Mbampin mba Mbaôron Takerada Ne Ve Pin La

Aluer wan kpe kwase ken uya nahan, a fatyô u veren ishima ér a va nder wan shon shin kuu?

Alaghga a taver mba i lu je wan u ken uya nan lu a vande kpen ve ga la u kaven er ka i lu mba wan a kpe ve ken uya mbara ken ishima yô. Mbamaren mbagenev ka ve zungwe imba ku la kpishi. Ngô ugen yange mar mbayev kpenegh je kuma utaan. Shighe kar yô, a mar mbayev mba nomso uhar mba ve lu gbong gbong yô. Nahan kpa, ku u hanma wan ken ônov nav mbara cii hungur un ga. Ken ayange a uma na cii, kwase ne lu fan anyom a luun er ônov mba ve saa mbara vea lu uma ve ma ve lu yô. Mbakristu mba wan a kpe ve sha imba gbenda ne mbara vea fatyô u veren ishima ér a va nder anikyundanev mbara shin kuu?

Se fa mlumun sha mpin ne jighilii ga. Bibilo ôr kwagh u va nderen anikyundanev mba i mar ve kpenegh shin i dugh iyav vev mbara jighilii ga. Kpa Mkaanem ma Aôndo ma a akaawan a a gbe a zough sha mpin ne, a aa fatyô u surun se ishima yô.

De se time sha mbampin uhar mba ve zough sha ngun yô. Hiihii yô, sha mnenge u Yehova yô, ka hanma shighe nahan uma u or ka a hii, ka shighe u i mar nan la shin ka shighe u i we iyav mbu nan laa? Kwagh u sha uhar yô, Yehova nengen wan u ken uya nena, nengen nan ér nan ngu or jim jim shin nengen nan ér nan ngu di ijenawambe ken iyav mbu ngô u nan tsôô? Akaawan a ken Bibilo na mbamlumun sha mbampin mban cii.

Tindi u Mose tese wang ér, uma hiin shighe u i mar anikyundan la ga, kpa ka shighe u nan hii a hii u jilen ken iyav mbu ngô u nan la je. Tindi la tese kwagh ne nena? Tindi la kaa ér aluer or wua wan u ken uya yô, nan di kpa i wua nan. Tindi la kaa ér: “I̱ kimbi uma sha uma.” * (Eks. 21:​22, 23) Nahan yô, wan u ken uya, u i lu a mar nan ga la nan ngu uma, nan ngu orumace jim jim. Er Mbakristu umiliôn imôngo ve fe mimi sha kweagh u uma u wan u ken uya wang yô, mba dughun iyav ga, sha ci u ve fa er u eren nahan la i lu isholibo i vesen je or lu eren Aôndo yô.

Er uma u wan u ken uya la a hii a hii nahan kpa, Yehova nenge uma shon nena? Tindi u se vande ôron kwagh teren la kaa ér aluer or wua uma u wan u ken uya yô, or shon kpa i wua nan. Nahan yô, uma u wan u ken uya gba Aôndo kwagh kpen kpen. Heela tseegh ga, avur a Bibilo agen kpa tese ér Yehova nengen uma u wan u ken uya ér ka or kpôô kpôô. U tesen ikyav yô, jijingi u Yehova yange mgbegha Tor Davidi, nahan a kaa ér: “Ka We U maghem ken iyav mbu ngôm ye. . . . Ashe a Ou nenge ijenawambe yam, man i nger a ken ruamabera Wou cii, ka ayange a i vande veren mo a je la.”​​—⁠Ps. 139:​13-16; Yobu 31:​14, 15.

Yehova shi ngu a nenge a aeren a wan u ken uya nan lu a mi, a va lun or u injaa ken hemen la kpaa. Shighe u Rebeka, kwase u Isaka lu iyav mbu va mar ahina la, Yehova ôr kwaghôron u profeti sha kwagh u mbayev mba nomso mba uhar mba ve lu nôngon ngô ve ken uya la, nahan kwagh ne tese ér Yehova nenge aeren a ve a aa va bende a ior kpishi ken hemen yô.​​—⁠Gen. 25:​22, 23; Rom. 9:​10-13.

Kwagh u Yohane u eren Batisema kpa ka kwagh u i doo u se time shami yô. Ngeren u Ivangeli kaa ér: “Er Elisabetu ungwa ishughun i Maria nahan yô, wan tsuwe un ken uya; tsô Elisabetu iv a Icighan Jijingi.” (Luka 1:41) Ortwer Luka yar tom a ishember i ken zwa Grika i inja i i̱ a fatyô u lun wan u ken uya shin anikyundan u i sember maren nan yô. Ka ishember shon i môm shi yange yar tom a mi zum u lu ôron kwagh u Yesu, shighe u lu anikyundan i gbir un shin anar u haan ilev kwaghyan la ye.​​—⁠Luka 2:​12, 16; 18:⁠15.

Er se nenge sha akav ne cii nahan, se nenge  ser Bibilo tese mkposo u a lu hen atô u wan u ken uya man anikyundan u i sember maren yôô? I̱ tese se ga. Man kwagh ne zua sha kwaghfan u sangen yeke u ainge ne kpaa. U tesen ikyav yô, mbatimen sha akaa kaa ér, anikyundan ka nan kav akaa a a lu zan hemen ken won u iyav mbu ngô u nan la shi nan er kwagh shami kpaa. Nahan yô, kera taver se er i hii ve ngô ka nan lu kôôsôô vea wan u nan u ken uya la nahan ga.

Ashighe a mbayev ve tse ken uya cii ve i maren ve la nga kwagh môm ga. Nenge ase ikyav ne: Ngô ugen mar wan na kôugh, ayange nga kar kpuaa yô maa a kpe. Ngô ugen di wan na via cii ve mase maren un ye, kpa wan shon dugh gbe ken inya maa kpe. Ngô u hiihii la una fatyô u lun a ishimaverenkeghen i va nengen a wan na ken mnder u shin ku sha ci u yange un mar wan kôugh yum, kpa ngô u sha uhar la yô una fatyô u veren ishima u va nengen a wan na gaa?

Kohol cii yô, Bibilo tese wang ér uma hiin shighe u kwase nan jir iyol la je, man Yehova ngu a nenge a wan u ken uya la, shi uma u nan gba un kwagh kpishi kpaa. Er akav a mimi a ken Bibilo ne a tese nahan yô, alaghga mbagenev vea kôr ave sha mi vea nyiman ér ishimaverenkeghen i mnder u shin ku ngi sha ci u mbayev mba i mar ve kpenegh la ga, sha ci u vea hen ér Bibilo nyiman iyol i i̱. Alaghga je yô, vea hen ér kwagh ne nyiman mtil wase sha kwagh u iyav mbu dughun mbu Bibilo i vende la.

Iyoukura yange i vande pinen mbampin mba injaav mba lu inja er ma ishimaverenkeghen ngi sha kwagh u mnder u mbayev mba i mar ve kpenegh la ga nahan. U tesen ikyav yô, Aôndo una va wa ijenawambe i i jir tsembelee ga yô ken sagh u kwase ken Paradiso? Mbahemenev mba Shin Tine seer henen Bibilo shi ve gbidye kwar sha kwagh u ve hen la tsema tsema shi ve er msen kpoghuloo, nahan ve mase kuren ér, u henen sha ambaakaa la una wase ishimaverenkeghen i mnder u shin ku la ga. Yesu kaa ér: “Aôndo yô, akaa cii a fatyô.” (Mar. 10:27) Kwagh u Yesu iyol na la kpa tese mimi u kwagh ne; yange i gema uma u Yesu u sha la i va wa un ken iyav mbu iniunkwase igen, man kwagh ne lu kwagh u orumace môm kpa nana fatyô u eren ga yô.

Nahan yô, akaa ne cii tese wang ér, Bibilo tese ér mbayev mba ve kpe cii i mase maren ve mbara vea va nder shin kuu? Se mba kimbir kaan ser, Bibilo na mlumun sha mpin la jighilii ga, nahan or môm nan ngu a ityôkyaa i sendegh sha ikyaa ne ga. Alaghga ior vea lu a mbampin kpishi mba pinen sha ikyaa ne. Nahan kpa, hemba doon u keren a ker ahaba ga. Kwagh u se fe yô ka un ne: Ikyaa ne ngi sha ikyev i Yehova Aôndo, un u a mgbogh a erdoo man mhôônom ma zungwen la. (Ps. 86:15) Sar un kpishi u sôron akaa a ku u vihi la je ka u tunan ga. (Yobu 14:​14, 15) Se fatyô u lun a vangertiôr ser, eren kwagh u vough hanma shighe cii. Una kar a mbamnyoon mba uma u ken botar ne a ve se a mi la cii kera, gadia a na Wan na ian sha dooshima ér a ‘vihi aeren a diabolo kera.’​​—⁠1 Yoh. 3:⁠8.

[Ngeren u shin kpe]

[Foto u sha peeji 13]

Yehova una kar a mbamnyoon mba se tagher a mi mbara cii kera