Saan Yehova Iyol Er Ú Lu Civir Un Sha Mimi yô
Saan Yehova Iyol Er Ú Lu Civir Un Sha Mimi yô
“Wan wam, lu orfankwagh, na i saan mo iyol, sha er me gema me kaa imo a or u a laham yô.”—ANZ. 27:11.
1, 2. (a) Ka ahon a nyi takerada u Yobu u kaa ér Satan yange gbaa? (b) Kanyi i tese ér shighe u Yobu kpe kera la kpa, Satan lu lahan Yehova here?
YEHOVA yange na Satan ian ér a kar mtil sha mimi u Yobu, u lu ortom u mimi u Aôndo la. Kwagh ne na yô, Satan tim Yobu ilev shi wua un ônov shi ta un angev kpaa. Kpa Satan yange wa shima u karen mtil sha mimi u Yobu tseegh ga, yange lu a ior mbagenev kpa ken ishima. Satan yange kaa ér: “Kwavyolough sha kwavyolough; mimi je, hanma kwagh u or nan lu a mi cii, nana na sha ci u uma u nan.” Ikyaren i Satan ne va a zayol u a bende a Yobu kua mbagenev kpaa yô. Yobu kera ngu uma hegen ga, kpa ikyaren la ngi zan hemen her.—Yobu 2:4.
2 Satan yange er Yobu atsan anyom nga kar er 600 nahan yô, jijingi u Aôndo mgbegha Solomon nger ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.” (Anz. 27:11) Kwagh ne tese wang ér, sha shighe u Solomon nger mkaanem man la kpa Satan lu lahan Yehova her. Shi shighe u Aôndo ver Tartor na sha ken inyom i 1914 ve, i daa Satan i gbihi un shin tar la kpa, apostoli Yohane nenge ken mpase u sha mnenge, Satan lu senden mbatomov mba Aôndo ityough. Ken ayange a mkur u botar ne kpa Satan ngu a de u karen mtil sha mimi u mbatomov mba Aôndo ga!—Mpa. 12:10.
3. Ka akaa a injaa a nyi se fatyô u henen ken takerada u Yobu?
3 Hen ase sha akaa a injaa atar a se zough a mi ken takerada u Yobu la. Kwagh u hiihii yô, takerada u Yobu pase se or u nan ker uumace ihyom man or u nan lu hendan a mbacivir Aôndo yô. Orihyom shon yô, ka Satan Diabolo. Kwagh u sha uhar yô, sea tagher a atsan nan nan kpa, aluer se seer sôsom a Aôndo yô, kwagh ne una wase se se za hemen u civir Aôndo sha mimi. Kwagh u sha utar yô, shighe u ican i tser se man i lu karen jighjigh u nan wase yô, Aôndo una wase se se hemba imeen la er yange wase Yobu nahan. Yehova ne se iwasen nyian sha ikyev i Mkaanem nam man nongo na kua icighan jijingi na.
Fa Or u Nan Lu Orihyom Jim Jim La
4. Ka an a war a nan ér nan ngu vihin tar nee?
4 Ior kpishi na jighjigh ér Satan ngu ga. Man alaghga ishima ia za ve iyol kpishi sha er tar u lu vihin nahan, kpa ve gema ve fa er i lu Satan Diabolo a lu vihin tar ne ga. Nahan kpa, mbamzeyol mbagenev kpishi mba uumace ve tagher a mi ne ka ve ayol a ve, ve ve a mi ye. Adam man Ifa, mbamaren asev mba hiihii mbara yange ve venda ér Orgban ve a de hemen ve ga. Hii shighe la zan zan nyian ior mba kera eren kwagh sha kwaghfan ga. Ka Diabolo a lu vihin tar ne ye, gadia lu un bume Ifa hemba Aôndo ato ye. Shi ka un a hemen tar u uumace mba ve yen ne shi a lu vihin u ye. Er Satan a lu “aôndo u tar u ainge” ne yô, ior i tar ne bee un inja eleghee: mba a ieren i imangeregh shi ve soo num man iyuhe man huwa kua icugh man ihyembeato kpaa. (2 Kor. 4:4; 1 Tim. 2:14; 3:6; ôr Yakobu 3:14, 15.) Aeren ne va a ayôôso a patii shi a na ukwaghaôndo nôngo num ayol a ve shi a va a ihyom man anyighe kua ayôôso kpaa. Akaa ne na yô, uumace mba yan ican tsung.
5. Se soo ser se er nyi a mfe u injaa u se lu a mi laa?
5 Ka mfe u injaa u nyi se mbacivir Yehova se lu a mini! Man se fa or u a war a nan ér ka nan nan lu vihin tar ne yô. Nahan se nenge ser, gba hange hange u se er tom u pasen kwagh ne kpoghuloo, se wase ior ve fa orihyom u nan lu vihin tar ne ga he? Shi doo se kpishi u tan ikyaa a Yehova Aôndo u mimi sha u pasen ior mbagenev ser ve fa er Yehova una tim Satan shi una kar a atsan a uumace ve lu yan ne kera ga zee?
6, 7. (a) Ka an nan lu tuur ior ken ijime ér ve tôv mbacivir Aôndo mba mimi a icana? (b) Se dondo Elihu u sha ashighe a tsuaa la nena?
6 Satan na ior kpishi mba yan ican shi ngu tuur ior ken ijime ér ve tôv ior mba Aôndo a ican. A kange ishima wener una kar ior mba Aôndo. Yesu Kristu yange kaa a apostoli Peteru ér: “Shimon! Shimon! Nenge, Satan norom sha u una yegher ne er uwua nahan.” (Luke 22:31) Nyian kpa, hanma or u nan dondo Yesu cii nana tagher a atsan atô kposo kposo. Peteru yange kar Diabolo sha ‘begha u tan kume u a keren or u una ya yô.’ Paulu kpa yange kaa wener: “Mba i sar ve pe zenden sha mciviraôndo ken Kristu Yesu cii, á tôv ve a ican.”—1 Pet. 5:8; 2 Tim. 3:12.
7 Shighe u kwagh a tser ma anmgbian yô, se tese ser se fa ser Satan ka orihyom wase nena? Mayange je, se palegh nan hen shighe u kwagh a tser nan la ga, kpa se er a nan doo doo er Elihu yange lam a ikyar na Yobu kundu kundu nahan. Doo u se kohol anmgbian wase u ken Kristu la, se hendan a orihyom wase Satan. (Anz. 3:27; 1 Tes. 5:25) Nyityô kwagh i i tser ma anmgbian wase cii, awashima wase i lu u wasen nan ser nana tile dông nana na i saan Yehova iyol.
8. Satan yange nôngo ér Yobu a de u civir Yehova kpa kan shio sha ci u nyi?
8 Satan yange hii timin ilev mbi Yobu. Ilev mbin lu Yobu a iwasen kpishi, alaghga je yô, lu kwagh u zuan a inyaregh sha mi je la. Yobu yange a na Aôndo nagh sha ilev mbin kpaa. Yobu yange una wanger ônov nav una been yô “a mough pepe, a na iniav mbi nanden sha iyenge ve cii; gadia Yobu a hen er: Alaghga ônov av er kwaghbo, ve venda Aôndo ken asema a ve. Kape Yobu eren gbem la.” (Yobu 1:4, 5) Yobu yange naan Yehova nagh sha ilev nav hanma shighe. Kpa Yobu hiin u tagher a tôvacan yô, kera faantyô u nan Yehova iniav sha ilev nav ga. Yobu kera lu a “inyaregh” ki una civir Yehova a mi ga. (Anz. 3:9) Kpa gema civir Yehova sha zwa na!
Ya Ikyar Kôôsôô Vea Yehova
9. Ka kwagh u doon u hemban cii u nyi se lu a mini?
9 Sea lu a kwagh ave shin sea lu ken ican shin sea lu gumor shin organden shin sea lu gbong gbong shin sea lu uange kpa, se fatyô u yan ikyar kôôsôô vea Yehova. Nyityô ican i se tagher a mi cii kpa, aluer se ya ikyar kôôsôô vea Aôndo yô, kwagh ne una wase se se civir un sha mimi nahan se na a saan Yehova iyol. Ior mba ve fe mimi i kom ve ga je kpa, ve taver ishima shighe u ve tagher a ican yô, nahan kwagh ne wase ve ve tile sha mimi.
10, 11. (a) Anmgbian u kwase ugen yange er nena shighe u i lu tôvon un a ican laa? (b) Anmgbian u kwase ne yange na Satan mlumun u kuman sha ieren na nena?
10 Hen ase sha kwagh u anmgbian u kwase ugen u i yer un ér Valentina Garnovskaya la. Ngu môm ken Mbashiada mba Yehova mba ken tar u Russia. Yange i tôv un man mbagenev a ican kpishi, kpa tile sha mimi vough er orjighjigh Yobu nahan. Anmgbian ugen yange pase un kwagh ken inyom i 1945, shighe u lu anyom ikyundu la. Anmgbian ne yange hide va hen Bibilo a anmgbian u kwase ne kuma kwa har nahan, kpa hii hen shighe la je anmgbian u kwase ne kera nenge a anmgbian la ga. Nahan kpa, Valentina hii u pasen ahuraior a na kwagh. Sha nahan yô, i kôr un i yem a na ken afo a mbakwarev, a tsa ker anyom anigheni. Yange mba dughun un ken afo a mbakwarev ken inyom i 1953 kera yô, a ngôôr ga je maa a hii u pasen kwagh. Shi i kôr un i wuhe, kwa ne yô, i wuhe un anyom pue. Yange tsa ken afo a mbakwarev anyom nga kar imôngo yô, i dugh un i yem a na hen afo agen. Anmgbianev mbakasev mbagenev lu a Bibilo hen afo a i yem a na her la. Iyange igen yô, anmgbian u kwase ugen tese Valentina Bibilo. Nahan doo un je gande! Gadia Bibilo i Valentina mase nengen a mi yô, lu Bibilo i anmgbian u yange pase un kwagh ken inyom i 1945 la!
11 Yange i dugh Valentina ken afo a mbakwarev ken inyom i 1967 la, nahan mase tseghan iyol na sha ci u Yehova sha u eren batisema. Yange er tom u pasen kwagh ne kpoghuloo zan zan inyom i 1969. Mba ker ken inyom ne yô, shi i kôr un, kwa ne yô, i kaa a na ér una tsa ken purusu anyom atar. Nahan kpa, Valentina de u pasen kwagh ga. Cii man mase kpen ken inyom i 2001 yô, wase iorov 44 ve fa mimi. Kohol cii yô, Valentina tsa ken purusu man ken afo a mbakwarev anyom 21. Yange wa iyol kegh a kegh u nan hanma kwagh u lu a mi cii, kua ian na kpaa sha u tilen sha mimi. Shighe u zulum u una kpe la, a kaa ér: “Ken uma wam cii, m lu a ijiir i môm i tsan ga. Ikyav yav cii yange m wa ken ikpa, nahan kpa m civir Yehova saan saan shi kwagh banem ga.” Valentina yange na Satan mlumun u kuman. Gadia Satan senge ér orumace u nana lu ken ican ve nana civir Aôndo sha mimi je kpa nan ngu ga. (Yobu 1:9-11) Se na jighjigh ser Valentina yange er kwagh u doon Yehova, sha nahan yô, sar Yehova tsung u va nderen un kua mbagenev mba ve kpe sha ci u jighjigh u nan ve la shin ku.—Yobu 14:15.
12. Dooshima wasen ikyar i se ye vea Yehova la nena?
12 Se ya ikyar i dedoo vea Yehova sha ci u a doo se ishima. Aeren a Yehova doo se ishima, nahan ka se nôngo sha afatyô wase cii ser se er ishima na. Yehova doo se ishima a ishima i môm man a mkighir shio, ka er Diabolo yange ôr nahan ga. Dooshima ne wasen se u civir Aôndo sha mimi shighe u se tagher a imeen yô. Sha nahan yô, Yehova “sôron gbenda u mba i doo Un a ve la.”—Anz. 2:8; Ps. 97:10.
13. Yehova nengen akaa a se eren sha ci na la nena?
13 Alaghga se mbagenev se mba civir Yehova er se soo ser ma se civir un la ga, nahan kpa dooshima ka a wase se se tsegha iti i Yehova, shin er se civir un er se soo la ga nahan kpaa. Sea civir Yehova er se soo la ga kpa, a fa ishima yase, nahan er se ijir ga. Kwagh u a hembe lun kwagh u vesen yô, ka kwagh u se eren la tseegh ga, kpa ka ityôkyaa i i ne ve se eren kwagh shon la. Yobu yange zungwe kpishi shi wa ishima a atsan tsung, nahan kpa a kaa a mba ve lu nahan un tar la ér kwagh u Yehova doo un ishima kpishi. (Ôr Yobu 10:12; 28:28.) Ityough ki masetyô ki takerada u Yobu la pase ér ishima yange i vihi Aôndo a Elifasa man Bildadi man Sofar tsung, gadia ve ôr kwagh u mimi ga. Nahan kpa, Yehova gema yila Yobu kwa nyiin ér “wanakiriki Wam” sha u tesen ér un lumun un. Shi Yehova yange kaa a Yobu ér a̱ de mbaaferev mbara asorabo a ve. (Yobu 42:7-9) Se kpa se dondo nen ieren i Yobu la sha er Yehova una lumun se yô.
Yehova Wasen Mbatomov Nav Mbajighjigh
14. Yehova yange wase Yobu u kôôm mhen na nena?
14 Yobu yange lu or u vough ga, kpa za hemen u civir Aôndo sha mimi. Shighe u Yobu lu yan ican tsung yô a hen kwagh bagenaa. U tesen ikyav yô, yange kaa a Yehova ér: “M ngu vaan a We, kpa U bughum zwa ga, . . . ka sha agee a uwegh Ough U tevem a ican ye.” (Yobu 30:20, 21) Kwagh ugen yô, kwagh yange hemba gban Yobu u keren ishô, ka nahan man kaa a Aôndo ér: “Er U fe er m lu a ibo ga nahan kpaa” ye, shi yange kaa ér ‘kwagh u aperagh ngu sha ave am ga man msen wam kpaa ngu wang.’ (Yobu 10:7; 16:17; 30:20, 21) Nahan cii kpa, Yehova wase Yobu. Yange pine Yobu mbampin kpishi mba ve wase un kera ver ishima sha iyol na ga, kpa ve wase un u seer fan er Aôndo a hembe tswen, or môm u hendan a na kpa nan lu ga yô. Yobu yange ngohol kwaghwan la nahan kôôm mhen na.—Ôr Yobu 40:8; 42:2, 6.
15, 16. Yehova wasen mbacivir un nyian nena?
15 Shi Yehova we mbacivir un kwagh sha dooshima shi hemen ve sha inja kpaa, man mbacivir un mba zough a iwasen sha hemen na. Heela tseegh ga, se mba zough a mbamtsera mba dedoo kpaa. U tesen ikyav yô, Yesu Kristu na nagh sha uma na sha ci wase, nahan kwagh ne bugh gbenda u den se asorabo. Er se yen nahan kpa, nagh ku Yesu kula wase se u yan ikyar kôôsôô vea Aôndo. (Yak. 4:8; 1 Yoh. 2:1) Shi ka sea tagher a ameen yô, se sôn Aôndo ser a sue se shi a sur se ishima sha icighan jijingi na. Kwagh ugen yô, se mba a Bibilo jimin cii, nahan aluer se mba ôron i̱ shi gbidyen kwar sha mkaanem ma ma lu ker la yô, ma a wa se ago a hendan a ameen a karen jighjigh wase u nan. Kwaghhenen wasen se u seer fan kwagh u or u nan kom u hemen sha won cii la man er i gbe u se civir Aôndo sha mimi yô.
16 Heela tseegh ga, se mba zough a iwasen ken nongo u Yehova, u u lu tar sha won cii, u a ne u kwaghyan u ken jijingi sha ikyev i “wanakiriki u jighjigh man u fan kwagh” la kpaa. (Mat. 24:45-47) Mbamkombo mba i eren ken atôônanongo a Mbashiada mba Yehova a kuman er 100,000 nahan la mba tesen se shi mba taver se asema sha er se fatyô u hendan a akaa a karen jighjigh u nan wase yô. Kwagh u gumkwase ugen ken tar u Jamani, u i yer un ér Sheila la tese er mbamkombo ve lu a inja yô.
17. Kwagh u yange er Sheila la tese ér doo u zan mbamkombo mba Mbakristu hanma shighe nena?
17 Sha shighe ugen la tica lu u tesen klase u Sheila ga. Nahan mbayev mba ken klase na gba kpehen ishor. Sheila maa due ken klase la kera fese, kwagh u Sheila va ungwa ér za hemen sha kwagh u ishor i kpehen la doo un kpishi er yange un er kwagh sha kwaghfan, un due ken klase la kera fele nahan. Shighe u i lu kpehen ishor la, mbayev makeranta mbagenev gba yevese duen ken klase kera ér azôv nyôr ken klase shon. Lu nyi i̱ na ve Sheila due ken klase kera fele? Sheila kaa wener, “Cii man mbayev makeranta mbara ve hii u kpehen ishor yô, m vande ungwan i ôr ken Iyou i Tartor ér ishor i kpehen i doo ga. Ka nahan man yange m fa kwagh u me er ye. Nahan yange m soo mer me na i saan Yehova iyol, vough er i er ken Anzaakaa 27:11 nahan.” Nenge er Sheila yange lu ken mkombo, kegh ato tsembelee ve kwagh u ungwa la wase un sha wono!
18. U kange ishima wer u er nyi?
18 Se cii, se kange nen ishima se seer dondon nen akaawan a se zough a mi sha ikyev i nongo u Aôndo la. Se zaan nen mbamkombo hanma shighe, shi se ôron nen Bibilo kua ityakerada i pasen akaa a ken Bibilo kpa hanma shighe, shi se eren nen msen hanma shighe, shi se civir nen Aôndo imôngo a anmgbianev mba ve tse ken mimi la kpaa. Aluer se mba eren nahan yô, Yehova una hemen se shi una sue se kpaa. Yehova soo ér se za hemen u civir un sha mimi, shi a fa dedoo ér se za hemen u eren nahan. Se mba a ian i vesen kpishi i wuese iti i Yehova shi civir un sha mimi shi eren kwagh u saan un iyol kpaa.
Baver We Kpa?
• Ka akaa a nyi nahan Satan a karen se sha mini?
• Ka kwagh u hemban cii u nyi se lu a mini?
• Se mba ye ikyar a Yehova sha ci u nyi?
• Yehova wasen se nyian sha nyi igbenda?
[Mbampin Mba Ngeren u Henen]
[Foto u sha peeji 8]
Ú nenge wer ka hange hange u ú ôr mbagenev akaa a injaa a u fe laa?
[Foto u sha peeji 9]
Se wase mba se civir Aôndo a ve imôngo la ser ve civir Aôndo sha mimi
[Foto u sha peeji 10]
Valentina yange er hanma kwagh u fatyô cii ér una civir Aôndo sha mimi