Dondo Ieren i Mimi i Itai la
Dondo Ieren i Mimi i Itai la
“MBA ve hemba inyam la man shi eev mbu i” la yange ve wa icam igen sha, man icam ne hemba ôron kwagh u mimi u Aôndo la. Ve wa icam la ve kaa ér: “We Ter, Aôndo, Uhembanagee, ityom You i vese, i kpiligh iyol kpaa. Igbenda You ka jighjigh man shi mimi kpaa, We, Tor u akuraior cii. We, Tere, ka an je nana cia U ga, man shi ka an nana civir iti You kpaa ga? Gadia ka We tseegh U lu wang ye.” (Mpa. 15:2-4) Yehova soo ér mbacivir un ve kav un sha u lun a ieren ne.—Ef. 4:24.
Kpa Satan Diabolo yô ngu nôngon sha afatyô na cii ér una pav ior mba Aôndo mba shin tar mbara a dooshima u Aôndo u ve civir la. Nahan kpa mbacivir Aôndo kpishi mba civir un sha mimi her, shin er ve lu yan ican kpishi nahan kpaa. Doo se kpishi er mbacivir Yehova mban ve doo un ishima tsung nahan. I taver se ishima ér: “Kwagh u mimi doon TER ishima, man shi te mba i doo Un a ve la kera ga.” (Ps. 37:28) Nahan a na i nger kwagh u ior mba mimi kpishi ken Mkaanem nam sha er una wase se se tile sha mimi yô. Môm ken ior mba mimi mban yô, ka Itai Orgati.
Itai lu ‘Shiror, u Undu Tar Na’ Yô
A shi nan kpa Itai due ken Gati, gar u Mbafiliti u za iti yum la. Man Gati gema lu ijiir i ikyôror Goliati, u lu orihyom u vesen u Mbaiserael la. Ka shighe u Abesalom lu hendan kwagh a Tor Davidi la i hii teren Itai u fa ityav yum la ken Bibilo ye. Itai vea Mbafiliti mbagenev 600 yange ve yem shir ken Yerusalem.
Mlu u Itai man mbadondon nav mbara yange umbur Davidi shighe u un man mbautyaav mba Iserael iorov 600 yange ve yem shir ken tar u Mbafiliti ve za nyôr hen haregh u Akishi, tor u Gati la. (1 Sam. 27:2, 3) Shighe u Abesalom lu hendan kwagh a Davidi la, Itai vea ior nav di vea gema a er nena? Vea ta ikyaa a Abesalom shin vea wa ave sha ihyembeato la ga shin vea ta ikyaa a Davidi man ior nava?
Nenge ase er Davidi yange lu yevese ér una due ken Yerusalem kera ve, va nyôr hen iyou i i mase shin kpe la yô. Alaghga lu iyou i ken Yerusalem i i lu vegher u yemen sha Uwo u Olev, a karen i maa i per Ifi u Kederon la. (2 Sam. 15:17) Er mbautyaav mba Davidi lu karen la, Davidi lu nengen ve vough vough. Kpa yange lu Mbaiserael mba jighjigh tseegh lu dondon un ijime ga, Mbakereti man Mbapeleti kpa lu a ve imôngo. Heela tseegh ga, Mbagati, ka Itai kua mbautyaav 600 je la, lu a ve imôngo.—2 Sam. 15:18.
Mhôônom yange ma kôr Davidi a Itai tsung, nahan a kaa a na ér: “Ka nyi we kpaa u ze a vese imôngoo? Hide za lu a tor [adooga lu Abesalom lu ôron kwagh na ye]; gadia u ngu shiror, u undu tar wou, hide hen ijiir you. Gadia ka nyen tsô u va ye, nahan nyian maa me er u u̱ hingir u zenden a vese imôngo wue wue, er mo kpaa m fe henpe m ze ga nee? Yô, we, cin hide, hide a anmgbianev ou kpaa; mhôônom ma zungwen [ma Yehova] kua mimi ve̱ lu a we.”—2 Sam. 15:19, 20.
Itai di gema pase er un til sha mimi yô. A kaa ér: “Er TER a lu u uma ne, man er terem tor kpaa a lu uma, mimi je, henpe terem tor una lu la, shin a lu ku shin a lu uma, ka heregh wanakiriki wou kpaa una lu ye.” (2 Sam. 15:21) Alaghga mlumun ne umbur Davidi mkaanem ma ngô u ngô na u tamen, Rutu kpa yange ôr la. (Rutu 1:16, 17) Mlumun u Itai la yange kôr Davidi ken ishima, nahan a kaa a na ér: “Yô, kar sha hemen” za per ifi u Kederon. Tsô “Itai Orgati la kar sha hemen a ior nav cii, kua mbayev mba kiriki mba ve lu a na imôngo cii.”—2 Sam. 15:22, NW.
“Sha ci u Ityesen Yase”
I kaa ken Mbaromanu 15:4 ér: “Akaa a i vande ngeren la cii ka sha ci u ityesen yase lu i nger a ye.” Nahan doo u se pine ayol a ase ser: Kanyi i doo u me hen ken ikyav i Itai yange ver nee? Nenge ase kwagh u alaghga yange na ve Itai tile sha mimi hen Davidi yô. Er Itai lu shiror shi undu tar na nahan kpa, yange na jighjigh ér Yehova ka Aôndo u uma, shi Davidi kpa ka u Yehova a shigh un mkurem yô. Itai yange nyagh Davidi sha ci u ihyom i vande lun hen atô u Mbaiserael man Mbafiliti la ga. Itai yange nenge ér Davidi gban kan di an-or u a woo kurutya u Mbafiliti, Goliati kua mbagenev ken tar na tsô ga. (1 Sam. 18:6, 7) Itai yange nenge ér Davidi ka or u Yehova a doo un ishima yô, shi yange aeren a dedoo a Davidi lu a mi la kpa doo un je ka u tunan ga. Kwagh ne na yô, Davidi na Itai icivir kpishi. Je yô, shighe u Davidi lu masen nôngon a mbautyaav mba Abesalom la, a wa Itai vegher u mbautyaav nav jimin sha ikyev.—2 Sam. 18:2.
Doo u se kpa se hemban nengen a aeren a dedoo a mbagenev, kpa se saa sha mlu ve u sha kwavyolough man ijiir i ve dugh her shin ikyur i ve dugh her la ga, inja na yô, doo u se dugh hanma ihyom i se lu a mi ken ishima sha mbagenev la cii kera. Mye u Davidi ya ikyar kangenaa vea Itai la tese ér, aluer se va fa Yehova shi a doo se ishima yô, kwagh la una wase se se hemba aeren a bo la cii.
Er se lu henen sha ikyav i Itai la, doo u se pine ayol a ase ser: ‘M ngu suen Kristu Yesu, u a lu Davidi u Vesen la sha mimi er Itai nahan kpa? M ngu tesen mtil sha mimi wam sha u eren tom u pasen kwagh u Tartor shi geman ior hingir mbahenen la sha gbashima kpa?’ (Mat. 24:14; 28:19, 20) ‘M we ishima a ican sha u tesen mtil sha mimi wam kpa?’
Aluer mbayaav kpa hen sha ikyav i mtil sha mimi i Itai la yô, vea zua a iwasen kpishi. Mtil sha mimi u Itai hen Davidi man mtsough u tsua ér una za a tor u Aôndo a shigh un mkurem la ityô la yange bende a ior nav mbara. Kape akaa a mbayaav ve tsough u eren sha u suen mcivir u mimi la kpa nga a bende a tsombor ve je la, man alaghga vea tagher a mbamtaver ashighe agen je kpaa. Nahan kpa, i taver se ishima ér: “Or u mimi yô, [Yehova una] tese nan mimi [Na] je.”—Ps. 18:25.
Ruamabera kera ôr se kwagh u Itai shighe u Davidi nôngo ityav a Abesalom bee kera la ga. Nahan kpa, kwagh u i er se sha kwagh u Itai tiônôô ne wase se se fa imbaor u Itai lu yô, hemban je yô shighe u Davidi lu ken ashighe a taver la. M-er u i er kwagh u Itai ken Bibilo la tese ér, Yehova fa mba ve til sha mimi mbara cii shi ne ve injar kpaa.—Heb. 6:10.