“Shighe u Huan Ving”

MBAYIASE mba sha Ityoughkitaregh ôr injakwagh igen ér: “Iliam ka azurfa, u huan ving gema ka zenaria.” Sha kwagh u takerada u i yer ér Brewer’s Dictionary of Phrase and Fable la u er yô, injakwagh i ken Zwa Heberu i i zough sha ingin yô kaa ér: “Aluer kuma u a na shekel môm sha iliam yô, kuma u a na usheke uhar sha u huan ving.” Shi Tor u fan kwagh Solomon, u hemen Mbaiserael mba ngise la kpa nger ér: “Hanma kwagh ngu a ayange na; man shighe kpaa ngu sha ci u hanma kwagh sha won . . . shighe u huan ving, man shighe u lamen.”​—⁠Orpa. 3:​1, 7.

Kpa, gema ka hanma shighe nahan i hembe doon u huan ving-ni? Í ter ishember i “ving” la man i̱ “huan ving” la ken Bibilo kwa kimbir kimbir. Gbenda u i yar tom a asember a ahar ne la due a atôakyaa a tesen ér doo u uumace vea huan ving sha igbenda itiar. De se nenge nen er u huan ving la i lu ikyav i tesen icivir, man i tesen kwaghfan kua mkav, shi i wasen se u henen sha kwagh yô.

Ikyav i Tesen Icivir

U huan ving la ka ikyav i tesen icivir shin nan or icivir. Profeti Habaku ngise kaa ér: “TER ngu ken icighantempel Na; yô, tar cii u̱ huan ving sha ishigh Nagh.” (Hab. 2:20) Gba u mbacivir Aôndo sha mimi vea “kegh myom u TER ving.” (Ukwe. 3:26) Orpasalmi wa icam ér: “Tema gir gir sha ishigh ki TER, ver ashe sha a Na sha ishima i wan; ishima i̱ de vihin we sha ci u or u nan zough a mkpeyol sha gbenda u nan, u nan eren atseregh la, ga.”​—⁠Ps. 37:⁠7.

Se fatyô u wuese Yehova a iliam shio kpa? Hide hen er shighe ugen ka wea nenge a akaa a Aôndo a gbe a doo ashe yum la ve i taver we u ôron kwagh sha mi yô. Kwagh u ka se henen ken ishima zum u se nenge a kwagh u doon ashe la ka gbenda ugen u wuese Yehova. Orpasalmi Davidi yange hii icam na igen ér: “Aôndo, We U kuma u á wuese We ken Shion [a ayôôso shio]; ka We, man á kure iceghzwa a We kpee ye.”​—⁠Ps. 65:⁠1.

Er Yehova a kom u se na un icivir nahan, kape mkaanem nav kpa ma kom icivir je la.  Ikyav i tesen yô, shighe u Mose, profeti u Aôndo lu nan Mbaiserael kwaghôron na u masetyô la, un kua upristi ve wa mba yange ve lu her mbara kwagh ve kaa ér: “Huan ving . . . , ungwa imo i TER, Aôndo wou.” Yange gba u mbayev mba kiriki kpa vea kegh ato ving zum u i lu ôron ônov mba Iserael cii Tindi u Aôndo yô. Nahan Mose kaa a ve ér, “Kohol ior, nomso man kasev man mbayev mba kiriki . . . ve̱ hen.”​—⁠Dut. 27:​9, 10; 31:​11, 12.

Sha shighe wase ne kpa, gba u mbacivir Yehova vea keghen ato sha icivir sha u ngohol kwaghwan ken mbamkombo mba Mbakristu, kua ken mbamkohol mba vesen kpaa! Aluer mba nan kwaghôron u pasen mimi mba ken Bibilo sha tsembe u nan kwaghôron la, man se gema se mba lamen a mbagenev yô, kera tese ér se mba lahan Mkaanem ma Aôndo kua nongoior na ga zee? Shighe u i lu nan akaaôron zan a mi ave la ka shighe u huan ving keghen ato.

U keghen ato a or zulee hen shighe u ne lu lamen ne uhar la kpa ka ikyav i tesen icivir. U tesen ikyav yô, tertamen Yobu yange kaa a ior mba ve lu nan un ibo la wener: “Tesem nen, tsô mo me huan.” Yobu yange kegh ato ving shighe u ve lu lamen la. Nahan ka gbe u un kpa una lam yô, a kaa a ve ér: “Huan nen ayôôso . . . mo me ôr kwagh.”​—⁠Yobu 6:24; 13:⁠13.

Ikyav i Tesen Kwaghfan kua Mkav

Bibilo kaa ér: “[Or] u nan kusu zwa u nan yô, nan er sha kwaghfan,” man “Or u fan kwagh yô, ka nan lu ving.” (Anz. 10:19; 11:12) Nenge ase er Yesu yange tese kwaghfan kua mkav sha u lun ving yô. Er Yesu kav ér mkaanem nam ma a ume atam a injaa hen atô u mbaihyomov nav ga yô, “Yesu huan ving.” (Mat. 26:63) Shighe u i va ôr un ijir sha ishigh ki Pilatu la kpa, “Yesu bugh zwa sha ma kwagh ga.” Yange de sha kwaghfan ér akaa a un er ior ve fe la a mase pasen kwagh na iyol i a.​—⁠Mat. 27:​11-14.

Se kpa aluer se kusu zwa wase yô, se lu mbafankwagh, hemban je yô shighe u or hii se iyongo yô. Bibilo kaa ér, “Or u nan yugh fefa ga yô, nan ngu a mkav u vesen, kpa or u nyoon ishima gagher yô, ka nan kende a ibumegh sha.” (Anz. 14:29) Aluer or lam a we dang man u na nan mlumun gagh yô, alaghga u ôr kwagh u ú va hide u vaa a vaa afanyô yô. Ashighe a taver er a ngara nahan mkaanem asem ma a lu ma ibumegh, shi ma a va se a ijungwen ken ishima.

Ikyav i tesen ér se mba a kwaghfan yô, ka u kuran zwa wase shighe u se lu hen atô u mbaaferev la. Shighe u se dugh kwaghpasen man se tagher a mbanahantar yô, ka a inja u ungwan ve ato. Heela tseegh ga, shighe u mba se ze makeranta a ve imôngo shin mba se eren tom imôngo ve lu eren asenge a doon ga shin ve lu tuhwan ityuhwanev yô, hemba doon u se lu ving sha er se tese ser, se lumun a iliam ve la ga yô. (Ef. 5:⁠3) Orpasalmi nger ér, “me kôron zwa wam tsaha shighe u iferor a lum sha ishi yô.”​—⁠Ps. 39:⁠1.

 Or u “fan kwagh yô,” ka nan lu ving. (Anz. 11:12) Orkristu u mimi nan lamen kpishi yum er nana pase akaa a ken myer ga. Nahan doo u Mbatamen vea hemba veren ishima sha gbaa ne sha er Mbakristu mba hen tiônnongo ve la vea lu a vangertiôr u pasen ve mbamzeyol vev yô.

Er ikyenge i dugh shighe u or huan ving la ga nahan kpa, u or huan ving la ngu a inja kpishi. Orgen ken tar u Ingila u ngeren akaa ken derianyom u sha puetaankarunyiin, u i yer un ér Syndey Smith yô, yange nger takerada ugen sha kwagh u orgen u lu uma sha ayange a na la ér: “Er a himbir iliam tswen ga yô, ka i doo mbagenev u keghen ato a na shighe u a lu lamen yô.” Sha kpôô yô, shighe u ahuraior ahar a lu ôron kwagh ayol a ve yô, doo u hanmô ve nana zua a ian i ôron kwagh. Or gbe doon u lamen a nan tsô ga, saa nana lu or u keghen ato.

Solomon yange ta icin wener, “Akaaôron kpishi yum la, kwaghbo ban sha mi ga, kpa u nan kusu zwa u nan yô, nan er sha kwaghfan.” (Anz. 10:19) Nahan aluer se mba lamen kpishi ga yô, se palegh u ôron kwagh u tesen lanegh. Sha kpôô yô, “Ibumeor je kpaa, zum u ka nana huan ving yô, i wa nan ken mbafankwagh; zum u nana kusu zwa u nan kpaa i nenge nan er nan ngu orkavenkwagh yô.” (Anz. 17:28) Nahan yô, se eren msen se sônon nen Yehova a ‘kura ityumbuzwaagh yase.’​—⁠Ps. 141:⁠3.

U Huan Ving la Wasen Se u Henen sha Kwagh

Bibilo ôr se kwagh u or u nan dondon gbenda u perapera la ér: “Ka atindi a [Aôndo] nan zeren henen a ken ishima tugh kua tetan kpaa ye.” (Ps. 1:⁠2) Kpa, ka hanma ian jighilii i hembe doon u henen kwagh ken ishima imba ne nahana?

Yange Isaka, wan u tertamen Aberaham, “due za ken akôngo aikighe sha u za henen kwagh.” (Gen. 24:63) Yange tsua u henen kwagh hen shighe u huan kweng yô, shi yem hen ijiir i ayôôso lu ga yô. Lu sha ashighe a mbamkor mba utuuv la Tor Davidi henen kwagh ye. (Ps. 63:⁠6) Yesu u lu or u vough la je kpa, er a kange ishima sha u kuren isharen na i lun tswen shi henen kwagh la yô, yange a undu ayôôso a ikpelaior, a unde sha uwo shin a yem ken taaikyôngo, kua sha ajiir agen a ior luun her ga yô.​—⁠Mat. 14:23; Luka 4:42; 5:⁠16.

Ka a huan ving nahan i doo se iyol. Ayôôso ka a lu hen ikyasen yase ga yô, i doo se u henen sha mbamlu asev, man ka kwagh u hange hange u se hii eren sha ci u sôron uuma asev je la. Ka sea huan yô, ishima kpa i kera nyian se ga. Aluer se mba henen kwagh ken ishima sha ashighe a i huan ving yô, kwagh la una wase se u eren kwagh akuma akuma shi hiden a iyol jime kpaa. Shi una seer wasen se u fan akaa a a hembe lun a injaa ken uma la.

U huan ving la doo, kpa “shighe u lamen” shi ngu. (Orpa. 3:⁠7) Nyian Mbakristu mba mimi mba pasen loho u dedoo u Tartor u Aôndo ‘sha tar cii.’ (Mat. 24:14) Nahan nongo u mbacivir Aôndo ngu huran iuu sha mngee u ior. (Mika 2:12) De se nôngo nen sha afatyô wase cii se kpa se lu nen mbayôôn loho u dedoo u Tartor a ishima i tseen shi se lu mba ôron kwagh u ityom i ageegh i Aôndo. Er se lu eren tom u injaa ne nahan, ieren yase i tese ér se fa er u huan ving la i lu zenaria yô.

[Foto u sha peeji 3]

Shighe u se lu eren mbamkombo yô, doo u se kegh ato shi se hen kwagh kpaa

[Foto u sha peeji 3]

Shighe u se dugh kwaghpasen man se tagher a mbanahantar yô, ka a inja u ungwan ve ato

[Foto u sha peeji 5]

Ka a huan ving yô, i doo se u henen sha kwagh