen kwagh la, se lamen a ior mba hen haregh wase sha akaa a aa doo ve u ungwan yô.​—⁠1/⁠15, peeji 8-​10.

• Doo u ityesen i Bibilo ia bende a aeren a Mbakristu sha kwagh u ikyu iin nena?

Orkristu nana fatyô u vaan ku u or u nan, nahan kpa nan fa er mbakpenev fe ma kwagh ga yô. Mbananjighjighga ka vea lam sha nan dang kpa, mayange je nan lumun u nyôron iyol ken aeren a a gbe a zough sha jighjigh u mbagenev ve ne ér mbakpenev vea fatyô u eren mbaumav kwagh la. Mbakristu mbagenev ka ve nger akaa a ve soo ér i er hen ku ve la shin inya sha u yangen ayôôso.​—⁠2/⁠15, peeji 22-​24.

• “Ruamabera u Yashar” man “Ruamabera u Ityav mbi TER” la ka ityakerada i ken Bibilo i i saa yôô? (Yos. 10:13; Num. 21:⁠14)

Ei. Ka inja er ityakerada ne ka ityakerada i yange i lu sha ashighe a i ngeren Bibilo la nahan, man yange i nger i sha iwasen i icighan jijingi u Aôndo ga. Mbangeren Bibilo mbagenev ter akaa a i er ken ityakerada ne la.​—⁠3/⁠15, peeji 32.