Ivor I Mimi Ar Sha Ajiir A Icaa

KPENTAR u Tuva ngu vegher u ken imbusutariyan u kpentar u Siberia ken tar u Russia. Tar u Mongolia gema kase Tuva vegher u ken imbusutariyan man sha ityoughkitaregh. Ior kpishi ken kpentar u Tuva mba ken angarem mba kiriki sha ajiir a icaa a i taver u zan a loho u Tartor her yô. Nahan kpa, sha shighe ugen la, ior mough sha ajiir agen ken Tuva za mkohol u tôvon sha akaa ken gartamen u Tuva u i yer ér Kyzyl la. Pania ugen ken gar u Kyzyl, mba yer un ér Maria, gema ungwa kwagh u mkohol u ior zua akpam akpam ne. Nahan a nenge ér mkohol la lu ian i dedoo i una fatyô u za pasen ior mba loho u dedoo u aren a ve hanma shighe ga mbara kwagh yô.

Maria pase kwagh u yange za hemen yô. A kaa wener: “Makeranta u m tesen her la yange u yila ior mkohol u tôvon sha kwagh u msôrom ma hunden man mcimbim ma bov kua ambaakaa la nahan. Nahan lu u iorov mba kuman er 50 nahan vea mough sha ajiir a icaa ken Tuva vea va mkohol ne. Ken a ve yô, lu atica man mbatôvon sha aeren a ior man mba nengen sha kwagh u mkpeyol u mbayev kua mbagenev kpaa.” Maria yange nenge mkohol ne ér ka ian i dedoo i una pase kwagh yô, shi fa ér ka kwagh u ican kpaa. A kaa wener: “M cie ashe kpishi, nahan ka i taver mo u pasen ior kwagh aburabur kpen kpen. Nahan kpa, m er msen hen Yehova mer, a̱ taver mo ishima sha er me cia ashe u za pasen kwagh hen mkohol la ga yô.” Nahan yange fatyô kpa?

Maria za hemen wener: “Yange m zua a magazin u Awake! u a er kwagh u mciem atô kposo kposo yô. M kaa a iyol yam mer, ‘alaghga itinekwagh ne ia doo ma ortôvon kwagh u aeren a ior,’ tsô m tôô magazin shon m za a mi sha makeranta. Sha iyange shon la, tica ugen u va mkohol la yô, nyôr ken afishi a am, nahan m na un magazin la. A ngohol ave ahar. Yange kaa a mo ér un kpa mciem ma ze un iyol. Kpernan yô, m va un a takerada u i yer ér Questions Young People Ask​—⁠Answers That Work, Tihi u sha 1 la. Ungun kpa, a ngohol u ave ahar. Er kwase ne ngohol takerada ne fese yô, ishima kaam ér alaghga atica agen kpa ua doo ve. Tsô m tôô katôn u takerada u Young People Ask la jimin, kua ityakerada igen m za a mi sha makeranta.” Fese je maa i ngohol ityakerada ne bee, katôn hingir gbilin. Maria pase kwagh u yange er yô, wener: “Atica agen a yange tesen vea tica u yange m hii nan un takerada u Young People Ask la va ken afishi am gba va pinen mo ér: ‘Ka han i lu nan ior ityakerada?’ ” Yange ve va hen ijiir i vea zua a i jighilii!

Lu u mkohol la una kure sha iyange i Sati. Maria gema yaren tom sha iyange i Sati ga, nahan a samber ityakerada sha utebul kpishi ken afishi a na. A gema a ver kpande, a nger sha mi ér: “Hen Atica! Ne fatyô u tôôn ityakerada sha ci wen man ahuraior a en. Ityakerada i injaa ne ia wase ne ken tom wen shi ia taver icombor yen asema kpaa.” Nahan nyi i eree? “Yange m hidi m ze ken afishi am sha iyange la yô, m mase nengen a ityakerada kpuaa tseegh. Maa m kar a kar m za va a ityakerada kua umagazin mbagenev.” Sha shighe u mkohol la kure la nahan, Maria na ior umagazin 380 man ityakerada 173 kua ityakerada i kiriki 34. Zum u mba ve va mkohol la hide yem sha ajiir a ve a icaa, ape ve eren ityom ve la yô, ve yem a ityakerada la seer seer. Maria kaa ér, “Saan mo iyol kpishi er ivor i mimi ne i ar sha ajiir a icaa a ken kpentar u Tuva hegen nahan!”​—⁠Orpa. 11:⁠6.

[Foto u tesen ijiir u sha peeji 32]

(Wea soo u nengen a foto u tesen ijiir la yô, nenge ken takerada)

RUSSIA

KPENTAR U TUVA